គ្រឿងចក្រក្រុមហ៊ុន 7NG កាយរំលំផ្ទះប្រជាពលរដ្ឋសហគមន៍ដីក្រហមកាលពីឆ្នាំ ២០០៩
ជាង៤ឆ្នាំ ហើយ អតីតតំបន់ដីក្រហមមិនមានការអភិវឌ្ឍជាមជ្ឈមណ្ឌលពាណិជ្ជកម្ម ទំនើប ដូចការអះអាងរបស់ក្រុមហ៊ុន 7NG ឡើយ។ សង្គមស៊ីវិលបានហៅសកម្មភាពបណ្តេញចេញនេះថា ជាការបំផ្លាញអ្នកក្រ ដើម្បីយកដីលក់ឲ្យអ្នកដែលហ៊ានថ្លៃខ្ពស់
ភ្នំពេញៈ មានរយៈពេលជាង ៤ ឆ្នាំមកហើយបន្ទាប់ពីការបណ្តេញប្រជាជនប្រហែល ៨០០ គ្រួសារ ដោយបង្ខំចេញពីសហគមន៍ដីក្រហម ក្នុងសង្កាត់ទន្លេបាសាក់ សំណង់ខ្នាតតូច ទីបំផុតបានចាប់ផ្តើមនៅលើតំបន់នេះ។
ការ បណ្តេញចេញដោយហិង្សា នៅសហគមន៍ដីក្រហម កាលពីជាង៤ ឆ្នាំមុននេះ គឺជាករណីមួយ ក្នុងចំណោមករណីនៃការបណ្តេញចេញជាច្រើនផ្សេងទៀត ដែលក្រុមអង្គការសង្គមស៊ីវិលហៅថា «ជាការបណ្តេញអ្នកក្រចេញ ដើម្បីយកដីឲ្យអ្នកមាន» ឬ «ជាការអភិវឌ្ឍដែលធ្វើឲ្យប្រជាពលរដ្ឋទឹកភ្នែក»។
កាលពីខែ មុន គ្រោងហាងដុតសាច់ និងហាងផឹកស៊ី បានលេចចេញជារូបរាងនៅផ្នែកខាងកើតនៃសហគមន៍ដីក្រហម ចំណែកឯនៅផ្នែកខាងត្បូងវិញ ដែលបានលក់ឲ្យក្រុមហ៊ុនមួយទៀត គឺកំពុងចាក់គ្រឹះសាងសង់អាហារដ្ឋាន ស៊ូ ស៊ូគីស៊ុប។
សកម្មជនបានថ្លែងកាលពីថ្ងៃអង្គារថា ប៉ុន្តែ នេះពុំមែនលេចចេញនូវសំណង់ច្រើនទេ បើគិតអំពីពេលវេលាកន្លងផុត ចាប់តាំងពីពេលបណ្តេញប្រជាជនចេញពីផ្ទៃដីទំហំ ៣,៧ ហិកតានេះ កាលពីខែមករា ឆ្នាំ២០០៩ ដើម្បីត្រួសត្រាយផ្លូវដល់ក្រុមហ៊ុន7NG ដែលធ្លាប់សន្យាធ្វើការអភិវឌ្ឍទំហំធំនៅកន្លែងនេះ។
លោក ស្រី សុធា ប្រធានក្រុមហ៊ុន 7NG បានថ្លែងកាលពីឆ្នាំ ២០០៩ ថា ក្រុមហ៊ុនមានផែនការសាងសង់មជ្ឈមណ្ឌលពាណិជ្ជកម្ម ទំនើបក្នុងនោះមានសណ្ឋាគារ និងផ្សារទំនើប» នៅដីក្រហម។
ប៉ុន្តែ ខណៈពេលគ្រួសារដែលត្រូវបានបណ្តេញចេញកំពុងតែតស៊ូចិញ្ចឹមជីវិត របស់ពួកគេយ៉ាងត្រដាបត្រដួសនៅកន្លែងផ្សេងទៀត ដីភាគច្រើនដែលក្រុមហ៊ុន 7NG បានសន្យាធ្វើការអភិវឌ្ឍនោះគឺនៅទំនេរ ហើយម្ចាស់ទីតាំង ដែលនឹងមានហាងស៊ុបនោះ បានថ្លែងថា លោកកំពុងតែចង់ជួលក្បាលដីនៅសល់។
ម្ចាស់ដី ម្នាក់នោះដែលបដិសេធមិនបញ្ចេញឈ្មោះខ្លួន ឬឈ្មោះក្រុមហ៊ុន បានថ្លែងថា៖ «ហាងស៊ូគី ស៊ុប ទើបតែជួលដីមួយផ្នែកពីខ្ញុំ។ នៅតែមានដីទំនេរសម្រាប់ជួល»។ លោកបានបន្ថែមថា៖ «យើងជួលដី តម្លៃ៤ដុល្លារ ក្នុងមួយម៉ែត្រការ៉េ ក្នុងមួយខែ»។ លោកបានបន្ថែមថា លោកបានទិញដីពីក្រុមហ៊ុន 7NG កាលពី ២ឬ៣ឆ្នាំមុន។ លោកបានបញ្ជាក់ថា កម្មករទើបតែចាក់គ្រឹះនៅទីតាំង ដែលគេអាចមើលឃើញដុំថ្មធំៗ និងម៉ាស៊ីន។
និយោជិតម្នាក់ នៅក្រុមហ៊ុន CKL Construction ដែលជួលឲ្យសាងសង់ភោជនីយដ្ឋាន បានថ្លែងថា អគារដែលត្រូវសង់នឹងមាន៣ជាន់ ហើយអាចបម្រើភ្ញៀវបាន១០០០ នាក់។
អ្នកគ្រប់គ្រងហាង ស៊ូ ស៊ូគីស៊ុបបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រុមហ៊ុនរបស់លោកកំពុងគិតអំពីការសាងសង់នៅកន្លែងនោះ ប៉ុន្តែលោកបានថ្លែងថា លោកមិនដឹងទេថាតើ ពេលណាគម្រោងនឹងត្រូវបញ្ចប់នោះឡើយ។
បុគ្គលិកនៅការិយាល័យ 7NG នៅកន្លែងបណ្តេញចេញ បានថ្លែងកាលពីម្សិលមិញថា ពួកគេជឿជាក់ថា ដីជាប់ការិយាល័យរបស់ពួកគេ បានលក់ទៅឲ្យក្រុមហ៊ុនដទៃទៀតហើយ ប៉ុន្តែពួកគេមិនអាចនិយាយថា តើពេលណាលក់ឬលក់ក្នុងតម្លៃប៉ុន្មានឡើយ។ ទន្ទឹមនឹងនេះ នៅលើដីភាគខាងកើត ស្រ្តីកម្មករម្នាក់ បានថ្លែងថា អ្នកស្រី ត្រូវបានគេជួលឲ្យមកចម្អិនអាហារ សម្រាប់បុរសរាប់សិបនាក់ ដែលកំពុងសាងសង់ភោជនីយដ្ឋានមួយ ហៅថា B+P BBQ ដែលនឹងបើកទ្វារនៅខាងក្រោយ។ អ្នកស្រីបន្តថា ហាងផឹកស៊ីក្បែរនោះ ហៅថា ផ្ទះតាទេព ក៏នឹងបើកទ្វារក្នុងពេលឆាប់ៗផងដែរ។ ការហៅទូរស័ព្ទទៅម្ចាស់ភោជនីយដ្ឋាន ពុំទទួលបានការឆ្លើយតបឡើយ។
ចុងភៅនោះ បានថ្លែងថា អ្នកស្រីជឿជាក់ថា ម្ចាស់ហាងសាច់អាំង ជួលដីពីក្រុមហ៊ុន 7NG ក្នុងតម្លៃ៣ដុល្លារ ក្នុងមួយម៉ែត្រការ៉េក្នុងមួយខែ។ អ្នកស្រីបានឲ្យដឹងទៀតថា៖«ខ្ញុំបានឮថា ដីទិញមួយម៉ែត្រការ៉េតម្លៃ៤០០០ ដុល្លារ»។ អ្នកស្រីបន្ថែមថា៖ «ខ្ញុំអាណិតអ្នកដីក្រហម។ ប៉ុន្តែក្នុងសង្គមនេះ អ្នកមាន និងអ្នកមានអំណាចតែងតែឈ្នះលើអ្នកក្រ»។
លោក David Pred នាយកប្រចាំប្រទេសនៃអង្គការ ស្ពានគ្មានព្រំដែនបានថ្លែងថា៖ «នេះជាករណីដណ្តើមកាន់កាប់ដីដើម្បីលក់យកចំណេញ»។ លោកបានបន្តថា៖ «គេជីកឫស និងបំផ្លាញជីវិតប្រជាជនរាប់រយគ្រួសារ ហើយដើម្បីអ្វី? គ្មានអ្វីទេ គឺដើម្បីលក់ដីទៅឲ្យអ្នកដែលហ៊ានថ្លៃខ្ពស់។ វាគួរឲ្យស្អប់ខ្ពើម»។
លោក សៀ ភារម្យ នាយកលេខាធិការដ្ឋាននៃក្រុមការងារពិសេសសិទ្ធិលំនៅឋាននិងលោក អៀង វុទ្ធី នៃអង្គការសមភាពកម្ពុជាក៏បានយល់ស្របដូចលោក David Pred ផងដែរ ហើយពួកគេបានបន្ថែមថា ការអភិវឌ្ឍប្រភេទនេះ មិនមែនកំពុងជួយសេដ្ឋកិច្ចកម្ពុជាទេ។ លោក ភារម្យ បានបន្ថែមថា៖ «ការអភិវឌ្ឍគ្មានតម្លាភាព គ្មានគណនេយ្យភាព ដូច្នេះ នោះជាមូលហេតុដែលអ្នកវិនិយោគមិនចាប់អារម្មណ៍ក្នុងការវិនិយោគ នៅកម្ពុជា»។
លោក វុទ្ធី បានបញ្ជាក់ថា៖ «គេនិយាយថា គេនឹងប្រើដីដើម្បីសាងសង់មជ្ឈមណ្ឌលពាណិជ្ជកម្ម ឬនាំភ្ញៀវទេសចរ ឬជួយសេដ្ឋកិច្ចកម្ពុជា ប៉ុន្តែយើងឃើញថា កិច្ចការនោះមិនកើតឡើងទេ ហើយយើងឃើញអ្នកវិនិយោគ មិនចាប់អារម្មណ៍ក្នុងការវិនិយោគលើទ្រព្យនេះទេ»។ ទោះជាយ៉ាងណា លោកបានកត់សម្គាល់ថា បុគ្គលិកក្រុមហ៊ុន7NG បានប្រាប់លោកថា ដីខ្លះត្រូវបានទិញដោយឧកញ៉ា គិត ម៉េង។ លោកបន្តថា ការរិះគន់កាន់តែខ្លាំងជាងមុន ចំពោះការបណ្តេញប្រជាជននៅសហគមន៍ដីក្រហម ទំនងជាបន្ទច់បង្អាក់ដល់វិនិយោគិន។
លោកបន្តថា៖ «ពាណិជ្ជករ ក៏គិតផងដែរ អំពីកិត្តិយសរបស់ខ្លួន ហើយសហគមន៍ដីក្រហម ធ្វើការប្រមូលផ្តុំគ្នាជារៀងរាល់ឆ្នាំ ដើម្បីរំឭកដល់ការប្រើអំពើហិង្សាបណ្តេញពួកគេចេញពីលំនៅឋាន និងដើម្បីបង្ហាញឲ្យមជ្ឈដ្ឋានផ្សេងៗយល់ដឹងអំពីករណីនោះ។ អ្នករាល់គ្នាដឹងអំពីករណីនេះ»។
លោកបន្តថា ការខ្វះចំណាប់អារម្មណ៍គឺជាហេតុផលដែលអាចពន្យល់អំពី មូលហេតុ ដែលកន្លែងនេះនៅតែមានភាពទទេ អស់រយៈពេលជាងបួនឆ្នាំ។ លោកអៀង វុទ្ធី គូសបញ្ជាក់ទៀតថា ការអភិវឌ្ឍទ្រង់ទ្រាយតូចបច្ចុប្បន្នគឺគ្រាន់តែដើម្បីចៀសពី ការរិះគន់ប៉ុណ្ណោះ។
ទន្ទឹមនេះ លោក សៀ ភារម្យ ប្រធានក្រុមការងារពិសេសសិទ្ធិលំនៅឋាន បានថ្លែងថា អតីតប្រជាជនដីក្រហម ដែលត្រូវបានបណ្តេញចេញ នៅកំពុងទទួលរងការឈឺចាប់នៅឡើយពីការបាត់បង់ផ្ទះ និងជីវភាពរស់នៅរបស់ពួកគេ ហើយភាគច្រើនក្នុងចំណោមពួកគេបាន ត្រឡប់មកជួលផ្ទះគេរស់នៅក្នុងទីក្រុងវិញដោយចាកចេញពីតំបន់ បញ្ជូនទៅតាំងទីលំនៅថ្មីក្នុងខេត្តកណ្តាល ដែលមានចម្ងាយប្រមាណ៤០គីឡូម៉ែត្រពីរាជធានីភ្នំពេញ។
លោក ចាន់ វិចិត្រ ជាសមាជិកម្នាក់ ដែលទទួលរងគ្រោះ ដោយសារការបណ្តេញចេញពីសហគមន៍ដី ក្រហមបានថ្លែងកាលពីថ្ងៃអង្គារថា លោកមិនមានការភ្ញាក់ផ្អើលទេ ដែលដីលោកធ្លាប់រស់នៅត្រូវបានគេពុះលក់ និងជួលសម្រាប់ពាណិជ្ជកម្មតូចៗ បើទោះបីជាការអះអាងរបស់ក្រុមហ៊ុន 7NG ពីមុនការបណ្តេញចេញនោះថា ខ្លួននឹងសាងសង់អគារកម្ពស់៥២ ជាន់ក៏ដោយ។
លោកបន្តថា៖ «ខ្ញុំមិនដឹងទេថា ក្រុមហ៊ុន 7NG លក់វាទៅឲ្យអ្នកណានោះទេ ប៉ុន្តែខ្ញុំសូមប្រាប់ពួកគេថា វានៅតែជាដីមានជម្លោះ។ វាជាដីពោរពេញទៅដោយទឹកភ្នែក ដីនៃការឈឺចាប់របស់ប្រជាជន»។ លោកបន្តថា៖ «យើងគិតថា ថ្ងៃណាមួយប្រសិនបើមានការផ្លាស់ប្តូរមេដឹកនាំ យើងនឹងទទួលបានដីនោះត្រឡប់មកវិញ»។
អ្នកគ្រប់គ្រងហាង ស៊ូ ស៊ូគីស៊ុប បានបដិសេធមិនធ្វើអត្ថាធិប្បាយ អំពីបញ្ហានៃការសាងសង់អគារ លើដីដែលត្រូវបានបណ្តេញចេញទាំងបង្ខំនោះទេ។
លោកឡៅ ទិព្វសីហា អគ្គនាយករងនៃអគ្គនាយកដ្ឋានសំណង់ នៅក្រសួងដែនដីនគរូបនីយកម្ម និង សំណង់ និងលោកបេងហុងសុជាតិខេមរ៉ូ អ្នកនាំពាក្យក្រសួងនេះ បានបង្វែរសំណួរពាក់ព័ន្ធនឹងបញ្ហានេះទៅអាជ្ញាធរមូលដ្ឋាន។ យ៉ាងណាក្តីលោកឡូ យុយ អភិបាលខណ្ឌចំការមន បានបដិសេធមិនធ្វើអត្ថាធិប្បាយឡើយ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ បានថ្លែងថា លោកមិនដឹងច្បាស់ទេ អំពីស្ថានភាពពាក់ព័ន្ធនឹងដីដែលជាអតីតសហគមន៍ដីក្រហម។ លោកបន្ថែមថា ក្រុងតម្រូវឲ្យក្រុមហ៊ុនដាក់ផែនការមេសម្រាប់ការអភិវឌ្ឍ តំបន់នោះប៉ុន្តែក្រុមហ៊ុន 7NG មិនបានដាក់ផែនការណាមួយបែបនេះទេ៕
avg antivirus license key 2020
ReplyDeleteByteFence License Key
Viber For Windows Crack