ប្រជាពលរដ្ឋ ស្រែកយំសោកស្ដាយជាពន់ពេកនៅក្នុងពិធីដង្ហែព្រះបរមសព
ព្រះករុណា ព្រះបរមរតនកោដ្ឋសម្ដេចឪកាលពីថ្ងៃសុក្រ
ភំ្នពេញៈ ទឹកនេត្រាបានចាប់ផ្តើមហូរស្រក់លើផែនផ្ទាល់របស់ពលរដ្ឋស្ទើរតែគ្រប់រូបនៅក្រោមកម្ដៅអាកាសធាតុក្តៅហែងខណៈដែលព្រះបរមមញ្ជូសាត្រូវបានរំកិលចេញពីលើព្រះទីនាំងបុស្បុកទៅតម្កល់នៅលើព្រះទីនាំងរំកិលព្រះបរមសព ព្រះករុណាព្រះបាទសម្តេចព្រះរោត្តម សីហនុ នៅវាលព្រះមេរុដើម្បីថ្វាយព្រះភ្លើង។
ដៃម្ខាងកាន់ផ្កាឈូកធ្វើពីប្លាស្ទិកនិងដៃម្ខាងទៀតកាន់ព្រះឆាយាល័ក្ខណ៍ព្រះមហាវីរក្សត្រ ព្រះបាទ នរោត្តម សីហនុ អ្នកស្រី សូន ចាន់ថុន អាយុ ៦៥ ឆ្នាំមកពីខេត្តតាកែវ បានមានប្រសាសន៍ថាអ្នកស្រីតែងតែស្រក់ទឹកភ្នែក នៅពេលឮព្រះនាម សម្តេចឪនិងមើលព្រះឆាយាល័ក្ខណ៍ព្រះអង្គ ព្រោះអ្នកស្រីអាណិតសម្តេចឪព្រះអង្គគួររស់នៅយូរជាងនេះ។ អ្នកស្រីបានបន្ថែមថា៖«សម្តេចឪខ្ញុំជាព្រះមហាក្សត្រល្អដែលមិនអាចរកព្រះមហាក្សត្រដទៃទៀតមកប្រៀបធៀបបានឡើយព្រះអង្គធ្វើឲ្យប្រទេសមានសន្តិភាព ហើយព្រះអង្គស្រឡាញ់ប្រជានុរាស្រ្តខ្លាំងណាស់»។
ទឹកភ្នែកស្រក់ចុះលើផ្ទៃមុខស្រអែមជ្រួញ ពេលអ្នកស្រីឃើញព្រះបរមរតនកោដ្ឋត្រៀមដាក់លើទីលានថ្វាយព្រះភ្លើងអ្នកស្រីចាន់ថុន បានថ្លែងថា៖ «ចាប់ពីថ្ងៃនេះតទៅខ្ញុំឃើញតែព្រះឆាយាល័ក្ខណ៍សម្តេចឪតែប៉ុណ្ណោះ។ ខ្ញុំលែងបានឃើញសម្តេចឪគង់នៅព្រះបរមរាជវាំងនិងផ្តល់ព្រះរាជអំណោយដល់ប្រជានុរាស្រ្តព្រះអង្គទៀតទេ»។
ទុក្ខសោកទាំងនេះមិនបានកើតឡើងលើតែអ្នកស្រីម្នាក់ប៉ុណ្ណោះនោះទេគឺបានកើតឡើងចំពោះប្រជាពលរដ្ឋកម្ពុជាទូទាំងប្រទេសដែលអាណិតនិងស្រណោះព្រះបរមរតនកោដ្ឋមិនអាចបំភ្លេចបាន។ មកពីខេត្តកំពង់ស្ពឺស្នាក់នៅវត្តឧណ្ណាលោមដោយកាន់កាបូបខោអាវ និងមុងអ្នកស្រី ភិន លាភ អាយុ៥៥ឆ្នាំ បានថ្លែងថា មូលហេតុដែលអ្នកស្រីមកពីខេត្តដើម្បីចូលរួមក្នុងពិធីនេះ ព្រោះអ្នកស្រីចង់មកអមដំណើរថ្ងៃចុងក្រោយរបស់សម្តេចឪ។អ្នកស្រីបានបន្តថា៖ «ខ្ញុំចង់ឃើញព្រះភក្រ្តព្រះអង្គចុងក្រោយ ប៉ុន្តែខ្ញុំមិនដឹងទេថាតើ គេនឹងបើកបង្ហាញព្រះភក្រ្តព្រះអង្គឲ្យរាស្ត្រមើលឬអត់ទេ»។
បើទោះបីជាអ្នកស្រីគ្មានសាច់ញាតិនៅភ្នំពេញប៉ុន្តែអ្នកស្រីគ្រោងស្នាក់នៅវត្តរហូតដល់ពិធីបុណ្យចប់សព្វគ្រប់ព្រោះអ្នកស្រីចង់ធ្វើគ្រប់យ៉ាងឲ្យចប់។អ្នកស្រីបានបន្ថែមថា៖ «ខ្ញុំបារម្ភខ្លាំងណាស់ ខ្ញុំមិនដឹងទេថាតើមានអ្វីកើតឡើងចំពោះប្រទេសព្រះអង្គ បន្ទាប់ពីព្រះអង្គសោយទិវង្គតប៉ុន្តែខ្ញុំសូមឲ្យដួងវិញ្ញាណក្ខន្ធសម្តេចឪបន្តជួយប្រទេសនេះ»។
យកដៃជូតទឹកភ្នែកអ្នកស្រី ភិន លាភបានថ្លែងថា អ្នកស្រីនឹងមិនភ្លេចសម្តេចឪទេអស់មួយជីវិតបើទោះបីជាព្រះអង្គសោយទិវង្គតក៏ដោយសម្តេចឪនៅតែស្ថិតនៅក្នុងដួងចិត្តអ្នកស្រីជានិច្ច។ អ្នកស្រីបានបន្តថា៖ «ខ្ញុំនឹងទិញខ្សែភាពយន្តដែលព្រះអង្គធ្លាប់ដើរតួយកទុកមើល ព្រោះខ្ញុំនឹងនៅតែសើចញញឹមជាមួយនឹងស្នាមញញឹមរបស់ព្រះអង្គ»។
ថ្លែងចេញពីស្ពានព្រះមុនីវង្សអ្នកស្រី យឹម សុខា អាយុ៥០ឆ្នាំជាអាជីវករលក់ខោអាវបានថ្លែងថា៖ «ខ្ញុំដូចជារន្ធត់ចិត្ត ពេលដែលឃើញគេរំកិលព្រះបរមសពចេញ។ ខ្ញុំនឹកឃើញថាព្រះអង្គនឹងលែងគង់ជាមួយប្រជានុរាស្ត្ររបស់ព្រះអង្គទៀតហើយ។ ពេលនេះយើងបាត់បង់នូវវីរបុរសរបស់ជាតិម្នាក់ទៀតហើយ»។
ក្នុងទឹកមុខស្រពាប់ស្រពោន យកដៃបាំងមុខ ហាក់ដូចជាមិនចង់ឲ្យគេដឹងថាកែវភ្នែកគាត់ដក់ដោយទឹកភ្នែកអ្នកស្រី ជី សុភី អាយុ៣៨ឆ្នាំ ថ្លែងថា ទិដ្ឋភាពនៃព្រះរាជពិធីធ្វើឲ្យអ្នកស្រី នឹកឃើញវង្សភក្រ្តព្រះអង្គនរោត្តមសីហនុ ក្នុងព្រះរាជសកម្មភាពដ៏ថ្លៃថ្លា ដើម្បីការពារជាតិមាតុភូមិរហូតដល់ដណ្តើមបានឯករាជ្យពីអាណានិគមបារាំង។ អ្នកស្រីថ្លែងថា៖ «ខ្ញុំមានអារម្មណ៍ក្តុកក្តួលក្នុងចិត្តបំផុត នឹកចង់តែស្រក់ទឹកភ្នែកទេ។ សម្តេចឪលែងនៅជាមួយកូនចៅទៀតហើយ»។
ក្នុងដៃ មានកាន់ឡាមសម្រាប់កោរសក់ ដែលលោកតាហាក់ត្រៀមរួចស្រេចសម្រាប់កោរសក់បួស៧ថ្ងៃ តមសាច់សម្រាប់បង្ហាញពីទឹកចិត្តនៃការដឹងគុណចំពោះព្រះមហាវីរក្សត្រ។ លោកតា សោម ធរ វ័យ៨០ឆ្នាំបានបើកបរម៉ូតូមករាជធានីដោយខ្លួនឯងពីស្រុកកៀនស្វាយខេត្តកណ្តាលថ្លែងថាលោកតាធ្លាប់ជាមន្ត្រីក្រសួងពាណិជ្ជកម្មកាលឆ្នាំ១៩៥៦ ដូច្នេះលោកតានឹកឃើញសម័យសម្តេចឪដែលលោកតាធ្លាប់ឆ្លងកាត់។ លោកបានឲ្យដឹងទៀតថា៖ «ខ្ញុំមិនអាចរង់ចាំក្រុមគ្រួសារខ្ញុំបានទេ ខ្ញុំត្រូវតែជិះម៉ូតូមកម្នាក់ឯង តាំងពីម៉ោង៦កន្លះមកដល់ទីនេះ។ ខ្ញុំកោរម្តងហើយ ឥឡូវខ្ញុំកោរលើកទីពីរ ដើម្បីឧទ្ទិសជូនព្រះបាទសីហនុ ព្រោះព្រះអង្គបានលះបង់ដើម្បីជាតិច្រើនណាស់។ អង្គុយក្តៅប៉ុណ្ណឹងមិនអីទេ សម្តេចឪបានតស៊ូពុះពារក្តៅជាងយើងរាប់រយដងទៅទៀត ព្រះអង្គមិនគិតពីខ្លួនឯងផង»។
សម្រាកនៅស្តង់គ្រូពេទ្យនៅវត្តបទុមដើម្បីទទួលការព្យាបាល លោកយាយ លី ញ៉ាញ់ អាយុ៧៥ឆ្នាំមកស្រុកស្អាង ខេត្តកណ្តាលបានថ្លែងថា បើទោះបីជាសុខភាពលោកយាយ មិនល្អក៏ដោយ ក៏ប៉ុន្តែលោកយាយនៅតែមកដើម្បីចូលរួមនៅក្នុងពិធីបុណ្យព្រោះលោកយាយចង់ថ្លែងអំណរគុណចំពោះព្រះអង្គនៅថ្ងៃចុងក្រោយ។លោកយាយបានបន្ថែមថា៖ «ខ្ញុំមិនខ្វល់ជាមួយនឹងអ្នកមួយចំនួនដែលមិនស្រឡាញ់សម្តេចឪខ្ញុំឡើយ ប៉ុន្តែ ខ្ញុំស្រឡាញ់សម្តេចឪមួយជីវិត ព្រោះព្រះអង្គស្រឡាញ់ប្រជានុរាស្រ្តព្រះអង្គជាងជីវិតព្រះអង្គ ព្រះអង្គមិនដែលភ្លេចប្រជាជនក្រីក្រទេ»។
សំឡេងនិយាយឮតិចៗខ្សាវៗខណៈពេលកំពុងដេកលើគ្រែរបស់គ្រូពេទ្យលោកយាយ លី ញ៉ាញ់ បានថ្លែងថា អ្វីដែលលោកយាយមិនអាចបំភ្លេចបានសមិទ្ធផលរបស់សម្តេចឪគឺអំពីការទាមទារប្រាសាទព្រះហារពីថៃចម្រៀង និងខ្សែភាពយន្តរបស់ព្រះអង្គ។
ទឹកភ្នែកស្រក់ចុះពេលនិយាយអំពីព្រះនាមព្រះមហាក្សត្រ នរោត្តម សីហនុ លោក គួន ជា អាយុ៦៤ ឆ្នាំ មកពីខេត្តឧត្តរមានជ័យបានថ្លែងថា មូលហេតុដែលលោកមកចូលរួមពិធីនេះ ព្រោះលោកចង់ថ្លែងអំណរគុណព្រះមហាក្សត្រ ព្រោះព្រះមហាក្សត្រជួយប្រជានុរាស្រ្តច្រើនខុសពីមន្រ្តីជាន់ខ្ពស់ដទៃទៀត។ លោកបានបន្ថែមថា៖ «ប្រសិនបើអ្នកផ្សេងក្រៅពីព្រះមហាក្សត្រ ខ្ញុំនឹងមិនមកចូលរួមក្នុងពិធីនេះទេព្រោះខ្ញុំនៅឆ្ងាយពីភ្នំពេញ»។
លោកបានថ្លែងឲ្យដឹងទៀតថាលោកលែងបានឃើញព្រះភក្ត្ររបស់ព្រះអង្គទៀតហើយចាប់ពីថ្ងៃនេះតទៅគឺលោកបានឃើញតែស្នាព្រះហស្តជាកេរដំណែលរបស់ព្រះអង្គដែលបន្សល់ទុកឲ្យក្មេងជំនាន់ក្រោយប៉ុណ្ណោះ។លោកបានថ្លែងឲ្យដឹងទៀតថា៖«ខ្ញុំសង្ឃឹមថាអ្នកដឹកនាំជំនាន់ក្រោយនឹងយកគំរូតាមព្រះអង្គគឺគិតគូរដល់ប្រយោជន៍ប្រជារាស្ត្រជាធំមុននឹងធ្វើអ្វីមួយពីព្រោះសម្តេចលោកពុំដែលធ្វើឲ្យរាស្ត្រលំបាកនោះទេ»។
សូមរំឭកថាកាលពីថ្ងៃទី១ ខែកម្ភៈ ព្រះបរមសព ព្រះករុណា សម្តេចព្រះមហាវីរក្សត្រ ត្រូវបានដង្ហែចេញដំណើរពីព្រះបរមរាជវាំង ឆ្ពោះទៅមុខផ្លូវព្រះអង្គដងកើ តាមតីរវិថីព្រះស៊ីសុវត្ថិ ធ្វើដំណើរត្រង់រហូតដល់ផ្លូវលេខ ៩៤ រួចបត់ឆ្វេង ដោយធ្វើដំណើរជុំវិញរង្វង់មូលរមណីយដ្ឋានវត្តភ្នំ រហូតដល់មហាវិថីព្រះនរោត្តម រួចធ្វើដំណើរត្រង់ដល់រង្វង់មូលវិមានឯករាជ្យ ដោយឆ្លងកាត់មហាវិថីព្រះសីហនុ ហើយបត់ឆ្វេង តាមមហាវិថីសម្តេចសុធារស ចូលវាលព្រះមេរុ។
ក្បួនព្រះរាជពិធីដង្ហែព្រះបរមសព ព្រះករុណា ព្រះបរមរតនកោដ្ឋ នៅមុខព្រះបរមរាជវាំង នាព្រឹកថ្ងៃទី១ ខែកុម្ភៈ កន្លងមកក៏មានផែនសំខាន់ៗ ចំនួន ១១ ផែន ហើយក្នុងមួយផែនមាន មនុស្ស៩០ រូប ក្នុងនោះរួមមាន ផែនមន្ត្រីរាជការ និស្សិតសិស្ស ប្រជាពលរដ្ឋ ទាហានកងរាជអាវុធហត្ថ នគរបាលជាតិ យុវជនកាយរឹទ្ធិ ព្រះសង្ឃ ដូនជី តាអាចារ្យជនជាតិដើមភាគតិច ជនជាតិអ៊ិស្លាម និងក្រុមដង្ហែសព តាមបែបជនជាតិចិនជាដើម។
លោកឡុង ឌីម៉ង់អ្នកនាំពាក្យសាលារាជធានីភ្នំពេញបានមានប្រសាសន៍ឲ្យដឹងថាពិធីដង្ហែព្រះបរមសពព្រះករុណាព្រះបាទសម្តេចព្រះវររាជបិតាសម្តេចព្រះបាទនរោត្តម សីហនុប្រព្រឹត្តទៅដោយរលូនមិនមានបញ្ហាអ្វីមួយកើតមានឡើងឡើយ។ លោកបានថ្លែងបន្តថា៖ «ចំពោះអ្នកចូលរួមទាំងអស់ខ្ញុំមិនមានតួលេខពិតប្រាកដនោះទេ តែចំពោះប្រជាពលរដ្ឋនៅក្នុងទីក្រុងមានជាង៩ម៉ឺននាក់ដែលបានអញ្ជើញមកពីខណ្ឌទាំង៩នៅក្នុងក្រុងភ្នំពេញ»។
ព្រះករុណា ព្រះបាទសម្ដេចព្រះនរោត្ដម សីហនុ អតីតព្រះមហាក្សត្រនៃព្រះរាជាណាចក្រកម្ពុជា ព្រះអង្គប្រសូតនៅថ្ងៃអង្គារ ទី៣១ខែតុលា ឆ្នាំ១៩២២ នៅរាជធានីភ្នំពេញទ្រង់ចូលទិវង្គតនៅថ្ងៃចន្ទ ទី១៥ខែតុលា ឆ្នាំ២០១២ វេលាម៉ោង ១ និង ២០ នាទីយប់ នៅទីក្រុងប៉េកាំង ប្រទេសចិន ដោយព្រះជរាពាធ ក្នុងជន្មាយុ ៩០ព្រះវស្សា។ ព្រះសពរបស់អតីតព្រះមហាក្សត្រ ត្រូវបានដឹកតាមជើងយន្តហោះពិសេសពីប្រទេសចិនមកកម្ពុជា នៅថ្ងៃទី១៧ ខែតុលា ឆ្នាំ២០១២ នៅវេលាម៉ោង៣រសៀល។
តាមការគ្រោងទុកព្រះសពរបស់ព្រះបរមរតនកោដ្ឋនឹងត្រូវថ្វាយព្រះភ្លើងនៅថ្ងៃទី៤ ខែកុម្ភៈ ឆ្នាំ២០១៣នេះហើយព្រះបរមធាតុនិងត្រូវកម្កល់នៅព្រះវិហារព្រះកែវមរកត។ នៅក្នុងពិធីថ្វាយព្រះភ្លើងដល់ព្រះករុណាព្រះបរមរតនកោដ្ឋនោះព្រះករុណាជាអម្ចាស់ជីវិតលើត្បូងព្រះបាទនរោត្តមសីហមុនី និងសម្តេចព្រះមហាក្សត្រិយ៍ព្រះវររាជមាតាជាតិខ្មែរសព្វព្រះរាជហឫទ័យ ប្រោសព្រះរាជទានដោះលែងអ្នកទោសនិងបន្ធូរបន្ថយទោសដល់ទណ្ឌិតចំនួន៤៩៦នាក់ ក្នុងនោះ អ្នកទោស៤១២នាក់ ត្រូវលើកលែងទោស និងអ្នកទោស៨៤នាក់ត្រូវបន្ធូរបន្ថយទោស៕
No comments:
Post a Comment
yes