ប្រជាពលរដ្ឋរស់នៅតាមបន្ទាត់ព្រំដែនខេត្តមណ្ឌលគិរី កំពុងព្រួយបារម្ភពីសុវត្ថិភាពក្នុងការរស់នៅ បន្ទាប់ពីពួកគេបានផ្តល់ព័ត៌មានលើករណីប្រទេសវៀតណាម លួចរំកិលតម្រុយបង្គោលកំណត់ខ្សែបន្ទាត់ព្រំដែនគោក រំលោភចូលក្នុងទឹកដីកម្ពុជា រាប់គីឡូម៉ែត្រចាប់តាំងពីក្រោយឆ្នាំ១៩៧៩។
យុវជន ចន្ទ វណ្ណា ជាឈ្មោះហៅក្រៅរបស់ជនជាតិដើមភាគតិចព្នង រស់នៅស្រុកអូរាំង ខេត្តមណ្ឌលគិរី។ លោកបានឲ្យដឹងនៅថ្ងៃទី២៣ ខែវិច្ឆិកា ថា ពួកគេមិនហ៊ាននិយាយចេញមុខលើបញ្ហាជនជាតិវៀតណាម រំកិលបន្ទាត់ព្រំដែនក្នុងមូលដ្ឋានខ្លួនទេ។ លោកបន្តថា សព្វថ្ងៃនេះមានពលរដ្ឋខ្មែរ និងអាជ្ញាធរមូលដ្ឋានខ្លះ បានលក់ឧត្តមគតិស៊ីឈ្នួលស៊ើបការណ៍ ឬផ្តល់ព័ត៌មានជុំវិញបញ្ហាព្រំដែន និងបញ្ហាផ្សេងៗទៀត ទៅឲ្យអាជ្ញាធរវៀតណាម ជាថ្នូរទទួលបានថវិកាប្រចាំខែ។ លោកឲ្យដឹងទៀតថា អាជ្ញាធរមូលដ្ឋានបានរឹតបន្តឹងសេរីភាពបញ្ចេញមតិលើបញ្ហាព្រំដែន ហើយជានិច្ចកាល ពលរដ្ឋត្រូវបានអាជ្ញាធរគំរាមកំហែង និងព្រមានចាប់ដាក់គុកច្រវាក់ថែមទៀត។
ពលរដ្ឋស្រុកអូរាំង បានអះអាងដូចៗគ្នាថា ប្រទេសវៀតណាម ពិតជាបានរំកិលតម្រុយបង្គោលព្រំដែនរំលោភចូលក្នុងទឹកដីកម្ពុជា ក្នុងខេត្តមណ្ឌលគិរី ក្រោយឆ្នាំ១៩៧៩ នៅគ្រាប្រទេសទាំងពីរមិនទាន់បោះកំណត់បង្គោលព្រំដែនគោករួមគ្នានៅឡើយនោះ។
មនុស្សវ័យជាង ៧០ឆ្នាំ ជនជាតិព្នង រស់នៅខេត្តមណ្ឌលគិរី បានឲ្យដឹងដែរថា ពលរដ្ឋក្នុងមូលដ្ឋាននេះត្រូវបានអាជ្ញាធរដើរស្រង់ឈ្មោះ បន្ទាប់ពីពួកគេស៊ើបដឹងថា បានផ្តល់ព័ត៌មានលើបញ្ហាវៀតណាម រំកិលព្រំដែនចូលទឹកដីប្រទេសកម្ពុជា ឲ្យអ្នកយកព័ត៌មានដឹង និងផ្សព្វផ្សាយប៉ុន្មានថ្ងៃមកនេះ។
ទោះយ៉ាងណា មន្ត្រីសាលាខេត្តមណ្ឌលគិរី បានបដិសេធន៍មិនផ្តល់អត្ថាធិប្បាយចំពោះសំណួរជុំវិញប្រទេសវៀតណាម បង្ខិតព្រំដែនដែលពលរដ្ឋអះអាងថា បានរំលោភចូលទឹកដីកម្ពុជា ទេ នៅថ្ងៃសុក្រ ទី២៣ ខែវិច្ឆិកា។
ប៉ុន្តែ លោក ក្រួច ឆេង នាយប៉ុស្តិ៍ព្រំដែនពូជូ ស្រុកអូរាំង ខេត្តមណ្ឌលគិរី ត្រូវបានពលរដ្ឋជនជាតិព្នង ដកស្រង់សម្ដីមកបញ្ជាក់ថា លោកដឹងឮលើករណីនេះដែរ ប៉ុន្តែមន្ត្រីរូបនេះគ្មានការភ្ញាក់ផ្អើលនោះទេ។
រដ្ឋាភិបាលកម្ពុជា គ្រោងបោះកំណត់បង្គោលព្រំដែនគោកជាមួយវៀតណាម ឲ្យចប់ជាស្ថាពរត្រឹមឆ្នាំ២០១២ ប៉ុន្តែពេលនេះ មន្ត្រីព្រំដែនបញ្ជាក់ថាអាចត្រូវពន្យារដល់ឆ្នាំ២០១៣។
ទាក់ទិនបញ្ហានេះ លោក រ៉ុង ឈុន តំណាងក្រុមប្រឹក្សាឃ្លាំមើលព្រំដែនកម្ពុជា បានថ្កោលទោសទង្វើរបស់សមត្ថកិច្ចខេត្តមណ្ឌលគិរី ដែលគំរាមប្រជាពលរដ្ឋដែលហ៊ានសម្ដែងមតិលើបញ្ហាប្រទេសជិតខាងរំលោភឈ្លានពានទឹកដីកម្ពុជា។ ផ្ទុយទៅវិញ លោកថាអាជ្ញាធរគួរលើកទឹកចិត្តពលរដ្ឋដែលហ៊ានលើកយកបញ្ហាមកពិភាក្សា និងរួមគ្នាការពារ។
បង្គោលព្រំដែនគោកខេត្តមណ្ឌលគិរី រដ្ឋាភិបាលកម្ពុជា និងវៀតណាម មិនទាន់បានឯកភាពបោះឲ្យបានរួចរាល់នៅឡើយទេ។
បញ្ហានេះ លោក វ៉ា គឹមហុង ប្រធានគណៈកម្មាធិការព្រំដែនកម្ពុជា ធ្លាប់បញ្ជាក់ថា បង្គោលដែន ឬតម្រុយព្រំដែនគោកកម្ពុជា-វៀតណាម រដ្ឋាភិបាលមិនមែនចេះតែបោះទៅតាមការចង្អុលបង្ហាញរបស់ភាគីវៀតណាម ដូចមន្ត្រីគណបក្សប្រឆាំង ឬសង្គមស៊ីវិលខ្លះចោទទេ។ លោកថា ការងារនេះរដ្ឋាភិបាលមានការថ្លឹងថ្លែង និងពិនិត្យដល់ទីបំផុតមុននឹងចាប់អនុវត្តការងារនេះ។
បង្គោលកំណត់ព្រំដែនគោកកម្ពុជា-វៀតណាម សរុបមានចំនួន ៣៧៥បង្គោល។ ដើមឡើយ លោកទេសរដ្ឋមន្ត្រី វ៉ា គឹមហុង បានបញ្ជាក់ថា រដ្ឋាភិបាលគ្រោងនឹងបោះឲ្យរួចជាស្ថាពរនៅត្រឹមឆ្នាំ២០១២ ប៉ុន្តែពេលនេះ លោកថាទំនងជាត្រូវពន្យារដល់ឆ្នាំ២០១៣ ដោយសារមន្ត្រីជំនាញត្រូវការពេលវេលាពិនិត្យបញ្ហានេះឲ្យបានល្អិតល្អន់៕
No comments:
Post a Comment
yes