ភ្នំពេញៈក្រុមហ៊ុនធានារ៉ាប់រងអាយុជីវិតមេនូឡាយហ្វ៍(ខេមបូឌា)បានផ្តល់សំណងជាលើកដំបូងបំផុតដល់អតិថិជនរបស់ខ្លួនបន្ទាប់ពីបានបើកដំណើរការផ្តល់សេវានៅកម្ពុជារយៈពេលជាង៦ខែមកនេះ។
លោកលឹមពិសិដ្ឋដែលបានស្លាប់កាលពីចុងខែតុលាដោយសារតែការប៉ុនប៉ងឡើងឲ្យដល់កំពូលភ្នំអេវឺរ៉េសជាជនរងគ្រោះដំបូងក្នុងគម្រោងធានារ៉ាប់រងអាយុជីវិតនៅកម្ពុជា។
ក្រុមហ៊ុនធានារ៉ាប់រងអាយុជីវិតមេនូឡាយហ្វ៍បានប្រតិបត្តិការនៅទីផ្សារកម្ពុជាកាលពីខែមិថុនាដែលគិតមកដល់ពេលនេះទើបតែដំណើរការជាង៦ខែប៉ុណ្ណោះ។
លោករ៉ូប៊ឺតអេលៀតអគ្គនាយកប្រតិបត្តិនិងជានាយកចាត់ការទូទៅនៃក្រុមហ៊ុនមេនូឡាយហ្វ៍បានប្រាប់ភ្នំពេញប៉ុស្តិ៍កាលពីថ្ងៃម្សិលមិញថានេះជាការផ្តល់សំណងលើកដំបូងរបស់ក្រុមហ៊ុនដល់អតិថិជនរបស់ខ្លួន។
ទោះបីយ៉ាងនេះក្តីលោកបានស្នើសុំមិនបញ្ចេញចំនួនទឹកប្រាក់ដែលត្រូវផ្តល់ជូនឪពុកម្តាយរបស់លោកលឹមពិសិដ្ឋនោះទេដោយអះអាងថាជាក្តីបារម្ភពីសុវត្ថិភាពហើយវាជាការងារសម្ងាត់។
លោករ៉ូប៊ឺតអេលៀតក៏បានសោកស្តាយចំពោះការបាត់បង់អតិថិជនម្នាក់នេះផងដែរ។ លោកបានថ្លែងថា៖«ក្នុងនាមអគ្គនាយកប្រតិបត្តិនៃក្រុមហ៊ុនមេនូឡាយហ្វ៍កម្ពុជាយើងសោកស្តាយជាពន់ពេកដោយដឹងថាអ្នកពាក់ព័ន្ធគោលការណ៍របស់យើងបានស្លាប់ខណៈដែលពេលដែលប៉ុនប៉ងធ្វើឲ្យសុបិនរបស់គាត់ក្លាយជាការពិត។យើងបានបញ្ជូនសាររំលែកទុក្ខទៅគ្រួសាររបស់គាត់មិត្តភក្តិនិងសហការីរបស់គាត់»។
លោកបានបន្តថាភ្លាមៗបន្ទាប់ពីមន្ត្រីក្រុមហ៊ុនបានដឹងអំពីការស្លាប់របស់លោកពិសិដ្ឋបុគ្គលិកបានធ្វើការយ៉ាងរហ័សរហួនដើម្បីបញ្ជូនវិកិយប័ត្រទៅកាន់គ្រួសាររបស់គាត់នៅឯខេត្តសៀមរាប។
លោកបានបញ្ជាក់ថា៖ «គាត់ជាអ្នកទី១ដែលយើងបង់ជូនហើយវាសំខាន់ណាស់សម្រាប់អ្នកដែលទិញធានារ៉ាប់រងជីវិតដើម្បីមានទំនុកចិត្ត»។
ក្រុមហ៊ុនមេនូឡាយហ្វ៍មានបំណងទាក់ទាញអតិថិជនចន្លោះពី១ទៅ២លាននាក់នៅក្នុងប្រទេសកម្ពុជាតែការសម្រេចបានគឺអាស្រ័យលើការអប់រំនិងការយល់ដឹងពីសាធារណជន។
លោកលឹមពិសាលបងប្រុសរបស់លោកលឹមពិសិដ្ឋបាននិយាយថាក្រុមហ៊ុនបាននាំយកវិក្កយបត្រទៅកាន់ផ្ទះឪពុករបស់លោកនៅក្នុងខេត្តសៀមរាបដែលប្អូនប្រុសរបស់លោកបានផ្តល់សិទ្ធិឲ្យទទួល។
លោកបានបន្តទៀតថាប្អូនប្រុសរបស់លោកបានទិញធានារ៉ាប់រងកាលពីខែកក្កដាប៉ុន្តែគាត់មិនចាំថាគាត់បង់ប្រាក់ប៉ុន្មានក្នុងមួយឆ្នាំដល់ក្រុមហ៊ុនទេដោយគ្រាន់តែដឹងថាគាត់ទិញរយៈពេល១០ឆ្នាំ។លោកបន្តថា ក្រុមហ៊ុនបានផ្តល់សំណងប្រមាណ១៤០០០ដុល្លារអាមេរិក។
លោកថ្លែងថា៖ «លុយនេះមិនច្រើនទេសម្រាប់ខ្ញុំលុយនេះមិនអាចប្តូរយកជីវិតបានទេ។ប្រសិននៅរស់ប្អូនខ្ញុំអាចរកបានច្រើនជាងនេះ»។លោករ៉ូប៊ឺតអេលៀតមិនបានបញ្ចេញអំពីដំណើរការរីកចម្រើនថ្មីៗទាក់ទងទៅនឹងក្រុមហ៊ុនទេតែលោកបញ្ជាក់ថាលោកនឹងបញ្ចេញនៅក្នុងរបាយការណ៍ប្រចាំឆ្នាំទាំងអស់។
ទោះយ៉ាងនេះក្តីកាលពីចុងខែសីហាលោកDavid Wongប្រធានក្រុមហ៊ុននេះបានប្រាប់ភ្នំពេញប៉ុស្តិ៍ថាមកដល់ចុងខែសីហាក្រុមហ៊ុនទទួលប្រាក់បុព្វលាភចំនួន២ម៉ឺនដុល្លារពីអតិថិជនប្រមាណ១០០នាក់៕
No comments:
Post a Comment
yes