ដោយ: រតនា CEN
ភ្នំពេញ: ការិយាល័យអ្នកនាំពាក្យគណបក្សហ្វ៊ុនស៊ិនប៉ិច បានប្រកាសខ្លីនៅថ្ងៃទី១៤ ខែមីនា ឆ្នាំ២០១៣ ថា គណបក្សហ្វ៊ុនស៊ិនប៉ិច លុបចោលការប្តឹង សម្តេចក្រុមព្រះ នរោត្តម រណឫទ្ធិ ពីបទអំពើពុករលួយ និងការលក់ឧទ្ធម្ភាគចក្រ ធុន MI17 ចាប់ពីពេលនេះតទៅ ដោយមូលហេតុថា ការលក់យន្តហោះ ឧទ្ធម្ភាគចក្រនេះ បានសុំការអនុញ្ញាតពីរាជរដ្ឋាភិបាល នៃព្រះរាជាណាចក្រកម្ពុជាច្បាស់លាស់។
ជាការកត់សម្គាល់ សេចក្តីប្រកាសរបស់គណបក្សហ្វ៊ុនស៊ិនប៉ិចយ៉ាងដូច្នេះ គឺធ្វើឡើងតែប៉ុន្មាននាទីប៉ុណ្ណោះ ក្រោយពីសម្តេចនាយករដ្ឋមន្ត្រី ហ៊ុន សែន បានថ្លែងគាំទ្រសម្តេចក្រុមព្រះថា ព្រះអង្គ មិនមែនជាអ្នកលួចយន្តហោះគណបក្សហ្វ៊ុនស៊ិនប៉ិច យកទៅលក់ទេ។
សម្តេចនាយករដ្ឋមន្ត្រី ហ៊ុន សែន បានប្រកាសគាំទ្រសម្តេចក្រុមព្រះ នរោត្តម រណឫទ្ធិ ថា ព្រះអង្គមិនមែនជាអ្នកលួចយន្តហោះរបស់គណបក្សហ្វ៊ុនស៊ិនប៉ិច យកទៅលក់ ដូចសេចក្តីប្រកាសប្តឹងរបស់គណបក្សហ្វ៊ុនស៊ិនប៉ិចនោះឡើយ។ សម្តេចនាយករដ្ឋមន្ត្រី ក៏មិនជឿថា សម្តេចក្រុមព្រះ នឹងយាងទៅរួបរួមនយោបាយជាមួយគណបក្សប្រឆាំងទេ។
ក្នុងពិធីកាត់ឫសសីមា និងសម្ពោធសមិទ្ធិផលនានា នៅវត្តនន្ទមុនី នៅស្ទឹងមានជ័យ នាព្រឹកថ្ងៃទី១៤ ខែមីនា ឆ្នាំ២០១៣ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា សម្តេចបានទាក់ទងទៅកាន់លោក ញឹក ប៊ុនឆៃ ប្រធានប្រតិបត្តិគណបក្សហ្វ៊ុនស៊ិនប៉ិច ពាក់ព័ន្ធនឹងការប្រកាសប្តឹងលើសម្តេចក្រុមព្រះ នរោត្តម រណឫទ្ធិ ថាព្រះអង្គបានលួចយន្តហោះរបស់គណបក្ស យកទៅលក់។
ប៉ុន្តែចំណុចនេះ សម្តេចនាយករដ្ឋមន្ត្រី ហ៊ុន សែន បានលើកឡើងថា ការចោទប្រកាន់សម្តចក្រុមព្រះ នរោត្តម រណឫទ្ធិ រឿងលួចយកយន្តហោះ ឧទ្ធម្ភាគចក្រ ទៅលក់នោះ ដូចជាការចោទប្រកាន់លើរាជរដ្ឋាភិបាល ព្រោះថា ការលក់ដូរយន្តហោះ គឺត្រូវឆ្លងកាត់រាជរដ្ឋាភិបាល។
មួយវិញទៀត សម្តេចនាយករដ្ឋមន្ត្រី ហ៊ុន សែន ក៏បានឲ្យដឹងថា សម្តេចមិនជឿថា សម្តេចក្រុមព្រះ នរោត្តម រណឫទ្ធិ នឹងយាងទៅចូលរួមធ្វើនយោបាយជាមួយនឹងគណបក្សប្រឆាំងឡើយ ព្រោះថា ព្រះអង្គថ្មីៗនេះ ទើបតែបានអំពាវនាវឲ្យព្រះរាជវង្សានុវង្ស ឈប់ធ្វើនយោបាយ។ ម្យ៉ាងទៀត បើសិនជាព្រះអង្គយាងទៅធ្វើនយោបាយ ក៏ដូចជាក្បត់នឹងព្រះវិញ្ញាណក្ខ័ន្ធព្រះមហាវីរក្សត្រ ដែលទើបតែធ្វើព្រះរាជពិធីបុណ្យថ្វាយព្រះភ្លើងថ្មីៗនេះ។
ក្នុងរឿងនេះ សម្តេចនាយករដ្ឋមន្ត្រី ហ៊ុន សែន បានប្រកាសថា សម្តេចបានទាក់ទង និងទទួលបានការបញ្ជាក់ពីសម្តេចក្រុមព្រះរួចហើយថា ព្រះអង្គមិនយាងទៅធ្វើនយោបាយជាមួយគណបក្សសង្គ្រោះជាតិឡើយ។ ការទាក់ទងរវាងសម្តេច និងសម្តេចក្រុមព្រះ គឺធ្វើឡើងតាមរយៈអ្នកកាសែត លោក សយ សុភាព។
សូមរម្លឹកថា កាលពីយប់ថ្ងៃទី១០ ខែមីនា ឆ្នាំ២០១៣ អ្នកនាំពាក្យគណបក្សហ្វ៊ុនស៊ិនប៉ិច បានចេញសេចក្តីប្រកាសថា គណបក្សហ្វ៊ុនស៊ិនប៉ិច ដាក់ពាក្យបណ្តឹង ប្តឹងសម្តេចក្រុមព្រះ នរោត្តម រណឫទ្ធិ ពីបទពុករលួយ និងលួចឧទ្ធម្ភាគចក្រ ម៉ាក MI17 របស់គណបក្សហ្វ៊ុនស៊ិនប៉ិច យកទៅលក់ ក្នុងពេលព្រះអង្គនៅជាប្រធានគណបក្សហ្វ៊ុនស៊ិនប៉ិច។
ក៏ប៉ុន្តែមកដល់ពេលនេះ ពាក្យបណ្តឹងប្រឆាំងសម្តេចក្រុមព្រះ នរោត្តម រណឫទ្ធិ មិនទាន់ដាក់ទៅកាន់តុលាការនៅឡើយទេ ខណៈដែលភាគីសម្តេចក្រុមព្រះ នរោត្តម រណឫទ្ធិ បានបដិសេធ ហើយចាត់ទុកថា បណ្តឹងលើសម្តេចក្រុមព្រះ ជារឿងអយុត្តិធម៌។
សេចក្តីប្រកាសប្តឹងសម្តេចក្រុមព្រះ បានកើតឡើងភ្លាមៗ ខណៈដែលសម្តេចក្រុមព្រះ នរោត្តម រណឫទ្ធិ ត្រូវបានគេអះអាងថា ព្រះអង្គនឹងយាងទៅធ្វើជាប្រធានកិត្តិយសគណបក្សសង្គ្រោះជាតិ ដែលជាសម្ព័ន្ធភាពគណបក្សប្រឆាំង សមរង្ស៊ី និងគណបក្សសិទ្ធិមនុស្សមនុស្សរបស់លោកកឹមសុខា។
ក៏ប៉ុន្តែភ្លាមៗនោះ អ្នកនាំពាក្យសម្តេចក្រុមព្រះ ក៏បានបដិសេធថា ព្រះអង្គ មិនយាងទៅចូលរួមជាមួយគណបក្សសង្គ្រោះជាតិ ដូចដំណឹងចុះផ្សាយឡើយ៕
No comments:
Post a Comment
yes