ថ្លែងក្នុងពិធីកាត់ឫសសីមា និងសម្ពោធសមិទ្ធផលនានានៅវត្តនន្ទមុនី ក្នុងសង្កាត់ស្ទឹងមានជ័យ នៅព្រឹកថ្ងៃទី១៤ ខែមីនា ឆ្នាំ២០១៣នេះ លោកនាយករដ្ឋមន្ត្រី ហ៊ុន សែន បានរិះគន់ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ដែលបានវិភាគពាក់ព័ន្ធទៅនឹងលទ្ធភាព នៃការយាងចូលឆាកនយោបាយជាថ្មីម្តងទៀត របស់សម្តេចក្រុមព្រះ ដែលលោកវិភាគថា ការត្រលប់ចូលឆាកនយោបាយរបស់ទ្រង់ អាចនឹងទទួលការគំរាមកំហែងជាច្រើន ដូចជាការបើកកកាយព័ត៌មាន ឬក្លាយជាចំណាប់ខ្មាំងរបស់គណបក្សកាន់អំណាច ៖ "អ្នកវិភាគឡប់ៗ វាមកលើកថា រឿងប្តឹងមិនប្តឹងវាស៊ីសងលើគណបក្សប្រជាជន បើឡប់តែធន់ហ្នឹងធ្វើអ្នកវិភាគយ៉ាងម៉េច មើលជៀសឆ្ងាយឲ្យពីខ្ញុំបន្តិចបានទេ លោកអ៊ូ វិរៈ អើយ លោកគួរណាស់តែចេះដឹងជាងនេះ ឲ្យបានច្រើនតិចបានទេ លោកពិតជាមានសិទ្ធិហើយ តែខ្ញុំក៏មានសិទ្ធិដែរ ខ្ញុំគិតថាការវិភាគរបស់លោកនេះ អន់ណាស់ៗ គួរតែទៅរៀនសារជាថ្មីជាមួយនឹងសិស្សនៅមធ្យមសិក្សា ឬបឋមសិក្សាល្អជាង វាគ្រាន់បើជាង"។
ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគសង្គម លោក អ៊ូ វីរៈ មានប្រសាសន៍ថា លោកនៅតែប្រកាន់ជំហរដដែលចំពោះវិភាគនោះ តែលោកថា ប្រតិកម្មនេះ គប្បីធ្វើឡើងក្នុងគំនិតនៃនយោបាយ ជៀសវាងការវាយប្រហារលើបុគ្គលផ្ទាល់ ៖ "ស្វាគមន៍ការបញ្ចេញមតិរបស់សម្តេច អាហ្នឹងគឺជាសិទ្ធិរបស់គាត់ បើសិនជាអាចបញ្ចេញអាចពិភាក្សា ឈានទៅដល់ការពិភាក្សា ពីគំនិតនិងគោលនយោបាយ គឺជារឿងមួយល្អ ជៀសវាងការវាយប្រហារបុគ្គល គឺមើលទៅជារឿងមិនល្អ"។
គួរបញ្ជាក់ថា ថ្មីៗនេះមានព័ត៌មានថា សម្តេចក្រុមព្រះ ចង់យាងចូលឆាកនយោបាយវិញ ជាមួយគណបក្សសង្គ្រោះជាតិ។ ប៉ុន្តែខណៈនោះ ក៏មានព័ត៌មានថា គណបក្សហ្វ៊ុនស៊ិនប៉ិច បានព្រមានសើរើឡើងវិញ ដើម្បីប្តឹងសម្តេចក្រុមព្រះ ពីបទពុករលួយ លក់ឧទ្ធម្ភាគចក្រ បន្ទាប់ពីព្រះអង្គចង់ចូលធ្វើនយោបាយប្រឆាំង៕
No comments:
Post a Comment
yes