អ្នកភូមិបឹងកក់ តវ៉ាទាមទារឲ្យដោះលែងតំណាងរបស់ពួកគេ នាពេលកន្លងមក
បញ្ហាដីធ្លី និងជម្រកនៅស្រុកខ្មែរ នៅតែជាបញ្ហាដ៏ក្តៅគគុកដដែល។ ភាពខុសគ្នារវាងអ្នកមានដីធ្លី និងអ្នកខ្លះរកតែដីមួយបង្គីក៏មិនបានផង កុំថាឡើយដល់ដីសង់ផ្ទះ។ អ៊ីចឹងធ្វើឲ្យជីវិតរបស់ពួកគាត់អណ្តែតត្រសែតទៅតាមយថាកម្មទៅ យកតែមួយរស់ៗទៅ។ តើហេតុអ្វីបានជាស្រុកសាន្តត្រាណហើយប្រជាពលរដ្ឋនៅតែក្រតោកយាកបែបនេះ ដែលរដ្ឋាភិបាលមិនមានដំណោះស្រាយយូរអង្វែងសោះ?
បើមើលទៅសកម្មភាពតវ៉ា បាតុកម្មអំពីបញ្ហាដីធ្លីនេះកើតឡើងជារៀងរាល់ថ្ងៃ ម្តងនៅមុខផ្ទះសម្តេចតេជោ ម្តងនៅមុខវិមានសន្តិភាព និងទីស្តីការគណៈរដ្ឋមន្ត្រី ម្តងនៅមុខរដ្ឋសភា ម្តងនៅមុខតុលាការ ម្តងនៅមុខក្រសួងមហាផ្ទៃ ម្តងនៅមុខទូតអាមេរិក ម្តងនៅខេត្តជាដើម ជាទូទៅប្រជាពលរដ្ឋរងគ្រោះដោយសារដីធ្លី ធ្វើការតវ៉ាសំណងសមរម្យ ឬក៏សុំដីធ្លីដែលត្រូវគេរឹបអូសយកទៅនោះ នោះគឺរឿងសោកសៅមួយរបស់សង្គម ដែលរ៉ាំរ៉ៃរាល់ថ្ងៃ។
ប្រជាពលរដ្ឋណាដែលបានសំណង ឬក៏បានដីធ្លីមកវិញក៏សប្បាយចិត្តទៅ ហើយអ្នកដែលមិនបាននោះគឺនៅតែយំសោកបោកប្រាណផង ដាក់បណ្តាសាផង ខ្លះក៏ត្រូវអាជ្ញាធរវាយធ្វើបាប ខ្លះសន្លប់ ខ្លះស្លាប់ក៏មាន។ គឺប្រៀបដូចជាសត្វឆ្មាដេក នៅជុំវិញជើងក្រានបាយរាល់ថ្ងៃដោយសង្ឃឹមថាតើថ្ងៃណាវាបានយកខោអាវរបស់វា ដែលយកទៅផ្ញើនៅក្នុងជើងក្រាននោះ។
ពេលណាចង់បង្ក្រាបអ្នកតវ៉ាគឺយកអជ្ញាធរសណ្តាប់ធ្នាប់ នគរបាល និងកងរាជអាវុធហត្ថ តែដល់ពេលមានដំណោះស្រាយ ហើយគឺមានប្រមុខថ្នាក់ដឹកនាំ និងឥស្សរជនជាន់ខ្ពស់។ គឺចុះយកមុខយកមាត់ធ្វើប្រជាភិថុត មើលទៅហាក់បីដូចជាខំប្រឹងជួយប្រជាពលរដ្ឋសម្បើមណាស់ ព្រោះជិតដល់ពេលបោះឆ្នោតជាតិហើយ ហើយមិនទាន់បើកសង្វៀនឲ្យប្រយុទ្ធគ្នាផងអ្នកនយោបាយចាប់ផ្តើមឌឺដងដាក់គ្នាកោកកាកៗដូចឃោសនារកសំឡេងឆ្នោតរៀងខ្លួនជាស្រេច។
ដូចកាលពីសប្តាហ៍មុននេះ លោកនាយករដ្ឋមន្ត្រី ហ៊ុន សែន បានចេញលិខិតមួយលុបចោល ស.ជ.ណ (សេចក្តីជូនដំណឹង)របស់ទីស្តីការគណៈរដ្ឋមន្រ្តីកាលពីឆ្នាំ ២០១១ ដែលកាត់ដីឲ្យក្រុមហ៊ុនស្រាបៀរលីអូ នៅភូមិ-ឃុំ កែវផុស ស្រុកស្ទឹងហាវ និងខេត្តព្រះសីហនុ គឺកាត់ដីឲ្យអ្នកភូមិទាំង៤៩គ្រួសារវិញ។ ទាំងបណ្តឹងតវ៉ារបស់អ្នកភូមិនៅសាលាឧទ្ធរណ៍មិនទាន់ដោះស្រាយវិវាទចប់សព្វគ្រប់ផង ស្រាប់តែមានការវាយកម្ទេចផ្ទះអ្នកភូមិហើយ។
បញ្ហានេះគឺធ្វើឲ្យមានភាពច្របូកច្របល់គ្នារវាងអំណាចនីតិប្បញ្ញត្តិ និងអំណាចតុលាការ។ បន្ទាប់ពីបានបើកមុខហើយ គឺមានអន្តរាគមន៍ជួយគ្រប់ច្រកល្ហក មានតាំងពីអជ្ញាធរទំនាស់ដីធ្លី លោកនាយករដ្ឋមន្ត្រី ជួយសង់ផ្ទះ ឯលោកឧកញ៉ា ម៉ុង ឫទ្ធី ក៏ចូលរួមដែរ ប្រសិនបើអ្នកភូមិមករស់នៅចម្ការដូងប្រេងរបស់គាត់គ្រាន់តែមិនមានសិទ្ធិលក់ដី និងផ្ទះតែប៉ុណ្ណោះ។ ចុះហេតុអ្វី បានជានាំគ្នាទៅធ្វើអន្តរាគមន៍តែកន្លែងភូមិ កែវផុស? ហេតុអ្វីបានជាមិននាំគ្នាជួយដោះស្រាយអ្នកភូមិបឹងកក់ និងបុរីកីឡាដែលរងទុកវេទនាជាង៦ឆ្នាំមកហើយនោះ? ឬមួយពីក្រោយឆាក មកពីហេតុផលនយោបាយជិតបោះឆ្នោត ឬក៏ដណ្តើមទីផ្សាររវាងស្រាបៀរនាំចូល និងស្រាបៀរក្នុងស្រុក?
បើគិតពីរយៈពេលធ្វើការតវ៉ារាល់ថ្ងៃរបស់អ្នកភូមិបឹងកក់ និងអ្នកភូមិបុរីកីឡារយៈពេលជាង៦ឆ្នាំកន្លងទៅនេះ បើគិតជាទឹកប្រាក់ដែលពួកគាត់អាចរកប្រាក់ចំណូលក្នុងគ្រួសារវិញគឺពួកគាត់ខាតបង់ច្រើនណាស់ ហើយពេលវេលាសម្រាប់ថែទាំកូនចៅ និងទៅសាលារៀនស្ទើរតែគ្មាន។
ហេតុអ្វីបានជារាជរដ្ឋាភិបាលទុកឲ្យពួកគាត់អង្គុយតវ៉ាហាលថ្ងៃ ហាលភ្លៀង ហាលខ្យល់ ពេលខ្លះត្រូវអជ្ញាធរធ្វើបាបទាត់ធាក់ ដែលជាសោកនាដកម្មប្រយោលមួយ? គឺឲ្យពិភពលោក មើលទៅវាអាក្រក់មើលពេក គ្រាន់តែរឿងដីបឹងកក់ ធ្វើឲ្យធនាគាពិភពលោកបង្កកជំនួយទាំងអស់តាំងពីខែសីហាឆ្នាំ២០១១មកម្ល៉េះ។ ហើយលុយជំនួយទាំងនោះ ត្រូវបង្វែរទៅប្រទេសមីយ៉ាន់ម៉ាដែលកំពុងកែទម្រង់លទិ្ធប្រជាធិបតេយ្យវិញដូចដែលបានសន្យាចំនួនទឹកប្រាក់ ២៤៥ លានដុល្លារកាលពីខែវិច្ឆិកា ឆ្នាំ២០១២។ មកទល់ពេលនេះ ធនាគាពិភពលោករង់ចាំមើលការបោះឆ្នោតជាតិសិន បានគិតគូរឡើងវិញរឿងជំនួយ និងកម្ចី។
ផ្អែកទៅលើជំរឿនឆ្នាំ២០០៨ គឺដង់ស៊ីតេប្រជាពលរដ្ឋខ្មែរ ៧៥នាក់ រស់នៅក្នុងដី១គីឡូម៉ែត្រការ៉េ ពោលគឺដីធំណាស់សម្រាប់ប្រជាពលរដ្ឋម្នាក់ៗនោះ។ ហេតុអ្វីបានជាបញ្ហាដីធ្លីទៅជាបញ្ហាទំនាស់ដ៏ក្តៅគគុកទៅវិញ? ហើយដីជាច្រើនទូទាំងប្រទេសដែលជារបស់រដ្ឋក្រោមការដឹកនាំរបស់សម្តេចតេជោ គ្រាន់អ្នកភូមិបឹងកក់ និងអ្នកភូមិបុរីកីឡាប្រមាណជាង១០០គ្រួសារសោះដោះស្រាយមិនចេញ។ ធ្វើខូចមុខមាត់ប្រទេសជាតិ មួយសកលលោក ហេតុអ្វីបានជាមិនព្រម សួរពួកគាត់១០០នាក់ដែលនៅសេសសល់ចុងក្រោយនេះ ចង់ទៅរស់នៅទីណា ខេត្តណា ធ្វើការសាងសង់ឲ្យទៅរួចជាស្រេចហើយ។ ចង់លក់ ឬគាត់ទិញថែមទៅនៅទីណាស្រេចតែគាត់ទៅជាការស្រេចហើយ មិនចាំបាច់ឲ្យរស់នៅយ៉ាងវេទនាតោកយ៉ាក រខេករខាក។ ពេលខ្លះគ្រាន់តែពួកគាត់ទៅអបអរសាទរលោក ម៉ម សូណង់ដូ ចេញពីគុកព្រៃសសោះ មកផ្ទះវិញគេរើរុះតង់និងខ្ទមចោលអស់។ ទាំងនេះ មិនមែនជាដំណោះស្រាយយូរអង្វែងទេ។
ដូចរឿងដីបឹងកក់ បន្ទាប់ពីធនាគាពិភពលោកបានបង្កកជំនួយ លោកនាយករដ្ឋមន្រ្តី ហ៊ុន សែន ក៏បានកាត់ដីបឹងកក់ឲ្យអ្នកភូមិដែលនៅសេសសល់ ១២,៤ហិកតារួចហើយតាំងពីខែវិច្ឆិកា ឆ្នាំ២០១១មកម្ល៉េះ ហេតុអ្វីបានជាពួកគាត់នៅតែតវ៉ាទៀត? ហេតុដូចនេះហើយ លោកនាយករដ្ឋមន្ត្រីគួរចុះមើលឲ្យអស់ដោះស្រាយឲ្យចប់ទៅ ថាតើមកតែពីដីនោះជ្រុះបាត់តាមផ្លូវ ដោយអាជ្ញាធរលួចបេះ ច្រឹបយក ឬយ៉ាងណា?
No comments:
Post a Comment
yes