គ្រឿងចក្រក្រុមហ៊ុន ម៉ែន សារុន ឈូសឆាយដីព្រៃនៅឃុំយ៉ាទុង ស្រុកអូរយ៉ាដាវ
ខេត្តរតនគិរី កាលពីអំឡុងខែមេសា ឆ្នាំ២០១២
អ្នកភូមិជនជាតិដើមភាគតិចមួយក្រុមនៅខេត្តរតនគិរី បានចោទប្រកាន់ក្រុមហ៊ុនសម្បទានសេដ្ឋកិច្ចខ្មែរ-វៀតណាម ថា បានរំលោភឈូសឆាយព្រៃត្រៀមបម្រុងសហគមន៍ និងដីស្រែចម្ការប្រជាពលរដ្ឋ។
ប្រជាពលរដ្ឋរស់នៅភូមិតេន ឃុំយ៉ាទុង ស្រុកអូរយ៉ាដាវ ខេត្តរតនគិរី នៅថ្ងៃពុធ ទី២០ ខែមីនា ឆ្នាំ២០១៣ អះអាងថា ក្រុមហ៊ុន គ្លបល ធិច រ៉ូមា ខ្មែរអន្តរជាតិ និងមិត្តភាព ម៉ែន សារុន (Global Tech Sdn.,Bhd,Roma Khmer International and Men Sarun Friendship) ហៅកាត់ថា ក្រុមហ៊ុន ៧២ បានឈូសឆាយព្រៃត្រៀមបម្រុងសហគមន៍អស់ប្រមាណ ៣ហិកតារ។
តំណាងសហគមន៍លោក សេវ ហេម មានប្រសាសន៍បញ្ជាក់ថា ការឈូសឆាយនេះធ្វើឡើងកាលពីថ្ងៃអង្គារ ទី១៩ កន្លងទៅនេះ ប៉ុន្តែក្រុមសហគមន៍ និងប៉ូលិសប៉ុស្តិ៍រដ្ឋបាលឃុំ បាននាំគ្នាទៅទប់ស្កាត់គ្រឿងចក្រក្រុមហ៊ុនមិនឲ្យឈូសឆាយបន្ត។
លោកបន្តថា នេះគឺជាលើកទី២ហើយក្នុងខែមីនា ឆ្នាំ២០១៣ ដែលគ្រឿងចក្រក្រុមហ៊ុនបានរំលោភឈូសឆាយតំបន់ព្រៃឈើអភិរក្ស និងដីស្រែចម្ការអ្នកភូមិ៖ «គេឈូសហ្នឹងចាប់ពីថ្ងៃទី១៥ ដល់ថ្ងៃទី១៦ ខែ៣ ហ្នឹង។ ពួកខ្ញុំទៅទប់ គេថយ មិនឲ្យឈូសរហូត ពីព្រោះសហគមន៍ព្រៃហ្នឹងមានតែម្ដុំហ្នឹង។ ខ្ញុំរាយការណ៍ដល់ឃុំសហការជាមួយឃុំហើយស្រុកគេថា ឲ្យនាំសហគមន៍ទៅទប់ទៅ។ ពីម្សិលគេបន្តឈូសទៀត»។
ក្រុមហ៊ុន ម៉ែន សារុន ទទួលបានដីសម្បទានសេដ្ឋកិច្ច ២ម៉ឺនហិកតារ នៅស្រុកអូរយ៉ាដាវ តាំងពីឆ្នាំ១៩៩៩ ក៏ប៉ុន្តែនៅឆ្នាំ២០០៧ ក្រុមការងាររាជរដ្ឋាភិបាលបានកាត់ចេញផ្ទៃដី ៣ពាន់ហិកតារវិញ សំរាប់កិច្ចសន្យាវិនិយោគ ៧០ឆ្នាំ ដាំដូងប្រេង កាហ្វេ និងដំណាំផ្សេងទៀត។
វិទ្យុអាស៊ីសេរី មិនទាន់អាចស្វែងរកអាសយដ្ឋាន ឬទូរស័ព្ទទាក់ទងតំណាងក្រុមហ៊ុន ម៉ែន សារុន បំភ្លឺការចោទប្រកាន់របស់ពលរដ្ឋបានទេនៅថ្ងៃពុធ ទី២០ ខែមីនា។
យ៉ាងនេះក្តី អភិបាលស្រុកអូរយ៉ាដាវ លោក ដក ស មានប្រសាសន៍ទទួលស្គាល់ថា ក្រុមហ៊ុននេះពិតជាបានឈូសឆាយទៅលើតំបន់ព្រៃបម្រុងសហគមន៍មែន។ លោកបន្តថា សូម្បីតែដីស្រែប្រជាពលរដ្ឋក៏ក្រុមហ៊ុនឈូសឆាយយកដែរ។ ករណីនេះ លោកកំពុងស្រង់តួលេខពីផ្ទៃដីដែលក្រុមហ៊ុនបានរំលោភយកដើម្បីសុំគោលការណ៍ដកហូតប្រគល់មកអ្នកភូមិវិញ។
លោក ដក ស៖ «ខ្ញុំឲ្យគេទៅឃាត់ម្សិលមិញហើយតើ! ព្រឹកមិញហ្នឹងខ្ញុំឈ្លោះជាមួយខាង ម៉ែន សារុន ណា! មេការខាង ម៉ែន សារុន ល្ងាចមិញមកស្ដីខ្ញុំថា ម៉េចអភិបាលស្រុកស្អីហ៊ានឃាត់អាត្រាក់គេ? ខ្ញុំថា ខ្ញុំមិនអាចឲ្យឈូសផ្ដេសផ្ដាសបានទេ»។
អ្នកឃ្លាំមើលបញ្ហាដីធ្លី និងព្រៃឈើ សមាគមអាដហុក (ADHOC) ខេត្តរតនគិរី លោក ឆាយ ធី បានកត់សម្គាល់ថា ក្រុមហ៊ុន ម៉ែន សារុន ឬក្រុមហ៊ុន ៧២ កន្លងទៅនេះត្រូវបានប្រជាសហគមន៍ភូមិឡុំ អះអាងថា បានរំលោភចូលកាប់ឈើក្នុងព្រៃសហគមន៍ និងរំលោភលើដីចម្ការប្រជាពលរដ្ឋទៀតផង។
លោកអំពាវនាវឲ្យមន្ត្រីខណ្ឌរដ្ឋបាលព្រៃឈើស៊ើបអង្កេតករណីទាំងអស់នេះ៖ «តែបើឈូសឆាយប៉ះពាល់ដីព្រៃស្រោង ឬព្រៃសហគមន៍ គឺយើងអន្តរាគមន៍ទៅស្ថាប័នជំនាញចាត់វិធានការទៅលើក្រុមហ៊ុនសម្បទានសេដ្ឋកិច្ចដែលមានកុងត្រាជាមួយរដ្ឋាភិបាលស្ដីពីកាត់ផលប៉ះពាល់ ស្ដីពីការហាមឃាត់មិនឲ្យឈូសឆាយព្រៃស្រោង ឬព្រៃសហគមន៍»។
នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភិន មានប្រសាសន៍បញ្ជាក់ថា លោកមិនទាន់បានទទួលរបាយការណ៍ស្ដីពីករណីនេះទេ។ លោកអះអាងថា នឹងស៊ើបអង្កេតករណីនេះ។
របាយការណ៍អង្កេតរបស់សមាគមអាដហុក ខេត្តរតនគិរី ឲ្យដឹងកាលពីអំឡុងខែមេសា ឆ្នាំ២០១២ បានឲ្យដឹងថា ក្រុមហ៊ុនចម្រុះ ម៉ែន សារុន បានឈូសឆាយធ្វើឲ្យប៉ះពាល់ដីស្រែ និងចម្ការ ០៧ហិកតារ របស់ពលរដ្ឋ ០៦គ្រួសារ ដីព្រៃការពារព្រៃអារក្ស ព្រៃស្រោងមានទំហំប្រវែង ២គីឡូម៉ែត្រ ជំរៅ ១គីឡូម៉ែត្រកន្លះ ស្ថិតនៅចំណុចវាលមិល ព័ទ្ធជុំវិញអូរក្រម៉ា ក្នុងឃុំយ៉ាទុង៕
No comments:
Post a Comment
yes