សមាជិកបណ្ដាញព្រៃឡង់ ក្នុងឃុំមានរិទ្ធ ស្រុកសណ្ដាន់ ខេត្តកំពង់ធំ ដែលចូលល្បាតក្នុងព្រៃឡង់ នៅថ្ងៃទី២៤ ខែមេសា ត្រូវក្រុមឈ្មួញឯកជនគំរាមកាប់សម្លាប់ បន្ទាប់ពីក្រុមសហគមន៍ព្យាយាមថតរូបសកម្មភាពការកាប់រានព្រៃយកដីធ្វើចម្ការរបស់ក្រុមឈ្មួញ ដែលបានបំពានលើដែនគ្រប់គ្រងរបស់សហគមន៍។
មន្ត្រីអង្គការសិទ្ធិមនុស្សដែលឃ្លាំមើលការរំលោភបទល្មើសព្រៃឈើ ចាត់ទុកទង្វើគំរាមកាប់សម្លាប់នោះជាការសម្លុតបំបាក់ស្មារតីមិនឲ្យប្រជាសហគមន៍ដើរល្បាតក្នុងព្រៃឡង់ បន្តទៀត។
ប្រជាសហគមន៍នៃបណ្ដាញព្រៃឡង់ ក្នុងស្រុកសណ្ដាន់ ខេត្តកំពង់ធំ កំពុងត្រៀមលិខិតបណ្ដឹងទៅអាជ្ញាធរ និងអង្គការសង្គមស៊ីវិល ឲ្យជួយអន្តរាគមន៍ពីការកាប់បំផ្លាញព្រៃឡង់ រានយកដីធ្វើចម្ការ និងបានគំរាមកាប់សម្លាប់ក្រុមសហគមន៍។
ប្រជាសហគមន៍ក្បាលអូរខ្ញាក់ លោក ពាង រិន រៀបរាប់ថា សមាជិកសហគមន៍ស្ថិតនៅភូមិត្បូងទិព្វ ឃុំមានរិទ្ធ ក្នុងស្រុកសណ្ដាន់ ចំនួន ៧នាក់ និងមន្ត្រីរដ្ឋបាលព្រៃឈើ ចំនួន ២នាក់ទៀត បានដើរចូលល្បាតក្នុងតំបន់ព្រៃឡង់ នៅថ្ងៃទី២៤ ខែមេសា។ លុះដល់ចំណុចក្បាលអូរខ្ញាក់ ក៏ប្រទះឃើញក្រុមឈ្មួញមានគ្នាប្រមាណ ២០នាក់ កំពុងឆ្ការដីដាំដំឡូងនៅកណ្ដាលព្រៃ។ លោក ពាង រិន បន្តថា ខាងសហគមន៍បានសួរនាំពីមូលហេតុដែលពួកគេមកឆ្ការដីដាំដំណាំលើដីសហគមន៍ តែពួកគេបានឆ្លើយថា ដីនោះមានម្ចាស់ត្រឹមត្រូវ ទើបលោកបានយកទូរស័ព្ទដៃមកថតពីសកម្មភាពរបស់ពួកគេ ក្នុងបំណងទុកជាភស្តុតាងសម្រាប់ប្ដឹងទៅសមត្ថកិច្ច ដែលពួកគេបានកាប់ព្រៃរំលោភយកដីសហគមន៍គ្រប់គ្រង។
លោកបញ្ជាក់ថា ពេលដែលលោកកំពុងថតរូបនោះ ស្រាប់តែលោក គំា យឿន ដែលស្គាល់ជាអតីតនាយប៉ុស្តិ៍នគរបាលឃុំងន បានទាញកាំបិតដេញកាប់លោក និងគំរាមកុំឲ្យថត ហើយប្រសិនបើគ្មានក្រុមសហគមន៍ឯទៀត និងមន្ត្រីរដ្ឋបាលព្រៃឈើ ២នាក់ ដែលទៅជាមួយជួយឃាត់ទេនោះ លោកទំនងជាត្រូវរបួសជាមិនខាន៖ «ខ្ញុំសុំថតរូប សុំថតរូបអ៊ីចឹងទៅ គេចង់រកកាប់ខ្ញុំប្រតប់ប្រតាយគ្នា ប៉ូលិសទៅឃាត់ពួកខ្ញុំតវ៉ាគ្នាមួយសន្ទុះធំដែរ ដីរានថ្មីទើបតែដុតរួចថ្មី យើងធ្វើជាវត្ថុតាងសហគមន៍យើងដែលយើងមិនដែលជួបប្រទះ»។
ជុំវិញបញ្ហានេះ មន្ត្រីរដ្ឋបាលព្រៃឈើ លោក ចិន្តា ដែលបានចូលរួមការចូលល្បាតព្រៃឡង់ ជាមួយសហគមន៍ក្បាលអូរខ្ញាក់ បញ្ជាក់ថា ពិតជាមានរឿងគំរាមកាប់ទៅលើប្រជាសហគមន៍ពិតមែន។ លោកបន្តថា ទំនាស់នោះកើតឡើងដោយសារតែក្រុមភាគីម្ខាងទៀតមិនចង់ឲ្យថតរូបពួកគេ រីឯក្រុមសហគមន៍នៅតែចចេសចង់ថត ដោយសម្អាងថាទុកជាភស្តុតាងនៃការរំលោភបទល្មើសព្រៃឈើលើដីសហគមន៍៖ «គាត់ជន្លកាំបិតរកកាប់ តែម៉េចហ៊ានកាប់នៅតំបន់នោះ»។
ទោះជាយ៉ាងណា មន្ត្រីរដ្ឋាភិបាលព្រៃឈើមិនបានឃាត់ខ្លួនលោក គាំ យឿន ដែលអ្នកភូមិចោទប្រកាន់ថាបានរំលោភដីសហគមន៍ និងបានយកកាំបិតគំរាមកាប់សមាជិកសហគមន៍នោះទេ ដោយបំបែកភាគីទាំងពីរមិនឲ្យមានទំនាស់នឹងគ្នាទៀត។
យ៉ាងនេះក្តី សហគមន៍ក្បាលអូរខ្ញាក់ កំពុងសរសេរលិខិតត្រៀមដាក់បណ្ដឹងទៅអាជ្ញាធរ និងអង្គការសង្គមស៊ីវិល ឲ្យជួយអន្តរាគមន៍រឿងកាប់ព្រៃឈើរានយកដីខុសច្បាប់ និងការប៉ុនប៉ងកាប់សម្លាប់មនុស្ស។
ជុំវិញបញ្ហានេះ អ្នកសម្របសម្រួលវេទិកាសាធារណៈនៃមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ ចាត់ទុកការគំរាមកាប់សម្លាប់លើសហគមន៍នេះជាការសម្លុតបំបាក់ស្មារតីរបស់សហគមន៍ ដែលតែងដើរល្បាតព្រៃឡង់ និងការរំលោភច្បាប់ព្រៃឈើ៖ «ប្រសិនបើគាត់គំរាមសហគមន៍ការពារព្រៃឈើ គឺគាត់ត្រូវមានទោសមួយជាន់ទៀតអ៊ីចឹង គាត់ត្រូវមានទោសពីរករណី។ ប៉ុន្តែកន្លងមក ទោះជាមានករណីហ្នឹងកើតឡើងក៏ដោយ សហគមន៍តែងប្ដឹងទៅសមត្ថកិច្ច ឬទៅជំនាញរដ្ឋបាលព្រៃឈើ ប៉ុន្តែរាល់ពាក្យបណ្ដឹងរបស់សហគមន៍មិនត្រូវបានដោះស្រាយទាល់តែសោះ ធ្វើឡើងដើម្បីបំបាក់ស្មារតីអ្នកដែលហ៊ានងើបឡើងតវ៉ាបំផ្លាញធនធានធម្មជាតិ»។
លោក ឈឹម សាវុធ បញ្ជាក់ថា ការចុះល្បាតរបស់សហគមន៍ព្រៃឈើ គ្រាន់តែជាការជួយរកភស្តុតាង និងជាការព្រមានខ្លះៗដល់មន្ត្រីខិលខូច និងជនប្រព្រឹត្តបទល្មើស។ លោកបញ្ជាក់ថា ការងារនេះមិនអាចទប់ស្កាត់បានទាំងស្រុងនោះឡើយ ប្រសិនបើមិនមានការសហការជាមួយមន្ត្រីអាជ្ញាធរនោះទេ៕
No comments:
Post a Comment
yes