បន្ទាប់ពីស្នូរកាំភ្លើងធំ លើកទី៣ បានលាន់ឡើង ព្រះបរមសព ព្រះបរមរតនកោដ្ឋ កំពុងត្រូវបានរំលាយដោយព្រះអគ្គី ថ្វាយដោយសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះវររាជមាតាជាតិខ្មែរ មុនីនាថ សីហនុ។
ចាប់ពីថ្ងៃទី១ ខែកុម្ភៈ ដែលជាថ្ងៃព្រះរាជពិធីដង្ហែ មានប្រជាជនរាប់សែននាក់ បានអង្គុយរង់ចាំក្បួនដង្ហែ តាមដងផ្លូវដោយស្លៀកពាក់សំលៀកបំពាក់កាន់ទុក្ខ និងកាន់ព្រះឆាយាល័ក្ខណ៍សម្ដេចតា។ ប្រជាជនភាគច្រើនបានក្ដុកក្ដួល ខ្លះទៀតបានទ្រហោយំ ពេលបានឃើញក្បួនដង្ហែ។
ដោយឡែកថ្ងៃទី២ និងទី៣ រាជរដ្ឋាភិបាល បានអនុញ្ញាតឲ្យប្រជានុរាស្ត្រ បានចូលថ្វាយបង្គំព្រះមញ្ជូសាដែលបានដាក់តម្កល់ នៅលើព្រះមេរុ បន្ទាប់ពីថ្វាយព្រះភ្លើង នៅថ្ងៃទី៥ នឹងមានព្រះរាជពិធីរើសព្រះបរមធាតុ ថ្ងៃទី៦ នឹងដង្ហែព្រះបរមធាតុទៅទន្លេចតុមុខ និងថ្ងៃទី៧ នឹងដង្ហែព្រះបរមធាតុ ទៅកាន់ព្រះវិហារព្រះកែវមរកត៕
No comments:
Post a Comment
yes