ក្រុមប្រជាពលរដ្ឋដែលមកពីសហគមន៍ភូមិតាពេន ភូមិចំបក់បីដើម ភូមិស្គន់
ក្នុងឃុំត្បែង និងភូមិតានី នៃឃុំរុនតាឯក ស្រុកបន្ទាយស្រី ខេត្តសៀមរាប
លើកគ្នាទៅជួបក្រុមនិស្សិត ដើម្បីស្នើសុំឱ្យចុះវាស់វែងដីរបស់ពួកគាត់ដែល
កំពុងមានរឿងក្ដីក្ដាំនៅឡើយ កាលពីព្រឹកថ្ងៃទី១៨ ខែមករា ឆ្នាំ២០១៣
អង្គការសិទ្ធិមនុស្សក្រៅរដ្ឋាភិបាល នៅខេត្តសៀមរាប ដែលកំពុងតាមឃ្លាំមើលបញ្ហាទំនាស់ដីធ្លីរបស់ប្រជាពលរដ្ឋ នៅក្នុងភូមិស្គន់ ស្រុកបន្ទាយស្រី បានរំពឹងទៅលើនិស្សិតស្ម័គ្រចិត្តវាស់វែងដីថា គឺជាអ្នកដែលអាចបញ្ជូនដំណឹងទៅដល់លោកនាយករដ្ឋមន្ត្រីដោយផ្ទាល់ ដើម្បីឈានទៅដល់ការដោះស្រាយ និងបញ្ចប់បញ្ហាជម្លោះដីដ៏រ៉ាំរ៉ៃជាយូរមកហើយបាន។
ការំពឹងទុកនេះ នៅស្របពេលដែលប្រជាពលរដ្ឋនៅក្នុងភូមិស្គន់ ឃុំត្បែង ជាង ១០០គ្រួសារ កំពុងមានទំនាស់ដីធ្លីជាង ១៧០ហិកតារ ដែលមិនទាន់មានការចុះវាស់វែង និងធ្វើប័ណ្ណកម្មសិទ្ធិនៅឡើយ។
ក្រុមប្រជាពលរដ្ឋប្រមាណ ២០០នាក់ មកពីសហគមន៍ដីធ្លីនៅក្នុងឃុំត្បែង និងឃុំរុនតាឯក នៃស្រុកបន្ទាយស្រី ខេត្តសៀមរាប បានលើកគ្នាទៅកន្លែងនិស្សិតស្ម័គ្រចិត្តវាស់វែងដីធ្លីស្នាក់នៅជិតជើងភ្នំគូលែន កាលពីព្រឹកថ្ងៃសុក្រ ទី១៨ ខែមករា ដើម្បីស្នើសុំឱ្យចុះវាស់វែងដីរបស់ពួកគេ ដែលកំពុងមានរឿងក្ដីក្ដាំនៅឡើយនោះ។
សហគមន៍ប្រជាពលរដ្ឋមកពីភូមិតាពេន ភូមិចំបក់បីដើម ភូមិស្គន់ ក្នុងឃុំត្បែង និងភូមិតានី នៃឃុំរុនតាឯក ដែលលើកគ្នាទៅជួបក្រុមនិស្សិតនោះ គឺមានទាំងមេក្រូ ព្រមទាំងបដា ហើយបានអំពាវនាវ ឱ្យប្រមុខរដ្ឋាភិបាល ជួយដោះស្រាយបញ្ហាជម្លោះដីធ្លី ដើម្បីឱ្យក្រុមនិស្សិតអាចចុះវាស់វែងធ្វើប័ណ្ណកម្មសិទ្ធិដ៏ស្របច្បាប់សម្រាប់ពួកគេ។
អ្នកស្រី ឆិក សំបូរ គឺជាតំណាងម្នាក់ក្នុងចំណោមតំណាងប្រជាពលរដ្ឋជាច្រើនទៀត រស់នៅភូមិស្គន់ នៃឃុំត្បែង ស្រុកបន្ទាយស្រី អ្នកស្រីបានមានប្រសាសន៍នៅពេលដែលលើកគ្នាទៅជួបក្រុមនិស្សិតថា ប្រជាពលរដ្ឋនៅក្នុងភូមិរបស់អ្នកស្រី កំពុងត្រូវការជំនួយពីក្រុមនិស្សិតស្ម័គ្រចិត្តវាស់វែងដីធ្លី ដែលទើបតែមកដល់ថ្មី ដើម្បីបញ្ចប់បញ្ហាជម្លោះដីធ្លី។
ស្ត្រីដដែលបានបញ្ជាក់ថា ជាច្រើនលើកមកហើយ ចាប់តាំងពីក្រុមនិស្សិតស្ម័គ្រចិត្តចុះវាស់វែងដីធ្លី ដើម្បីធ្វើប័ណ្ណកម្មសិទ្ធិជូនប្រជាពលរដ្ឋ គឺអ្នកភូមិបានព្យាយាមជួបជាមួយអាជ្ញាធរ ឃុំ ស្រុក ដើម្បីពិភាក្សារកដំណោះស្រាយ ក៏ប៉ុន្តែមិនដែលឃើញអាជ្ញាធរចូលរួមដោះស្រាយទេ៖ «ក្នុងថ្ងៃនេះ គឺខ្ញុំជាម្ចាស់ដីពិតប្រាកដ ហើយខ្ញុំមកចង់ឱ្យនិស្សិតហៅចៅហ្វាយស្រុក និងមេឃុំ មកជួបប្រជាពលរដ្ឋនៅទីនេះ ដើម្បីឱ្យដឹងថា តើដីណាដែលមានបញ្ហាទំនាស់ដីធ្លី។ អ៊ំមកនេះ គឺអ៊ំធ្វើអស់កិច្ចការដាក់លិខិតក៏ដាក់ ហៅចៅហ្វាយស្រុក និងមេឃុំវិញ ទៅជួយមើលដល់ដីប្រជាពលរដ្ឋក៏ហៅ។ អស់ជំនឿហើយ អ៊ំនេះពឹងទៅលើប្អូនៗដែលមកក្រោយនេះ សុំឱ្យប្អូនៗចុះមក និងវាស់ជូនប្រជាពលរដ្ឋ កុំឱ្យប្រជាពលរដ្ឋពិបាក រងគ្រោះដោយសាររឿងដីធ្លី»។
ក្រុមអ្នកភូមិជាច្រើន ក៏មានកង្វល់ទៅលើបញ្ហាដូចដែលតំណាងរបស់ពួកគេបានលើកឡើង ហើយគេក៏ចង់ឱ្យក្រុមនិស្សិត ជួយពាំនាំយកកង្វល់ទាំងនេះទៅជម្រាបជូនប្រមុខរដ្ឋាភិបាល។
លោក នី សារុន គឺជាប្រជាពលរដ្ឋម្នាក់ រស់នៅភូមិស្គន់ បានមានប្រសាសន៍ថា ក្នុងពេលដែលក្រុមនិស្សិតស្ម័គ្រចិត្តបានចុះវាស់វែងដីធ្លីជាច្រើនខែមកហើយ នៅជិតតំបន់ដែលពួកគាត់រស់នៅនោះ ក៏ប៉ុន្តែអ្នកភូមិរបស់គាត់ជាច្រើនមិនទាន់បានវាស់វែងដើម្បីធ្វើប័ណ្ណកម្មសិទ្ធិដីធ្លីនៅឡើយទេ។ បុរសដដែលបានសម្ដែងការព្រួយបារម្ភជាខ្លាំង ខ្លាចក្រែងមិនអាចមានសិទ្ធិកាន់កាប់ដីធ្លីរបស់គាត់នៅពេលអនាគត។
លោក នី សារុន៖ «អត់បានវាស់ឱ្យខ្ញុំដោយសាររឿងអី ខ្ញុំអត់បានដឹងទេ។ ក៏ប៉ុន្តែប្រជាពលរដ្ឋខ្ញុំកំពុងតែមានកង្វល់។ តាពេន ស្គន់ ត្បែង ខ្វាវ ដីពាក់ព័ន្ធ វាអត់ទាន់បានវាស់ អត់ទាន់បានប័ណ្ណ។ អីចឹង ប្រជាជនទាំងអស់ហ្នឹងទុក្ខកង្វល់បានជាមក ជួបជុំនិស្សិតចុងក្រោយហ្នឹង សុំសួរនិស្សិតដោយផ្ទាល់ តើដីពេលណា ដែលចុះដោះស្រាយឱ្យ?»។
តំណាងក្រុមនិស្សិតស្ម័គ្រចិត្តចុះវាស់វែងដីធ្លី ដែលទើបតែមកដល់ថ្មី បានយល់ព្រមជួបពិភាក្សាជាមួយតំណាងអ្នកភូមិទាំងនោះ និងសុំឱ្យប្រជាពលរដ្ឋស្វែងរកឯកសារមួយចំនួន ដើម្បីយកមកឱ្យពួកគេពិនិត្យ ពីព្រោះពួកគេទើបតែផ្លាស់មកថ្មី គឺមិនដឹងថាមានបញ្ហាអ្វីកើតឡើងនៅទីនោះទេ។
លោក ឆែ សាលីដេត ជាប្រធានក្រុមទី៣០៦ស៊ី (306C) បានមានប្រសាសន៍ថា នៅពេលបច្ចុប្បន្នក្រុមនិស្សិតមិនអាចដោះស្រាយជូនទៅតាមការស្នើសុំរបស់ប្រជាពលរដ្ឋចង់បាននោះទេ៖«ព្រោះអាហ្នឹងគឺរឿងរបស់អាជ្ញាធរដែនដី។ គោលការណ៍ពួកខ្ញុំ បើខ្ញុំចុះមកវាស់វែងដីជូនប្រជាពលរដ្ឋ គឺរឿងដីដែលអត់មានទំនាស់ ឯដីរបស់ពួកគាត់កំពុងតែនៅក្នុងតុលាការ»។
លោក ចៅ ល័ក្ខវណ្ណា ជាអ្នកស៊ើបអង្កេតរបស់អង្គការសិទ្ធិមនុស្សលីកាដូ (Licadho) ខេត្តសៀមរាប បានមានប្រសាសន៍ថា គេបានរកឃើញដីដែលប្រជាពលរដ្ឋកំពុងទាមទារឱ្យក្រុមនិស្សិតវាស់វែងដើម្បីធ្វើប័ណ្ណកម្មសិទ្ធិនោះ មានទំហំប្រមាណជាង ១៧០ហិកតារ ដែលជារបស់ប្រជាពលរដ្ឋនៅក្នុងភូមិស្គន់ ផង និងនៅឃុំត្បែង មួយចំនួនទៀតផង។
ក្រុមអ្នកភូមិស្គន់ ចំនួន ១១៧គ្រួសារ បានកើតមានជម្លោះដីធ្លីទំហំ ១២០ហិកតារ ជាមួយអ្នកមានអំណាចតាំងតែពីអំឡុងឆ្នាំ២០០៥ មកម្ល៉េះ។ កាលពីឆ្នាំ២០០៩ កន្លងទៅ តុលាការខេត្តសៀមរាប បានចោទប្រកាន់អ្នកស្រី ឆិក សំបូរ និងប្ដីរបស់គាត់ឈ្មោះ វិច វី ដែលជាតំណាងអ្នកភូមិទីនោះ ពីបទរំលោភលើទ្រព្យសម្បត្តិឯកជន តាមរយៈការប្រើអំពើហិង្សា និងបានចាប់ឃុំខ្លួនជាច្រើនខែ ដោយសារតែតំណាងប្រជាពលរដ្ឋនោះបានដឹកនាំការតវ៉ាជម្លោះដីធ្លី។
ទោះយ៉ាងណា អាជ្ញាធរស្រុកបន្ទាយស្រី បានអះអាងថា រដ្ឋាភិបាលមិនបានព្រងើយកន្តើយក្នុងការគិតគូរទៅលើបញ្ហាធ្វើប័ណ្ណកម្មសិទ្ធិជូនដល់ប្រជាពលរដ្ឋទាំងនោះទេ ក៏ប៉ុន្តែការដែលមិនទាន់អាចឈានទៅដល់ការវាស់វែងដីធ្លីជូនប្រជាពលរដ្ឋនៅទីនោះបាន ដោយសារតែបញ្ហាទំនាស់ដីធ្លីរវាងអ្នកភូមិជាមួយលោក លន់ ភន់ កំពុងស្ថិតក្នុងរឿងក្ដីក្ដាំនៅឯតុលាការនៅឡើយ។
អភិបាលស្រុកដដែលបានបញ្ជាក់ទៀតថា លោកធ្លាប់បានទៅពិនិត្យមើលដីទាំងនោះ ដោយឃើញថា កន្លែងដែលប្រជាពលរដ្ឋកំពុងទាមទារនោះ គឺផ្នែកខ្លះគាត់មិនទាន់បានកាន់កាប់នៅឡើយ និងកន្លែងខ្លះទៀត គឺបានជាន់គ្នាជាមួយនឹងដីលក់ដូរ ដែលកំពុងមានក្ដីក្ដាំនៅឯតុលាការ៖ «ស្រុកចាំតែដោះស្រាយទេ ក៏ប៉ុន្តែរង់ចាំតុលាការសម្រេចថាយ៉ាងម៉េចសិន។ ព្រោះពាក់ព័ន្ធនឹងការអនុវត្តគោលនយោបាយចាស់ សកម្មភាពថ្មី គឺដីដែលអត់មានទំនាស់។ អីចឹង គាត់មិនអាច គាត់មកទាមទារខុសលាក់ការណ៍ គាត់ធ្វើស្រែកបញ្ជាគេបញ្ជាឯង ទៅមិនកើតទេ។ គាត់មកធ្វើអីចឹងដូចជាបង្ខំឱ្យយើងទៅធ្វើតាមគាត់ហើយ។ មិនទាន់មានគោលការណ៍ណាដែលយើងត្រូវរៀបចំ គឺរង់ចាំការសម្រេចរបស់តុលាការដល់អង្គសេចក្តីសិន តើតុលាការសម្រេចឱ្យភាគីខាងណា? ដីហ្នឹង បើអត់មានទំនាស់ ទើបក្រុមនិស្សិតស្ម័គ្រចិត្តអាចទៅវាស់វែងបាន ហើយគណៈកម្មការក៏អត់មានសិទ្ធិ ព្រោះរឿងនៅតុលាការ»។
អាជ្ញាធរស្រុកបន្ទាយស្រី បានឱ្យដឹងថា គេកំពុងព្យាយាមពន្យល់ទៅដល់ប្រជាពលរដ្ឋ អំពីរឿងនេះ ដើម្បីឱ្យយល់ដឹងកាន់តែច្រើន។ ជាមួយគ្នានេះដែរ អាជ្ញាធរស្រុកបានអំពាវនាវដល់អង្គការសង្គមស៊ីវិលផ្សេងៗ ឱ្យជួយសហការ ដើម្បីពន្យល់ប្រជាពលរដ្ឋឱ្យបានយល់ចំពោះបញ្ហានេះផងដែរ៕
No comments:
Post a Comment
yes