អគ្គលេខាធិការរបស់គណៈកម្មាធិការជាតិរៀបចំការបោះឆ្នោត (គ.ជ.ប.)
លោក ទេព នីថា
សមាជិកសភាបក្សប្រឆាំង និងសង្គមស៊ីវិល ចង់ជួបមន្ត្រី គណៈកម្មាធិការជាតិរៀបចំការបោះឆ្នោត (គ.ជ.ប) ពិភាក្សាទល់មុខគ្នា ដើម្បីផ្តល់អនុសាសន៍កែលំអចំណុចខ្វះខាតមួយចំនួនរបស់ស្ថាប័ន គ.ជ.ប ជំរុញឲ្យការងារបោះឆ្នោតតំណាងរាស្ត្រអាណត្តិទី៥ ឆ្នាំ២០១៣ មានយុត្តិធម៌។
ប៉ុន្តែមន្ត្រី គ.ជ.ប បានបដិសេធថា គណបក្សនយោបាយ ឬសង្គមស៊ីវិល អាចផ្តល់អនុសាសន៍ជាលាយលក្ខណ៍អក្សរផ្ញើមក គ.ជ.ប ជំនួសការផ្តល់អនុសាសន៍ទល់មុខគ្នា ពីព្រោះ គ.ជ.ប មិនមានពេលគ្រប់គ្រាន់។
មន្ត្រីសង្គមស៊ីវិល និងមន្ត្រីគណបក្សប្រឆាំងនៅតែខ្វែងគំនិតគ្នាជាមួយនឹងថ្នាក់ដឹកនាំស្ថាប័ន គ.ជ.ប ជុំវិញសំណើសុំផ្តល់អនុសាសន៍កែលំអការងារបោះឆ្នោតជ្រើសរើសតំណាងរាស្ត្រអាណត្តិទី៥ ឆ្នាំ២០១៣។
មន្ត្រីសង្គមស៊ីវិល និងបក្សប្រឆាំង ទទូចចង់ជួបពិភាក្សាជាមួយមន្ត្រី គ.ជ.ប ទល់មុខគ្នា ប៉ុន្តែមន្ត្រី គ.ជ.ប បដិសេធ។
លោក អ៊ូ ច័ន្ទឫទ្ធិ មន្ត្រីនាំពាក្យ និងជាអ្នកតំណាងរាស្ត្រគណបក្ស សិទ្ធិមនុស្ស មានប្រសាសន៍នៅថ្ងៃសុក្រ ទី១៨ ខែមករា ថា គណបក្ស សិទ្ធិមនុស្ស ចង់ឲ្យមានកិច្ចពិភាក្សាទល់មុខគ្នា ជាជាងធ្វើជាលាយលក្ខណ៍អក្សរ។ លោកសោកស្ដាយចំពោះទង្វើរបស់មន្ត្រី គ.ជ.ប ដែលមិនអនុញ្ញាតឲ្យគណបក្សប្រឆាំងជួបពិភាក្សាផ្ទាល់ចំពោះបញ្ហានេះ។
លោក អ៊ូ ច័ន្ទឫទ្ធិ៖ «គ.ជ.ប ត្រូវស្តាប់យើង ហើយយកការស្នើសុំរបស់យើងយកទៅពិចារណា ហើយបើសិនជាអាចទទួលយកបាន សុំឲ្យដាក់ចូលទៅក្នុងនីតិវិធី និងបទបញ្ជាផ្ទៃក្នុងទៅ វាអត់មានខុសអីទេ ព្រោះយើងចង់ឲ្យមានការបោះឆ្នោតមួយដែលសេរី ត្រឹមត្រូវ និងយុត្តិធម៌។ អ្នកឈ្នះៗដោយយុត្តិធម៌ និងថ្លៃថ្នូរ ហើយអ្នកចាញ់ៗដោយអស់ចិត្ត។ យើងមិនចង់ឲ្យការប្រកួតប្រជែងមិនស្មើភាពគ្នាទេ»។
កាលពីថ្ងៃទី១៥ ខែមករា គណបក្ស សម រង្ស៊ី និងសិទ្ធិមនុស្ស បានដាក់លិខិតស្នើជួបថ្នាក់ដឹកនាំ គ.ជ.ប នៅថ្ងៃទី២១ ខែមករា ដើម្បីផ្តល់យោបល់លើសេចក្តីព្រាងបទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រអាណត្តិទី៥។ ប៉ុន្តែសំណើនេះត្រូវមន្ត្រី គ.ជ.ប បដិសេធ តែបក្សប្រឆាំងអាចជួបពិភាក្សារួមជាមួយគ្រប់គណបក្សនយោបាយ និងសង្គមស៊ីវិល ក្រោយថ្ងៃទី២៤ ខែមករា ជំនួសវិញ។
លោក ទេព នីថា អគ្គលេខាធិការ គ.ជ.ប មានប្រសាសន៍នៅថ្ងៃសុក្រ ទី១៨ ខែមករា ថា គ.ជ.ប ស្វាគមន៍រាល់ការផ្តល់អនុសាសន៍ពីគ្រប់គណបក្សនយោបាយ និងសង្គមស៊ីវិល មកស្ថាប័ន គ.ជ.ប។ ប៉ុន្តែអនុសាសន៍ទាំងនោះត្រូវធ្វើជាលាយលក្ខណ៍អក្សរផ្ញើមកស្ថាប័ន គ.ជ.ប ជំនួសការស្នើជួបពិភាក្សាទល់មុខគ្នា។
លោក ទេព នីថា៖ «ពេលយើងបូកសរុបអនុសាសន៍នេះ ហើយយើងពិចារណាលើអនុសាសន៍នេះយ៉ាងម៉េច។ ក្នុងករណីមិនច្បាស់ ហើយសួរទៅសាមីគណបក្សដែលផ្តល់អនុសាសន៍នេះ។ បន្ទាប់ពីបូកសរុបហើយ បានយើងអញ្ជើញគណបក្ស ឬអង្គការមិនមែនរដ្ឋាភិបាលមកជួបប្រជុំទាំងអស់គ្នា។ ហើយយើងផ្តល់ឱកាសឲ្យពួកគាត់និយាយពីអនុសាសន៍របស់គាត់ ហើយយើងធ្វើការបកស្រាយវិញ ហើយពិគ្រោះគ្នាថា តើចំណុចណាអាច និងចំណុចណាមិនអាច ដោយផ្អែកលើច្បាប់ជាធរមាន»។
លោកថា រហូតមកដល់ពេលនេះ គ.ជ.ប នៅបន្តទទួលយកអនុសាសន៍ ឬការផ្តល់យោបល់ផ្សេងៗផ្ញើមក គ.ជ.ប ដើម្បីជំរុញឲ្យដំណើរការបោះឆ្នោតតំណាងរាស្ត្រអាណត្តិទី៥ ឆ្នាំ២០១៣ មានភាពរលូន។ លោកថា សង្គមស៊ីវិល និងបក្សនយោបាយ អាចផ្ញើអនុសាសន៍ជាលាយលក្ខណ៍អក្សរមកស្ថាប័ន គ.ជ.ប ឲ្យបានមុនថ្ងៃទី២៤ ខែមករា ឆ្នាំ២០១៣។
ការបោះឆ្នោតជ្រើសរើសតំណាងរាស្ត្រអាណត្តិទី៥ ចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ ការបោះឆ្នោតនេះ មន្ត្រីគណបក្សប្រឆាំង និងសង្គមស៊ីវិល ក៏បានជំរុញឲ្យមន្ត្រីដឹកនាំស្ថាប័ន គ.ជ.ប ត្រូវអនុវត្តច្បាប់បោះឆ្នោតឲ្យបានស្មើភាពរវាងបក្សកាន់អំណាច និងបក្សប្រឆាំង។
លោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (និកហ្វិច = NICFEC) លោកមានប្រសាសន៍ថា និកហ្វិច បានត្រៀមផ្តល់អនុសាសន៍កែលំអចំណុចខ្វះខាតច្រើនចំណុចជូនស្ថាប័ន គ.ជ.ប ដើម្បីជំរុញឲ្យការបោះឆ្នោតឆ្នាំ២០១៣ មានអព្យាក្រឹត និងមានយុត្តិធម៌។
លោកបណ្ឌិត ហង្ស ពុទ្ធា៖ «ការគិតគូរដល់ហិរញ្ញវត្ថុសម្រាប់គណបក្សនយោបាយ ពិសេសក្នុងអំឡុងពេលយុទ្ធនាការឃោសនាបោះឆ្នោត។ បង្កលក្ខណៈឲ្យប្រជាពលរដ្ឋគ្រប់រូបដែលមានឈ្មោះក្នុងបញ្ជីបោះឆ្នោត មានឱកាស និងពេលវេលាគ្រប់គ្រាន់សម្រាប់រកឃើញឈ្មោះ និងជួយឲ្យអ្នកដែលមានពិការភាព ឬក៏ជនជាតិដើមភាគតិចហ្នឹង ចូលរួមទាំងអស់គ្នា ក្នុងដំណើរការបោះឆ្នោតតាមបែបប្រជាធិបតេយ្យ»។
ការចុះបញ្ជីគណបក្សនយោបាយឈរឈ្មោះបោះឆ្នោត និងបេក្ខជនសម្រាប់ការបោះឆ្នោតជ្រើសរើសតំណាងរាស្ត្រនីតិកាលទី៥ ចាប់ផ្ដើមពីថ្ងៃទី២៩ ខែមេសា ដល់ថ្ងៃទី១០ ខែឧសភា ឆ្នាំ២០១៣។ ការផ្តល់ប័ណ្ណព័ត៌មានដល់អ្នកបោះឆ្នោត ចាប់ផ្ដើមពីថ្ងៃទី១ ដល់ថ្ងៃទី២៥ ខែមិថុនា ឆ្នាំ២០១៣។ រីឯការឃោសនាបោះឆ្នោត ចាប់ផ្ដើមនៅថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣។
បញ្ជីឈ្មោះបោះឆ្នោតផ្លូវការសម្រាប់បម្រើឲ្យការបោះឆ្នោតជ្រើសរើសតំណាងរាស្ត្រអាណត្តិទី៥ ឆ្នាំ២០១៣ គ.ជ.ប បានផ្តល់សុពលភាពនៅថ្ងៃទី៣១ ខែធ្នូ ឆ្នាំ២០១២។ បញ្ជីឈ្មោះនេះ មានអ្នកបោះឆ្នោតចំនួន ៩.៦៧៥.៤៥៣នាក់ បានចុះឈ្មោះបោះឆ្នោត ក្នុងនោះមានស្ត្រីចំនួន ៥.០៨១.៨៤៣នាក់។ ការបោះឆ្នោតសភានីតិកាលទី៥ មានការិយាល័យបោះឆ្នោតសរុបចំនួន ១៩.០០៩ការិយាល័យទូទាំងប្រទេស៕
No comments:
Post a Comment
yes