ខ្ទមរបស់ប្រជាពលរដ្ឋចំណូលថ្មីត្រូវគេដុតបំផ្លាញ នៅស្រុកវ៉ារិន ខេត្តសៀមរាប
កាលពីថ្ងៃទី៨ ខែឧសភា ឆ្នាំ២០១៣
អង្គការសិទ្ធិមនុស្សក្រៅរដ្ឋាភិបាលចំនួន២ ក្នុងខេត្តសៀមរាប បានព្រួយបារម្ភថា ប្រជាពលរដ្ឋចំនួនជាង ៧០គ្រួសារ ដែលទើបតែទៅរុករានដីព្រៃរបស់រដ្ឋដើម្បីសង់ទីលំនៅក្នុងស្រុកវ៉ារិន អាចនឹងត្រូវបណ្ដេញចេញនៅពេលខាងមុខ។
ការព្រួយបារម្ភនេះ ដោយសារតែអាជ្ញាធរចាប់តាំងពីថ្នាក់ភូមិ ឃុំ រហូតដល់ស្រុក បានបដិសេធមិនទទួលស្គាល់ប្រជាពលរដ្ឋទាំងនោះ ថាមិនមែនជាអ្នកភូមិដែលធ្លាប់រស់នៅទីនោះឡើយ។
តើបញ្ហាអ្វីខ្លះដែលកំពុងប្រឈមមុខចំពោះប្រជាពលរដ្ឋទាំងនោះ?
ប្រជាពលរដ្ឋចំនួន ៧៩គ្រួសារ បានចោទប្រកាន់មេក្រុម ព្រមទាំងមេភូមិគោកស្រុក នៃឃុំវ៉ារិន និងបក្ខពួកមួយចំនួនទៀត ថាជាអ្នកដែលពាក់ព័ន្ធក្នុងសកម្មភាពកាប់ និងដុតបំផ្លាញផ្ទះរបស់ពួកគេអស់ជាច្រើនខ្នង។
ក្រុមអ្នកភូមិបានធ្វើពាក្យបណ្ដឹងមួយច្បាប់ដាក់ជូនទៅមេឃុំវ៉ារិន មេឃុំល្វាក្រាំង និងអង្គការសិទ្ធិមនុស្សអាដហុក (Adhoc) ដើម្បីឱ្យជួយស៊ើបអង្កេត និងអន្តរាគមន៍ផ្លូវច្បាប់ចំពោះករណីនោះ។
បុរសឈ្មោះ សួន សុផល បានចេញមុខធ្វើជាតំណាងប្រជាពលរដ្ឋ និងផ្ដិតមេដៃទទួលខុសត្រូវលើពាក្យបណ្ដឹងនោះ។ លោកបានមានប្រសាសន៍ថា រូបលោក និងប្រជាពលរដ្ឋចំនួន ៧៩គ្រួសារ កំពុងកើតទុក្ខមិនសុខចិត្តចំពោះសកម្មភាពកាប់ និងដុតបំផ្លាញផ្ទះសម្បែងដូច្នេះទេ។
តំណាងប្រជាពលរដ្ឋរូបនោះបានអះអាងថា កាលពីអំឡុងខែសីហា ឆ្នាំ២០១២ កន្លងទៅ អាជ្ញាភូមិគោកស្រុក បានចែកដីព្រៃខ្លះមកឱ្យពួកគាត់ចំនួន ៧៩គ្រួសាររស់នៅ ក៏ប៉ុន្តែ បន្ទាប់ពីអ្នកភូមិបានកាប់ឆ្ការព្រៃស្រឡះសង់ជាខ្ទមរស់នៅមក គេដឹងថា មានអ្នកចង់ទិញយកដីទាំងនោះ៖ «ក្រោយមក លោក តាំង គឹមហឿន ហ្នឹង ចាប់ផ្ដើមដេញប្រជាជន ថាប៉ះដីបងប្អូនខ្លួនគាត់។ ដល់ពេលថ្ងៃទី១០ ខែមករា ឆ្នាំ២០១៣ លោក តាំង គឹមហឿន បានហៅឈ្មោះ ញ៉ ជាអ្នកម៉ៅការចម្ការកៅស៊ូ ទៅមើលដីហ្នឹង។ ពេលទៅកាប់រើដុតអស់ ៧ខ្ទម លុះរំលងបាន ២ថ្ងៃក្រោយ គ្នា ១៥នាក់មកដល់កាប់រើប្រាវ អាក្រោយ ៤-១០ទៀត»។
ក្នុងពាក្យបណ្ដឹងរបស់ប្រជាពលរដ្ឋទាំងនោះ បានចោទប្រកាន់លោក តាំង គឹមហឿន ជាមេក្រុមទី៨ និងអ្នកស្រី មុន យ៉េន ជាមេភូមិគោកស្រុក ព្រមទាំងបក្ខពួកចំនួន ១៥នាក់ទៀត ថាជាអ្នកពាក់ព័ន្ធចំពោះរឿងកាប់ និងដុតបំផ្លាញខ្ទមរបស់ប្រជាពលរដ្ឋនោះ។
ទោះយ៉ាងណា វិទ្យុអាស៊ីសេរី មិនអាចទាក់ទងលោក តាំង គឹមហឿន និងអ្នកស្រី មុន យ៉េន ដើម្បីសុំប្រតិកម្មជុំវិញការចោទប្រកាន់នោះយ៉ាងណាបានទេ។
ក៏ប៉ុន្តែ អាជ្ញាធរបានបដិសេធចោលការចោទប្រកាន់របស់ប្រជាពលរដ្ឋនោះថា គឺជារឿងមិនពិត។ អនុប្រធានភូមិគោកស្រុក លោក ព្រំ សុភាព បានមានប្រសាសន៍ថា តាមពិតខ្ទមទាំងនោះគឺឆេះបំផ្លាញដោយសារភ្លើងព្រៃដែលរាលមកដល់។ អនុប្រធានភូមិដដែលបានបញ្ជាក់ថា មេឃុំវ៉ារិន និងអាជ្ញាធរពាក់ព័ន្ធមួយចំនួន បានចុះពិនិត្យស្ថានភាពខ្ទមទាំងនោះ ហើយឃើញថា មិនមែនមេក្រុម មេភូមិ និងបក្ខពួកទៅដុតបំផ្លាញដូចការចោទប្រកាន់ទេ។ ចំណែកឯប្រជាពលរដ្ឋដែលទៅសង់ខ្ទមរស់នៅទីនោះទៀតសោត ក៏អាជ្ញាធរមិនដែលស្គាល់ទេ គឺសុទ្ធតែជាជនចំណូលថ្មី។
លោក ព្រំ សុភាព៖ «ថាឆេះឯណា ៧ខ្ទម ប៉ុន្តែគេធ្វើនោះ គឺដើម្បីច្បាមយកដីធ្វើខ្ទមសម្រាប់សង់យកដី ហើយដែលមានដាក់ពាក្យបណ្ដឹង មិនមែនជាប្រជាពលរដ្ឋខ្ញុំនេះទេ គឺគ្រាន់តែដាក់ភូមិគោកស្រុក ក៏ប៉ុន្តែភូមិនោះនៅឆ្ងាយរាប់សិបគីឡូពីភូមិគោកស្រុក ទៅ។ ឈ្មោះ សួន សុផល នេះ គឺមកស្នាក់នៅប្រៀបដូចចោរព្រៃ។ កន្លងមក ខ្ញុំក៏មិនដែលបានឃើញបានស្គាល់រូប ទើបតែឃើញដែលថាដាក់ពាក្យបណ្ដឹងនេះឯង។ បើខ្ញុំអ្នកទទួលខុសត្រូវក្នុងភូមិគោកស្រុក អត់បានឃើញលិខិតផ្លាស់ប្ដូរទីលំនៅពីឆ្នាំណាមកឆ្នាំណា។ នៅក្នុងភូមិគោកស្រុក ៣៩៧គ្រួសារ អត់មានឈ្មោះ សួន សុផល នោះទេ»។
កាលពីពេលថ្មីៗ អង្គការសិទ្ធិមនុស្សលីកាដូ (Licadho) និងសមាគមការពារសិទ្ធិមនុស្សអាដហុក ខេត្តសៀមរាប បានសហការគ្នាចុះទៅជួបអ្នកភូមិ ដើម្បីស៊ើបអង្កេតស្វែងរកការពិតនៃករណីនោះ។
អ្នកស៊ើបអង្កេតរបស់សមាគមការពារសិទ្ធិមនុស្សអាដហុក លោក សួស ណារិន បានមានប្រសាសន៍ថា ការស៊ើបអង្កេតកាលពីថ្ងៃទី៨ ខែឧសភា កន្លងទៅ គឺក្រុមអង្គការសិទ្ធិមនុស្សទទួលបានលទ្ធផលអវិជ្ជមាន ដោយសារតែអាជ្ញាធរឆ្លើយថា ការខូចខាតជម្រករបស់ប្រជាពលរដ្ឋមួយចំនួននោះ គឺបំផ្លាញដោយសារភ្លើងព្រៃ។
លោក សួស ណារិន បានបញ្ជាក់ថា ទោះយ៉ាងណា តាមការស៊ើបអង្កេតបានឱ្យដឹងថា ប្រជាពលរដ្ឋចំនួន ៧៩គ្រួសារនោះ គឺបានចូលទៅកាប់រានព្រៃរស់នៅថ្មីជាប់ដីរបស់ក្រុមហ៊ុនចម្ការកៅស៊ូសំរោង រូប៊ើ ចន្លោះភូមិសាស្ត្រឃុំវ៉ារិន ឃុំល្វាក្រាំង និងឃុំស្រែណូយ៖ «យើងរកឃើញថា ការចូលកាន់កាប់ថ្មីក្រោយច្បាប់ភូមិបាល ជាការខុសច្បាប់ ប៉ុន្តែគាត់កាន់កាប់មុនបទបញ្ជា០១ របស់រដ្ឋាភិបាល។ ឃើញថា ការកាប់រាននេះ មិនមានលិខិតស្នាមអីពីអាជ្ញាធរភូមិឃុំដែលអនុញ្ញាតឱ្យទេ គឺជាការចូលទៅកាន់កាប់ក្រោយច្បាប់ភូមិបាល ប៉ុន្តែគាត់បានអះអាងថា ដោយសារពួកគាត់ហ្នឹងចំណាកស្រុកមកពីឆ្ងាយ គាត់អត់មានដីធ្លីនៅ គាត់ក៏ចូលទៅកាន់កាប់តំបន់នោះ។ គាត់បានសង់ខ្ទមធ្វើជាលំនៅឋានហ្នឹង ៧៩គ្រួសារ»។
អង្គការក្រៅរដ្ឋាភិបាល បានរកឃើញថា ក្រុមអ្នកភូមិទាំងនោះបាននាំគ្នាចំណាកស្រុកចេញពីក្រុងប៉ៃលិន ទៅរស់នៅតំបន់ព្រៃនៃស្រុកវ៉ារិន ហើយអង្គការសិទ្ធិមនុស្ស ព្រួយបារម្ភថាប្រជាពលរដ្ឋទាំងនោះអាចនឹងត្រូវបណ្ដេញចេញនៅពេលណាមួយ។
ក្នុងបណ្ដឹងរបស់ប្រជាពលរដ្ឋចំនួន ៧៩គ្រួសារ បានអះអាងថា ការដែលមេក្រុមទី៨ និងបក្ខពួកនៅភូមិគោកស្រុក បាននាំគ្នាទៅដុតបំផ្លាញខ្ទមអ្នកភូមិចំណូលថ្មីនោះ គឺធ្វើឱ្យបាត់បង់ទ្រព្យសម្បត្តិប្រមាណ ១.៥០០ដុល្លារ លុយខ្មែរប្រមាណ ២លានរៀល មាស ១ជី ព្រមទាំងសម្លៀកបំពាក់ និងសម្ភារៈប្រើប្រាស់ក្នុងផ្ទះមួយចំនួនទៀត។
ក្រុមប្រជាពលរដ្ឋចំណូលថ្មីទាំងនោះកំពុងប្ដឹងទាមទារប្រាក់ជំងឺចិត្តចំនួន ២០លានរៀល ព្រមទាំងទាមទារឱ្យច្បាប់ផ្ដន្ទាទោសទៅលើមេក្រុមទី៨ ឈ្មោះ តាំង គឹមហឿន និងបក្ខពួកមួយចំនួនដែលពាក់ព័ន្ធ នឹងការចោទប្រកាន់ថាបានដុតបំផ្លាញខ្ទមពួកគេនោះ៕
No comments:
Post a Comment
yes