រាជធានីភ្នំពេញ ៖ ប្រតិទិនរបស់ជនជាតិម៉ាយ៉ានបានធ្វើការទស្សន៍ទាយអំពីពិភពលោក ដោយបាននិយាយថា ពិភពលោកនឹងត្រូវបញ្ចប់នៅថ្ងៃទី២១ ធ្នូ ឆ្នាំ២០១២ ស្អែកនេះ ។ តើនេះជាការពិតឬ? គេបានពណ៌នាអំពីគន្លងនៃផែនដី ចាប់ពីថ្ងៃទី១១ សីហា ឆ្នាំ៣១១៤ មុនគ្រឹះសករាជ រហូតទៅដល់ថ្ងៃទី២១ ធ្នូ ឆ្នាំ២០១២ ស្រាប់តែទំព័រប្រតិទិនរបស់ពួកគេលែងបង្កើតជាបន្តទៀតតែម្តង ដោយពួកគេយល់ថា ជាថ្ងៃអវសាននៃភពផែនដី ហើយបង្កើតក៏គ្មានន័យអ្វីដែរ ។ យោងទៅតាម «ប្រតិទិនរបស់ជនជាតិម៉ាយ៉ាន» បានឲ្យដឹងថា ថ្ងៃទី២១ ធ្នូ ឆ្នាំ២០១២នេះ នឹងនាំមកនូវការបញ្ចប់នៃពិភពលោកទាំងមូល ។
ការទស្សន៍ទាយអំពីការបញ្ចប់នៃពិភពលោកនេះ គ្មានអ្វីដែលថ្មីឡើយ ដោយសារតែកាលពីលើកមុន ធ្លាប់មានអ្នកវិទ្យាសាស្រ្តមួយរូប ដែលមានឈ្មោះថា ហ្សេកឃឺបានជឿជាក់ថា ពិភពលោកទាំងមូលនឹងត្រូវបញ្ចប់នៅក្នុងឆ្នាំ១៧៩២ ។ ចំណែកឯអ្នកខ្លះទៀតបានអះអាងថា ពិភពលោកនឹងអាចត្រូវបញ្ចប់ក្នុងអំឡុងពីឆ្នាំ១៩១៤ ទៅ១៩៩៤។ ផ្ទុយទៅវិញអ្វីដែលពួកគេបានអះអាងទាំងនេះ មិនទាន់បានកើតឡើងនៅឡើយនោះទេ ហើយវាក៏បានរំលងហួសទៅហើយដែរ ។
ជាមួយនឹងការព្យាករណ៍ខុសទាំងអស់នេះ ហេតុអ្វីបានជាការទស្សន៍ទាយរបស់ ជនជាតិម៉ាយ៉ានបញ្ចប់ប្រតិទិនកំពុងត្រូវបានទាក់ទាញចំណាប់អារម្មណ៍របស់សហគមន៍អ្នកវិទ្យាសាស្រ្តទៅវិញ?
លោកចន មេយើ ជេនឃីនស៍ បាននិយាយថា ពូជពង្សវង្សត្រកូលរបស់ជនជាតិម៉ាយ៉ានបានត្រឡប់ទៅមើលនៅ២០០០ឆ្នាំមុន ។ លោកបានធ្វើការតវ៉ាថា ជនជាតិម៉ាយ៉ានបុរាណបានកំណត់សញ្ញាអំពីគន្លងនៃអវកាសដែល មានអាយុកាល២៦.០០០ឆ្នាំ ដែលត្រូវបានគេហៅថា ការកើតមុននៃអយនកាល ដែលជាកាលក្នុងរដូវដែលមានវេលាថ្ងៃនឹងយប់ស្មើគ្នា គឺនៅថ្ងៃទី២១ ឬ២២ មីនា និងថ្ងៃ២២ ឬ២៣ខែកញ្ញា។កាលបរិច្ឆេទដែលត្រូវបញ្ចប់នៅក្នុងឆ្នាំ២០១២នេះ កើតឡើងព្រមគ្នាជាមួយនឹង «ព្រឹត្តិការណ៍នៃការតំរៀបជួរគ្នានៃផ្កាយទំាងអស់» ដែលអ្នកយានអវកាសសម័យទំនើបបានស្រាវជ្រាវឃើញថានឹងមាន។
ចំណែកនៅក្នុងសៀវភៅដែលត្រូវបានសរសេរឡើងដោយ លោក Adrian Gilbert “The End of Time” បាននិយាយថា «យប់ថ្ងៃទី២១ និង២២ ខែធ្នូ ឆ្នាំ២០១២មិនត្រឹមតែជា យប់ដែលមានរយៈពេលវែងជាងគេនោះទេ ប៉ុន្តែវាក៏អាចជាការតំរៀបជួរគ្នានៃផ្កាយ។ «ការតំរៀបជួរគ្នានៃផ្កាយនេះបញ្ជាក់អំពីចលនាយឺតៗនៃអ័ក្ស ។ មួយវិញទៀតអយនកាល គឺជាពេលដែលព្រះអាទិត្យធ្វើការឆ្លងកាត់ខ្សែអេក្វាទ័រ ដែលថ្ងៃនិងយប់មានរយៈពេលស្មើគ្នា (សមភាពចន្ទ្រា-សុរិយា)»។
ជាការពិតណាស់ថា ទំព័រប្រតិទិនរបស់ជនជាតិម៉ាយ៉ាននឹងបញ្ចប់កាលបរិច្ឆេទនេះ ក៏ប៉ុន្តែវាមិនមែនជាថ្ងៃបញ្ចប់នៃពិភពលោករបស់យើងទាំងមូលឡើយ ។ មានការកត់សម្គាល់ថា មានសៀវភៅមួយចំនួននឹងប្រាប់លោកអ្នកថា ជនជាតិម៉ាយ៉ានបានរីកចំរើនលូតលាស់ នៅអាមេរិកកណ្តាលពីឆ្នាំ២៥០ ទៅ៩០០នៃគ.ស ដែលបានកសាងនូវប្រាង្គប្រាសាទសំខាន់ៗជាច្រើននៅក្នុងក្រុងនៃប្រទេសហ្គាតេម៉េឡា Guatemala, ហុងឌូរ៉ាស់Honduras, ប៊ីលីហ្ស Belize និងប្រទេសមិចស៊ីកូភាគខាងត្បូង ។
ជាការពិតអារ្យធម៌អាថ៌កំបាំងរបស់ជនជាតិម៉ាយ៉ានបានរីកលូតលាស់ឡើងនៅក្នុងប្រទេសអាមេរិកមេសូ បន្ទាប់មកក៏ត្រូវបានរលាយសាបសូន្យ ដោយមិនបានដឹងពីមូលហេតុនៃការបាត់បង់ជនជាតិនេះឡើយ ។ ក្រៅតែពីពួកគេបានបន្សល់ទុកនូវប្រាង្គប្រាសាទដ៏អស្ចារ្យជាច្រើន ប្រាសាទពីរ៉ាមីត និងវិមានសិលាចារឹកប្លែកៗជាច្រើនទៀត។អ្នកវិទ្យាសាស្រ្តបានលើកឡើងថា ប្រតិទិនដ៏អស្ចារ្យដែលពួកម៉ាយ៉ានបានបន្សល់ទុកបានបង្ហាញអំពីចលនាយ៉ាងជាក់លាក់នៃភព និងតារាទាំងអស់ ដោយមិនចាំបាច់ប្រើប្រាស់ឧបករណ៍អ្វីឡើយ ។
ក្រោយពីមានព័ត៌មានពីការទស្សន៍ទាយរបស់ពួកម៉ាយ៉ានដែលមានជំនឿស៊ប់ទៅលើទំនាយរបស់ខ្លួនថា ពិភពលោកនឹងបញ្ចប់នៅថ្ងៃទី២១ ខែធ្នូ ឆ្នាំ២០១២ នេះ អ្នកវិទ្យាសាស្ត្រនៃមន្ទីរពិសោធន៍ Jet Propulsion របស់អង្គការណាសា បានចេញមុខមកអះអាងថា នេះជាការទស្សន៍ទាយខុសស្រឡះ ។តាមការអះអាងរបស់អ្នកវិទ្យាសាស្ត្រ អង្គការណាសា លោក Yeoman បានបញ្ជាក់ថាតាមការពិតនេះគ្រាន់តែជាជំនឿនៃអារ្យធម៌បុរាណរបស់ពួកម៉ាយ៉ានតែប៉ុណ្ណោះ ទាក់ទងនឹងព្រឹត្តិការណ៍ថ្ងៃអវសាននៃពិភពលោក ។ ប្រតិទិនរបស់ពួកនេះមិនមែនបញ្ចប់នៅថ្ងៃទី២១ ខែធ្នូ ឆ្នាំ២០១២ទេ វាគ្រាន់តែជាការបញ្ចប់នៃវដ្ដមួយ និងចាប់ផ្តើមវដ្តថ្មីមួយទៀតប៉ុណ្ណោះ ។ ការពិតវាដូចនឹងប្រតិទិនរបស់យើងដែលបញ្ចប់នៅថ្ងៃទី៣១ ធ្នូ ហើយប្រតិទិនថ្មីចាប់ផ្តើមនៅថ្ងៃទី១ ខែមករា ។
លោក Yeoman ក៏បានអំពាវនាវសុំឱ្យប្រជាជនទាំងអស់ធ្វើចិត្តឱ្យបានស្ងប់ ចំពោះការភ័យខ្លាចណាមួយទាក់ទងនឹងបុព្វហេតុនៃការទស្សន៍ទាយពីថ្ងៃអវសាននៃពិភពលោករបស់ពួកម៉ាយ៉ាន ។ មានមនុស្សម្នាជាច្រើននាំគ្នាភ័យព្រួយថានឹងមានអព្ភូតហេតុមួយនៅក្រៅប្រព័ន្ធព្រះអាទិត្យ នឹងធ្លាក់មកបុកភពផែនដីនៅក្នុងខែធ្នូនេះ ។ លោកថ្លែងថា ប្រសិនបើកើតមានអព្ភូតហេតុដូច្នេះមែន ម៉្លេះសមយើងឃើញតាំងពីយូរយារមកហើយ ។ បើសិនគេឃើញមានមែននោះយើងទំនងជានឹងឃើញប្រតិកម្មកម្លាំងទំនាញនៃភពនោះទៅលើភពមួយទៀតដែលនៅជិតភពផែនដីយើងនេះ ។ តារាវិទូរាប់ពាន់នាក់ដែលបានផ្តិតរូបភាពហ្វូងតារារៀងរាល់ថ្ងៃ មិនបានឃើញអព្ភូតហេតុនេះទេ ។ លោកបានបន្ថែមទៀតថាណាសាមិនដែលលាក់លៀមព័ត៌មានទាំងនោះទ ។ តើអ្នកអាចស្រមើស្រមៃមើលថា តើក្រុមតាវិទូរាប់ពាន់នាក់ដែលបានអង្កេតលំហអាកាសជារៀងរាល់ថ្ងៃ គេរក្សាការសម្ងាត់ ។
ទាក់ទងនឹងអណ្តាតភ្លើងរបស់ព្រះអាទិត្យវិញ លោក Yeoman ពន្យល់ថា វាពិតជាកើតមានមែន ។ តាមពិត អណ្តាតភ្លើងព្រះអាទិត្យ២ធំៗបានផ្ទុះឡើងកាលពីច្រើនថ្ងៃមុនមកម៉្លេះបង្កឱ្យមានចំហាយក្តៅចូលទៅក្នុងលំហអាកាស ។ ប៉ុន្តែនេះគ្រាន់តែជាវដ្ដធម្មតាមួយនៃព្រះអាទិត្យរៀងរាល់១១ឆ្នាំម្តងតែប៉ុណ្ណោះ ។ ចំហាយនៃអណ្តាតភ្លើងព្រះអាទិត្យ អាចកម្ទេចផ្កាយរណបក្នុងគន្លងគោចរបាន ប៉ុន្តែបរិយាកាសដែនម៉ាញ៉េទិករបស់ផែនដីអាចការពារមិនឱ្យផ្ទុះបាន ហើយអណ្តាតភ្លើងនោះមិនបង្កបញ្ហាដល់សុខភាពនោះទេ ។
អ្នកវិទ្យាសាស្ត្ររូបនេះរៀបរាប់បន្តថា មានអ្នកទស្សន៍ទាយពីអវសានពិភពលោកជាច្រើនជឿថា ភពមួយផ្សេងទៀតនិងព្រះអាទិត្យនឹងត្រួតស៊ីគ្នាជាមួយភពផែនដីនៅក្នុងខែធ្នូនេះ ហើយបង្កឱ្យមានមហន្តរាយរលករញ្ជួយព្រះធរណី ។ លោកបានពន្យល់ថា គ្មានការត្រួតស៊ីគ្នានៃភពនោះទេ នៅក្នុងខែធ្នូ ឆ្នាំ២០១២នេះ ។ បើទោះបីជាមានមែន ក៏មិនមានរលករញ្ជួយអ្វីប៉ះពាល់លើភពផែនដីនេះដែរ ។ ពពួកផ្កាយតែពីរពួកប៉ុណ្ណោះនៅក្នុងប្រព័ន្ធព្រះអាទិត្យដែលអាចប៉ះពាល់ដល់ផែនដី គឺព្រះចន្ទដែលនៅជិតបំផុតនិងព្រះអាទិត្យ ។
ប៉ុន្តែភពផ្សេងៗទៀតមានផលប៉ះពាល់តិចតួចស្តួចស្តើងមកលើភពផែនដី ។
ជាមួយគ្នានេះ ទាក់ទិនទៅនឹងព័ត៌មានដែលថាភពផែនដីនឹងងងឹត៣យប់៣ថ្ងៃ ចាប់ពីថ្ងៃទី២៣ ដល់២៥ ធ្នូ ក៏មិនមានអព្ភូតហេតុនេះកើតឡើងនោះទេ ហើយព័ត៌មានដែលថាអង្គការណាសាប្រកាសនោះគឺមិនពិតទេ ៕
No comments:
Post a Comment
yes