ពលរដ្ឋសហគមន៍បឹងកក់១ លើកគ្នាធ្វើសន្និសីទកាសែតប្រឆាំងផែនការឲ្យរុះផ្ទះធ្វើផ្លូវ
ប្រជាពលរដ្ឋចំនួន១៤គ្រួសារ ក្នុងសហគមន៍ផ្លូវ៣៤៧ ដែលកំពុងប្រឈមនឹងការបណ្ដេញចេញពីលំនៅឋាន បាននាំគ្នាធ្វើសន្និសីទសារព័ត៌មានកាលពីព្រឹកថ្ងៃព្រហស្បតិ៍ប្រកាសច្រានចោលនូវរបាយការណ៍ និងគំនូសប្លង់អភិវឌ្ឍន៍របស់ការិយាល័យភូមិបាលខណ្ឌទួលគោក ដែលដាក់ក្នុងកំណត់សម្គាល់ថាលំនៅឋានពួកគាត់ឲ្យស្ថិតនៅលើទ្រូងផ្លូវ៣៤៧ ជាការរាំងខ្ទប់ចរាចរណ៍ទៅមក។
អ្នកស្រី ឯក ម៉ាលីនណា អាយុ៥៧ឆ្នាំ ជាតំណាងពលរដ្ឋចំនួន១៤គ្រួសារ នៃសហគមន៍ផ្លូវ៣៤៧ នៅសង្កាត់បឹងកក់១ បានប្រាប់ភ្នំពេញ ប៉ុស្តិ៍ថា ប្រធានការិយាល័យភូមិបាលខណ្ឌទួលគោក លោក អំ ប៊ុនលី បានគូរគំនូសប្លង់អភិវឌ្ឍន៍មួយក្នុងតំបន់ពួកគាត់ រស់នៅ បានដាក់កំណត់សម្គាល់ថា ពួកគាត់១៤ គ្រួសារបានសង់លំនៅឋាននៅលើទ្រូងផ្លូវលេខ៣៤៧ ដែលបង្កការរាំងខ្ទប់ចរាចរណ៍ទៅមករបស់សាធារណជន។
អ្នកស្រីបន្តថា៖«ខ្ញុំយល់ថា គំនូសប្លង់នេះ មិនត្រឹមត្រូវនិងមិនឆ្លើយតបទៅនឹងស្ថានភាពទីតាំងភូមិសាស្ត្រជាក់ស្តែងដែលពួកយើងខ្ញុំកំពុងរស់នៅនេះទេ»។
អ្នកស្រីបន្ថែមថា៖«ដូចបងប្អូនបានឃើញផ្លូវ៣៤៧មានទំហំជាង១០ម៉ែត្រ ដែលរថយន្តធុនធ្ងន់កំពុងចរាចរណ៍ឆ្លងកាត់។ផ្ទះពួកយើងខ្ញុំស្ថិតនៅតាមបណ្ដោយផ្លូវនេះ មិនប៉ះពាល់ដល់ការធ្វើចរាចរណ៍នោះទេ»។
តំណាងម្នាក់ទៀត លោក ពៅ បញ្ញា បានបន្ទរថា តាមស្ថានភាពជាក់ស្ដែង ផ្លូវ ៣៤៧ ដែលមានទំហំ១០ម៉ែត្រ និងបានតភ្ជាប់ផ្លូវលេខ៥១៦ និងផ្លូវលេខ៥២៨ និងផ្លូវលេខ ៥៩៨។ ចំណែកផ្លូវលេខ៣៤៩ ជាផ្លូវទាល់ត្រឹមផ្លូវលេខ៥២៨ប៉ុណ្ណោះ ប៉ុន្តែគំនូសប្លង់ដែលគូរដោយមន្ត្រីការិយាល័យរៀបចំដែនដីនគរូបនីយកម្ម សំណង់និងភូមិបាលខណ្ឌនោះ បានគូសផ្លូវលេខ ៣៤៩ ធ្លាយដល់ផ្លូវលេខ៥៩៨ ហើយគូសផ្លូវ៣៤៧ ជាផ្លូវទាល់ត្រឹមផ្លូវ៥២៨ទៅវិញ ដោយបានគូរលំនៅឋានពួកគាត់នៅបាំងជិតផ្លូវ ដែលផ្ទុយពីការពិតទាំងស្រុង។
លោកនិយាយថា៖«គូររបៀបនេះ គឺជាចេតនាចង់បំភាន់ថ្នាក់ដឹកនាំនៃស្ថាប័ន មន្ទីរនិងក្រសួងជំនាញនានា ឲ្យយល់ច្រឡំមកលើប្រជាពលរដ្ឋក្នុងសហគមន៍យើងខ្ញុំ ថាជាអ្នករស់នៅអនាធិបតេយ្យលើទ្រូងផ្លូវប្រឆាំងនឹងការអភិវឌ្ឍរបស់អាជ្ញាធរដែនដី និង រាជរដ្ឋាភិបាល និងបំណងចង់បណ្ដេញពួកយើងខ្ញុំចេញ ដោយផ្ដល់នូវសំណងមិនសមស្របតាមតម្លៃទីផ្សារសេរី»។
លោកបញ្ជាក់ឲ្យដឹងដែរថា តាមប្រកាសលេខ ៣៧១ សហវ.ប្រក ចុះថ្ងៃទី៥ ខែឧសភា ឆ្នាំ២០១១ របស់ក្រសួង សេដ្ឋកិច្ច និងហិរញ្ញវត្ថុនិងយោងតាមផែនទីកំណត់តម្លៃគិតពន្ធលើអចលនទ្រព្យរបស់សាលាខណ្ឌទទួលគោក បានបង្ហាញថា «ដី» ក្នុងតំបន់សហគមន៍នេះ មានតម្លៃចន្លោះពី៥០០ ដុល្លារ និង ៧៥០ដុល្លារក្នុងមួយម៉ែត្រការ៉េ។
លោកបញ្ជាក់ថា ៖ «ខ្ញុំសូមឲ្យស្ថាប័នមន្ទីរ និងក្រសួងរៀបចំដែនដីនគរូបនីយកម្ម និងសំណង់ បញ្ជូនមន្ត្រីជំនាញចុះមកពិនិត្យអង្កេតនៅក្នុងតំបន់របស់យើងខ្ញុំ ដើម្បីផ្ទៀងផ្ទាត់នូវរបាយការណ៍ និងគំនូសបង្ហាញពីទីតាំងដែលមន្ត្រីភូមិបាលខណ្ឌបានធ្វើត្រឹមត្រូវឬយ៉ាងណា? ដើម្បីផ្ដល់ភាពយុត្តិធម៌ដល់យើងខ្ញុំ»។
ពាក់ព័ន្ធទៅនឹងការលើកឡើងនេះលោក អំ ប៊ុនលី ប្រធានការិយាល័យរៀបចំដែនដីនគរូបនីយកម្មសំណង់ និងភូមិបាលខណ្ឌទួលគោក កាលពីម្សិលមិញបានបដិសេធការផ្ដល់អត្ថាធិប្បាយ។
នៅចុងឆ្នាំ២០០៧ អាជ្ញាធរដែនដី បានជូនដំណឹងបន្តបន្ទាប់ ស្ដីពីការពង្រីកផ្លូវលេខ៣៤៧ ឲ្យបានទំហំ៣០ម៉ែត្រ ដើម្បីងាយក្នុងការសម្រួលចរាចរណ៍ក្នុងរាជធានីដោយតម្រូវឲ្យអ្នកភូមិដែលរស់នៅតាមបណ្ដោយផ្លូវនេះប្រមាណជាង១០០គ្រួសាររុះរើលំនៅឋានចេញពីតំបន់នេះដោយអាជ្ញាធរបានសន្យាថា នឹងផ្ដល់ថវិកាចំនួន៣លានរៀល និងថ្នូរជាដីទំហំ៦ម៉ែត្រគុណ១២ម៉ែត្រ នៅតំបន់ភូមិតាគោ ឃុំជ្រៃលាស់ ស្រុកពញាឮ ខេត្តកណ្ដាល ហើយ ចាប់ពីពេលនោះមក ក្រុមអ្នកភូមិបានដើរដាក់ញត្តិសុំកិច្ចអន្តរាគមន៍គ្រប់ក្រសួងមន្ទីរ និងនៅស្ថាប័នកំពូលទាំងបីរបស់ជាតិ ប៉ុន្តែរហូតមកទល់ពេលនេះ មិនមានស្ថាប័នពាក់ព័ន្ធណាមួយដោះស្រាយទេ៕
No comments:
Post a Comment
yes