ស្ត្រីចំណាស់ម្នាក់កាន់ព្រះឆាយាល័ក្ខណ៍សម្តេចឪយំសោកសង្វេគ
ចំពោះការយាងចូលទិវង្គត
មេដឹកនាំក្នុងសម័យ«សង្គមរាស្ត្រនិយម»នឹងបាត់ព្រះកាយជារៀងរហូតពីពិភពផែនដីនេះហើយ នៅពេលដែលព្រះរាជពិធីថ្វាយព្រះភ្លើងព្រះបរមសពរបស់ព្រះអង្គ ប្រព្រឹត្តទៅនៅវាលព្រះមេរុ នៅថ្ងៃចន្ទទី៤ ខែកុម្ភៈនេះបន្ទាប់ពីព្រះអង្គ បានសោយទិវង្គត កាលពីថ្ងៃទី១៥ ខែតុលាឆ្នាំ ២០១២ កន្លងមក។
សង្គមរាស្ត្រនិយម គឺជាពាក្យដ៏ពេញនិយម ដែលប្រជាពលរដ្ឋខ្មែរភាគច្រើនចងចាំជាទូទៅពីព្រោះវាជាសម័យកាលដ៏រុងរឿងមួយ ក្រោមការដឹកនាំរបស់សម្តេចឪ នរោត្តម សីហនុ មុនពេលដែលកម្ពុជា ធ្លាក់ចូលក្នុងភ្នក់ភ្លើងសង្គ្រាមដ៏សន្ធោសន្ធៅស្ទើរបាត់រូបនៅក្នុងរយៈពេលជាច្រើនទសវត្សរ៍កន្លងមកនេះ។
បើទោះបីជាសម្តេចឪ បានអវត្តមានពីព្រះរាជាណាចក្រដែលនៅសេសសល់ដ៏តូចមួយនេះក្តី ក៏ព្រះអង្គ បានបន្សល់ទុកនូវស្នាព្រះហស្តជាច្រើនអនេក សម្រាប់ជាឧត្តមប្រយោជន៍របស់ប្រជាជាតិខ្មែរ ហើយអ្វីដែលជនកម្ពុជាវ័យចំណាស់ជាច្រើនចងចាំមិនភ្លេចនោះ គឺការដឹកនាំ និងការអភិវឌ្ឍប្រទេសឲ្យរីកចម្រើនយ៉ាងខ្លាំងក្នុងសម័យសង្គមរាស្រ្តនិយម ចន្លោះពីឆ្នាំ១៩៥៤-១៩៧០។
ធំធេងជាងនេះទៅទៀត ការទាមទារឯករាជ្យពីបារាំង ក្នុងឆ្នាំ ១៩៥៣ ដោយគ្មានការបង្ហូរឈាម ការទាមទារប្រាសាទព្រះវិហារពីថៃមកវិញតាមរយៈការប្តឹងទៅតុលាការយុត្តិធម៌អន្តរជាតិទីក្រុងឡាអេក្នុងឆ្នាំ១៩៦២ និងការកៀងគរគ្រប់ភាគីខ្មែរដែលមានជម្លោះឲ្យទៅចុះកិច្ចព្រមព្រៀងសន្តិភាពនៅទីក្រុងប៉ារីស ក្នុងឆ្នាំ១៩៩១ ដែលជាការចាប់ផ្តើមនាំឲ្យមានសុខសន្តិភាព និងការអភិវឌ្ឍស្តារប្រទេសជាតិឡើងវិញរហូតមកដល់សព្វថ្ងៃនេះគឺជាអ្វីដែលប្រជាជាតិខ្មែរបានទទួលស្គាល់ជាទូទៅថាជាមរតកប្រវត្តិសាស្ត្រដ៏ធំធេងមិនអាចកាត់ថ្លៃបានរបស់អង្គសម្តេចឪ នរោត្តម សីហនុ។
លោកស្រី ជា វណ្ណាត អតីតនាយិកា មជ្ឈមណ្ឌលអភិវឌ្ឍន៍សង្គមដែលជាអ្នកតាមដានស្ថានការណ៍នយោបាយកម្ពុជា បានអធិប្បាយថា ក្រោយពីទាមទារឯករាជ្យពីអាណានិគមបារាំងបានដោយជោគជ័យ ដោយគ្មានការបង្ហូរឈាមសម្តេចឪក៏បានដើរតួជាអ្នកសម្របសម្រួលនយោបាយក្នុងតំបន់រវាងប្លុកសេរី និងកុម្មុយនីស្តផងដែរ។ ព្រះអង្គបានដាក់ប្រទេសកម្ពុជា ជាប្រទេសអព្យាក្រឹតមិនចូលបក្សសម្ព័ន្ធ ដោយសារតែព្រះអង្គ មិនចង់ឲ្យមានការប្រទាញប្រទង់គ្នា រវាងប្រទេសមហាអំណាច។
ដោយកើតឡើងធំដឹងក្តី នៅក្នុងសម័យសង្គមរាស្ត្រនិយម លោកស្រី ជា វណ្ណាត ដែលនៅពេលនេះ មានវ័យ៧០ឆ្នាំ បានថ្លែងថា៖
« សម្តេចឪ ជាក្សត្រដ៏ល្អ។ អ្វីដែលព្រះអង្គបានធ្វើ គឺទ្រង់ឲ្យតម្លៃ និងយកព្រះហឫទ័យទុកដាក់មែនទែនទៅលើប្រជានុរាស្ត្រក្រីក្រតោកយ៉ាក។ សម្តេចឪកាន់ជើងរាស្ត្រ។ព្រះអង្គបានធ្វើជាស្តេចតាំងពីណាពីណីមកប៉ុន្តែព្រះអង្គ បានធ្វើខ្លួនឲ្យទៅជាក្សត្រសម័យថ្មី ដោយមិនបានផ្តាច់ព្រះកាយពីប្រជារាស្ត្រឡើយ»។
លោក ជាម យៀបតំណាងរាស្ត្រគណបក្សប្រជាជនកម្ពុជាក៏បានកោតសរសើរសម្តេចឪផងដែរ ដោយលោកមានប្រសាសន៍ថា៖
« ព្រះអង្គបានបូជាអ្វីៗទាំងអស់ ដើម្បីជាតិមាតុភូមិ ចាប់តាំងពីព្រះអង្គបានឡើងសោយរាជ្យ នៅក្នុងឆ្នាំ១៩៤១ នៅពេលព្រះអង្គនៅក្មេង។ ព្រះអង្គបានរៀបចំផែនការទាមទារឯករាជ្យពីបារាំង រហូតទទួលបានជោគជ័យ ដែលប្រជាពលរដ្ឋខ្មែរចង់បាន»។ សម្តេចឪ បានដាក់រាជ្យថ្វាយព្រះបិតារបស់ព្រះអង្គ គឺព្រះអង្គម្ចាស់ នរោត្តម សុរាម្រិត ដើម្បីធ្វើនយោបាយបង្កើតសម័យសង្គមរាស្ត្រនិយម។ លោក ជាម យៀប បានគូសបញ្ជាក់ទៀតថា៖ «ព្រះអង្គមានកម្មវិធីនយោបាយ និងព្រះរាជទស្សនៈយ៉ាងទូលំទូលាយ។ បានឯករាជ្យពីបារាំងហើយ ដោយមិនចង់ឲ្យអ្នកណាមកត្រួតត្រាប្រទេសកម្ពុជាតទៅទៀតនោះ ព្រះអង្គបានធ្វើឲ្យប្រទេសក្លាយជារដ្ឋមិនចូលបក្សសម្ព័ន្ធឯករាជ្យ និងអព្យាក្រឹត»។ សម្តេចឪបានដឹកនាំសម័យសង្គមរាស្ត្រនិយមឲ្យមានការរីកចម្រើនលើគ្រប់វិស័យ រហូតដល់លោកសេនាប្រមុខ លន់ នល់ បានធ្វើរដ្ឋប្រហារទម្លាក់ព្រះអង្គ នៅថ្ងៃទី១៨ ខែមីនាឆ្នាំ១៩៧០។
លោកស្រីជា វណ្ណាតបានរំឭកពីព្រះរាជបូជនីយកិច្ចរបស់ព្រះបាទនរោត្តម សីហនុ ដែលបានពន្លត់ភ្លើងសង្គ្រាមនៅកម្ពុជា តាមរយៈការកៀងគរគ្រប់ភាគីខ្មែរ ឲ្យទៅចុះកិច្ចព្រមព្រៀងសន្តិភាពនៅទីក្រុងប៉ារីស។ ស្ត្រីជាអ្នកតាមដានព្រឹត្តិការសង្គមរូបនេះបានគូសបញ្ជាក់ថា៖ «ការចុះកិច្ចព្រមព្រៀងក្រុងប៉ារីសយើងដឹងហើយ មិនមែនធ្វើឡើងតែភាគីខ្មែរនិងខ្មែរទេ រហូតដល់មានបណ្តាប្រទេសចំនួន១៨ប្រទេសផ្សេងទៀត។ ព្រះអង្គគឺជាបិតា ផ្សះផ្សាជាតិ និងបង្រួបបង្រួមជាតិ»។
លោក ជាម យៀប ក៏យល់ស្របផងដែរថា កិច្ចព្រមព្រៀងសន្តិភាពទីក្រុងប៉ារីស គឺជាព្រះរាជសមិទ្ធផលមួយទៀតរបស់សម្តចឪ ប៉ុន្តែលោកអះអាងថា កិច្ចព្រមព្រៀងនេះ កើតឡើងដោយសារតែការផ្តួចផ្តើមគំនិត របស់លោកនាយករដ្ឋមន្ត្រី ហ៊ុន សែន។
តំណាងរាស្ត្រគណបក្សប្រជាជនកម្ពុជារូបនេះ បានគូសបញ្ជាក់ថា៖«ដោយមើលឃើញតាំងពីឆ្នាំ ១៩៧៩ មកមានការច្បាំងគ្នាងាប់ខ្មែរ។ នៅឆ្នាំ១៩៨៧ សម្តេចតេជោ មានទស្សនៈមួយចង់បង្រួបបង្រួមជាតិដើម្បីបញ្ឈប់ការច្បាំងសម្លាប់ខ្មែរមិនដឹងទៅរកអ្នកណា មានតែទៅរកសម្តេចឪ ក៏ទាក់ទងព្រះអង្គហើយជួបចរចាគ្នា រហូតដល់មានកិច្ចព្រមព្រៀងសន្តិភាពទីក្រុងប៉ារីស»។
លោក សឺន សូប៊ែរ្តិ៍ សមាជិកឧត្តមទីប្រឹក្សា ព្រះមហាក្សត្រ ព្រះបាទ នរោត្តម សីហមុនី ដែលជាកូនប្រុសសម្តេចបវរសេដ្ឋាសឺន សាន បានមានប្រសាសន៍ថា «ស្នាព្រះហស្តរបស់សម្តេចឪធំធេងណាស់»។ បើទោះបីជាសម្តេចឪ បានលាចាកឆ្ងាយពីលោកនេះទៅហើយក្តី ក៏លោកសឺន សូប៊ែរ្តិ៍ សង្ឃឹមថាគោលនយោបាយបង្រួបបង្រួមជាតិនិងផ្សះផ្សាជាតិរបស់ព្រះអង្គ មិនគួរសាបសូន្យនោះទេ។ លោកបានបញ្ជាក់ថា៖«បើមិនមានការបង្រួបបង្រួមជាតិទេ ស្រុកយើងនឹងអន្តរាយ»។
ចំណែកលោក បណ្ឌិត សុខ ទូច សាកលវិទ្យាធិការនៃសាកលវិទ្យាល័យខេមរៈ មិនយល់ស្របទៅនឹងការលើកឡើងដែលថា សម្តេចឪ ជាបិតា បង្រួបបង្រួមជាតិនិងផ្សះផ្សាជាតិនោះទេ ប៉ុន្តែលោកបានចង្អុលបង្ហាញពីមរតកមិនសាបសូន្សរបស់សម្តេចឪ គឺភាពជោគជ័យ ក្នុងការទាមទារប្រាសាទព្រះវិហារពីថៃមកវិញ ការសាងសង់ពហុកីឡដ្ឋានជាតិអូឡាំពិក បើទោះបីជាបច្ចុប្បន្នពហុកីឡដ្ឋានជាតិមួយនេះ ត្រូវគេធ្វើឲ្យចាប់ឆាយរួមតូចក្តី និងសមិទ្ធផលជាច្រើនផ្សេងទៀត រួមទាំងកិច្ចព្រមព្រៀងសន្តិភាពទីក្រុងប៉ារីស ដែលលោក សុខ ទូច បានហៅថា «ជាស្នាដៃ ជាសក្ខីកម្មអមតៈ» របស់សម្តេចឪ។
លោក សុខ ទូចបានលើកតម្កើងការអភិវឌ្ឍនៅក្នុងសម័យសង្គមរាស្ត្រនិយម ប៉ុន្តែហាក់ដូចជាចំអកដល់ការអភិវឌ្ឍប្រទេសនៅក្នុងសម័យបច្ចុប្បន្ន។លោកបានមានប្រសាសន៍ថា៖«ព្រះអង្គបានអភិវឌ្ឍប្រទេសសង់រោងចក្រដោយមិនបានធ្វើឲ្យប៉ះពាល់ដល់ប្រជាពលរដ្ឋដូចការអភិវឌ្ឍបច្ចុប្បន្នឡើយ។ បច្ចុប្បន្នបើគេអភិវឌ្ឍផ្លូវ គេលុបបឹង»។
លោកសឺន សូប៊ែរ្តិ៍ក៏មើលបានឃើញពីចំណុចវិជ្ជមានក្នុងការអភិវឌ្ឍប្រទេសក្រោមការដឹកនាំរបស់សម្តេចឪផងដែរ។ លោកបានគូសបញ្ជាក់ថា៖ «សម័យសម្តេចឪប្រទេសយើងមានការអភិវឌ្ឍច្រើនណាស់។ មានការសង់រោងចក្រខ្លួនឯងជាច្រើនចាប់តាំងពីរោងចក្រស៊ីម៉ងត៍ រហូតដល់រោងចក្រត្រាក់ទ័រ។ ការអភិវឌ្ឍប្រទេសសម័យសម្តេចឪមិនប៉ះពាល់រាស្ត្រ និងធនធានធម្មជាតិទេ គឺខុសគ្នាស្រឡះពីការអភិវឌ្ឍឥឡូវ»។
លោក សូប៊ែរ្តិ៍ បានជំរុញឲ្យរាជរដ្ឋាភិបាលដែលដឹកនាំដោយគណបក្សប្រជាជនកម្ពុជាបច្ចុប្បន្នយកគំរូតាមសម្តេចឪ ក្នុងការអភិវឌ្ឍប្រទេសដោយលោកគូសបញ្ជាក់ថា ការអភិវឌ្ឍគួរតែសម្រាប់ទាំងអស់គ្នា មិនមែនសម្រាប់តែឈ្មួញនោះទេ។
យ៉ាងណាក្តី លោក ជាម យៀប បានមានប្រសាសន៍ថា សម័យសង្គមរាស្ត្រនិយម និងសម័យបច្ចុប្បន្ន គឺមានភាពខុសគ្នាស្រឡះ។ លោកគូសបញ្ជាក់ថា សម័យសង្គមរាស្ត្រនិយម កម្ពុជា មានប្រជាជនប្រមាណតែពី៥-៦ លាននាក់ប៉ុណ្ណោះ ហើយដីក៏មានច្រើនធនធានធម្មជាតិក៏មានច្រើន។ប៉ុន្តែសម័យបច្ចុប្បន្ន វាខុសគ្នា។ លោកបញ្ជាក់ថា៖«សម័យប៉ុលពត បានបំផ្លិចបំផ្លាញដល់ឫសគល់តាំងពីសេដ្ឋកិច្ច ប្រពៃណី ទំនៀមទម្លាប់ វប្បធម៌ អប់រំ...គឺបំផ្លាញទាំងអស់»។ លោកគូសបញ្ជាក់ទៀតថា៖«សម័យសម្តេចឪដីធំ ប្រជាពលរដ្ឋតិច។ យើងចង់ធ្វើតាមសង្គមរាស្ត្រនិយមណាស់ ចង់ឲ្យជាតិបានសុខសាន្ត សេដ្ឋកិច្ចរីកចម្រើន ដើម្បីរំដោះភាពក្រីក្រ ឲ្យបានឆាប់រហ័ស»។ លោកជាម យៀប បានឲ្យដឹងថា គណបក្សប្រជាជនកំពុងតែដំណើរការនូវកម្មវិធីនយោបាយល្អៗដើម្បីអភិវឌ្ឍជាតិ។
ព្រះអង្គម្ចាស់ស៊ីសុវត្ថិ ធម្មិកោ អតីតលេខាផ្ទាល់របស់សម្តេចឪបានមានបន្ទូលក្នុងបទសម្ភាសមួយដែលត្រូវបានចុះផ្សាយនៅក្នុងសៀវភៅ«ព្រះបាទនរោត្តម សីហនុ ឥស្សរជនអមតៈ» ដែលត្រូវបានចែកចាយពីថ្ងៃព្រហស្បតិ៍ថា សម្តេចឪ គឺជាក្សត្រដែលក្រីក្រជាងគេបំផុតនៅលើលោក។ ព្រះអង្គម្ចាស់មានបន្ទូលថា៖«បើតាមអ្វីដែលខ្ញុំដឹង ព្រះរាជបិតា សម្តេចព្រះនរោត្តម សីហនុ មានព្រះរាជទ្រព្យបី។ ព្រះរាជទ្រព្យទី១គឺជាប្រាក់អឺរ៉ូ ចំនួន២ម៉ឺនអឺរ៉ូ(ប្រមាណ២ម៉ឺន៥ ពាន់ដុល្លារ) នៅធនាគារក្នុងប្រទេសបារាំង។ ព្រះរាជទ្រព្យទី២ គឺព្រះរាជដំណាក់នៅក្បែរគេហដ្ឋានសម្តេចតេជោ ហ៊ុន សែន ដែលសព្វថ្ងៃនេះជាស្ថានទូតកូរ៉េខាងជើង។ និងទី ៣ គឺព្រះរាជដំណាក់នៅទីក្រុងកែប។ ព្រះរាជដំណាក់នេះ គឺស្ថិតនៅក្រោមការគ្រប់គ្រងរបស់ព្រះបរមរាជវាំង»។
ការខ្សត់ព្រះរាជទ្រព្យរបស់សម្តេចឪនេះត្រូវបានលោកស្រី ជាវណ្ណាត អធិប្បាយថា ជាចំណុចពិសេសខុសពីគេ នៅក្នុងចំណោមក្សត្រ និងមេដឹកនាំនៅលើពិភពលោក ដោយសារតែព្រះអង្គគិតពីផលប្រយោជន៍ជាតិ ជាងផលប្រយោជន៍សួនតួផ្ទាល់ព្រះកាយរបស់ព្រះអង្គ។
តាមការលើកឡើងរបស់ឥស្សរជនខាងលើនេះ អាចបញ្ជាក់បានថា ព្រះកិត្តិនាមរបស់សម្តេចឪ នឹងស្ថិតនៅជាអមតៈទោះបីជាព្រះកាយរបស់ព្រះអង្គដែលត្រូវថ្វាយព្រះភ្លើងនៅថ្ងៃនេះក្តី៕
No comments:
Post a Comment
yes