សមាជិកសមាជិកាគណបក្សហ៊្វុនស៊ិនប៉ិច ចូលរួមសមាជវិសាមញ្ញបក្ស
កាលពីថ្ងៃទី២៣ ខែមីនា ឆ្នាំ២០១៣
ព្រះអង្គម្ចាស់ក្សត្រី នរោត្តម អារុណ រស្មី ជាបុត្រីពៅរបស់អតីតព្រះមហាវីរក្សត្រ សម្ដេចព្រះ នរោត្តម សីហនុ ត្រូវបានតែងតាំងជាព្រះប្រធានថ្មីគណបក្សហ៊្វុនស៊ិនប៉ិច ជាផ្លូវការនៅថ្ងៃសៅរ៍ ទី២៣ មីនា។ ការតែងតាំងនេះ ធ្វើឡើងក្នុងមហាសន្និបាតវិសាមញ្ញដែលមានសមាជិកចូលរួមប្រមាណជាង៤ពាន់នាក់។
ក្រៅពីការប្រកាសតែងតាំងប្រធានថ្មី សមាជវិសាមញ្ញក៏បានសម្រេចធ្វើកំណែទម្រង់លើគោលនយោបាយមួយចំនួន សម្រាប់ប្រកួតប្រជែងក្នុងការបោះឆ្នោតនាខែកក្កដា ខាងមុខ។
អតីតមគ្គុទ្ទេសក៍គណបក្សហ៊្វុនស៊ិនប៉ិច លោក កែវ ពុទ្ធរស្មី មានប្រសាសន៍ថា គណបក្សហ៊្វុនស៊ិនប៉ិច ធ្វើកំណែទម្រង់ផ្ទៃក្នុងដើម្បីប្រមូលកម្លាំង និងស្ដារកិត្តិយសគណបក្សរាជានិយមឡើងវិញ បន្ទាប់ពីបែកបាក់ផ្ទៃក្នុងនាពេលកន្លងទៅ។
លោកបន្តថា គណបក្សនេះនឹងអាចកើនសំឡេងគាំទ្រច្រើន បន្ទាប់មានមេដឹកនាំថ្មី គឺអ្នកអង្គម្ចាស់ នរោត្តម អារុណ រស្មី ដែលជាបុត្រីពៅអតីតព្រះមហាវីរក្សត្រ។ ប៉ុន្តែលោកមិនទាន់ច្បាស់ថា តើអ្នកអង្គម្ចាស់ក្សត្រីទ្រង់នឹងក្លាយជាបេក្ខភាពនាយករដ្ឋមន្ត្រី ឬយ៉ាងណានោះឡើយ ដោយត្រូវរង់ចាំការប្រជុំផ្ទៃក្នុងជាមុនសិន។ លោកបញ្ជាក់ថា គណបក្សហ៊្វុនស៊ិនប៉ិច ចូលរួមប្រជែងដោយស្មើភាព ឯករាជ្យ និងយកផលប្រយោជន៍ជាតិជាធំ។
សមាជបានជ្រើសតាំងអតីតមគ្គុទ្ទេសក៍ លោក កែវ ពុទ្ធរស្មី ជាប្រធានឧត្តមប្រឹក្សាគណបក្ស ប្ដូរលោក ញឹក ប៊ុនឆៃ ពីប្រធានប្រតិបត្តិ ទៅជាអគ្គលេខាធិការគណបក្ស តែងតាំងលោក សៅ រ៉ានី ជាអគ្គលេខាធិការរងគណបក្ស និងលោក យូ ហុកគ្រី ជាព្រឹទ្ធិបុរសគណបក្ស។
ព្រះប្រធានគណបក្សហ៊្វុនស៊ិនប៉ិច អ្នកអង្គម្ចាស់ នរោត្តម អារុណ រស្មី មានបន្ទូលថា គណបក្សហ៊្វុនស៊ិនប៉ិច បន្តដើរតាមគន្លងសីហនុនិយម ដោយឈរលើគោលការណ៍លទ្ធិប្រជាធិបតេយ្យ និងព្រះពុទ្ធសាសនា។ ទ្រង់បន្តថា ហ៊្វុនស៊ិនប៉ិចនឹងជំរុញឲ្យមានការគោរពច្បាប់ និងលទ្ធិប្រជាធិបតេយ្យពេញលេញ អំពើយុត្តិធម៌សង្គម ពិសេសគឺបែងចែកផលប្រកបដោយសមធម៌។ ទ្រង់បញ្ជាក់ថា គណបក្សហ៊្វុនស៊ិនប៉ិច នឹងព្យាយាមដោះស្រាយបញ្ហាប្រឈមនានា ដើម្បីសេចក្តីសុខរបស់ប្រជាជាតិកម្ពុជា។
ទាំងលោក កែវ ពុទ្ធរស្មី ទាំងលោក ញឹក ប៊ុនឆៃ មិនបានរំលឹកឡើយដល់អតីតប្រធានគណបក្ស គឺសម្ដេចក្រុមព្រះ នរោត្តម រណឫទ្ធិ។ ប៉ុន្តែព្រះអនុជ នរោត្តម អារុណ រស្មី ទ្រង់មានបន្ទូលអរព្រះគុណចំពោះសម្ដេចក្រុមព្រះ ដែលធ្លាប់បានខិតខំដឹកនាំគណបក្សហ៊្វុនស៊ិនប៉ិច កន្លងមក។
អ្នកអង្គម្ចាស់ក្សត្រី នរោត្តម អារុណ រស្មី សព្វថ្ងៃជាអគ្គរាជទូតកម្ពុជា ប្រចាំប្រទេសម៉ាឡេស៊ី។ ទ្រង់ជាភរិយារបស់លោក កែវ ពុទ្ធរស្មី ដែលមានតួនាទីជាឧត្តមក្រុមប្រឹក្សាគណបក្សហ៊្វុនស៊ិនប៉ិច។
ព្រះអង្គម្ចាស់ក្សត្រី នរោត្តម អារុណ រស្មី ព្រះប្រធានថ្មីគណបក្សហ៊្វុនស៊ិនប៉ិច ថ្លែងក្នុងសមាជវិសាមញ្ញ កាលពីថ្ងៃទី២៣ ខែមីនា ឆ្នាំ២០១៣
បន្ទាប់ពីសមាជនេះ ព្រះប្រធានថ្មីរបស់គណបក្សហ៊្វុនស៊ិនប៉ិច មានគម្រោងនឹងយាងទៅកាន់ទីជនបទនានា ដើម្បីកៀងគររកសំឡេងគាំទ្រពីប្រជាពលរដ្ឋ។ ខេត្តដែលទ្រង់សព្វព្រះហឫទ័យយាងទៅដំបូងគេ គឺខេត្តបន្ទាយមានជ័យ។
អ្នកតាមដានស្ថានការណ៍នយោបាយមួយចំនួនយល់ថា តួនាទីជាព្រះប្រធានគណបក្សហ៊្វុនស៊ិនប៉ិច របស់អ្នកអង្គម្ចាស់ក្សត្រី នឹងអាចទាក់ទាញសំឡេងគាំទ្រពីពលរដ្ឋបានច្រើនជាងមុន។ ប៉ុន្តែ ហ៊្វុនស៊ិនប៉ិច ក៏ត្រូវមានជំហរផ្ទៃក្នុងរឹងមាំ និងច្បាស់លាស់ដែរ ទើបអាចឈរជើងបានក្នុងឆាកនយោបាយ។
ចំណែកឯគណបក្សប្រជាជនវិញ ក៏បានប្រកាសយក គណបក្សហ៊្វុនស៊ិនប៉ិច ជាដៃគូរដ្ឋាភិបាលដដែលក្នុងសមាជរបស់ខ្លួន កាលពីសប្ដាហ៍មុន។ ប៉ុន្តែបើសិនជាគណបក្សហ៊្វុនស៊ិនប៉ិច បរាជ័យក្នុងការបោះឆ្នោតដោយមិនមានអាសនៈក្នុងសភាសោះ គណបក្សប្រជាជនក៏មិនអាចយកគណបក្សហ៊្វុនស៊ិនប៉ិច ជាដៃគូក្នុងរដ្ឋាភិបាលចម្រុះបានដែរ។ តាមរយៈការចូលរួមក្នុងរាជរដ្ឋាភិបាលអាណត្តិទី៤ នេះ បេក្ខជននយោបាយមកពីគណបក្សហ៊្វុនស៊ិនប៉ិច រាប់រយនាក់ បានទទួលតំណែងចាប់ពីអភិបាលរងខេត្ត រហូតដល់ឧបនាយករដ្ឋមន្ត្រី៕
No comments:
Post a Comment
yes