ទិដ្ឋភាពស្ងប់ស្ងាត់នៅមាត់ទន្លេមុខវាំង ដោយសារតែពិធីបុណ្យអំទូកត្រូវបាន
រដ្ឋាភិបាលលុបចោល
ដូចឆ្នាំមុនដែរ នៅឆ្នាំនេះ ពិធីបុណ្យអុំទូក ត្រូវបានរដ្ឋាភិបាល សម្រេចលុបចោល មិនរៀបចំពិធីប្រពៃណីប្រចាំឆ្នាំ នៅមុខព្រះបរមរាជវាំង ក្នុងទីក្រុងភ្នំពេញឡើយ។ មូលហេតុ មកពីព្រះមហាវីរក្សត្រ សម្តេចព្រះ នរោត្តម សីហនុ ទើបតែយាងចូលព្រះទិវង្គត កាលពីថ្ងៃទី១៥ ខែតុលា ឆ្នាំ២០១២ ក្នុងព្រះជន្ម ៩០ ព្រះវស្សា។ព្រះបរមសពរបស់ព្រះអង្គ ត្រូវបានតម្កល់ធ្វើបុណ្យ នៅក្នុងព្រះបរមរាជវាំង រហូតដល់ថ្ងៃទី៤ ខែកុម្ភៈ ឆ្នាំ២០១៣ ទើបថ្វាយព្រះភ្លើង បូជា។ នៅតាមបណ្តាខេត្តនានា ក៏ត្រូវបានអាជ្ញាធរ អះអាងថា មិនមានរៀបចំពិធីបុណ្យអុំទូកអ្វីឡើយ។ ដោយឡែកអ្នកទេសចរ បានបន្តចូលមកទស្សនាទីក្រុងភ្នំពេញ។ រីឯប្រជាពលរដ្ឋនៅភ្នំពេញមួយចំនួន បានចេញទៅកំសាន្តនៅក្រៅប្រទេស និងតាមរមណីយដ្ឋានក្នុងស្រុក។
រដ្ឋាភិបាល បានសម្រេចលុបចោល ការរៀបចំពិធីបុណ្យអុំទូក ២ ឆ្នាំ ជាប់ៗគ្នា។ មូលហេតុ មកពីគ្រោះទឹកជំនន់ នៅឆ្នាំ២០១១ ហើយនៅឆ្នាំ២០១២នេះ ដោយសារតែការយាងចូលទិវង្គតរបស់ព្រះមហាវីរក្សត្រ សម្តេចព្រះ នរោត្តម សីហនុ។
នៅថ្ងៃទី២៧ ខែវិច្ឆិកា ឆ្នាំ២០១២ ដែលជាថ្ងៃទី១ នៃពិធីបុណ្យអុំទូក ទិដ្ឋភាពនៅជួរមាត់ទន្លេ ក្នុងទីក្រុងភ្នំពេញ ពេលព្រឹក មានសភាពស្ងប់ស្ងាត់។ ផ្លូវជុំវិញព្រះបរមរាជវាំង ប៉ូលិសនៅតែបន្តដាក់របាំងបិទចរាចរណ៍។ តែពេលរសៀល និងពេលល្ងាចមានប្រជាពលរដ្ឋជាច្រើននាក់បានទៅកាន់មុខព្រះបរមរាជវាំង ដើម្បីអុជធូប ថ្វាយផ្កា គោរពព្រះវិញ្ញាណក្ខន្ធសម្តេចព្រះមហាវីរក្សត្រ សម្តេចព្រះ នរោត្តម សីហនុ។
តាមជួរមាត់ទន្លេ គឺមិនមានការរៀបចំស្តង់លក់ទំនិញអ្វីឡើយ។ ប៉ុន្តែនៅកោះពេជ្រ មានស្តង់ទំនិញតិចតួច បានបើកទ្វារ នៅថ្ងៃទី២៧វិច្ឆិកានេះ។ ឆាកតន្ត្រីសម្រាប់ឃោសនាពីរកន្លែង ត្រូវបានគេរៀបចំឡើង។ ក៏ប៉ុន្តែអាជ្ញាធរ មិនអនុញ្ញាតឲ្យប្រគុំតន្ត្រីអធិកអធមឡើយ។
ស្តង់លក់ទំនិញបញ្ចុះតម្លៃ ក៏ត្រូវក្រុមហ៊ុនលក់ផលិតផលនានា ដូចជា ឧបករណ៍អេឡិចត្រូនិក គ្រឿងអគ្គិសនី ទូរទឹកកក និងទូរទស្សន៍ ជាដើម បានដាក់លក់ នៅមុខហាង តាមដងផ្លូវនានា ក្នុងទីក្រុងភ្នំពេញ តែមិនមានច្រើនទេ។
យ៉ាងណាក៏ដោយ បើទោះបីជាព្រះរាជពិធីបុណ្យអុំទូក មិនត្រូវបានគេរៀបចំ នៅមុខព្រះបរមរាជវាំងក៏ដោយ តែហាងទំនិញ និងកន្លែងធ្វើការរបស់ក្រុមហ៊ុនឯកជន ព្រមទាំងមន្ទីរស្ថាប័នរដ្ឋ និងសាលារៀន ត្រូវបានបិទទ្វារ ក្នុងរយៈពេល ៣ថ្ងៃ គិតចាប់ពីថ្ងៃទី២៧ ដល់ថ្ងៃទី២៩ ខែវិច្ឆិកា ឆ្នាំ២០១២ ។
ចំណែកអ្នកទេសចរ នៅតែបន្តចូលមកកាន់ទីក្រុងភ្នំពេញ ទោះជាមិនមានពិធីបុណ្យអុំទូក នៅឆ្នាំនេះក៏ដោយ។ នេះបើតាមការបញ្ជាក់របស់លោក អាង គឹមអ៊ាង ប្រធានសមាគមទីភ្នាក់ងារទេសចរណ៍កម្ពុជា។
លោក អាង គឹមអ៊ាង បានមានប្រសាសន៍ថា "ជាធម្មតា ភ្ញៀវ ដែលមកទស្សនាបុណ្យអុំទូក គាត់មិនមែនមកទស្សនាតែបុណ្យអុំទូកតែមួយទេ។ គាត់មកទស្សនារួមគ្នានូវរមណីយដ្ឋានដ៏ល្បីល្បាញរបស់ខ្មែរយើង នៅរាជធានីភ្នំពេញផងដែរ ដូចជា ព្រះបរមរាជវាំង វត្តភ្នំ សារមន្ទីរ ជាដើម។ អ៊ីចឹងបើទោះជាយើងមានការលុបចោលបុណ្យអុំទូក (នៅមុខព្រះបរមរាជវាំង នៅឆ្នាំនេះ) ក៏មិនមានការប៉ះពាល់ទេ ព្រោះអ្នកទេសចរ គាត់មិនបានទស្សនាបុណ្យអុំទូកក៏ពិតមែន តែគាត់អាចទស្សនារមណីយដ្ឋានធំៗផ្សេងៗទៀត"។
លោក អាង គឹមអ៊ាង បានបន្ថែមថា ប្រជាពលរដ្ឋខ្មែរ ពិសេសអ្នករស់នៅទីក្រុងភ្នំពេញ នៅថ្ងៃឈប់សម្រាកនេះ បានចេញទៅលេងនៅរមណីយដ្ឋានក្នុងស្រុក និងធ្វើដំណើរចេញទៅក្រៅប្រទេស។
ជាការកត់សម្គាល់ ការសម្រេចផ្អាក មិនរៀបចំព្រះរាជពិធីបុណ្យអុំទូកពីរឆ្នាំជាប់ៗគ្នានេះ ក្រោយពីកើតមានព្រឹត្តិការណ៍ដ៏សោកនាដកម្ម កាលពីយប់ថ្ងៃទី៣ នៃពិធីបុណ្យអុំទូក ថ្ងៃទី២២វិច្ឆិកា ឆ្នាំ២០១០ នៅកោះពេជ្រ ដែលមានមនុស្សស្លាប់យ៉ាងហោចណាស់ ៣៥៣ នាក់ និងរងរបួសជាង ៤០០ នាក់ផ្សេងទៀត ដោយសារតែការផ្អើលរត់ជាន់គ្នា៕
No comments:
Post a Comment
yes