គេនៅតែមានការងឿងឆ្ងល់យ៉ាងខ្លាំងចំពោះសកម្មភាពដែលសមត្ថកិច្ចចម្រុះរួមមាននគរបាលសេដ្ឋកិច្ចក្រសួងមហាផ្ទៃ និងមន្ដ្រីជំនាញនៅខេត្ដពោធិ៍សាត់ ដែលបានឃាត់ចាប់រថយន្ដដឹកជញ្ជូនទំនិញរបស់ក្រុមហ៊ុន ថុងហួត ដែលទើបប្ដូរឈ្មោះមកពីក្រុមហ៊ុនព្រះអាទិត្យ កាលពីថ្ងៃទី១៨ ខែវិច្ឆិកា ឆ្នាំ២០១២ ដែលទីបញ្ចប់រកមិនឃើញអ្វីជាដុំកំភួននោះទេអាចចាត់ទុកថា ប្រតិបត្ដិការនោះជាប្រភេទក្បាលដំរីកន្ទុយកណ្ដុរដែលគេសង្ស័យថា ប្រធានក្រុមហ៊ុនថុងហួត មានអំណាច និងឥទ្ធិពលអាចបំបិទសំណុំរឿងមួយនេះមិនឱ្យរាលដាលក្លាយជារឿង ស្មុគស្មាញវែងឆ្ងាយ ។
បើតាមមន្ដ្រីតូចតាចមួយចំនួនបានឱ្យដឹងថា ករណីឃាត់រថយន្ដដឹកទំនិញរបស់ក្រុមហ៊ុនថុងហួតនៅចំណុចផ្លូវជាតិលេខ៥ ក្នុងភូមិស្វាយបេការ៉ង ភូមិត្រញំងរំដេញ ឃុំក្បាលត្រាច ស្រុកក្រគរ ខេត្ដពោធិ៍សាត់ ដឹកនាំដោយនគរបាល ប្រឆាំងបទល្មើសសេដ្ឋកិច្ចក្រសួងមហាផ្ទៃ បន្ទាប់ពីស៊ើបអង្កេតដឹងថា រថយន្ដដឹកទំនិញនោះប្រើប្រាស់ស្លាកលេខក្លែងក្លាយ ហើយក្រដាសពន្ធដឹកទំនិញហួសសុពលភាព ពោលគឺករណីចាប់ឃាត់រថយន្ដនេះមើលទៅទំនងខ្លាំងណាស់ មានឯកសារភស្ដុតាងគ្រប់គ្រាន់ អស់ហើយគឺអាចប្រមូលចំណូលជូនជាតិគួរឱ្យចាប់អារម្មណ៍។
ប៉ុន្ដែវាជារឿងគួរឱ្យអាម៉ាស់បំផុតគ្រាន់តែចាប់ឃាត់រថយន្ដដឹកទំនិញមិនប្រក្រតីនេះបានភ្លាមក៏ស្រាប់តែមានទូរស័ព្ទទ្រហឹងពីភ្នំពេញទៅកាន់មន្ដ្រីពាក់ព័ន្ធក្នុងខេត្ដពោធិ៍សាត់ ដែលមន្ដ្រីតូចតាចខ្លះធ្លោយឱ្យដឹងថា ក្រុមហ៊ុន ថុងហួត នេះមានខ្នងបង្អែករឹងមាំធ្វើឱ្យសមត្ថកិច្ចដែលចាប់ឃាត់រថយន្ដនោះភ័យស្ទើរលស់ព្រលឹង ប៉ុន្ដែចុងបញ្ចប់នៃប្រតិបត្ដិការគេដឹងថា ក្រុមហ៊ុន ថុងហួត បានសម្របសម្រួលជាមួយសមត្ថកិច្ច ដើម្បីទប់ស្កាត់កុំឱ្យមានរឿងវែង ឆ្ងាយកាន់តែស្មុគស្មាញ ។
មានការបញ្ជាក់ផងដែរថា រថយន្ដរបស់ក្រុមហ៊ុន ថុងហួត ដែលត្រូវបានចាប់ឃាត់នោះមានប្រើប្រាស់ស្លាកលេខមិនប្រក្រតី គឺខាងមុខលេខផ្សេង ហើយនៅខាងក្រោយលេខផ្សឹងមានដឹក សម្ភារៈដូចជាចំណីសត្វ កែវជ័រ រួមនឹងសម្ភារៈចម្រុះជាច្រើនមុខទៀត ដោយមានលិខិតស្នាមបង់ពន្ធអាកររបស់គយ ផុតសុពលភាពត្រឹមថ្ងៃទី១៦-១៧ខែវិច្ឆិកា ឆ្នាំ២០១២ ហើយមិនបានប៉ុន្មាន ផងសមត្ថកិច្ចបានដណ្ដើមគ្នាយករថយន្ដដឹកទំនិញមិនប្រក្រតីនេះទៅរក្សាទុកបង្កើតឱ្យមានជម្លោះ គឺមិនបានប៉ុន្មានផងរថយន្ដដឹកទំនិញមិនប្រក្រតីនោះត្រូវបានដោះលែងទៅវិញយ៉ាងរំភើយ ។ មន្ដ្រីតូចតាចមួយចំនួនបានបង្ហើបឱ្យដឹងថា យោងតាមមាត្រា៧៧ នៃច្បាប់ស្ដីពីចរាចរណ៍ផ្លូវគោកបានបញ្ជាក់ច្បាស់ណាស់ថា ជនដែលក្លែងស្លាកលេខរថយន្ដអាចនឹងត្រូវផ្ដន្ទាទោសដាក់ពន្ធនាគារ ចាប់ពី២ឆ្នាំដល់៥ឆ្នាំ និងពិន័យជាប្រាក់៤លានរៀលទៅ១០លាន រៀលដោយគ្មានករណីលើកលែង។
នេះគិតតែបទល្មើសនៃការប្រើប្រាស់ស្លាកលេខក្លែងក្លាយប៉ុណ្ណោះ មិនទាន់រាប់បញ្ចូលនូវការដឹកទំនិញមិនប្រក្រតី ក៏ដូចជាការប្រើប្រាស់ក្រដាសពន្ធហួសសុពលភាពផងទេ ដូច្នេះមិនគួរណាប្រតិបត្ដិការបង្ក្រាបរថយន្ដដឹកទំនិញមិនប្រក្រតីរបស់ក្រុមហ៊ុនថុងហួត មិនមានអ្វីជាដុំកំភួន ធ្វើឱ្យមន្ដ្រីមួយចំនួនអស់សំណើច និងខកចិត្ដយ៉ាងខ្លាំង ។ សូមរំលឹកថា ក្រុមហ៊ុន ថុងហួត អតីតក្រុមហ៊ុន ព្រះអាទិត្យបានប្រកបសេវាកម្មដឹកជញ្ជូនទំនិញឱ្យក្រុមឈ្មួញតាមផ្លូវជាតិលេខ ៥ អស់រយៈពេលជិត ២០ ឆ្នាំមកហើយ គឺភាគច្រើនទំនិញមានភាពមិនប្រក្រតីធ្វើឱ្យខាតបង់ចំណូលថវិកាជាតិ ដូចជាករណីរថយន្ដដែលត្រូវបានឃាត់ ចាប់នេះ គឺមានការប្រើប្រាស់ស្លាកលេខក្លែងក្លាយអស់រយៈ ពេលជាង ១០ ឆ្នាំមកហើយគ្មាននរណាហ៊ានប៉ះពាល់ទេ ។
អគ្គនាយកគយ និងរដ្ឋាករគួរតែចាប់អារម្មណ៍ពីករណីក្រុមហ៊ុន ថុងហួត ដែលរកស៊ីដឹកជញ្ជូនទំនិញមិនប្រក្រតីជាបន្ទាន់ ដើម្បីតាមដានមើលថាតើចំណូលពន្ធត្រូវខាតបង់ក្នុងកម្រិតណា ចំពោះសេវាដឹកជញ្ជូនទំនិញតាមផ្លូវជាតិលេខ ៥ របស់ក្រុមហ៊ុន ថុងហួត ព្រោះច្រើនឆ្នាំមកហើយគេសង្កេតឃើញថា អ្នករត់ការរបស់ក្រុមហ៊ុនថុងហួតមានជំនាញចាយ ប្រាក់ដើម្បីបិទបាំងកំហុសឆ្គងរបស់ខ្លួនមិនដែលរងនូវការបង្ក្រាបពីសមត្ថកិច្ចម្ដងណាឡើយ ។ ក្រុមអ្នករកស៊ីដឹកជញ្ជូនទំនិញមួយ ចំនួនបានឱ្យដឹងថា ក្រុមហ៊ុន ថុងហួត ប្រកបសេវាដឹកជញ្ជូនទំនិញឱ្យក្រុមឈ្មួញឡើងដុះស្លែទៅ ហើយកន្លុកកន្លៀតត្រង់ណាដែលត្រូវចុះបង់លុយ ក៏ក្រុមអ្នករត់ការរបស់ក្រុមហ៊ុននេះមិនដែលរំលងឡើយ ហើយសម្រាប់មន្ដ្រីធំៗ សុទ្ធតែមានចំណែកដែលប្រធានក្រុមហ៊ុនថុងហួតឧបត្ថម្ភជាប់ជាប្រចាំ ។ សមត្ថកិច្ច ជាពិសេសមន្ដ្រីជំនាញគយ នគរបាល សេដ្ឋកិច្ច សុទ្ធតែទទួលបានផលប្រយោជន៍ពីការដឹកជញ្ជូនទំនិញ មិនប្រក្រតីរបស់ក្រុមហ៊ុន ថុងហួត រាប់សិបឆ្នាំមកហើយទើបអ្វីៗ អាចដំណើរការដោយរលូនល្អ ទើបតែកាលពីព្រឹកថ្ងៃទី១៨ ខែ វិច្ឆិកាកន្លងទៅនេះស្រាប់តែមាន កម្លាំងចម្រុះ រួមមានព្រះរាជ អាជ្ញាផងដែរមកចាប់ឃាត់រថយន្ដ របស់ក្រុមហ៊ុនថុងហួតដើម្បីត្រួត ពិនិត្យបានតែមួយដង្ហើមចង្រិត ប៉ុណ្ណោះក៏ដោះលែងទៅវិញ ៕
No comments:
Post a Comment
yes