លោក ឈូក បណ្ឌិត អតីតអភិបាលក្រុងបាវិត
តុលាការខេត្តស្វាយរៀង គ្រោងនឹងបើកសវនាការករណីអតីតអភិបាលក្រុងបាវិត លោក ឈូក បណ្ឌិត ដែលរងការចោទប្រកាន់ថាបាញ់កម្មករ នៅពាក់កណ្តាលខែឧសភា ដោយត្រូវការពេលវេលា ដើម្បីប្រមូលភស្តុតាងបន្ថែម។
ការបើកសវនាការនេះ ធ្វើឡើងក្រោយពីសាលាឧទ្ធរណ៍ កាលពីថ្ងៃទី៤ ខែមីនា បានប្រកាសថា ជនសង្ស័យបាញ់កម្មករ នៅក្រុងបាវិត ពិតជាជាប់ពាក់ព័ន្ធនឹងលោក ឈូក បណ្ឌិត ដោយបញ្ជាឲ្យសាលាដំបូងខេត្តស្វាយរៀង ស៊ើបអង្កេតករណីនេះឡើងវិញ ដើម្បីរកឲ្យឃើញការពិត និងរកយុត្តិធ៌មជូនជនរងគ្រោះ។
ព្រះរាជអាជ្ញារងតុលាការខេត្តស្វាយរៀង លោក ហ៊ឹង ប៊ុនជា បានឲ្យដឹងនៅព្រឹកថ្ងៃចន្ទនេះថា រឿងក្តីរបស់លោកឈូក បណ្ឌិត គ្រោងនឹងបើកសវនាការឡើងវិញនៅពាក់កណ្តាលខែឧសភា។ លោកថា ការពន្យាពេលនេះ ដោយសារជាប់រវល់បុណ្យចូលឆ្នាំ និងត្រូវការពេលវេលាដើម្បីប្រមូលភស្តុតាងបន្ថែម។
លោកឈូក បណ្ឌិត ត្រូវបានសង្ស័យថា ជាអ្នកបាញ់កម្មការិនីឲ្យរងរបួសបីនាក់ នៅតំបន់សេដ្ឋកិច្ចពិសេសក្រុងបាវិត កាលពីថ្ងៃទី២០ ខែកុម្ភៈ ឆ្នាំ២០១២ នៅពេលកម្មករ បានធ្វើកូដកម្ម ទាមទារលក្ខខណ្ឌការងារមួយចំនួន។
សាលាដំបូងខេត្តស្វាយរៀងនេះ ទម្លាក់បទចោទកាលពីខែធ្នូ ឆ្នាំ២០១២ ដោយសំអាងថា រកមិនឃើញកំហុសជនជាប់ចោទ បើទោះបីជារដ្ឋមន្ត្រីក្រសួងមហាផ្ទៃ លោក ស ខេង អះអាងថា លោក ឈូក បណ្ឌិត ជាជនដៃដល់ក៏ដោយ៕
No comments:
Post a Comment
yes