ដើមឈើនៅដែនជម្រកសត្វព្រៃលំផាត់ ក្នុងខេត្តរតនគិរី ទើបតែត្រូវបានគេកាប់ផ្តួលថ្មីៗ
ក្រុមហ៊ុនដែលទទួលបានដីសម្បទានសេដ្ឋកិច្ច ពីរដ្ឋាភិបាលចំនួនបីនៅក្នុងខេត្តរតនគិរី កំពុងពួតដៃគ្នាកាប់បំផ្លាញព្រៃឈើនៅក្នុងដែនជម្រកសត្វព្រៃ លំផាត់យ៉ាងអនាធិបតេយ្យ ក្នុងនោះក៏មានដើមច្បោះជ័ររបស់ប្រជា ពលរដ្ឋរាប់ម៉ឺនដើមផងដែរ ត្រូវបានកាប់បំផ្លាញចាប់តាំងពីចុងឆ្នាំ២០១២ មក ដោយពុំមានអាជ្ញាធរណាទប់ស្កាត់ឡើយ។
អង្គការសិទ្ធិមនុស្ស អាដហុក និងអ្នកសារព័ត៌មានក្នុងស្រុកបានចុះទៅឃុំស្រែអង្គ្រង ស្រុកកូនមុំកាលពីម្សិលមិញ ដើម្បីធ្វើការស៊ើបអង្កេតពីករណីកាប់ឈើខុសច្បាប់ នៅក្នុងដែនជម្រកសត្វព្រៃលំផាត់ដែលស្ថិតនៅក្នុងស្រុកកូនមុំ និងស្រុកលំផាត់។
លោក ឆាយ ធី អ្នកសម្របសម្រួលសមាគមសិទ្ធិមនុស្សអាដហុក ប្រចាំខេត្តរតនគិរី បានឲ្យដឹងថា លោកបានធ្វើការសាកសួរអាជ្ញាធរមូលដ្ឋាននិងប្រជាពលរដ្ឋជាង២០ គ្រួសារនៅក្នុងតំបន់នោះ ដោយពួកគាត់បានអះអាងថា ក្នុងចំណោមក្រុមហ៊ុនទាំងនោះ ក៏មានក្រុមហ៊ុនជារបស់ឧកញ៉ាម្នាក់ផងដែរ។
លោក បញ្ជាក់ថា៖ «ក្រុមហ៊ុនសម្បទានចំនួន ៣ មានដូចជា ហ័ងអាញលំផាត់ ហ័ងអាញអណ្តូងមាស និងដូនពេញ(អា ហ្គ្រីកូ) បាននិងកំពុងកាប់បំផ្លាញឈើក្នុងដែនជម្រកសត្វព្រៃលំផាត់»។
លោកបន្ថែមថា ឈើប្រណីតទាំងនោះ មានមុខកាត់ពី៥០ទៅ១០០សង់ទីម៉ែត្រ ហើយក្រុមហ៊ុននីមួយៗ មានម៉ាស៊ីនអារឈើពី ២០ ទៅ ៣០គ្រឿង ដាក់ចល័ត អារក្នុងព្រៃ រួចមានម៉ាស៊ីនអារច្រៀកប្រើរ៉ៃ ប្រមាណជា ៥ គ្រឿង និងដឹកឈើអាររួចចេញទៅភ្នំពេញភ្លាមៗ។
លោក ឆាយ ធី បានថ្លែងដូច្នេះថា ៖«សកម្មភាពកាប់ឈើនេះ មានការបើកដៃពីមន្ត្រីដែនជម្រកសត្វព្រៃ និងទាហានកាងឲ្យក្រុមហ៊ុនចូលកាប់។ នេះជាបទល្មើសព្រៃឈើធ្ងន់ធ្ងរណាស់ បន្ទាប់ពីករណីកាប់ព្រៃឈើ នៅក្នុងតំបន់កន្ទុយនាគ កាលពីឆ្នាំ២០០៥ កន្លងមក»។
សកម្មភាពកាប់ឈើទាំងនេះ ក៏កើតមានលើដើមឈើរាប់ពាន់ដើមដែលពលរដ្ឋជាង២០ គ្រួសារបានចោះយកជ័រទឹករាប់សិបឆ្នាំមកហើយផងដែរ។ តំណាងប្រជាពលរដ្ឋឈ្មោះ ចាន់ ណារួន បានឲ្យដឹងថា ដើមត្រាច និងឈើទាល រាប់ពាន់ដើម ដែលពួកគាត់បានចោះយកជ័រទឹកត្រូវបានក្រុមហ៊ុនរបស់លោកឧកញ៉ាឈ្មោះថៃ កាប់អស់គ្មានសល់។
លោកនិយាយថា៖«ដើមណាមានមុខកាត់លើសពី ៥០សង់ទីម៉ែត្រឡើងទៅ គេសងថ្លៃឲ្យយើង១ដើម៨ពាន់រៀល។ គ្រួសារខ្ញុំមានដើមច្បោះជ័រ ៦០០ ដើម និងពលរដ្ឋខ្លះទៀត មានចាប់ពី១០០ទៅ២០០ដើម។ តែអីឡូវ ត្រូវឧកញ៉ាថៃ កាប់អស់ហើយ។ យើងគ្មានអ្វីរកស៊ីបានទៀតទេ»។
លោក ឈឹម សុឃឹម មេឃុំស្រែអង្គ្រងបានឲ្យដឹងថា ដីដែនជម្រកសត្វព្រៃនោះ ត្រូវបានកាត់មួយផ្នែកទៅឲ្យក្រុមហ៊ុន ប៉ុន្តែលោកមិនដឹងមានចំនួនប៉ុន្មាននោះទេ «ហើយបើទោះបីមានការកាប់បំផ្លាញព្រៃឈើមែនក៏ខ្ញុំមិនមាន អំណាចអ្វីទៅទប់ស្កាត់ដែរ»។
ភ្នំពេញ ប៉ុស្តិ៍ មិនអាចទាក់ទងក្រុមហ៊ុនទាំងបីនេះសុំការបំភ្លឺបានទេ។ បើទោះបីជាការកាប់បំផ្លាញព្រៃឈើទាំងនេះ មានទ្រង់ទ្រាយធំ ដែលកំពុងធ្វើឲ្យវិនាសអន្តរាយព្រៃឈើទាំងស្រុងយ៉ាងណាក៏ដោយ ក៏លោក ណាប់ ប៊ុនហេង អភិបាលរងខេត្តរតនគិរី បានមានប្រសាសន៍ថារដ្ឋាភិបាលតាមរយៈមន្ទីរបរិស្ថាន បាននិងកំពុងអភិវឌ្ឍទៅតាមបែបស្បែកខ្លានៅក្នុងតំបន់នោះ ដោយធ្វើការកាត់ផលប៉ះពាល់ផងដែរ។ ចំពោះការកាប់ឈើវិញ លោកអភិបាលរងរូបនេះ និយាយថា លោកពុំបានដឹងទេ។ ប៉ុន្តែលោកថា កន្លងមកករណីកាប់បំផ្លាញព្រៃឈើបែបនេះត្រូវបានបង្ក្រាបម្តងហើយ។
ដែន ជម្រកសត្វព្រៃលំផាត់ដែលកំពុងទទួលរងការកាប់បំផ្លាញស្ថិតនៅ ក្នុងខេត្តរតនគិរី មណ្ឌលគិរីនិងស្ទឹងត្រែងដែលមានទំហំប្រមាណជា២៥០០ គីឡូម៉ែត្រការ៉េ៕
No comments:
Post a Comment
yes