រហូតមកទល់នឹងពេលនេះ មនុស្សនៅតែមិនអស់ចិត្ត ពោលគឺភ័យខ្លាចចំពោះពាក្យចចាមអារ៉ាមដែលថាពិភពលោកនឹងរលាយនៅថ្ងៃទី២១ ខែធ្នូ ឆ្នាំ ២០១២ ស្អែកនេះ រហូតដល់ម្នាក់ៗនាំគ្នាសំរុកទូរស័ព្ទទៅកាន់អង្គការណាសា (NASA) ។ ក្នុងមួយថ្ងៃៗ ណាសាទទួលការការហៅចូលតាមទូរស័ព្ទជិត ៣០០ នាក់ឯណោះ ដោយមិនគិតតាមអ៊ីមែល ក្នុងរយៈពេលប៉ុន្មានសប្ដាហ៍ចុងក្រោយនេះ។
អាស្រ័យហេតុនេះ ណាសាបានបញ្ចេញសំណួររបស់អ្នកហៅចូល និងចម្លើយសំខាន់ៗ និងវីដេអូឃ្លិបមួយ “Why didn’t the world end yesterday”ដើម្បីបំភ្លឺពាក្យចចាមអារ៉ាមទាំងនោះ។
តើមានការគំរាមកំហែងណាមួយមកលើផែនដីទេនៅឆ្នាំ ២០១២នេះ? គេហទំព័រជាច្រើនសុទ្ធតែនិយាយថា ពិភពលោកនឹងរលាយនៅខែធ្នូ ឆ្នាំ ២០១២។
ចម្លើយ៖ ពិភពលោកនឹងមិនរលាយនោះឡើយនៅឆ្នាំ ២០១២ នេះ។ ភពយើងស្ថិតក្នុងស្ថានភាពល្អដដែលអស់រយៈពេលជាង ៤ ពាន់លានឆ្នាំមកហើយទល់នឹងពេលនេះ ហើយអ្នកវិទ្យាសាស្ត្រសំខាន់ៗទូទាំងពិភពលោក សុទ្ធតែនិយាយថា គ្មានការគំរាមកំហែងណាមួយកើតឡើងមកលើផែនដីនាឆ្នាំ ២០១២នេះឡើយ។
តើអ្វីជាប្រភពនៃការទស្សន៍ទាយថា ពិភពលោកនឹងរលាយនៅឆ្នាំ ២០១២?
ចម្លើយ៖ ដំណើររឿង កើតចេញពីការអះអាងដែលថា ភព Nibiru ដែលគេគិតថាត្រូវជនជាតិដើម Sumerian រកឃើញកាលពីមុនរាប់ពាន់ឆ្នាំមុនគ្រិស្តសករាជនោះ នឹងឆ្ពោះមកបុកកម្ទេចផែនដី។ ដើមឡើយ ភយន្តរាយនេះត្រូវគេទស្សន៍ទាយបង្កើតឡើងសម្រាប់ខែឧសភា ឆ្នាំ ២០០៣ ប៉ុន្តែនៅពេលដែលគ្មានអ្វីកើតឡើងនៅថ្ងៃនោះ គេក៏បង្កើតពាក្យចចាមអារ៉ាមនេះមកខែធ្នូ ឆ្នាំ ២០១២ វិញ ដោយយកលេសភ្ជាប់ទំនាក់ទំនងទៅនឹងវដ្ដរបស់ប្រតិទិនជនជាតិបុរាណដើមម៉ាយ៉ាន ដែលបញ្ចប់ការរាប់រយៈពេលវែង (long-count period) នៅថ្ងៃទី២១-ធ្នូ-២០១២នេះ។
តើប្រតិទិនជនជាតិម៉ាយ៉ាននឹងចប់នៅថ្ងៃធ្នូ-២០១២នេះ ឬទេ?
ចម្លើយ៖ គឺវាដូចគ្នានឹងប្រតិទិនរបស់អ្នកទេ ដែលនឹងត្រូវបញ្ចប់ត្រឹមថ្ងៃ៣១-ធ្នូ បំណាច់ឆ្នាំនោះ។ ប្រតិទិនជនជាតិម៉ាយ៉ានមិនចប់នៅថ្ងៃទី២១-ធ្នូ-២០១២ នោះឡើយ។ កាលបរិច្ឆេទនេះ គឺជាការបញ្ចប់រយៈពេលរាប់វែងរបស់ជនជាតិម៉ាយ៉ានប៉ុណ្ណោះ ពោលគឺដូចប្រតិទិនធម្មតាយើងអីចឹង វានឹងចាប់ផ្ដើមឡើងវិញនៅថ្ងៃទី១-មករា ហើយរយៈពេលរាប់វែងរបស់ប្រតិទិនម៉ាយ៉ាននឹងចាប់ផ្ដើមម្ដងទៀត។
តើណាសាព្យាករណ៍ឃើញ “ថ្ងៃងងឹតស្លុប” លើភពផែនដីនាថ្ងៃទី២៣-២៥ ខែធ្នូនេះដែរទេ?
ចម្លើយ៖ ច្បាស់ណាស់ គឺគ្មានរឿងបែបនេះកើតឡើងនោះទេ។ ទាំងខាងណាសា និងបណ្ដាអង្គការវិទ្យាសាស្ត្រផ្សេងៗទៀត ព្យាករណ៍មិនឃើញមិនមានករណីងងឹតទូទាំងពិភពលោករយៈពេល ៣ ថ្ងៃដូចពាក្យចចាមអារ៉ាមឡើយ។ ពាក្យចចាមអារ៉ាមខុសទាំងនោះអះអាងថា នឹងមានភពរៀបគ្នាជាជួរ ដែលនឹងបង្កឲ្យផែនដីបាត់ពន្លឺព្រះអាទិត្យ និងងងឹតទាំងស្រុងរយៈពេល ៣ ថ្ងៃ។
តើមានភពឈ្មោះ Nibiru ឬ X ឬ Eris កំពុងឆ្ពោះមកបុកកម្ទេចផែនដីដែរទេ?
ចម្លើយ៖ ភព Nibiru ឬ រឿងផ្សេងៗទៀត គឺជាបោកប្រាសតាមអ៊ីនធឺណិតប៉ុណ្ណោះ។ គ្មានមូលដ្ឋានគ្រឹះណាមួយចំពោះការអះអាងនេះនោះឡើយ។ បើសិន Nibiru ឬ X មានពិតមែន និងកំពុងឆ្ពោះមកបុកផែនដីឆ្នាំ ២០១២ មែន នោះតារាវិទូប្រាកដជាព្យាករណ៍ដឹងមុនតាំងពី ១០ ឆ្នាំមុនម្ល៉េះ ហើយបើគិតដល់ឥឡូវ អ្នកប្រាកដជាមើលឃើញភពដែលកំពុងឆ្ពោះមកបុក ដោយភ្នែកទទេ។ ភព Eris មានពិតមែន តែវានៅក្រៅប្រព័ន្ធព្រះអាទិត្យទេ។ វាមានចម្ងាយប្រមាណជា ៤ ពាន់លានម៉ាយឯណោះពីផែនដី។
តើនឹងមានអាចម៍ផ្កាយធំមកបុកផែនដីឆ្នាំ ២០១២ ទេ?
ចម្លើយ៖ ភពផែនដីតែងតែមានបំណែកផ្កាយដុះកន្ទុយ និងអាចម៍ផ្កាយធ្លាក់ ប៉ុន្តែបំណែកធំៗ គឺកម្រនឹងមានណាស់។ បំណែកធំបំផុត គឺកើតឡើងកាលពី ៦៥ លានឆ្នាំមុនឯណោះ ដែលបណ្ដាលឲ្យពពួកសត្វដាយណូស័រស្លាប់ផុតពូជ។ បច្ចុប្បន្ន តារាវិទូរបស់ណាសា កំពុងធ្វើការស្រាវជ្រាវរកមើលថាតើ មានបំណែកអាចម៍ផ្កាយធំណាមួយជិតផែនដីជាងគេ នឹងធ្លាក់ប៉ះផែនដី ឬយ៉ាងណា។ យើងបានកំណត់រកឃើញច្បាស់ហើយ គឺគ្មានបំណែកអាចម៍ផ្កាយធំណាមួយដូចដែលបានធ្លាក់សម្លាប់ដាយណូស័រឡើយ។
តើមានគ្រោះថ្នាក់បណ្ដាលមកពីព្យុះព្រះអាទិត្យដ៏ខ្លាំង ព្យាករណ៍សម្រាប់ឆ្នាំ ២០១២ នេះទេ?
ចម្លើយ៖ សកម្មភាពព្រះអាទិត្យ មានវដ្ដទៀងទាត់ ដោយមានព្យុះខ្លាំងប្រមាណជារាល់ ១១ ឆ្នាំម្ដង។ ពេលជិតមានសកម្មភាពព្យុះព្រះអាទិត្យ អណ្ដាតភ្លើងព្រះអាទិត្យអាចបង្កភាពរអាក់រអួលដល់ផ្កាយរណប ទោះបីជាក្រុមវិស្វករកំពុងសិក្សាបង្កើតគ្រឿងអេឡិចត្រូនិកដែលការពារព្យុះព្រះអាទិត្យក៏ដោយ។ ប៉ុន្តែ សម្រាប់ឆ្នាំ ២០១២ នេះ គ្មានគ្រោះថ្នាក់ពិសេសណាមួយឡើយ។ ព្យុះព្រះអាទិត្យខ្លាំងបំផុតនឹងកើតឡើងចន្លោះឆ្នាំ ២០១២-២០១៤។
បន្ទាប់ពីការបកស្រាយពីណាសា តើប្រិយមិត្តនៅជឿថា ពិភពលោកនឹងបញ្ចប់ទៀតដែរទេ?
No comments:
Post a Comment
yes