ភ្នំពេញ: សមាជិករដ្ឋសភា ៩២ រូប ក្នុងចំណោមសមាជិករដ្ឋសភាសរុប ១២៣ រូប នាព្រឹកថ្ងៃសុក្រ ទី១៥ ខែកុម្ភៈ ឆ្នាំ២០១៣ បានបើកកិច្ចប្រជុំពិភាក្សា និងអនុម័តលើសេចក្តីព្រាងច្បាប់ ស្តីពីវិសោធនកម្ម មាត្រា៩ និងមាត្រា១០ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា។
សេចក្តីថ្លែងហេតុ របស់សម្តេចនាយករដ្ឋមន្ត្រី ហ៊ុន សែន ផ្ញើជូនរដ្ឋសភា ចុះថ្ងៃទី១៤ ខែមករា ឆ្នាំ២០១៣ បង្ហាញថា មាត្រាទាំងពីរ ដែលស្នើសុំវិសោធនកម្មនេះ ដោយយោងតាមការចាំបាច់ ក្នុងការគ្រប់គ្រងមន្ត្រីរាជការស៊ីវិល។ ម្យ៉ាងទៀត ខ្លឹមសារសំខាន់នៃការស្នើសុំធ្វើវិសោធនកម្មមាត្រាទាំងពីរនេះ គឺដើម្បីឲ្យរាជរដ្ឋាភិបាលងាយស្រួលក្នុងការចេញលិខិតបទដ្ឋានគតិយុត្តពាក់ព័ន្ធនឹងការគ្រប់គ្រងមន្ត្រីរាជការស៊ីវិល មានលក្ខណៈចាំបាច់ និងអាចបត់បែនបាន។
ក្នុងសេចក្តីថ្លែងហេតុ សម្តេចនាយករដ្ឋមន្ត្រី ហ៊ុន សែន បានជម្រាបជូនរដ្ឋសភាថា ការស្នើសុំធ្វើវិសោធនកម្មមាត្រាទាំងពីរ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា មានគោលបំណង ៣ ចំណុច។ ទី១-ធ្វើឲ្យច្បាប់ពាក់ព័ន្ធនឹងការគ្រប់គ្រងមន្ត្រីរាជការស៊ីវិល មានភាពរលូនជាមួយច្បាប់ពាក់ព័ន្ធនឹងការគ្រប់គ្រងមន្ត្រីក្រុមនីតិប្បញ្ញត្តិ។ ទី២-រក្សាលក្ខណៈត្រឹមត្រូវនៃលិខិតបទដ្ឋានគតិយុត្តមួយចំនួន ពាក់ព័ន្ធនឹងការគ្រប់គ្រងមន្ត្រីរាជការស៊ិវិល ដែលមានស្រាប់ ហើយដែលបានចែងឡើងក្នុងគោលដៅអនុវត្តខ្លឹមសារ នៃមាត្រា ដែលត្រូវស្នើសុំធ្វើវិសោធនកម្មនេះ និងទី៣-បើកផ្លូវដល់ការកសាង និងកែសម្រួលលិខិតបទដ្ឋានគតិយុត្តមួយចំនួនទៀត ដែលពាក់ព័ន្ធនឹងខ្លឹមសារនៃមាត្រា ដែលត្រូវស្នើសុំធ្វើវិសោធនកម្មនេះផងដែរ។
នេះជាលើកទី២ នៃការស្នើសុំធ្វើវិសោធនកម្មច្បាប់សហលក្ខន្តិកៈមន្ត្រីរាជការស៊ីវិល បន្ទាប់ពីការស្នើសុំធ្វើវិសោធនកម្ម មាត្រា ៥១ នៃច្បាប់នេះ ក្នុងឆ្នាំ១៩៩៩។
ជាការកត់សម្គាល់ សមាជិករដ្ឋសភាគណបក្សប្រឆាំង មិនបានលើកដៃគាំទ្រឲ្យរដ្ឋសភា លើកយកសេចក្តីព្រាងច្បាប់នេះមកពិភាក្សា និងអនុម័តទេ។ លោក យឹម សុវណ្ណ សមាជិករដ្ឋសភា មកពីគណបក្សសមរង្ស៊ី បានលើកឡើងក្នុងអង្គប្រជុំរដ្ឋសភា នៅព្រឹកនេះថា ការយកចិត្តទុករបស់រាជរដ្ឋាភិបាល លើមន្ត្រីរាជការ មិនសំខាន់លើវិសោធនកម្មមាត្រាទាំងពីរ ក្នុងច្បាប់សហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជាឡើយ សំខាន់គឺរាជរដ្ឋាភិបាល ត្រូវគិតគូរលើប្រាក់ខែមន្ត្រីរាជការ ដែលនៅ និងមានគម្លាតគ្នាយ៉ាងច្រើន រវាងប្រធាននាយកដ្ឋាន និងប្រធានការិយាល័យ ឬក៏បុគ្គលិកក្នុងមន្ទីរក្រសួង ក្នុងស្ថាប័នរាជរដ្ឋាភិបាល។
យ៉ាងណាក៏ដោយ លោក ជាម យៀប សមាជិករដ្ឋសភា មកពីគណបក្សប្រជាជនកម្ពុជា យល់ឃើញផ្ទុយពីសមាជិករដ្ឋសភាគណបក្សប្រឆាំង។ លោក ជាម យៀប គាំទ្រ ឲ្យរដ្ឋសភា លើកយកសេចក្តីព្រាងច្បាប់នោះមកពិភាក្សា និងអនុម័ត នៅព្រឹកនេះ។
ជាការកត់សម្គាល់ សមាជិករដ្ឋសភាគណបក្សប្រជាជនកម្ពុជា មានសំឡេងលើសលប់ ក្នុងការសម្រេច និងលើកយកសេចក្តីព្រាងច្បាប់មកពិភាក្សា និងអនុម័ត ទោះបីជាគណបក្សប្រឆាំងមិនគាំទ្រក៏ដោយ។
ទីបំផុតទៅ សេចក្តីព្រាងច្បាប់ ស្តីពី វិសោធនកម្ម មាត្រា៩ និងមាត្រា១០ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល នៃព្រះរាជាណាចក្រកម្ពុជា ត្រូវបានរដ្ឋសភា អនុម័ត ដោយសំឡេង ៨៥ លើ ៩៤ រូប៕
No comments:
Post a Comment
yes