អាងទឹកកំពីងពួយ ឬហៅថា រមណីយដ្ឋានកំពីងពួយ មានទទឹងប្រវែងជិត ៧គីឡូម៉ែត្រ
និងបណ្ដោយជិត ១០គីឡូម៉ែត្រ។ អាងនេះ ស្ថិតនៅឃុំតាគ្រាម ស្រុកបាណន់
ខេត្តបាត់ដំបង។ ទឹកនៅក្នុងអាងនេះ បច្ចុប្បន្នកំពុងរីងស្ងួត ដោយសារតែការបើកទ្វារ
ទឹកយកទឹកទៅស្រោចស្រពស្រូវប្រាំងជាច្រើនពាន់ហិកតារនៅតាមឃុំចំនួន ៥
ក្នុងស្រុកចំនួនបីរបស់ខេត្តបាត់ដំបង។
ត្រីពូជជាច្រើនប្រភេទដែលរស់នៅក្នុងអាងកំពីងពួយ កំពុងហិនហោច ដោយសារតែការចូលទៅនេសាទរបស់ប្រជាពលរដ្ឋ ទាំងនៅពេលយប់ និងនៅពេលថ្ងៃ។ ចំណែកឯអាជ្ញាធរមូលដ្ឋាន ស្រុក ខេត្ត និងស្ថាប័នជំនាញនៅពុំទាន់មានវិធានការទប់ស្កាត់ចំពោះការវិនាសហិនហោចពូជត្រីនេះទេ។
នៅក្នុងផ្ទៃបឹង គេសង្កេតឃើញមានការដាក់មង ការបង់សំណាញ់ និងមានការលួចឆក់ត្រីនៅពេលយប់ ចាប់យកត្រីតូចធំស្ទើរគ្មានសល់តែក្នុងរយពេលប៉ុន្មានសប្ដាហ៍កន្លងទៅនេះ។
ក្រុមអ្នកនេសាទថ្លែងនៅថ្ងៃទី១១ ខែឧសភា ថា ការសម្រុកទៅចាប់ត្រីនេះ កើតមានឡើងខណៈដែលទឹកនៅក្នុងអាងនោះ បានស្រកចុះស្ទើរដល់បាតបឹង ដោយសារតែការបើកទ្វារទឹក និងលូសម្ងាត់ យកទឹកទៅស្រោចស្រូវប្រាំងជាច្រើនពាន់ហិកតារនៅតាមឃុំនានា ក្នុងស្រុកបាណន់ ស្រុកថ្មគោល និងនៅជាយក្រុងបាត់ដំបង៖ «ប៉ុន្មានថ្ងៃមុនគេបាន ១៥គីឡូ ត្រីឆ្កោក ត្រីដូចត្រីត្រសក់ ក៏បានដែរ ១០គីឡូទៅ ១៥គីឡូ មងគេមានព័ន្ធជុំវិញហើយបង់សំណាញ់ ផ្អើល ឮតែសំណង់កំពីង ពួយរីងអ្នកណាក៏មកដែរ»។
ត្រីដែលគេនេសាទបាននោះ មានដូចជាត្រីឆ្ដោរ ត្រីរ៉ស់ ត្រីដំរី ត្រីខ្មាន់ ត្រីឆ្លាត ត្រីស្ពិន ត្រីឆ្កោក ជាដើម ត្រូវបានគេនេសាទបាន ហើយមានម៉ូយទិញត្រីទៅចាំទទួលទិញដល់កន្លែង ប៉ុន្តែគេពុំឃើញមានសមត្ថកិច្ចជំនាញ និងអាជ្ញាធរពាក់ព័ន្ធ មានវិធានការទប់ស្កាត់នោះឡើយ៖ «យកមកអ្នកបាត់ដំបង ទិញយកអស់រលីង គេលើកយកទៅ អ្នកចាំទិញវាស់ល្ងាច អ្នកណារកបានថ្លឹងៗ គេបង់បានណាស់។ សំបូរជាងគេនេះត្រីប្រា ជលផលគេយកមកលែងត្រីស្ពិន ត្រីតានិល»។
មេឃុំតាគ្រាម លោក អឹម ប៊ុនយូ បញ្ជាក់ថា ការបើកបង្ហូរយកទឹកពីអាងកំពីងពួយយកទៅស្រោចស្រពស្រែប្រាំងនេះ កើតមានអស់រយៈពេលជាង ១ខែ ដោយមានការឯកភាពពីសហគមន៍ប្រើប្រាស់ទឹក និងកសិករចំនួន ៥ឃុំ។ ដូចជាឃុំអូរតាគី ឃុំជ្រៃ ឃុំភ្នំសំពៅ ឃុំអូរម៉ាល់ និងឃុំតាគ្រាម។ ឃុំទាំងនេះស្ថិតនៅស្រុកថ្មគោល ក្រុងបាត់ដំបង និងស្រុកបាណន់។ លោកថា ស្រែប្រាំងទាំងនោះខ្វះទឹកដោយសារតែការធ្វើស្រែប្រាំងនៅឆ្នាំនេះលើសផែនការ។ តាមផែនការមានជាង ៤ពាន់ហិកតារ ប៉ុន្តែការធ្វើលើសផែនការរហូតទៅដល់ជាង ១.០០០ហិកតារ។ ទាក់ទិនទៅការរីងទឹកនៅក្នុងអាង ដែលអាចនាំទៅរកការហិនហោចពូជត្រី និងខ្វះខាតទឹកប្រើប្រាស់នៅឃុំតាគ្រាមនេះ។
លោកមេឃុំបញ្ជាក់ថា ខណ្ឌជលផលដាក់ចេញគោលការណ៍ណែនាំឲ្យបិទលូបង្ហូរទឹកសម្ងាត់នោះវិញ៖ «បិទលូសម្ងាត់វិញដើម្បីរក្សាទឹក រក្សាពូជត្រីឲ្យនៅខ្លះ។ ទទួលសារាចរណែនាំពីម្សិលមិញ ហើយក៏យើងត្រូវតែផ្សព្វផ្សាយដើម្បីឲ្យប្រជាពលរដ្ឋផ្អាកការធ្វើនេសាទត្រី រង់ចាំឲ្យមានការធ្លាក់ភ្លៀងច្រើនចាំយើងធ្វើការនេសាទតទៅទៀត»។
ប៉ុន្តែវិទ្យុអាស៊ីសេរី ពិនិត្យឃើញលូបង្ហូរទឹកសម្ងាត់នោះនៅពុំទាន់បានបិទ ហើយសកម្មភាពនេសាទត្រីនៅតែបន្តនៅក្នុងផ្ទៃបឹងដដែល។
នាយខណ្ឌរដ្ឋបាលជលផលបាត់ដំបង លោក ជួង សុភាថ្លែងថា ខណ្ឌរដ្ឋបាលជលផលនឹងបញ្ជូនមន្ត្រីរបស់ខ្លួនចុះទៅពិនិត្យបញ្ហានេះ ដើម្បីបិទលូសម្ងាត់ ព្រោះលូសម្ងាត់នោះអាចហូរទឹកចេញអស់ពីបឹង៖ «ព្រោះលូហ្នឹងវានៅខាងក្រោមហើយខ្ញុំនឹងឲ្យសង្កាត់ទៅពិភាក្សាជាមួយមេឃុំ សហការជាបន្ទាន់ ចេញសេចក្ដីជូនដំណឹងមកផ្សព្វផ្សាយជូនដំណឹងឲ្យបានគ្រប់គ្នា សុំឲ្យផ្អាកមួយរយៈសិនការនេសាទហ្នឹង»។
អស់រយៈពេលជាង ១០ឆ្នាំកន្លងទៅនេះ ខណ្ឌរដ្ឋបាលជលផលបាត់ដំបង បានលើកគម្រោងស្នើសុំទៅថ្នាក់ជាតិដើម្បីយកទីតាំងកណ្ដាលអាងទឹកកំពីងពួយទំហំ ២គីឡូម៉ែត្រគុណនឹង ៣គីឡូម៉ែត្រ ដើម្បីអភិរក្សពូជត្រី។ គម្រោងនោះស្ងាត់រហូតមកបច្ចុប្បន្ន ប៉ុន្តែរាល់ឆ្នាំ អាជ្ញាធរខេត្ត និងជំនាញជលផលបានយកពូជត្រី ទៅដាក់នៅក្នុងអាងទឹកកំពីងពួយនោះ។ គេកត់សម្គាល់ឃើញថា ការបើកបង្ហូរទឹកពីអាងយកទៅស្រោចស្រូវប្រាំង ប្រៀបបានទៅនឹងការបូមទឹក។ នៅពេលទឹកនៅក្នុងអាងរីងរាក់ ហើយក៏នាំគ្នាចាប់ត្រី៕
No comments:
Post a Comment
yes