សន្និសីទ្ធសារព័ត៌មានរបស់សមាគមខ្មែរកម្ពុជាក្រោ
ព្រះសង្ឃ និងប្រជាពលរដ្ឋខ្មែរកម្ពុជាក្រោម
គ្រោងដាក់ពាក្យប្តឹង ស្នើអន្តរាគមន៍ពីរដ្ឋាភិបាលកម្ពុជា
រដ្ឋាភិបាលវៀតណាម និងសង្គមស៊ីវិលពាក់ព័ន្ធ ដើម្បីថ្កោលទោសអាជ្ញាធរវៀតណាម
និងទាមទារបញ្ឈប់សកម្មភាពគំរាមកំហែង រឹតត្បិតសេរីភាពរបស់ពួកគាត់។
ការអះអាងបែបនេះធ្វើឡើងនៅព្រឹកថ្ងៃអាទិត្យ ទី២១
ខែមេសា ក្នុងសន្និសីទ្ធសារព័ត៌មាននៅទីស្នាក់ការសមាគមខ្មែរកម្ពុជាក្រោម
បន្ទាប់ពីជនរងគ្រោះដែលជាព្រះសង្ឃ និងខ្លះជាពលរដ្ឋខ្មែរកម្ពុជាក្រោម
បានរៀបរាប់ពីការគំរាមកំហែង និងការគាបសង្កត់ពីអាជ្ញាធរ វៀតណាម ទៅកាន់ពួកគេ
ខណៈពួកគេធ្វើដំណើរទៅកាន់ស្រុកកំណើតរបស់ខ្លួនវិញ។
ក្នុងសន្និសីទ្ធសារព័ត៌មាននោះ
ព្រះចៅអធិការវត្តសាមគ្គីរង្ស៊ី ព្រះតេជគុណ សៀង សុវណ្ណារ៉ា មានសង្ឃដីកាថា
ព្រះអង្គ ត្រូវបានអាជ្ញាធរវៀតណាមរារាំង ខណៈធ្វើដំណើរទៅដល់ច្រកព្រំដែន
ដោយឆែកឆេរ និងឃាត់ខ្លួនជាង៤៨ម៉ោង ដើម្បីសួរចម្លើយ។ ព្រះតេជគុណបន្តថា មិនតែប៉ុណ្ណោះ
អាជ្ញាធរវៀតណាម បានតាមដាន និងជួលសាច់ញាតិ របស់ព្រះអង្គ
ឲ្យឃ្លាំមើលព្រះអង្គគ្រប់សកម្មភាព នៅពេលទៅដល់ស្រុកកំណើតដែល
បច្ចុប្បន្នស្ថិតក្នុងទឹកដីវៀតណាម។
ជាមួយគ្នានេះដែរ ចាងហ្វាងកាសែតព្រៃនគរ
ដែលជាខ្មែរកម្ពុជាក្រោម លោក លី ឈួន ឲ្យដឹងដែរថា លោកត្រូវបានអាជ្ញាធរវៀតណាម
ពិន័យប្រាក់៣០លានដុង ដែលមានតម្លៃជាង ១.៥០០ដុល្លារ ជាថ្នូរនឹងការដោះលែងឲ្យមានសេរីភាពវិញ
បន្ទាប់ពីលោក និងក្រុមគ្រួសារ ត្រូវបានរារាំង និងឃាត់ខ្លួននៅច្រកព្រំដែន
កាលពីថ្ងៃទី១២ ខែមេសាឆ្នាំ២០១៣នេះ។
លេខាធិការ នៃលេខាធិការដ្ឋានអង្គការសមាគមខ្មែរក្រោម
លោក គឹម ស៊ីសំណាង ឲ្យដឹងថា ទង្វើរបស់អាជ្ញាធរវៀតណាម
ចំពោះខ្មែរកម្ពុជាក្រោម គឺជាការរំលោភសិទ្ធិមនុស្សយ៉ាងធ្ងន់ធ្ងរមួយ
ពោលគឺសេរីភាពក្នុងការធ្វើដំណើរ ដោយសារអាជ្ញាធរវៀតណាមបានតាម
ឃ្លាំមើលគ្រប់ពេលវេលា។
គួរជំរាបជូនផងដែរថា កន្លងទៅថ្មីៗនេះ
មន្ត្រីជាន់ខ្ពស់ស្ថានទូតវៀតណាមប្រចាំកម្ពុជា លោក ឡេ មិញង៉ុក លើកឡើងថា
ការត្រួតពិនិត្យរបស់អាជ្ញាធរវៀតណាម នៅតាមច្រកព្រំដែន ដើម្បីរក្សាសន្តិសុខ
សណ្តាប់ធ្នាប់ មិនមានគោលបំណងរើសអើង
ឬរឹតបណ្តឹងសេរីភាពខ្មែរកម្ពុជាក្រោមទេ។
តាមរយៈរបាយការណ៍សង្ខេបស្តីពី
សេរីភាពដើរហើររបស់ខ្មែរកម្ពុជាក្រោម កំពុងត្រូវបានរំលោភពីអាជ្ញាធរវៀតណាម
ចុះថ្ងៃទី២០ ខែមេសា ឆ្នាំ២០១៣នេះ ឲ្យដឹងថា នៅដើមឆ្នាំ២០១៣នេះ
ប្រជាពលរដ្ឋខ្មែរកម្ពុជាក្រោម ជាង៣០នាក់ ត្រូវបានអាជ្ញាធរប្រទេសវៀតណាម
បានធ្វើការរារាំងគំរាមកំហែង មិនឲ្យធ្វើដំណើរទៅលេងស្រុកកំណើតវិញឡើយ៕
No comments:
Post a Comment
yes