ក្រុមអង្គការសង្គមស៊ីវិលអាស៊ាន ប្រមាណ ៥០អង្គការ បានបើកវេទិកា និងធ្វើសន្និសីទស្ដីពីលទ្ធផលនៃកិច្ចពិភាក្សាក្នុងរយៈពេល ៣ថ្ងៃ បន្ទាប់ពីពួកគេជំនះនូវឧបសគ្គផ្សេងៗ។
លទ្ធផលនៃការស្រាវជ្រាវ បានបង្ហាញថា ភាពខ្វះចន្លោះនៃសេចក្ដីប្រកាសពង្រាងសិទ្ធិមនុស្សអាស៊ាន នៅតែជាបញ្ហាចោទនៅឡើយ បើទោះរដ្ឋមន្ត្រីក្រសួងការបរទេសកម្ពុជាអះអាងថា ពង្រាងនៃសេចក្ដីប្រកាសសិទ្ធិមនុស្សនោះ បានជជែកជាមួយសង្គមស៊ីវិលអាស៊ានទាំង១០ រួចហើយក៏ដោយ។
លទ្ធផលនៃកិច្ចពិភាក្សាប្រកបដោយឧបសគ្គជាច្រើន បានទទួលផ្លែផ្កាបន្ទាប់ពីមន្ត្រីសង្គមស៊ីវិលព្យាយាមជំនះគ្រប់រូបភាពនៃការរារាំងរបស់អាជ្ញាធរ។
ប្រធានក្រុមអ្នកច្បាប់ការពារសិទ្ធិមនុស្សកម្ពុជា លោក សុខ សំអឿន មានប្រសាសន៍នៅថ្ងៃទី១៦ វិច្ឆិកា ថា លទ្ធផលនៃកិច្ចពិភាក្សាដែលបានសម្រេចនេះ មិនមែនជាការងាយស្រួលឡើយ ដោយលោកអះអាងថា អាជ្ញាធររាជធានីភ្នំពេញ បានព្យាយាមម្ដងហើយម្ដងទៀត ដើម្បីរារាំងកុំឲ្យមានការជួបប្រជុំគ្នារវាងសង្គមស៊ីវិល ដែលមកពីប្រទេសនៃសមាជិកអាស៊ានទាំង១០ តាមរយៈការហាមឃាត់ម្ចាស់ភោជនីយដ្ឋាន និងមជ្ឈមណ្ឌលជួលសម្រាប់ធ្វើពិធីផ្សេងៗ កុំឲ្យជួលកន្លែងដល់ក្រុមការងារ។
តែទោះជាយ៉ាងណា លោកឲ្យដឹងថា កិច្ចពិភាក្សានេះនៅតែអាចសម្រេចជោគជ័យប្រកបដោយផ្លែផ្កា។ អង្គការសង្គមស៊ីវិលមកពីប្រទេសសមាជិកអាស៊ានចំនួន១០ រួមទាំងសហគមន៍អាហ្វ្រិក សហគមន៍អឺរ៉ុប និងតំណាងមកពីសហរដ្ឋអាមេរិក បានលើកយកបញ្ហាអសកម្មមួយចំនួនទាក់ទងនឹងសសរស្ដម្ភទាំងបីរបស់អាស៊ាន ទៅជជែកពិភាក្សា ដែលប្រទេសជាសមាជិកទាំងនោះមិនទាន់បានអនុវត្តឲ្យល្អប្រសើរ។
ប្រធានគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) លោក គល់ បញ្ញា មានប្រសាសន៍ថា ពង្រាងនៃសេចក្ដីប្រកាសសិទ្ធិមនុស្សអាស៊ាន នៅមានចំណុចខ្វះខាតជាច្រើនអន្លើ ដែលមិនទាន់ស្របនឹងច្បាប់សិទ្ធិមនុស្សអន្តរជាតិនោះឡើយ ដូច្នេះសង្គមស៊ីវិលចង់ឲ្យមេដឹកនាំនៃប្រទេសសមាជិកអាស៊ានទាំងអស់ ធ្វើការពិចារណាឡើងវិញលើសេចក្ដីប្រកាសនេះ មុននឹងសម្រេចអនុម័ត។
ឆ្លើយតបនឹងបញ្ហានេះ កាលពីថ្ងៃទី១៥ វិច្ឆិកា ក្នុងឱកាសសន្និសីទមួយ រដ្ឋមន្ត្រីក្រសួងការបរទេសលោក ហោ ណាំហុង មានប្រសាសន៍ថា សេចក្ដីប្រកាសសិទ្ធិមនុស្សអាស៊ាន ត្រូវគេដាក់ឲ្យមានកិច្ចពិភាក្សាជាច្រើនលើករវាងរដ្ឋាភិបាលនៃប្រទេសសមាជិកអាស៊ាន និងសង្គមស៊ីវិលអាស៊ាន ដូច្នេះសេចក្ដីប្រកាសសិទ្ធិមនុស្សនេះ គេជឿថានៅមានភាពខ្វះចន្លោះតិចតួច។ ម្យ៉ាងទៀត លោកអះអាងបន្ថែមថា បើសិនសេចក្ដីប្រកាសសិទ្ធិមនុស្សនេះមិនទាន់ល្អប្រសើរទាំងស្រុងយ៉ាងណាក៏ដោយ ក៏ច្បាប់នេះនឹងត្រូវគេលើកមកពិភាក្សានៅពេលក្រោយទៀតដែរ។
ទោះយ៉ាងណា លោក គល់ បញ្ញា មានប្រសាសន៍ថា សង្គមស៊ីវិលទទួលស្គាល់ថា ខ្លួនពិតជាធ្លាប់ចូលរួមពិភាក្សាលើពង្រាងនៃសេចក្ដីប្រកាសសិទ្ធិមនុស្សអាស៊ាននេះ ប៉ុន្តែអ្នកដែលមានសិទ្ធិជ្រើសរើសក្នុងការសម្រេចដាក់បញ្ចូលខ្លឹមសារនៃកិច្ចពិភាក្សានោះចូលទៅក្នុងពង្រាងនៃសេចក្ដីប្រកាសសិទ្ធិមនុស្សអាស៊ាននោះ គឺរដ្ឋាភិបាលនៃប្រទេសជាសមាជិកអាស៊ានទាំង១០។
ទាក់ទងនឹងពង្រាងនៃសេចក្ដីប្រកាសសិទ្ធិមនុស្សអាស៊ាននេះដែរ ក្រុមអ្នកជំនាញផ្នែកសិទ្ធិមនុស្សនៃអង្គការសហប្រជាជាតិ បានផ្ញើលិខិតដោយចំហមួយនៅថ្ងៃទី១៦ វិច្ឆិកា ទៅមេដឹកនាំនៃប្រទេសសមាជិកសមាគមអាស៊ាន សុំឲ្យធ្វើការពិចារណាឡើងវិញនូវខ្លឹមសារនៃសេចក្ដីប្រកាសសិទ្ធិមនុស្សអាស៊ាននោះ មុននឹងអនុម័ត។
ប្រធានគណៈកម្មាធិការសម្របសម្រួលនៃក្រុមប្រឹក្សាសិទ្ធិមនុស្សអង្គការសហប្រជាជាតិ លោក ម៉ាយខឺល ហ្វស្ទ បានសរសេរក្នុងលិខិតនោះថា ពង្រាងនៃសេចក្ដីប្រកាសសិទ្ធិមនុស្សអាស៊ាន គឺមិនទាន់មានលក្ខណៈស្របនឹងសិទ្ធិមនុស្សអន្តរជាតិនោះឡើយ៕
No comments:
Post a Comment
yes