លោក សម រង្ស៊ី ប្រធានគណបក្ស សង្គ្រោះជាតិ ដ៏មានប្រជាប្រិយភាព
ដើម្បីធានាឱ្យដំណើរការបោះឆ្នោតក្នុងប្រទេសកម្ពុជាប្រព្រឹត្ដទៅដោយភាពសេរី និងយុត្ដិធម៌គួរឱ្យជឿទុកចិត្ដទាមទារឱ្យមានការកែទម្រង់ប្រព័ន្ធបោះឆ្នោតជាពិសេសការបើកច្រកឱ្យលោក សម រង្ស៊ី វិលមកចូលរួមប្រកួតប្រជែងក្នុងការបោះឆ្នោតដោយផ្ទាល់ ។ បើទោះបីជាពេលនេះក្រុមអ្នកកាន់អំណាចបានព្យាយាមតាមគ្រប់មធ្យោបាយ ដើម្បីបំបិទសំឡេងរិះគន់ក៏ដោយ ក៏នៅអំឡុងជំនួបកំពូលអាស៊ាន និងដៃគូសំខាន់ៗចាប់ពីថ្ងៃទី ១៨ ដល់ ថ្ងៃទី ២០ ខែវិច្ឆិកា នេះក្រុមអង្គការ សង្គមស៊ីវិលបាននាំគ្នារៀបចំតាក់តែងញត្ដិដើម្បីដង្ហែយកទៅជូនមេដឹកនាំមហាអំណាច និងអ្នកពាក់ព័ន្ធជាច្រើនទៀតឱ្យជួយសម្របសម្រួលដោះស្រាយវិបត្ដិនយោបាយដែលកំពុងទាល់ច្រកនៅក្នុងប្រទេសកម្ពុជា ។
បើតាមការលើកឡើងរបស់ក្រុមអង្គការសង្គមស៊ីវិលបានឱ្យដឹងថា យ៉ាងហោចណាស់មានសកម្មជនមកពីអង្គការក្រៅរដ្ឋាភិបាលប្រមាណ ៤០០ នឹងទាមទារឱ្យមានការកែទម្រង់ គ.ជ.ប និងប្រព័ន្ធបោះឆ្នោតធ្វើឱ្យមានភាពសេរី និងយុត្ដិធម៌ ដោយមានការចូលរួមប្រកួតប្រជែង ដោយផ្ទាល់ពីលោកប្រធាន សម រង្ស៊ី ព្រោះគេមិនអាចនិយាយបានទេថា ដំណើរការបោះឆ្នោតក្នុងឆ្នាំ ២០១៣ ខាងមុខនេះមានភាពសេរី និងយុត្ដិធម៌ នៅពេលគ្មានការចូលរួមប្រកួតប្រជែងពីសំណាក់មេដឹកនាំគណបក្សប្រឆាំង ។
មានការបញ្ជាក់ទៀតថា ក្រុមអង្គការសង្គមស៊ីវិលជាតិ និងអន្ដរជាតិដែលកំពុងបំពេញការងារក្នុងប្រទេសកម្ពុជានឹងជួបជុំគ្នាថ្ងៃទី ១៣-១៤ ខែវិច្ឆិកា ឆ្នាំ ២០១២ ដើម្បីត្រៀមដាក់ញត្ដិទៅកាន់មេដឹកនាំ ជាន់ខ្ពស់នៃបណ្ដាប្រទេសជាសមាជិកអាស៊ានរួមទាំងមេដឹកនាំសំខាន់ៗមួយចំនួនទៀតជាពិសេសញត្ដិនោះត្រៀមដាក់ជូនប្រធានាធិបតីអាមេរិកលោក បារ៉ាក់ អូ បាម៉ា ដើម្បីជំរុញឱ្យមានការកែទម្រង់លើវិស័យសំខាន់ៗជាច្រើនក្នុងប្រទេសកម្ពុជា ។
តំណាងក្រុមអង្គការសង្គមស៊ីវិលបានបញ្ជាក់ថា សកម្មជនមកពីជាង ៤០០ អង្គការបានជួបប្រជុំគ្នា ដើម្បីពិភាក្សាអំពីផែនការដាក់ញត្ដិជូនមេដឹកនាំអាស៊ាន និងប្រមុខដឹកនាំបណ្ដាប្រទេសមហាអំណាចមួយចំនួនទៀត ដែលបានអញ្ជើញមកកាន់ប្រទេសកម្ពុជាមកចូលរួមជំនួបកំពូលអាស៊ានបូក និងកិច្ចប្រជុំអាស៊ីបូព៌ានៅចុងខែវិច្ឆិកានេះ ហើយប្រធានបទសំខាន់ៗដែលបាន លើកយកមកពិភាក្សាគ្នាមានជាប់ពាក់ព័ន្ធជាមួយបញ្ហាអភិវឌ្ឍន៍ សេដ្ឋកិច្ច បញ្ហាចំណាកស្រុក បញ្ហា សិទ្ធិសេរីភាពរបស់ពលករ ដែលកំពុងទទួលរងនូវការធ្វើទុក្ខបុកម្នេញ។ ពាក់ព័ន្ធនឹងបញ្ហាស្ដ្រីនៅកម្ពុជាក៏ក្រុមអង្គការសង្គមស៊ីវិលទាំងនោះនឹងលើកយកទៅធ្វើការពិភាក្សាអំពីលក្ខខណ្ឌផ្សេងៗដែលពួកគេចេញទៅធ្វើការងារនៅក្រៅប្រទេស និងការធ្វើចំណាកស្រុកទៅរៀបការជាមួយបុរសបរទេស ជាពិសេសបញ្ហាភាពក្រីក្រដែលកំពុងដាក់បន្ទុកទៅលើស្ដ្រីជាមេផ្ទះធ្ងន់ធ្ងរជាងបុរស ។
ក្រុមអង្គការសង្គមស៊ីវិលបាន ទាមទារឱ្យមានច្បាប់ការពារសិទ្ធិស្ដ្រីចំពោះការរំលោភបំពានទាំងឡាយណា ហើយអង្គការសង្គមស៊ីវិល ក៏មិនបានបំភ្លេចអំពីការ រំលោភសិទ្ធិមនុស្សទាក់ទិនជម្លោះដីធ្លី ការបណ្ដេញចេញដោយបង្ខំដែលកំពុងកើតមានយ៉ាងរាលដាល នៅក្នុងប្រទេសកម្ពុជា ព្រោះបញ្ហាសង្គមជាច្រើនបានបន្ដកើតឡើងដោយគ្មានដំណោះស្រាយដែលជាដើមហេតុនាំឱ្យមានភាពក្រីក្រងើបមុខមិនរួច ។ អង្គការសង្គមស៊ីវិលជាតិ និងអន្ដរជាតិដែលកំពុងបំពេញការងារក្នុងប្រទេសកម្ពុជា តែងតែរងនូវការគាបសង្កត់បំបិទសិទ្ធិសេរីភាពនៅពេលដែលពួកគេហ៊ាននិយាយរឿងពិត ធ្វើឱ្យក្រុមអ្នកកាន់អំណាចមិនសប្បាយចិត្ដដូចជាករណីចុងក្រោយនេះមានការបង្កើតច្បាប់គ្រប់គ្រងអង្គការសង្គមស៊ីវិលដែលមានចរិតរឹតត្បិត លើសិទ្ធិសេរីភាពរបស់សកម្មជន ការពារសិទ្ធិមនុស្ស និងសកម្មជន ការពារដីធ្លី ។
រឿងសំខាន់បំផុតដែលមានសរសេរនៅក្នុងញត្ដិនេះ គឺអង្គការសង្គមស៊ីវិលទាមទារឱ្យកែទម្រង់សមាសភាព គ.ជ.ប និងប្រព័ន្ធបោះឆ្នោតធ្វើឱ្យមានភាពសេរី និងយុត្ដិធម៌ ដែលមានការចូលរួមប្រកួតប្រជែងដោយសេរី និងពេញលេញពីសំណាក់គណបក្សប្រឆាំង ជាពិសេសត្រូវតែមានវត្ដមានរបស់ លោក សម រង្ស៊ី មកចូលរួមប្រកួតប្រជែងក្នុងការបោះឆ្នោតនាថ្ងៃទី ២៨ ខែកក្កដា ឆ្នាំ២០១៣ខាង មុខនេះ ។ ត្រង់ចំណុចដែលទាមទារឱ្យមានការកែទម្រង់ប្រព័ន្ធបោះ ឆ្នោត គឺក្រុមអង្គការសង្គមស៊ីវិល ក៏បានភ្ជាប់ទៅនឹងការលើកឡើងរបស់អ្នករាយការណ៍ពិសេសអង្គការសហប្រជាជាតិ គឺលោក សុរិយា ស៊ូប៊ែរឌី ដែលបានដាក់ការទាមទារខ្លាំងបំផុតសុំឱ្យមានការ កែទម្រង់ប្រព័ន្ធបោះឆ្នោត និងការវិលត្រឡប់មកចូលរួមប្រកួតប្រជែងក្នុងការបោះឆ្នោតដោយផ្ទាល់របស់លោកប្រធាន សម រង្ស៊ី ដើម្បីធា នាថាលទ្ធផលបោះឆ្នោតនោះមាន ការទទួលស្គាល់ជាអន្ដរជាតិ ។
មានបញ្ហាជាច្រើនដែលមេដឹកនាំពិភពលោកកំពុងយកចិត្ដទុកដាក់ ពីភាពប្រឈមនៃគ្រោះថ្នាក់ និងការដើរថយក្រោយនៃលទ្ធិប្រជាធិបតេយ្យនៅក្នុងប្រទេសកម្ពុជា ដោយសារការដឹកនាំមិនត្រឹមត្រូវផ្ទុយពីកិច្ចព្រមព្រៀងសន្ដិភាពក្រុងប៉ារីស គឺមិនត្រឹមតែធ្វើឱ្យប្រជាពលរដ្ឋខ្មែររងទុក្ខវេទនាប៉ុណ្ណោះទេ សូម្បីតែធនធានធម្មជាតិរងនូវការ វិនាសហិនហោចគួរឱ្យសោកស្ដាយជាទីបំផុត ។ បញ្ហាសិទ្ធិសេរីភាព គឺជាគោលការណ៍គ្រឹះជួយលើកស្ទួយចំពោះការអនុវត្ដលទ្ធិប្រជាធិបតេយ្យឱ្យមានភាពរឹងមាំនិងរីកចំរើនទៅមុខ ប៉ុន្ដែរយៈកាលកន្លងមកគេសង្កេតឃើញស្ថាប័នជាតិដែលដឹកនាំដោយគណបក្សប្រជាជន កម្ពុជាធ្វើការងារតាមរបៀបជិះសេះលែងដៃដោយបំពានទៅលើគោលការណ៍ច្បាប់ជាតិ និងអន្ដរជាតិ ។ ដូចជាករណីធ្វើទុក្ខបុកម្នេញលើមេដឹកនាំគណបក្សប្រឆាំងហើយរិះរកតាមគ្រប់មធ្យោបាយដើម្បីរារាំងមិនឱ្យ លោក សម រង្ស៊ី វិលមកចូលរួមប្រកួតប្រជែងក្នុងការបោះឆ្នោតឆ្នាំ ២០១៣ ខាង មុខនេះធ្វើឱ្យសហគមន៍អន្ដរជាតិថ្កោលទោសសឹងរាប់ភ្លេចទៅហើយ ប៉ុន្ដែលោក ហ៊ុន សែន នៅតែបន្ដក្រអឺតក្រទមធ្វើមិនដឹងមិនឮចំពោះ សម្ពាធរបស់អន្ដរជាតិដដែល។
លោកប្រធាន សម រង្ស៊ី ធ្លាប់បានផ្ដោតក្ដីសង្ឃឹមយ៉ាងមុតមាំថា វត្ដមានរបស់លោក បារ៉ាក់ អូបាម៉ា មកចូលរួមកិច្ចប្រជុំអាស៊ីបូព៌ានៅ រាជធានីភ្នំពេញចន្លោះថ្ងៃទី១៨-២០ខែវិច្ឆិកាឆ្នាំ២០១២នេះមាន តម្លៃបំផុតសម្រាប់ប្រជារាស្ដ្រខ្មែរ ដែលកំពុងតស៊ូក្នុងបុព្វហេតុទាមទារលទ្ធិប្រជាធិបតេយ្យ និងការគោរពសិទ្ធិមនុស្ស ហើយអាចចាត់ទុកថា ជាការលើកទឹកចិត្ដដ៏ធំមួយសម្រាប់គណបក្សប្រឆាំងក៏ដូចជាក្រុមអង្គការសង្គមស៊ីវិលផងដែរព្រោះលោក អូបាម៉ា នឹងប្រើប្រាស់ដំណើរទស្សនកិច្ចដ៏មានតម្លៃនេះជួយឱ្យមានការកែទម្រង់បញ្ហាសំខាន់ៗ ជាមិនខានឡើយ ។ រឿងដែលក្រុមអង្គការសង្គមស៊ីវិលក៏ដូចជាគណបក្សប្រឆាំងធ្លាប់បានទាមទារឱ្យលោក អូបាម៉ា ដាក់ សម្ពាធទៅលើក្រុមអ្នកកាន់អំណាចឱ្យកែទម្រង់ប្រព័ន្ធបោះឆ្នោត ជាពិសេសបើកច្រកឱ្យលោក សម រង្ស៊ី វិលត្រឡប់មកកាន់ប្រទេសកម្ពុជា វិញដោយសុវត្ថិភាព គេរំពឹងទុកថា លោក បារ៉ាក់ អូបាម៉ា នឹងមិនមើលរំលងពីបញ្ហានេះទេ ។
លោក សម រង្ស៊ី បានបញ្ជាក់ថា សមាជិកសភានៅទូទាំងពិភពលោកបានទាមទារឱ្យមានការកែទម្រង់របៀបដឹកនាំមិនត្រឹមត្រូវរបស់លោក ហ៊ុន សែន ឱ្យស្រប តាមរបត់នយោបាយរបស់ពិភពលោក ហើយលោកជឿជាក់ថា ប្រទេសកម្ពុជាដ៏តូចមួយដែលរស់អាស្រ័យតែលើប្រាក់ជំនួយនិងកម្ចីពីបរទេសមិនអាចបន្ដក្រអឺតក្រទម ធ្វើមិនដឹងមិនឮចំពោះការទាមទាររបស់សហគមន៍អន្ដរជាតិបានយូរតទៅទៀតទេ ។ រឿងសំខាន់បំផុតលោកប្រធាន សម រង្ស៊ី ជឿជាក់ថា សហរដ្ឋអាមេរិកតាមរយៈ លោក អូបាម៉ា ដែលនឹងមកបំពេញទស្សនកិច្ចជាផ្លូវការនៅក្នុងប្រទេសកម្ពុជានឹងប្រើសំឡេងតែមួយដូចការទាមទាររបស់អង្គការសហប្រជាជាតិក្នុងការដាក់សម្ពាធឱ្យក្រុមអ្នកកាន់អំណាចនៅស្រុកខ្មែរកែទម្រង់ប្រព័ន្ធបោះឆ្នោត និងធានាថា ការបោះឆ្នោតក្នុងឆ្នាំ ២០១៣ ខាងមុខនេះមានភាពសេរី យុត្ដិធម៌ គួរឱ្យជឿទុកចិត្ដ ។
លោក សម រង្ស៊ី បានបញ្ជាក់ថា សមាជិកសភានៅទូទាំងពិភពលោកបានទាមទារឱ្យមានការកែទម្រង់របៀបដឹកនាំមិនត្រឹមត្រូវរបស់លោក ហ៊ុន សែន ឱ្យស្រប តាមរបត់នយោបាយរបស់ពិភពលោក ហើយលោកជឿជាក់ថា ប្រទេសកម្ពុជាដ៏តូចមួយដែលរស់អាស្រ័យតែលើប្រាក់ជំនួយនិងកម្ចីពីបរទេសមិនអាចបន្ដក្រអឺតក្រទម ធ្វើមិនដឹងមិនឮចំពោះការទាមទាររបស់សហគមន៍អន្ដរជាតិបានយូរតទៅទៀតទេ ។ រឿងសំខាន់បំផុតលោកប្រធាន សម រង្ស៊ី ជឿជាក់ថា សហរដ្ឋអាមេរិកតាមរយៈ លោក អូបាម៉ា ដែលនឹងមកបំពេញទស្សនកិច្ចជាផ្លូវការនៅក្នុងប្រទេសកម្ពុជានឹងប្រើសំឡេងតែមួយដូចការទាមទាររបស់អង្គការសហប្រជាជាតិក្នុងការដាក់សម្ពាធឱ្យក្រុមអ្នកកាន់អំណាចនៅស្រុកខ្មែរកែទម្រង់ប្រព័ន្ធបោះឆ្នោត និងធានាថា ការបោះឆ្នោតក្នុងឆ្នាំ ២០១៣ ខាងមុខនេះមានភាពសេរី យុត្ដិធម៌ គួរឱ្យជឿទុកចិត្ដ ។
មន្ដ្រីរដ្ឋាភិបាលកំពុងមានការព្រួយបារម្ភផងដែរចំពោះគម្រោងដង្ហែញត្ដិរបស់សកម្មជនមកពី ៤០០ អង្គការជាតិនិងអន្ដរជាតិដែលកំពុងបំពេញការងារក្នុងប្រទេសកម្ពុជា គឺបញ្ហានេះចង់ ឬមិនចង់ វាធ្វើឱ្យប៉ះពាល់ដល់មុខមាត់របស់ក្រុមអ្នកកាន់អំណាចដែលកំពុងក្រអឺតក្រទមធ្វើមិនដឹងមិនឮចំពោះ ការទាមទាររបស់សហគមន៍អន្ដរជាតិ ។ គេមិនច្បាស់ទេថា តើគម្រោងដង្ហែញត្ដិរបស់ក្រុមអង្គ ការសង្គមស៊ីវិលយកទៅជូនប្រមុខដឹកនាំបណ្ដាប្រទេសដែលមកចូលរួមកិច្ចប្រជុំកំពូលក្នុងប្រទេសកម្ពុជា អាចដំណើរការដោយរលូនល្អ ឬយ៉ាងណានោះទេ ប៉ុន្ដែមន្ដ្រីរដ្ឋាភិបាលបានបញ្ជាក់រួចហើយថា ពួកគេមិនបណ្ដែតបណ្ដោយឱ្យមានបាតុភាពអ្វីកើតឡើងនោះទេ អំឡុងជំនួបកំពូលអន្ដរជាតិសំខាន់ៗក្នុង ប្រទេសកម្ពុជា ព្រោះសូម្បីតែសាលារៀនមួយចំនួនក៏ត្រូវបានបិទទ្វារ រយៈពេលជិត១សបា្ដហ៍ផងដែរ ៕
No comments:
Post a Comment
yes