សណ្ឋាគារផ្កាយ៤ ដែលអគ្គីភ័យឆាបឆេះ
អ្នកគ្រប់គ្រងសណ្ឋាគារ ជនជាតិម៉ាឡេស៊ី ពេលប្រាប់អ្នកកាសែត
សណ្ឋាគារផ្កាយ៤ ដែលអគ្គីភ័យឆាបឆេះ
សៀមរាប: ភ្ញៀវបរទេសប្រមាណ ៩៤នាក់ បានផ្អើលរត់ចុះដីទាំងកណ្តាលអធ្រាត្រ ក្នុងនោះមានភ្ញៀវមួយចំនួន ត្រូវបានប៉ូលិសទម្លុះទ្វារចូលជួយរំដោះ ខណៈកំពុងដេកលក់ក្នុងសណ្ឋាគារលំដាប់ផ្កាយ៤ ដែលត្រូវអគ្គីភ័យឆាបឆេះ។ ទោះបីសមត្ថកិច្ចមិនបានបញ្ជាក់ពីមូលហេតុ នៃការឆេះក៏ដោយ តែក្នុងហេតុការណ៍នេះ មិនបណ្តាលឲ្យមានមនុស្សបាត់បង់ជីវិតទេ។
ហេតុការណ៍នេះកើតឡើងនៅម៉ោង ២ និង ១៥នាទី រំលងអធ្រាត្រ ឈានចូលថ្ងៃទី១៥ ខែវិច្ឆិកា ឆ្នាំ២០១២ នៅសណ្ឋាគារលំដាប់ផ្កាយ៤ ឈ្មោះ ម៉ាចេកស្ទិក អូរៀនថល ដែលមានទីតាំងតាមបណ្តោយផ្លូវជាតិលេខ៦ ស្ថិតក្នុងភូមិគ្រួស សង្កាត់ស្វាយដង្គុំ ក្រុង-ខេត្តសៀមរាប។
ហេតុការណ៍នេះកើតឡើងនៅម៉ោង ២ និង ១៥នាទី រំលងអធ្រាត្រ ឈានចូលថ្ងៃទី១៥ ខែវិច្ឆិកា ឆ្នាំ២០១២ នៅសណ្ឋាគារលំដាប់ផ្កាយ៤ ឈ្មោះ ម៉ាចេកស្ទិក អូរៀនថល ដែលមានទីតាំងតាមបណ្តោយផ្លូវជាតិលេខ៦ ស្ថិតក្នុងភូមិគ្រួស សង្កាត់ស្វាយដង្គុំ ក្រុង-ខេត្តសៀមរាប។
សណ្ឋាគារម៉ាចេកស្ទិក អូរៀនថល លំដាប់ផ្កាយ៤ ត្រូវអគ្គីភ័យឆាបឆេះនៅជាន់ទី៣ ចាប់ពីបន្ទប់លេខ៣០១ ទៅដល់បន្ទប់លេខ៣០៥ និងបន្តឆេះរាលទៅដល់បន្ទប់ក្បែរនោះចំនួនពីរទៀត។ នៅព្រឹកថ្ងៃទី១៥ ខែវិច្ឆិកានេះ ស្នងការរងទទួលបន្ទុកអគ្គីភ័យ លោក ភឹង ចិន្តារិទ្ធ ដែលចុះទៅកន្លែងកើតហេតុ ពុំបានធ្វើអត្ថាធិប្បាយជុំវិញហេតុការណ៍នេះទេ។
ប៉ុន្តែលោកអនុសេនីយ៍ឯក ពិន វិចិត្រ នាយផ្នែកបច្ចេកទេស នៃការិយាល័យនគរបាលពន្លត់អគ្គីភ័យ បានឲ្យដឹងថា តាមការសន្និដ្ឋានជំហានដំបូង ការឆេះនេះអាចបណ្តាលមកពីទុស្សេខ្សែភ្លើង។ លោកបន្តថា ក្នុងហេតុការណ៍នេះ ខាងលោកបានប្រើប្រាស់ឡានទឹកចំនួន ៣ឡាន ទើបភ្លើងរលត់ទៅវិញ នៅវេលាម៉ោងជាង ៤ ទៀបភ្លឺ។
នៅព្រឹកថ្ងៃទី១៥ ខែវិច្ឆិកាដដែល អ្នកគ្រប់គ្រងសណ្ឋាគារ ជាបុរសជនជាតិម៉ាឡេស៊ី ឈ្មោះ SIVAM RAMAN បានប្រាប់អ្នកកាសែតថា ការឆេះនេះ គឺបណ្តាលមកពីភ្ញៀវជនជាតិរុស្ស៊ីម្នាក់ ដែលស្នាក់នៅក្នុងបន្ទប់លេខ៣០៤។ ភ្ញៀវរូបនេះ ក្រោយពីផឹកស្រាស្រវឹងជោកជាំ ក៏បានជក់បារី ហើយឡើងទៅចូលបន្ទប់ដេក។
អ្នកគ្រប់គ្រងសណ្ឋាគារបានឲ្យដឹងទៀតថា ក្រោយបុរសជនជាតិរុស្ស៊ីស្រវឹងស្រា និងជក់បារី ឡើងទៅដេក ក៏ស្រាប់តែមានអណ្តាតភ្លើង ឆាបឆេះចេញពីបន្ទប់លេខ៣០៤ តែម្តង។ ដូច្នេះដើមចម ដែលបណ្តាលឲ្យមានការឆាបឆេះនេះ គឺមកពីជននោះចោលកន្ទុយបារីទៅលើកម្រាលព្រំ។
ក្រៅពីសម្តែងការសោកស្តាយ អ្នកគ្រប់គ្រងសណ្ឋាគារបានបញ្ជាក់ថា ក្នុងហេតុការណ៍នេះ ខូចខាតទ្រព្យសម្បត្តិប្រហែល ៣ ទៅជាង ៤ ម៉ឺនដុល្លារអាមេរិក។ ក្រៅពីខូចខាតទ្រព្យសម្បត្តិ ភ្ញៀវជនជាតិរុស្ស៊ីជាង ៩០នាក់ ដែលសុទ្ធសឹងជាភ្ញៀវទេសចរ ក៏មានការភ័យខ្លាច ហើយសណ្ឋាគារប្រហែលជាអាចបិទទ្វារមួយរយៈ ដើម្បីជួសជុល។
បន្ទាប់ពីមានការអះអាងពីអ្នកគ្រប់គ្រងសណ្ឋាគារ ថាហេតុការណ៍ភ្លើងឆេះនេះ ផ្តើមឡើងពីបុរសជនជាតិរុស្ស៊ី គេឃើញប៉ូលិសអន្តោប្រវេសន៍ បានចុះទៅសាកសួរបុរសនោះ។ ក្នុងស្ថានភាពស្រវឹង និងកំពុងតែអង្គុយផឹកស្រា នៅក្នុងសណ្ឋាគារនាព្រឹកថ្ងៃដដែល បុរសជនជាតិរុស្ស៊ីបានប្រាប់ប៉ូលិសថា មិនពាក់ព័ន្ធនឹងខ្លួនឡើយ ខ្លួនមិនដឹងអ្វីទាំងអស់។
នៅរសៀលថ្ងៃដដែល លោកវរសេនីយ៍ត្រី ចៅ ម៉ៅវីរៈ នាយការិយាល័យនគរបាលអន្តោប្រវេសន៍ បានឲ្យដឹងថា ក្រោយទទួលព័ត៌មាននេះ លោកបានចាត់កម្លាំងឲ្យចុះទៅសាកសួរ។ ប៉ុន្តែបន្ទាប់ពីស្រាវជ្រាវ និងឆែកកាមេរ៉ាសុវត្ថិភាព គឺមិនមានការពាក់ព័ន្ធនឹងបុរសជនជាតិរុស្ស៊ីទេ។ លោកបន្តថា ភ្លើងឆេះមុនម៉ោង ២ ហើយពេលបុរសនេះឡើងទៅដេក ប្រទះឃើញភ្លើងឆេះ ក៏រត់ចុះមកវិញ តែត្រូវបានគេចោទប្រកាន់បែបនេះ។
លោកនាយការិយាល័យបន្ថែមថា ការចោទប្រកាន់នេះ គឺគ្រាន់តែជាការដោះបន្ទុក ជាមួយថៅកែសណ្ឋាគារ ពីសំណាក់អ្នកគ្រប់គ្រងសណ្ឋាគារតែប៉ុណ្ណោះ។ ដូច្នេះការឆេះសណ្ឋាគារខាងលើនេះ ពុំមាននរណាបានដឹងមូលហេតុពិតប្រាកដឡើយ៕
No comments:
Post a Comment
yes