ការតវ៉ានៅទីក្រុងបាងកក កាលពីម្សិលមិញដែលរៀបចំឡើងដើម្បីជំទាស់នឹង
សេចក្តីសម្រេចរបស់តុលាការយុតិ្តធម៌អន្តរជាតិ លើជម្លោះទឹកដីជិតប្រាសាទព្រះវិហារ
ភ្នំពេញៈ លោកនាយករដ្ឋមន្រ្តី ហ៊ុន សែន កាលពីថ្ងៃចន្ទបានវាយប្រហារលោក អាភីស៊ីត វេចាជីវ៉ា អតីតនាយករដ្ឋមន្រ្តីថៃ និងសកម្មជនបក្សប្រឆាំងរបស់ថៃលើអ្វីដែលលោកហៅថា ជាកិច្ចប្រឹងប្រែងប្រើប្រាស់កម្ពុជាជាឈ្នាន់ដើម្បីបានពិន្ទុ នយោបាយលើបញ្ហារសើប នៅក្នុងប្រទេសថៃ។
លោក ហ៊ុន សែន មានប្រតិកម្មចំពោះការតវ៉ាមួយ នៅទីក្រុងបាងកក កាលពីម្សិលមិញដែលរៀបចំឡើងដើម្បីជំទាស់នឹង សេចក្តីសម្រេចរបស់តុលាការយុតិ្តធម៌អន្តរជាតិ លើជម្លោះទឹកដីជិតប្រាសាទព្រះវិហារ ដែលរំពឹងថានឹងចេញនៅក្នុងឆ្នាំនេះ។ លោក ហ៊ុន សែន ថ្លែងថា លោក អាភីស៊ីត ដែលគណបក្សប្រជាធិបតេយ្យរបស់លោកមានទស្សនៈដូចអ្នកតវ៉ា ត្រូវដាក់ភស្តុតាងគាំទ្រលើការអះអាងដែលបានលើកឡើងកន្លងមក អំពីតំបន់សម្បូរធនធានក្នុងឈូងសមុទ្រថៃ ដែលហៅថា តំបន់ត្រួតស៊ីគ្នា។
លោក ហ៊ុន សែន បានថ្លែងក្នុងពិធីចែកប័ណ្ណកម្មសិទិ្ធដី ក្នុងស្រុកសៀមបូក ខេត្តស្ទឹងត្រែងថា ៖ «ជានិច្ចកាលអតីតនាយករដ្ឋមន្រ្តីរូបនេះ ចោទប្រកាន់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃ ថាបានផលប្រយោជន៍ជាសម្ងាត់ជាមួយនឹងកម្ពុជា លើបញ្ហាតំបន់ត្រួតស៊ីគ្នាក្នុងសមុទ្រ និងបានជំទាស់យុត្តាធិការតុលាការអន្តរជាតិ។ ថ្ងៃនេះ ខ្ញុំសុំប្រាប់ អាភីស៊ីត ឲ្យយកភស្តុតាងមកបញ្ជាក់ តើលោក ថាក់ស៊ីន មាន ប្រយោជន៍អ្វីជាមួយនឹង កម្ពុជា។ បើគ្មានភស្តុតាងទេ អ្នកឯងបោកប្រជាជនថៃជាង ៦០ លាននាក់ និងកម្ពុជា ជាង ១៤ លាននាក់ហើយ។ នេះជានយោបាយស្មោកគ្រោករបស់ពួក អាភីស៊ីត»។
ក្នុងរយៈពេល ប៉ុន្មានសប្តាហ៍ដើមឆ្នាំ ២០១៣ នេះ នៅក្នុងប្រទេសថៃ មានការជជែកដ៏ក្តៅគគុក ទាក់ទិននឹងបញ្ហាប្រាសាទព្រះវិហារ ដែលតុលាការយុតិ្តធម៌អន្តរជាតិ ក្រុងឡាអេ បានសម្រេចប្រគល់ឲ្យមកប្រទេសកម្ពុជា តាមរយៈសាលក្រមចេញដោយតុលាការនេះកាលពីឆ្នាំ ១៩៦២។ សវនាការលើតំបន់វិវាទទឹកដីនៅជុំវិញប្រាសាទនេះ នឹងធ្វើឡើងនៅខែមេសា ឆ្នាំ២០១៣ នៅឯតុលាការទីក្រុងឡាអេ។ ដូចគ្នានឹងបញ្ហាប្រាសាទនេះផងដែរ តំបន់សមុទ្រត្រួតស៊ីគ្នា ក៏ជាប្រភពនៃភាពតានតឹងរវាងប្រទេសកម្ពុជា និងប្រទេសថៃដែលនៅជាប់គ្នានេះដែរ។
ការអភិវឌ្ឍនៅតំបន់ទំហំ ២៦ពាន់ គីឡូម៉ែត្រការ៉េ ដែលគេជឿជាក់ថា មាន សម្បូរទៅដោយថាមពលប្រេង និងឧស្ម័នធម្មជាតិ អាចក្លាយជាប្រភពចំណូលថ្មីសម្រាប់ប្រទេសទាំងពីរ និងសម្រាប់ក្រុមហ៊ុនដែលនឹងទទួលបានសិទិ្ធសម្បទាលើតំបន់។ អនុស្សរណៈនៃការយោគយល់គ្នាមួយ ដើម្បីរុករកតំបន់នេះរួមគ្នានោះ បានចុះហត្ថលេខាជាលើកដំបូងនៅក្នុងឆ្នាំ ២០០១ ប៉ុន្តែ ក្នុងរយៈពេលជាង ១០ ឆ្នាំកន្លងមកនេះ កិច្ចព្រមព្រៀងនោះនៅទ្រឹងនិងរេរា ដោយពឹងផ្អែកទៅលើអ្នកកាន់អំណាចនៅក្នុងប្រទេសថៃ។
អនុស្សរណៈនេះ កម្ពុជាបានចុះហត្ថលេខាជាមួយនឹងលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃ ក្នុងអំឡុងឆ្នាំ ២០០៦ នៅពេលដែលលោកត្រូវបានទម្លាក់ពីតំណែងជានាយករដ្ឋមន្ត្រី ក្នុងរដ្ឋប្រហារយោធា ក្នុងប្រទេសថៃ ហើយក្រោយមកហាក់នៅទ្រឹងអស់រយៈពេលប្រមាណជា ៣ ឆ្នាំ គឺនៅបន្ទាប់ពីលោកនាយករដ្ឋមន្ត្រី ហ៊ុន សែន ធ្វើឲ្យលោក អាភីស៊ីត វេចាជីវ៉ា អតីតនាយករដ្ឋមន្រ្តីថៃ នៅពេលនោះខឹងសម្បា ដោយសារតែការតែងតាំងលោក ថាក់ស៊ីន ស៊ីណាវ៉ាត្រា ធ្វើជាទីប្រឹក្សាសេដ្ឋកិច្ច របស់រាជរដ្ឋាភិបាលកម្ពុជា។
ប៉ុន្តែ នៅក្នុងឆ្នាំ ២០១១ ជាការឆ្លើយតបទៅនឹងការចោទប្រកាន់របស់លោក អាភីស៊ីត ដែលបានចោទថាលោក ថាក់ស៊ីន ស៊ីណាវ៉ាត្រា មានផលប្រយោជន៍ជាសម្ងាត់ជាមួយនឹងកម្ពុជា ទីស្តីការគណៈរដ្ឋមន្រ្តីនៃរាជរដ្ឋាភិបាលកម្ពុជា បានចេញសេចក្តីថ្លែងការណ៍ ដែលបានលម្អិត ស្តីពីកិច្ចប្រជុំបិទទ្វាររវាងកម្ពុជា និងមន្រ្តីគណបក្សប្រជាធិបតេយ្យថៃ ដែលស្ថិតក្រោមអំណាចលោកអតីតនាយករដ្ឋមន្ត្រី អាភីស៊ីត ស្តីពីតំបន់ត្រួតស៊ីគ្នា។
អង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្រ្តី បានចេញសេចក្តីថ្លែងការណ៍ឆ្នាំ ២០១១ ជាថ្មីទៀតកាលពីម្សិលមិញ ហើយលោក ផៃ ស៊ីផាន អ្នកនាំពាក្យទីស្តីការគណៈរដ្ឋ មន្ត្រីថ្លែងថា គឺមានគោលបំណងជាការដាស់ក្រើនរំឭកពីបញ្ហានេះ។
លោក ផៃ ស៊ីផាន បានបញ្ជាក់ថា ៖ «ប្រជាជនថៃ នៅតែមិនដឹងថា រដ្ឋាភិបាលលោក អាភីស៊ីត បានព្យាយាមពិភាក្សាជាមួយកម្ពុជា ដោយសម្ងាត់អំពីបញ្ហានេះទេ។ យើងចង់ដាក់វាលើតុប្រជុំ។ នេះគឺជាមូលហេតុដែលយើងត្រូវបង្ហាញការពិតថា លោក អាភីស៊ីត បានលេងល្បិចជាមួយប្រជាជន»។
កិច្ចសន្ទនាមានលក្ខណៈល្អប្រសើរឡើង បន្ទាប់ពីលោកស្រី យីងឡាក់ ស៊ីណាវ៉ាត្រា ប្អូនស្រីលោក ថាក់ស៊ីន បានជាប់ឆ្នោតក្នុងឆ្នាំ ២០១១ ប៉ុន្តែ ប៉ុន្មានខែមុននេះ ពុំមានជំហរអ្វីច្បាស់លាស់ ត្រូវបានប្រកាសនោះឡើយ។
ឯកអគ្គរាជទូតថៃនៅកម្ពុជា បដិសេធមិនផ្តល់ការអត្ថាធិប្បាយទេ៕
No comments:
Post a Comment
yes