សកម្មភាពវាស់វែងដីដើម្បីបែងចែកកម្មសិទ្ធិជូនប្រជាពលរដ្ឋ នៅក្នុងស្រុកឈូក ខេត្តកំពត ដោយក្រុមនិស្សិតស្ម័គ្រចិត្តចំនួន ២ក្រុម កំពុងធ្វើការងារយ៉ាងសកម្មនៅទីនោះ។
ទន្ទឹមនោះ មានក្រុមប្រជាពលរដ្ឋនៅភូមិតេជោអន្លង់ក្មេងលេង ឃុំតេជោអភិវឌ្ឍន៍ កំពុងបារម្ភខ្លាចក្រុមយុវជនស្ម័គ្រចិត្តមិនវាស់ដីជូនគាត់ ដើម្បីទទួលកម្មសិទ្ធិស្របច្បាប់ ដោយសារមានការជំទាស់ពីអាជ្ញាធរមូលដ្ឋាន។
អ្នកភូមិប្រមាណ ៣០០គ្រួសារ នៅភូមិតេជោអន្លង់ក្មេងលេង ឃុំតេជោអភិវឌ្ឍន៍ ស្រុកឈូក ខេត្តកំពត ផ្នែកខាងត្បូងស្ទឹងអន្លង់ក្មេងលេង ថ្លែងថា អាជ្ញាធរខេត្តកំពត មិនឲ្យក្រុមយុវជនស្ម័គ្រចិត្តចូលវាស់ដីឲ្យពួកគាត់ទេ។
ការចោទនេះ បានធ្វើឡើងនៅថ្ងៃទី៨ ខែវិច្ឆិកា ឆ្នាំ២០១២ ក្រោយពីអាជ្ញាធរខេត្តកំពត បានប្រជុំជាមួយក្រុមយុវជនស្ម័គ្រចិត្ត និងប្រជាពលរដ្ឋឃុំតេជោអភិវឌ្ឍន៍ ពីចំណុចដែលត្រូវវាស់វែងដីក្នុងឃុំនោះ ដោយមិនបានបញ្ជាឲ្យក្រុមយុវជនស្ម័គ្រចិត្តវាស់ដីពួកគាត់នៅប៉ែកខាងត្បូងស្ទឹងឡើយ។
បុរសអ្នកភូមិម្នាក់ឈ្មោះ សុផល ថ្លែងថា គាត់ព្រួយបារម្ភជាខ្លាំងខ្លាចមិនបានកម្មសិទ្ធិដី ព្រោះអាជ្ញាធរបញ្ជាឲ្យក្រុមយុវជនវាស់តែដីនៅខាងជើងស្ទឹងអន្លង់ក្មេងលេង ដោយមិនបានបញ្ជាឲ្យក្រុមយុវជនស្ម័គ្រចិត្តចុះវាស់ដីឲ្យពួកគាត់នៅខាងត្បូងស្ទឹងនោះទេ៖«ដល់ពេលនិស្សិតចុះវាស់វែងដីហ្នឹង ខាងក្រុមអាជ្ញាធរគេថានៅចាំការរៀបចំសិន អត់ឲ្យនិស្សិតចុះវាស់វែងដីឲ្យ វាស់តែមួយចំហៀង»។
លោកស្រី សុភាព ថ្លែងថា ដីពួកគាត់ដែលនៅផ្នែកខាងត្បូងស្ទឹងអន្លង់ក្មេងលេង តាមគាត់សួរទៅ អាជ្ញាធរមូលដ្ឋាន និងមន្ត្រីសុរិយោដី អះអាងថា សាលាខេត្តកាត់ទុកជាដីសង្គមកិច្ចសម្រាប់ធ្វើសួនច្បារទៅវិញ។ ទើបពួកគាត់បារម្ភខ្លាចអត់មានដីរស់នៅ និងដាំដំណាំ៖ «ពេលដីភូមិនៅសល់ ២០អារជាង ឥឡូវគេថាគេមិនចុចឲ្យ គេថាគេធ្វើសួន»។
អ្នកភូមិម្នាក់ទៀត លោក វុធី អាយុ ៣២ឆ្នាំ ថ្លែងថា ដីនៅខាងត្បូងស្ទឹងអន្លង់ក្មេងលេង នេះ កាលពីឆ្នាំ២០០៧ មានការរំលោភដីពីអាជ្ញាធរ ដោយដុតផ្ទះបណ្ដេញប្រជាពលរដ្ឋ និងចាប់មនុស្សដាក់គុកបង្ខំឲ្យចេញពីដី។ ក្រោយព្រឹត្តិការណ៍នោះ ប្រជាពលរដ្ឋបានបោះតង់រស់នៅ។ ប្រសិនអាជ្ញាធរមិនឲ្យយុវជនស្ម័គ្រចិត្តវាស់ដីឲ្យគាត់មានកម្មសិទ្ធិកាន់កាប់ដីស្របច្បាប់ទេ គាត់គ្មានជម្រក និងដីដាំដុះឡើយ ព្រោះគាត់បានកើតក្រោយរដ្ឋាភិបាលចែកដីជូនប្រជាពលរដ្ឋ កាលពីទសវត្សឆ្នាំ១៩៩៤៖ «ព្រោះខ្ញុំក្រ វាទីទ័លពេក ហើយដីហ្នឹងវាដីនៅទំនេរ។ កាលនោះ ខ្ញុំមកនាំគ្នារុករានជាដីឧទ្យានជាតិបូកគោ ហ្នឹង ហើយសម្ដេចបានកាត់ដីចេញពីឧទ្យានជាតិបង្កើតបានជាភូមិថ្មី ឃុំថ្មីហ្នឹង»។
ថ្លែងស្រដៀងគ្នាដែរ ស្ត្រីសុំមិនបញ្ចេញឈ្មោះ អះអាងថា គ្រួសារវ័យក្មេងមានអាយុក្រោម ៣០ឆ្នាំ សុទ្ធតែកសាងគ្រួសារក្រោយការចែកដីរបស់រដ្ឋាភិបាល ទើបពួកគាត់គ្មានដីដាំដុះ និងដីលំនៅឋាន ខ្លះក៏បានចាប់យកដីក្នុងស្រុកឈូក នេះរស់នៅ ព្រោះជាដីដែលទំនេរ មិនទាន់ជាកម្មសិទ្ធិរបស់នរណាច្បាស់លាស់ ក្រោយការធ្វើសមាហរណកម្ម៖ «ឲ្យសម្ដេចជួយពួកនាងខ្ញុំហ្នឹង ឲ្យនិស្សិតចុះវាស់ដីឲ្យពួកនាងខ្ញុំផង»។
ឆ្លើយតបការបារម្ភរបស់ប្រជាពលរដ្ឋច្រើនរយគ្រួសារ នៅភូមិតេជោអន្លង់ក្មេងលេង ផ្នែកខាងត្បូងស្ទឹងអន្លង់ក្មេងលេង មេភូមិ គឺលោក ទឹម ហុង ថ្លែងបញ្ជាក់ថា អ្នកភូមិនឹងទទួលបានប្លង់កម្មសិទ្ធិដីគ្រប់គ្រួសារ។ ប៉ុន្តែដោយសារកម្លាំងយុវជនស្ម័គ្រចិត្តមានតែ ២ក្រុម និងមន្ត្រីសុរិយោដីមានគ្នាតិច ទើបការវាស់ដីបានធ្វើជាដំណាក់កាល។ បច្ចុប្បន្ន ក្រុមយុវជនស្ម័គ្រចិត្តទើបវាស់ដីដែលអាជ្ញាធរបានរៀបចំដីជាដីដែលមានប័ណ្ណកម្មសិទ្ធិពីមុនរួចរាល់នោះ ឲ្យបានកម្មសិទ្ធិស្របច្បាប់សិន គឺដីនៅផ្នែកខាងជើងស្ទឹង។ ចំណែកអ្នករស់នៅខាងត្បូងស្ទឹង ក្រុមយុវជននឹងវាស់ជូនបន្តទៀត បន្ទាប់ពីវាស់ដីអ្នកនៅខាងជើងស្ទឹងរួច។ លោកថា អាជ្ញាធរនឹងប្រគល់ដីជូនពលរដ្ឋគ្រប់គ្នា ព្រោះជាគោលនយោបាយរបស់រាជរដ្ឋាភិបាល គឺធ្វើយ៉ាងណាឲ្យប្រជាពលរដ្ឋបានកម្មសិទ្ធិដីមុនការបោះឆ្នោតឆ្នាំ២០១៣៕
No comments:
Post a Comment
yes