អ្នកស្រី យ៉ោម បុប្ផា ថ្ងៃទី២៧មីនា ២០១៣
បន្ទាប់ពីបើកសវនាការអស់រយៈពេលពេញមួយព្រឹក នៅថ្ងៃទី២៧ ខែមីនា ឆ្នាំ២០១៣ លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះរបស់តុលាការកំពូល បានសម្រេចតំកល់សាលក្រមរបស់តុលាការសាលាដំបូងរាជធានីភ្នំពេញ និងសាលដីការបស់តុលាការសាលាឧទ្ធរណ៍ ទុកជាបានការដដែល។ ពោលគឺចៅក្រមតុលាការកំពូល បានសម្រេច បិទផ្លូវតវ៉ា មិនដោះលែងអ្នកស្រី យ៉ោម បុប្ផា សកម្មជនតវ៉ាដីធ្លីនៅបឹងកក់ ឲ្យនៅក្រៅឃុំឡើយ។
អ្នកស្រី យ៉ោម បុប្ផា ត្រូវបានចាប់ខ្លួន កាលពីថ្ងៃទី៤ ខែកញ្ញា ឆ្នាំ២០១២ ពីបទចូលរួមប្រើអំពើហិង្សា ដោយចេតនា តាមរយៈការវាយលើបុរសអ្នករត់ម៉ូតូឌុបពីរនាក់ ឲ្យរងរបួស។
ក្នុងសំលៀកបំពាក់អ្នកទោស ខោអាវពណ៌ខៀវ ឆ្នូតស អ្នកស្រី យ៉ោម បុប្ផា បានអង្គុយលើបង់ អោបកូនប្រុសតូចម្នាក់ នៅដើមទ្រូង។ អ្នកស្រី បានថ្លែងទាំងយំបណ្តើរ ទៅកាន់ក្រុមអ្នកកាសែត ដោយលើកទឹកចិត្តដល់សហគមន៍ មានជម្លោះដីធ្លី ពិសេសសហគមន៍បឹងកក់ ឲ្យបន្តការរួមគ្នា តស៊ូ ដើម្បីការពារផ្ទះ និងសេរីភាព។ អ្នកស្រី យ៉ោម បុប្ផា បានចាត់ទុក ការផ្តន្ទាទោស លើអ្នកស្រី ជាការមួលបង្កាច់ និងការលាបពណ៌។
អ្នកស្រី យ៉ោម បុប្ផា បានថ្លែងថា "ខ្ញុំសង្ឃឹមថា បងប្អូនសហគមន៍ មិនរាថយទេ។ យុត្តិធម៌ពិតជាមាន សម្រាប់យើងទាំងអស់គ្នា។ ទោះបីនរណាលាបពណ៌យ៉ាងណាក៏ដោយ យុត្តិធម៌នៅតែមានសម្រាប់យើង។ កុំចុះចាញ់ឲ្យសោះ! ខ្ញុំសូមផ្តាំផ្ញើទៅកាន់សហគមន៍ ដែលត្រូវរងគ្រោះ ដោយសារការបណ្ថេញចេញ រងគ្រោះដោយសារដីធ្លី សូមឲ្យមានទឹកចិត្តតស៊ូឡើង ងើបឈរឡើង ព្រោះយើងទាំងអស់គ្នា ជាពលរដ្ឋខ្មែរ យើងត្រូវតែមានឆន្ទៈស្រលាញ់ ហើយចេះជួយគ្នា ជួយគ្នាលើកទឹកចិត្ត ស្រលាញ់ ហើយតស៊ូទាំងអស់គ្នាឡើង។ យើងគ្រាន់តែការពារផ្ទះ និងសិទ្ធិសេរីភាព ដីផ្ទះរបស់យើងទេ។ យើងអត់មានបានធ្វើអីខុសទេ។ ទោះបីជាគេព្យាយាមលាបពណ៌យើងទៅជាអ្វីក៏ដោយ គេព្យាយាមមួរបង្កាច់យើង ទៅជាអ្វីក៏ដោយ ការពិតនៅតែជាការពិត មិនអាចមាននរណាមួយ មកបន្លំការពិតនឹងបានទេ។ តស៊ូទាំងអស់គ្នាឡើង! តស៊ូនឹងមានជ័យជម្នះ"។
នៅព្រឹកមិញ នៅខាងក្រៅរបងតុលាការកំពូល ជាប់ខាងត្បូងព្រះបរមរាជវាំង មានអ្នកគាំទ្រប្រមាណ ១០០ នាក់ បានអង្គុយសំពះ លើកបដា ដែលក្នុងនោះ មានទាំងកូនប្រុសតូចរបស់អ្នកស្រី យ៉ោម បុប្ផា ផងដែរ។ នៅព្រឹកមិញ មិនមានអំពើហិង្សាកើតឡើងទេ គ្រាន់តែប៉ូលិស ដាក់របាំង និងឈររាំងផ្លូវ មិនឲ្យក្រុមអ្នកភូមិបឹងកក់ និងសហគមន៍ដីធ្លីដទៃទៀត ចូលទៅកាន់តុលាការកំពូល។
ក្រុមអ្នកតវ៉ា ដែលគាំទ្រអ្នកស្រី យ៉ោម បុប្ផា បានដើរទៅប្រមូលផ្តុំគ្នា នៅមុខព្រះបរមរាជវាំង ហើយបានលុតជង្គង់ ស្រែកទូលសុំព្រះរាជអន្តរាគមន៍ពីព្រះមហាក្សត្រ សម្តេចព្រះបរមនាថ នរោត្តម សីហមុនី និងសម្តេចម៉ែ ដើម្បីឲ្យព្រះអង្គ ជួយដោះលែងអ្នកស្រី យ៉ោម បុប្ផា ចេញពីពន្ធនាគារ។
ករណីតុលាការកាត់ទោសលើស្ត្រីបឹងកក់ អ្នកស្រី យ៉ោម បុប្ផា កន្លងមក ក៏មានក្រុមអ្នករត់ម៉ូតូឌុប ធ្លាប់បានប្រមូលផ្តុំ លើកបដាជាច្រើនលើក ទាមទារឲ្យតុលាការ ផ្តន្ទាទោសលើអ្នកស្រី យ៉ោម បុប្ផា ដោយពួកគេសំអាងថា អ្នកស្រី យ៉ោម បុប្ផា ជាអ្នកចូលរួម វាយទៅលើអ្នករត់ម៉ូតូពីរនាក់ ឲ្យរងរបួស កាលពីដើមខែកញ្ញា ឆ្នាំ២០១២ គឺជារឿងព្រហ្មទណ្ឌ ល្មើសច្បាប់ មិនមែនជាករណីជម្លោះដីធ្លីទេ។
សំណុំរឿងក្តីនោះ ក៏ត្រូវលោកនាយករដ្ឋមន្ត្រី ហ៊ុន សែន បានថ្លែងកាលពីពេលថ្មីៗនេះថា ករណីស្ត្រីបឹងកក់ អ្នកស្រី យ៉ោម បុប្ផា ជារឿងក្តីព្រហ្មទណ្ឌ នៅតុលាការ តែបែរជាត្រូវបានគេបង្វែរជាសំណុំរឿងដីធ្លី ហើយទម្លាក់កំហុស លើរដ្ឋាភិបាលរបស់លោកទៅវិញ៕
No comments:
Post a Comment
yes