អ្នកភូមិបឹងកក់ នៅមុខស្ថានទូតកូរ៉េខាងត្បូងកាលពីម្សិលមិញ
អ្នកភូមិបឹងកក់ កាលពីម្សិលមិញ បាននាំគ្នាទៅដាក់ញត្តិ នៅស្ថានទូតកូរ៉េខាងត្បូង ក្នុងទីក្រុងភ្នំពេញ ដើម្បីស្នើសុំឲ្យរដ្ឋាភិបាលប្រទេសសេរីមួយនេះ ជួយជំរុញឲ្យរដ្ឋាភិបាលកម្ពុជា ធ្វើការដោះស្រាយបញ្ហាជម្លោះដីធ្លីដ៏រ៉ាំរ៉ៃរបស់ពួកគេ។
ការដាក់ញត្តិរបស់អ្នកភូមិបឹងកក់នេះ ធ្វើឡើងបន្ទាប់ពីសកម្មជនអង្គការសង្គមស៊ីវិលកូរ៉េខាងត្បូង បានទៅប្រមូលផ្តុំគ្នា នៅខាងមុខស្ថានទូតកម្ពុជាប្រចាំនៅទីក្រុងសេអ៊ូល ធ្វើការទាមទារឲ្យរដ្ឋាភិបាលកម្ពុជា ប្រញាប់ដោះស្រាយបញ្ចប់បញ្ហាជម្លោះដីធ្លីនៅក្នុងតំបន់បឹងកក់ឲ្យបានឆាប់ និងឲ្យមានភាពយុត្តិធម៌ ចំពោះប្រជាពលរដ្ឋ ដែលជាអ្នកទទួលរងគ្រោះពិតប្រាកដ ដោយសារគម្រោងអភិវឌ្ឍរបស់ក្រុមហ៊ុនស៊ូកាគូអ៊ីន របស់លោកឡាវ ម៉េងឃីន សមាជិកព្រឹទ្ធសភាគណបក្សប្រជាជនកម្ពុជា។
បើទោះបីជា មានការរារាំងខ្លះៗ ពីសមត្ថកិច្ចដូចពេលមុនៗក្តី ក៏ក្រុមអ្នកភូមិបឹងកក់ ដែលមានការចូលរួមពីអ្នកភូមិសហគមន៍បុរីកីឡា សរុបប្រមាណ ៥០នាក់ បានសម្រុកចូលទៅអង្គុយនៅមុខស្ថានទូតកូរ៉េ និងបានធ្វើការស្រែកអំពាវនាវសូមឲ្យរដ្ឋាភិបាលប្រទេសកូរ៉េខាងត្បូង ដែលមានសម្ព័ន្ធភាពល្អជាមួយរដ្ឋាភិបាលកម្ពុជា សូមជួយជំរុញឲ្យរដ្ឋាភិបាលកម្ពុជា ត្រូវចាត់វិធានការឲ្យបានឆាប់តាមដែលអាចធ្វើទៅបាន ដើម្បីដោះស្រាយបញ្ចប់បញ្ហាជម្លោះដីធ្លីដ៏រ៉ាំរ៉ៃមួយនេះ។
ក្រៅពីការទាមទារឲ្យដោះស្រាយបញ្ហាដីធ្លី ក្រុមអ្នកភូមិក៏បានទាមទារឲ្យដោះលែងអ្នកស្រី យ៉ោម បុប្ជា ដែលកំពុងជាប់ឃុំនៅពន្ធនាគារព្រៃសផងដែរ។ អ្នកភូមិបានកាន់រូបថត អ្នកស្រីយ៉ោម បុប្ជា ដែលអង្គការលើកលែងទោសអន្តរជាតិហៅថា ជាអ្នកទោសមនសិការ។
បើតាមតំណាងអ្នកភូមិបឹងកក់ មន្ត្រីស្ថានទូតកូរ៉េខាងត្បូង បានទទួលយកញត្តិរបស់ពួកគាត់។
បញ្ហាជម្លោះដីធ្លី នៅក្នុងតំបន់បឹងកក់ និងបុរីកីឡា ត្រូវបានលោកប៉ា សុជាតិវង្ស អភិបាលរាជធានីភ្នំពេញ ដែលទើបតែឡើងកាន់តំណែងជំនួសលោកកែប ជុតិមា កាលពីថ្ងៃសុក្រ បានប្រាប់អ្នកភូមិ នៅក្នុងជំនួបមួយកាលពីថ្ងៃចន្ទថា លោកនឹងធ្វើការប្រជុំនិងចុះទៅពិនិត្យផ្ទាល់នៅលើដីជម្លោះ ហើយនឹងធ្វើការដោះស្រាយឲ្យបានឆាប់៕
No comments:
Post a Comment
yes