លោក ម៉ម សូណង់ដូ ពេលឡើងសាលាឧទ្ធរណ៍កាលពីម្សិលមិញ។
មានប្រជាពលរដ្ឋជាច្រើនមកពីបណ្ដាខេត្ត-ក្រុងនានា ធើ្វដំណើរមករាជធានីភ្នំពេញដើម្បីគាំទ្រលោក
ភ្នំពេញៈ សវនាការលើបណ្តឹងទាស់របស់លោក ម៉ម សូណង់ដូ នាយកវិទ្យុសំបុកឃ្មុំ បានចាប់ផ្តើមនៅថ្ងៃអង្គារ នៅក្នុងសាលាឧទ្ធរណ៍ដោយមានមនុស្សប្រមាណ៨០០នាក់ មកពីបណ្ដាខេត្តនានានិងរាជធានីភ្នំពេញ មកផ្ដុំគ្នានៅមុខតុលាការនេះ ទាមទារឲ្យដោះលែងគាត់និងជនជាប់ចោទឯទៀតក្នុងរឿងក្តីនេះ។
សវនាការ ជាសាធារណៈពីមិ្សលមិញ មានជនជាប់ចោទបីនាក់ គឺលោក ម៉ម សូណង់ដូ ក្នុងសម្លៀកបំពាក់ស៊ីវិលនិងក្រវាត់កជាប្រធានសមាគមអ្នកប្រជាធិបតេយ្យ ជនជាប់ចោទ ទូច រាម និង កាន់ សុវណ្ណ ស្លៀកពាក់ក្នុងឈុតអ្នកទោសឈរមុខក្រចកសេះ ឆ្លើយទៅកាន់ចៅក្រមជំនុំជម្រះបីរូប ដឹកនាំដោយប្រធានក្រុមប្រឹក្សាចៅក្រម ឃុន លាងម៉េង និងឆ្លើយមុខមេធាវីការពារក្តីរបស់ខ្លួន។
មេធាវីការពារក្តី លោកម៉ម សូណង់ដូ គឺលោក សំ សុគង់ បានបង្ហាញបំណងសុំឲ្យតុលាការលើកពេលកាត់ក្តី ព្រោះថា តុលាការមិនបានកោះហៅជន៧នាក់ ជាសាក្សីសំខាន់ និងមិនដែលមានវត្តមានសូម្បីនៅសាលាដំបូង។
អ្នកទាំងនោះផ្តល់ចម្លើយដាក់បន្ទុកធ្ងន់ធ្ងរលើកូនក្តីលោក ដែលទាមទារឲ្យកូនក្តីលោកតតាំងនៅមុខតុលាការ។
ទោះ យ៉ាងណាបន្ទាប់ពីពិភាក្សាប្រមាណ១៥នាទី និងមានការសួរយោបល់ពីលោក សូណង់ដូ ចៅក្រម ឃុន លាងម៉េងក៏សម្រេចបន្តនីតិវិធីសវនាការ ដោយសំអាងថា៖ «ការពន្យារពេលនឹងខាតពេលវេលា ព្រោះសាក្សីទាំងនោះមានដីកាចាប់ខ្លួន ទោះកោះហៅក៏មិនចូលខ្លួនដែរ»។ ឯការសម្រេចមានការឯកភាពពីជនជាប់ចោទ ម៉ម សូណង់ដូ ដែរ។
លោក ម៉ម សូណង់ដូ អាយុ ៧១ឆ្នាំ ត្រូវចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២ តាមបណ្តឹងចោទប្រកាន់៤ករណី ទាក់ទិននឹងការបង្កើតតំបន់អបគមន៍ ក្នុងភូមិប្រមា ឃុំកំពង់ដំរី ស្រុកឆ្លូង ខេត្តក្រចេះ កាលពីដើមឆ្នាំ២០១២ ហើយសាលាដំបូងរាជធានីសម្រេចផ្តន្ទាទោសដាក់ពន្ធនាគារ ២០ ឆ្នាំ និងពិន័យជាប្រាក់១០លានរៀល កាលពីថ្ងៃទី១ ខែតុលា ឆ្នាំ២០១២។
សាលក្រមនោះក៏មានជនជាប់ចោទ១៣នាក់ទៀត ត្រូវបានផ្តន្ទាទោសពី១០ខែទៅ៥ឆ្នាំ ដែលត្រូវតុលាការកាត់ទោស ប៉ុន្តែ ត្រូវព្យួរទោស ដោយសារពួកគេខ្លះព្រមធ្វើសាក្សីដាក់បន្ទុកលោក សូណង់ដូ។ លើកលែងតែឈ្មោះ ប៊ុន រដ្ឋា ដែលគេចខ្លួននៅក្រៅប្រទេស ត្រូវតុលាការចោទថា ជាមេខ្លោងក្នុងការបង្កើតតំបន់អបគមន៍ នៅភូមិប្រមា ត្រូវកាត់ទោស៣០ឆ្នាំ និងពិន័យប្រាក់៣០លានរៀល សុខ តុង កាត់ទោស១៥ឆ្នាំ និងប៊ុន ឆន កាត់ទោស១៥ឆ្នាំ ដូចគ្នា។
ក្នុង អង្គសវនាការលោក ម៉ម សូណង់ដូ ថា លោកមិនបានប្រព្រឹត្តឬដឹកនាំ ឬក៏ញុះញង់ឲ្យមានតំបន់អបគមន៍ឡើយ ព្រោះលោកមិនដែលបានជាន់ទឹកដីភូមិប្រមាទេ គ្រាន់តែមានមនុស្សមួយចំនួនក្នុងភូមិនោះជាសមាជិកសមាគមអ្នក ប្រជាធិបតេយ្យ មានឈ្មោះសុខ តុង និង ប៊ុន ឆន បានមកសុំជួបលោក សុំពឹងពាក់រឿងដំឡើងអគ្គិសនីឲ្យអ្នកភូមិប្រមា មិនមែនករណីដីធ្លីឡើយ។ រីឯការដោះស្រាយផ្សេងៗ បញ្ហាអ្វីក៏លោកធ្វើស្របទៅតាមច្បាប់ដែរ។
លោកនិយាយថា ៖ «ការចោទប្រកាន់ខ្ញុំ គ្មានមូលដ្ឋានច្បាស់លាស់។ ខ្ញុំគ្មានពាក់ព័ន្ធ ឬស្គាល់ភូមិឃុំនេះទេ។ បើសមាជិកខ្ញុំធ្វើអ្វីខុសច្បាប់ តាមលក្ខន្តិកៈយើង នោះ ជាការទទួលខុសត្រូវរបស់បុគ្គល។ អ្នកដែលបានចោទដាក់ខ្ញុំទាំងប៉ុន្មាន សុទ្ធតែចង់បង្កឲ្យខ្ញុំមានបញ្ហា ហើយខ្លួនរត់គេច»។
លោកបន្ត ថា ៖ «សូមសវនាការពិចារណា បើខ្ញុំឲ្យគេកាប់ទន្រ្ទានដី ធ្លីតើខ្ញុំចំណេញអី ចំណេញភាគរយឬ? អត់ទេ!។ កិច្ចការខ្ញុំគឺធ្វើការបង្ហាត់សមាជិកឲ្យធ្វើខ្លួនល្អ គោរពច្បាប់ កុំប្រើហិង្សា ដើរតាមផ្លូវធម៌ តែទីបំផុតខ្ញុំក្លាយជាជនរងគ្រោះ»។
ទោះយ៉ាងណាលោកនៅតែស្នើ ឲ្យតុលាការកោះហៅសាក្សី ៧នាក់ ឲ្យចូលសវនាការតទល់ជាមួយលោក ដើម្បីបង្ហាញពីភាពស្មោះត្រង់របស់ខ្លួន។
ដោយឡែកជនជាប់ចោទពីរ នាក់ទៀត ទូច រាម និងកាន់ សុវណ្ណ ដែលជាអនក្ខរជន ក៏បានបដិសេធចម្លើយនឹងនគរបាលខេត្តក្រចេះ ព្រោះថា លោកមិនដឹងចម្លើយនោះសរសេរយ៉ាងម៉េច និងត្រូវបានគេបង្ខំឲ្យផ្តិតមេដៃ។
ជនជាប់ចោទ ទូច រាម អាយុ៣៣ឆ្នាំ ប្រាប់ចៅក្រមថា លោកមិនចេះអាននិងត្រូវនគរបាលសំឡុតគំរាមថាមានគេសារភាពអស់ ហើយ «បើមិនឆ្លើយនឹងឆក់»។ លោកថាមិនស្គាល់ ម៉ម សូណង់ដូ និងមិនមែនជាសមាជិកសមាគមអ្នកប្រជាធិបតេយ្យអ្វីឡើយ។
ជនជាប់ចោទ កាន់ សុវណ្ណ អាយុ៥៩ឆ្នាំ ក៏មិនមែនជាសមាជិកសមាគម ឬស្គាល់លោក សូណង់ដូ ដែរ ហើយថា មិនដែលឃើញលោកទៅតំបន់គាត់ម្តងឡើយ។ លោកឆ្លើយថា ឈ្មោះ ប៊ុន រដ្ឋា ជាអ្នកដឹកនាំកិច្ចប្រជុំរកដំណោះស្រាយដីធ្លីជាមួយពលរដ្ឋ។
ដោយទឹកចិត្តពុះកញ្ជ្រោលពលរដ្ឋរាប់រយនាក់បានកាន់បដា រូប ពាក់មួកក្រដាសសរសេរអក្សរដោះលែងលោក ម៉ម សូណង់ដូ ខាងក្រៅតុលាការ និងស្រែកតាមមេក្រូមកបន្ទប់សវនាការសុំឲ្យមានការកាត់ក្តី យុត្តិធម៌ មិនលុះដោយអំណាចអ្នកនយោបាយ។
លោក ឈឹម សុទ្ធ អាយុ៧០ឆ្នាំ មកពីភូមិប្រមា និយាយថា៖«ខ្ញុំមកតវ៉ានៅថ្ងៃនេះ គឺដើម្បីសុំឲ្យសាលាឧទ្ធរណ៍ដោះលែងចៅប្រុសឈ្មោះទូច រាមនិងលោក សូណង់ដូ ឲ្យមានសេរីភាពវិញព្រោះពួកគេមិនបានធ្វើខុសច្បាប់ ដូចដែលអាជ្ញាធរចោទប្រកាន់ទេ»។
លោក អ៊ូច កែល អាយុ៧៤ឆ្នាំ មកពីខេត្តព្រៃវែង បានថ្កោលទោសអំពើដែលអាជ្ញាធរបានធ្វើនេះថា ជាអំពើ«ល្មើសច្បាប់រដ្ឋធម្មនុញ្ញ គំរាមកំហែងសិទ្ធិសេរីភាពពលរដ្ឋនិងដំណើរអភិវឌ្ឍន៍លទ្ធិ ប្រជាធិបតេយ្យនៅកម្ពុជា»។
លោក ផុន ភួង អាយុ៧៣ឆ្នាំ និយាយថា៖«តាមរយៈបណ្ដាញផ្សព្វផ្សាយ ខ្ញុំមិនឃើញសេចក្ដីរាយការណ៍ណាដែលថា អ្នកភូមិបានប្រើកាំភ្លើង តូច ធំ ឬ រថក្រោះ រថពាសដែក ប្រឆាំងតបនឹងកងទ័ពរដ្ឋាភិបាលទេ ក្រៅពីសេចក្ដីរាយការណ៍ថា កម្លាំងរដ្ឋាភិបាលបានប្រើប្រាស់ឧទ្ធម្ភាគចក្រយោធា និងកាំភ្លើងយន្ត បាញ់រះលើអ្នកភូមិបណ្ដាលឲ្យពលរដ្ឋម្នាក់ស្លាប់និងរបួសច្រើននាក់នោះ»។
លោក ម៉ម សូណង់ដូ បានចាកចេញពីបន្ទប់សវនាការអមដោយនគរបាលមកកាន់រថយន្តពន្ធនាគារ និងថ្លែងមកកាន់អ្នកកាសែតថា ៖ «អត់មានបញ្ហាអីទេព្រោះខ្ញុំនិយាយពីការពិត ហើយសង្ឃឹមថាតុលាការនឹងរកយុត្តិធម៌ឲ្យខ្ញុំ។ អ្នកសាក្សីដាក់បន្ទុកខ្ញុំទាំង៧នាក់នេះទុកឲ្យតុលាការសម្រេច ចុះ តែបើពាក់ព័ន្ធត្រូវតែម៉ោ ខ្ញុំមិនអាចថា យុត្តិធម៌ឬអត់ឥឡូវនេះទេ បើអត់មាន៧នាក់។ ពេលចប់ទើបអាចសន្និដ្ឋានបានថា យុត្តិធម៌ឬមិនយុត្តិធម៌»។
លោក អ៊ូ វីរៈប្រធានមជ្ឈមណ្ឌល សិទ្ធិមនុស្សកម្ពុជាថ្លែងថា សវនាការម្សិលមិញពុំមានអ្វីឲ្យភ្ញាក់ផ្អើលឡើយ គឺធ្វើដូចនៅសាលាដំបូងដែរ ព្រោះគ្មានភ័ស្តុតាងដាក់បន្ទុកលោក សូណង់ដូ។
លោកបន្តថា៖ «យើងរង់ចាំមើលថ្ងៃស្អែកទៀត។ នេះជាការសាកល្បងប្រព័ន្ធតុលាការនៅសាលាឧទ្ធរណ៍ យើងចាំមើលប្រព័ន្ធតុលាការកាត់រឿងនេះ។ នេះជារឿងសំខាន់សម្រាប់ប្រព័ន្ធសេរីភាពព័ត៌មាន និងលោកសូណង់ដូ។ បញ្ហាគឺថា តើអាចមានការលូកដៃពីអ្នកនយោបាយលើការវិនិច្ឆ័យរបស់សាលាឧទ្ធរណ៍ឬអត់? យើងនឹងមើលការសម្រេចបន្តទៀត»។
លោក អំ សំអាត ទីប្រឹក្សាបច្ចេកទេសអង្គការសិទ្ធិមនុស្សលីកាដូ និយាយថា ឆ្លងតាមការដេញដោលលោក ម៉ម សូណង់ដូ និងជនជាប់ចោទពីរនាក់ទៀត គឺគ្មានភ័ស្តុតាងណា ដែលថាលោកពាក់ព័ន្ធនឹងបទល្មើសនៅខេត្តក្រចេះឡើយ ហើយការសាកសួរសាក្សី៧នាក់ជារឿងសំខាន់។
លោកថ្លែងថា៖ «ខ្ញុំគិតថាជាការសំខាន់ អ្នកទាំងនោះគួរមានវត្តមានដើម្បីជជែកដេញដោល ឲ្យឃើញថា តើការដាក់បន្ទុកនោះ ពិតទេ។ ព្រឹកនេះ គ្មានភ័ស្តុតាងណាមួយដែលគាត់ពាក់ព័ន្ធទេ។ ដូច្នេះ ខ្ញុំគិតថា សាក្សី៧នាក់នោះ សំខាន់ណាស់»។
បើតាមលោកមេធាវី ស សូវ៉ាន ការពារលោកសូណង់ដូ ឲ្យដឹងថា សវនាការថ្ងៃទី២ នៅព្រឹកនេះ មានមនុស្ស៣នាក់ ជាបណ្តឹងរដ្ឋប្បវេណី ត្រូវសួរដេញដោល តែមិនសំខាន់ ព្រោះបីនាក់នោះមិនទារសំណង។ លោក សូវ៉ាន បន្តថា៖ «ដូច្នេះ គេអាចថា ព្រះរាជអាជ្ញានឹងឆ្លងឆ្លើយជាមួយមេធាវីការពារក្តី តែចៅក្រមស្តាប់ ដូច្នេះស្អែកថ្ងៃសំខាន់។ ថ្ងៃនេះ គេសួរពីព្រឹត្តិការណ៍នៅភូមិប្រមា។ តាមពិតមានតែ ប៊ុន រដ្ឋា ទេ ដែលមានបង្កើតសហគមន៍ឈ្មោះគាត់ មិនពាក់ព័ន្ធនឹងកូនក្តីខ្ញុំឡើយ»។
សវនាការពេញមួយព្រឹកម្សិលមិញ បញ្ចប់នៅម៉ោងជិត១២ថ្ងៃត្រង់ ហើយចៅក្រមប្រកាសបន្តសវនាការនៅព្រឹកថ្ងៃពុធទី៦ មីនានេះបន្តទៀត៕
No comments:
Post a Comment
yes