លោក រ៉ុង ឈុន ប្រធាន សហជីព សហភាព កម្ពុជា និង ជា ប្រធាន
សមាគម គ្រូបង្រៀន កម្ពុជា ឯករាជ្យ
លោក រ៉ុង ឈុន ប្រធានសហជីពសហភាពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យបានបា្រប់អោយដឹង កាលពីរសៀលថ្ងៃទី២៦ មេសាម្សិលមិញថា សាលារាជធានីភ្នំពេញ មិនអនុញ្ញាតឲ្យសហភាពសហព័ន្ធសហជីព និងសមាគមចំនួន១២ មកពីវិស័យចំនួន៩ រួមមានកាត់ដេរ សំណង់ ទេសចរណ៍ ចំណីអាហារ និងសេវាកម្ម មន្ត្រីរាជការ សេដ្ឋកិច្ចក្រៅប្រព័ន្ធ កសិកម្ម ធនាគារ និងផ្នែកទូរគមនាគមន៍ ធ្វើការហែក្បួនពីស្តាតអូឡាំពិក ទៅរដ្ឋសភា នៅថ្ងៃទី១ ខែឧសភា ឆ្នាំ២០១៣ទេ ប៉ុន្តែឲ្យរង់ចាំការសម្រេចពីក្រសួងមហាផ្ទៃ។ ទោះជាយ៉ាងណាក៏ដោយ មេដឹកនាំសហជីព បានប្រកាន់ជំហរថា នៅតែធ្វើការហែក្បួនតាមការគ្រោងទុកដដែល។
លោក រ៉ុង ឈុន បានបន្តថា ចំពោះការស្នើសុំទីតាំងស្តាតអូឡាំពិក ធ្វើការជួបជុំគ្នា រួចដង្ហែក្បួនតាមផ្លូវព្រះសីហនុ ឆ្ពោះទៅកាន់រដ្ឋសភា គឺសាលារាជធានីភ្នំពេញ មិនអនុញ្ញាតឲ្យទេ ពីព្រោះទីតាំងនោះជារបស់ក្រសួងអប់រំ យុវជន និងកីឡា ហើយទាល់តែសុំការអនុញ្ញាតពីក្រសួងអប់រំ។ ខាងសហជីពបានស្នើសុំជួបជុំគ្នានៅវត្តភ្នំ ប៉ុន្តែខាងសាលាក្រុងថា នៅថ្ងៃទី១ ខែឧសភា មានកម្មវិធីនៅទីនោះដែរ។
លោកបានបញ្ជាក់ថា បើទោះបីជាយ៉ាងណាក៏ដោយ សហជីពរបស់លោក នៅតែធ្វើដដែល តាមការគ្រោងទុក ហើយបើអស់ជម្រើសប្រហែលជាយកទីតាំងសួនច្បារមុខក្រុមប្រឹក្សាអភិវឌ្ឍន៍ ហែតាមមាត់ទន្លេ ឆ្ពោះទៅកាន់រដ្ឋសភា ដើម្បីដាក់ញត្តិ។ ចំពោះកម្មករ កម្មការិនី មន្ត្រីរាជការ គ្រូបង្រៀន …ដែលតាមគម្រោងមានអ្នកចូលរួម ២ ម៉ឺននាក់នោះ ត្រូវកាត់បន្ថយឲ្យមកនៅត្រឹមនៅក្រោម ២ ម៉ឺននាក់។ ជាគោលការណ៍ យើងត្រូវតែដង្ហែ អត់មានអ្វីប្រែប្រួលទេ ដើម្បីយកញត្តិ ឬសេចក្តីថ្លែងការណ៍រួមដាក់ជូនរដ្ឋសភា ដែលមានចំនួន ១៦ ចំណុច ដោយផ្តោតសំខាន់ទៅលើប្រាក់ឈ្នួលអប្បបរមា ១៥០ដុល្លារ។
លោក អាត់ ធន់ ប្រធានសហភាពការងារកម្ពុជា បានថ្លែង ថា ៖ ការប្រារព្ធទិវាពលកម្មអន្តរជាតិលើកនេះ ខុសពីឆ្នាំមុនៗ ដោយសហភាពការងារកម្ពុជា បានរួមបញ្ចូលគ្នាជាមួយសហភាពសហព័ន្ធផ្សេងៗ ដើម្បីក្លាយជាសំឡេងតែមួយ ដាក់ញត្តិទៅរដ្ឋាភិបាលដោះស្រាយបញ្ហាប្រាក់ឈ្នួល កិច្ចសន្យាការងារកំណត់ខ្លី ក្នុងប្រភេទការងារជាប់លាប់ ការមិនទទួលខុសត្រូវលើករណីបិទសហគ្រាស គ្រឹះស្ថានឈប់ដំណើរការ ការរំលោភលើការប្រើប្រាស់សិទ្ធិ សមាគម និងសហជីព។
ក្នុងឱកាសទិវាពលកម្មអន្តរជាតិនេះ ប្រារព្ធឡើងក្នុងគោលបំណងជារួមគឺ សម្តែងមតិស្តីពីស្ថានភាពរបស់កម្មករ និយោជិតគ្រប់វិស័យ និងមន្ត្រីរាជការ, ការថ្លែងអំពីកង្វល់នានារបស់កម្មករ និយោជិតគ្រប់វិស័យ និងមន្ត្រីរាជការ ដែលពួកគេបានជួបប្រទះ ដើម្បីដាក់ជូនរាជរដ្ឋាភិបាលឲ្យជួយដោះស្រាយ, ជំរុញដល់ក្រុមហ៊ុនបញ្ជាទិញធំៗពីកម្ពុជា ឲ្យកាន់តែយកចិត្តទុកដាក់ និងមានការទទួលខុសត្រូវខ្ពស់លើស្ថានភាពកម្មករ, ស្តាប់ការសន្យា និងគោលនយោបាយរបស់តំណាងមកពីគណបក្សនយោបាយនីមួយៗ ចំពោះស្ថានភាពរបស់មន្ត្រីរាជការ កម្មករ និយោជិត និងប្រជាពលរដ្ឋដែលប្រកបរបរក្នុងសេដ្ឋកិច្ចក្រៅប្រព័ន្ធសម្រាប់រាជរដ្ឋាភិបាលអាណត្តិថ្មី ៕
សូមបព្ជាក់ថា កាលពីថ្ងៃទី១១ ខែមេសា ឆ្នាំ២០១៣ សហភាពការងារកម្ពុជា បានដាក់លិខិតទៅសាលារាជធានីភ្នំពេញ ដើម្បីសុំការអនុញ្ញាត ដោយជួបជុំគ្នានៅពហុកីឡដ្ឋានជាតិអូឡាំពិក និងដង្ហែជាក្បួនតាមបណ្តោយផ្លូវព្រះសីហនុ ឆ្ពោះទៅកាន់មន្ទីររដ្ឋសភាជាតិ ដើម្បីធ្វើការសម្តែងមតិ នៅថ្ងៃទិវាពលកម្មអន្តរជាតិ ១ឧសភា ឆ្នាំ២០១៣ ដែលមានអ្នកចូលរួមចំនួន ២ ម៉ឺននាក់៕
No comments:
Post a Comment
yes