អង្គការ សមាគមខ្មែរកម្ពុជាក្រោម ប្រចាំព្រះរាជាណាចក្រកម្ពុជា បានប្រកាសថាកន្លងមកថ្មីៗនេះ ប្រជាពលរដ្ឋខ្មែរកម្ពុជាក្រោម ក្នុងខណៈធ្វើដំណើរទៅស្រុកកំណើតនៅកម្ពុជាក្រោម ត្រូវបានអាជ្ញាធរវៀតណាមនៅច្រកព្រំដែនហាមឃាត់ មិនឲ្យធ្វើដំណើរទៅស្រុកកំណើតនៅកម្ពុជាក្រោម។ បញ្ហានេះ នឹងត្រូវលើកបង្ហាញ ក្នុងសន្និសីទកាសែត នាថ្ងៃអាទិត្យ ទី២១ ខែមេសាខាងមុខ។
សេចក្តីប្រកាសលើកឡើងថា ខ្មែរកម្ពុជាក្រោមខ្លះ ត្រូវបានឃាត់ខ្លួនអស់រយៈពេល ៤៨ ម៉ោង ត្រូវបានពិន័យជាទឹកប្រាក់រាប់សិបលានដុង ត្រូវបានឆែកឆេរឥវ៉ាន់ ត្រូវបានសួរចម្លើយ និងគម្រាមកំហែង បំផិតបំភ័យ ហើយត្រូវបានបញ្ជូនត្រឡប់មកកម្ពុជាវិញ។ រីឯអ្នកខ្លះទៀត ពេលទៅដល់ស្រុកកំណើតនៅកម្ពុជាក្រោម ត្រូវបានអាជ្ញាធរវៀតណាមនៅទីនោះ រឹតត្បិតសិទ្ធិសេរីភាពក្នុងការធ្វើដំណើរ ដូចជាការហៅទៅសួរចម្លើយនៅទីស្នាក់ការនគរបាលឃុំ ស្រុក និងខេត្តជាញឹកញាប់។
សេចក្តីប្រកាសដដែល បង្ហាញថា អ្នកខ្លះទៀត ត្រូវបាននគរបាលវៀតណាមពីថ្នាក់ស្រុកដល់ថ្នាក់ខេត្ត ចុះមកសួរចម្លើយ គម្រាមកំហែង បំផិតបំភ័យដល់គេហដ្ឋានតែម្តង។ មិនត្រឹមតែប៉ុណ្ណោះ អ្នកខ្លះទៀត ក៏ត្រូវបានអាជ្ញាធរវៀតណាមរឹបអូសយកលិខិតឆ្លងដែន ព្រមទាំងចាប់បង្ខំឲ្យធ្វើជាកិញសម្ងាត់ ដើម្បីរាយការណ៍អំពីស្ថានភាពខ្មែរក្រោម ឲ្យអាជ្ញាធរវៀតណាមទៅវិញ។
សេចក្តីប្រកាស លើកឡើងថា ដោយសម្លឹងឃើញថា នេះជាទង្វើរំលោភសិទ្ធិយ៉ាងធ្ងន់ធ្ងរពីសំណាក់អាជ្ញាធរវៀតណាម មកលើខ្មែរកម្ពុជាក្រោម ទើបអង្គការសមាគមខ្មែរកម្ពុជាក្រោម នឹងរៀបចំអង្គសន្និសីទសារព័ត៌មាន ស្ដីពី “សេរីភាពដើរហើររបស់ខ្មែរកម្ពុជាក្រោម កំពុងត្រូវបានរំលោភ ពីសំណាក់អាជ្ញាធរវៀតណាម” ដើម្បីជាការអំពាវនាវសូមឲ្យអាជ្ញាធរវៀតណាម ត្រូវតែបញ្ឈប់រាល់ទង្វើរំលោភសិទ្ធិខ្មែរក្រោម។
មិនទាន់មានប្រតិកម្មបែបណាពីស្ថានទូតវៀតណាម ប្រចាំកម្ពុជា ជុំវិញការលើកឡើងខាងលើនៅឡើយទេ។
សន្និសីទកាសែតនោះ នឹងធ្វើនៅព្រឹកថ្ងៃអាទិត្យ ទី២១ ខែមេសា ឆ្នាំ២០១៣ នៅវេលាម៉ោង ៩ ដល់ម៉ោង ១០ ព្រឹក នៅសាលប្រជុំ នៃសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ ឋិតក្នុងភូមិគោកឃ្លាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
No comments:
Post a Comment
yes