សមាជិកគណបក្សសង្គ្រោះជាតិក្នុងសមាជកាលពីថ្ងៃអាទិត្យ
គណបក្សសង្គ្រោះជាតិកម្ពុជា(CNRP) នឹងធ្វើមហាបាតុកម្មមួយនៅថ្ងៃទី ២៤ខែមេសាដើម្បីទាមទារឲ្យគណៈកម្មាធិការជាតិរៀបចំការបោះ ឆ្នោត(គ.ជ.ប) ធ្វើទៅតាមអនុសាសន៍របស់អង្គការសហប្រជាជាតិក្នុងការធ្វើ កំណែទម្រង់ប្រព័ន្ធបោះឆ្នោត និងជំរុញឲ្យមានវត្តមានរបស់លោក សម រង្ស៊ី ចូលរួមក្នុងការបោះឆ្នោត។
CNRP នឹងជូនដំណឹងទៅសាលារាជធានីអំពីគម្រោងនៃការធ្វើបាតុកម្ម ដែលមានអ្នកចូលរួម ៤ ពាន់នាក់នេះ នៅក្រោយថ្ងៃបុណ្យចូលឆ្នាំខ្មែរ។ លោក យឹម សុវណ្ណអ្នកនាំពាក្យ CNRP បានថ្លែងថា គ.ជ.ប. ត្រូវតែទទួលស្គាល់ថា បញ្ជីឈ្មោះបោះឆ្នោត មិនមានតម្លាភាព ព្រោះមានមនុស្សជាច្រើនបាត់ឈ្មោះ។ ដូច្នេះ គ.ជ.ប. ត្រូវតែធ្វើតាមអនុសាសន៍របស់តំណាងពិសេសអង្គការសហប្រជាជាតិ លោក សូរិយ៉ាស៊ូប៊ែរឌី និងអង្គការឃ្លាំមើលការបោះឆ្នោតជាច្រើនទៀត ដែលស្នើឲ្យ គ.ជ.ប.ផ្លាស់ប្តូរ និងធ្វើកំណែទម្រង់សមាសភាពរបស់ខ្លួន។
លោក យឹម សុវណ្ណ បញ្ជាក់ថា៖« ប្រសិនបើ គ.ជ.ប. មិនធ្វើកំណែទម្រង់តាមអនុសាសន៍របស់អង្គការសហប្រជាជាតិទេ មានន័យថា គ.ជ.ប.ជាឧបករណ៍របស់បក្សកាន់អំណាច»។
យោងតាមរបាយការណ៍កាលពីសប្តាហ៍មុនរបស់ Comfrel បានបង្ហាញថា មានពលរដ្ឋ១លាន២ សែននាក់បានបាត់ឈ្មោះពីបញ្ជីបោះឆ្នោតឆ្នាំ២០១២។ Comfrel និងអង្គការសង្គមស៊ីវិលមួយចំនួនទៀតបានទាមទារឲ្យ គ.ជ.ប.ធ្វើសវនាកម្មបញ្ជីឈ្មោះឡើងវិញប៉ុន្តែគ.ជ.ប.បានបដិសេធ។
អគ្គលេខាធិការ គ.ជ.ប. លោក ទេព នីថា បានបញ្ជាក់ជាថ្មីទៀតថា គ.ជ.ប. មិនអាចធ្វើតាមអនុសាសន៍ណាដែលផ្ទុយនឹងច្បាប់បានទេ។ លោក និយាយថា៖«ពួកគេមិនត្រូវបង្ខំឲ្យ គ.ជ.បធ្វើតាមពួកគេទេ។ បើ គ.ជ.ប. ធ្វើតាមគណបក្សណាមួយ វាហាក់បីដូចជា គ.ជ.ប. លម្អៀង»។
លោក ទិត សុធា អ្នកនាំពាក្យ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្រ្តី បានហៅគម្រោងការធ្វើបាតុកម្មរបស់ CNRP ថា ជាសកម្មភាពខុសច្បាប់។ លោកនិយាយថា៖« ការធ្វើបាតុកម្មដើម្បីត្រួសត្រាយផ្លូវសម្រាប់ការវិលត្រឡប់មក វិញរបស់លោក សម រង្ស៊ី គឺផ្ទុយនឹងច្បាប់បោះឆ្នោត។ លោក សម រង្ស៊ី មក ឬមិនមក វាជាសិទ្ធិរបស់បុគ្គល សម រង្ស៊ី មិនមែនជាការសម្រេចរបស់រដ្ឋាភិបាលទេ»។
អ្នកនាំពាក្យសាលា រាជធានីលោក ឡុង ឌីម៉ង់ បានព្រមានថា ប្រសិនបើបាតុកម្មរបស់ CNRP បង្កបញ្ហាស្មុគស្មាញប៉ះពាល់ដល់សណ្តាប់ធ្នាប់សាធារណៈអាជ្ញាធរ រាជធានីនឹងស្នើសុំជំនួយពីក្រសួងមហាផ្ទៃដើម្បីចាត់វិធានការ ៕
No comments:
Post a Comment
yes