ក្រុមប្រជាពលរដ្ឋបឹងកក់ បានប្រារព្ធទិវារម្លឹកគុណអ្នកម្តាយ នៅមុខស្នងការដ្ឋាននគរបាល រាជធានីភ្នំពេញ នាព្រឹកថ្ងៃអាទិត្យ ទី១២ ខែឧសភា ឆ្នាំ២០១៣។ ក្រុមអ្នកភូមិ បានរៀបចំបាយទឹក សម្រាប់កុមារតូចៗ និងមនុស្សចាស់ ទទួលទាននៅមុខស្នងការប៉ូលិស ជាមួយនឹងការស្រែកទាមទារឲ្យមានការដោះលែងអ្នកស្រី យ៉ោម បុប្ផា ចេញពីពន្ធនាគារ PJ។
ក្នុងពិធីជួបជុំនោះ កូនប្រុសរបស់អ្នកស្រី យ៉ោម បុប្ផា ក៏បានចូលរួមក្នុងពិធីជួបជុំ ដើម្បីទាមទារឲ្យដោះលែងម្តាយរបស់ខ្លួនផងដែរ នៅព្រឹកថ្ងៃអាទិត្យនេះ។ នេះបើតាមស្ត្រីតំណាងអ្នកភូមិបឹងកក់។
ក្រុមអ្នកភូមិបឹងកក់ ដែលភាគច្រើនជាស្ត្រី ក៏បានស្រែកទាមទារឲ្យព្រះមហាក្សត្រ ព្រះរាជទានការលើកលែងទោសដល់អ្នកស្រី យ៉ោម បុប្ផា ក្នុងឱកាសនៃព្រះរាជពិធីបុណ្យចម្រើនព្រះជន្មវស្សា គម្រប់ ៦០ ព្រះវស្សា យាងចូល ៦១ ព្រះវស្សា របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាថ្ងៃទី១៣-១៤-១៥ ខែឧសភា ឆ្នាំ២០១៣។
សូមរម្លឹកថា ស្ត្រីអ្នកភូមិបឹងកក់ អ្នកស្រី យ៉ោម បុប្ផា កាលពីព្រឹកថ្ងៃទី១០ ខែឧសភា ឆ្នាំ២០១៣ ត្រូវបានគេប្តូរពីការឃុំខ្លួន នៅពន្ធនាគារព្រៃស ទៅកាន់ពន្ធនាគារ PJ ដែលស្ថិតក្រោមការគ្រប់គ្រងរបស់ស្នងការប៉ូលិសរាជធានីភ្នំពេញ។ មូលហេតុ ត្រូវបានអ្នកគ្រប់គ្រងពន្ធនាគារ លោក គុយ ប៊ុនសន ប្រធាននាយកដ្ឋានពន្ធនាគារ របស់ក្រសួងមហាផ្ទៃ បានបញ្ជាក់ថា មកពីនៅពន្ធនាគារព្រៃស ម២ ចង្អៀតខ្លាំងពេក។
អ្នកស្រី យ៉ោម បុប្ផា ជាសកម្មជន អ្នកតវ៉ាដីធ្លីដ៏សកម្ម នៅតំបន់ភូមិបឹងកក់ អាយុ ២៩ ឆ្នាំ ត្រូវបានចាប់ខ្លួន នៅថ្ងៃទី៤ ខែកញ្ញា ឆ្នាំ២០១២ ពីបទចោទប្រកាន់ថា អ្នកស្រី បានចូលរួមប្រើអំពើហិង្សា ដោយចេតនា តាមរយៈការវាយលើបុរសអ្នករត់ម៉ូតូឌុបពីរនាក់ ឲ្យរងរបួស។
កាលពីព្រឹកថ្ងៃទី២៧ ខែធ្នូ ឆ្នាំ២០១២ អ្នកស្រី យ៉ោម បុប្ផា ត្រូវបានតុលាការសាលាដំបូង រាជធានីភ្នំពេញ ផ្តន្ទាទោស ដាក់ពន្ធនាគារ ៣ ឆ្នាំ និងតម្រូវឲ្យបង់លុយ ជំងឺចិត្ត ទៅបុរសអ្នករត់ម៉ូតូឌុបពីរនាក់ សរុប ៦០ លានរៀល។ មកដល់ពេលនេះ សំណុំរឿងក្តីអ្នកស្រី យ៉ោម បុប្ផា ស្ថិតនៅតុលាការសាលាឧទ្ធរណ៍។
ករណីតុលាការកាត់ទោសលើស្ត្រីបឹងកក់ អ្នកស្រី យ៉ោម បុប្ផា ក៏មានក្រុមស្ត្រីអ្នកភូមិបឹងកក់ និងសកម្មជនអង្គការសង្គមស៊ីវិលជាតិ និងអន្តរជាតិ បានធ្វើការប្រមូលផ្តុំ គាំទ្រអ្នកស្រី យ៉ោម បុប្ផា និងទាមទារឲ្យតុលាការដោះលែងអ្នកស្រី យ៉ោម បុប្ផា។
ក្រុមអ្នកតវ៉ា និងអង្គការសិទ្ធិមនុស្ស បានចាត់ទុកថា អ្នកស្រី យ៉ោម បុប្ផា ជាសកម្មជនតវ៉ាដីធ្លី ហើយត្រូវអាជ្ញាធរចាប់ខ្លួន យកទៅកាត់ទោសនោះ គឺដើម្បីបំបាក់ស្មារតីអ្នកតវ៉ាដីធ្លី នៅបឹងកក់។
ក៏ប៉ុន្តែក៏មានក្រុមអ្នករត់ម៉ូតូឌុប តែងតែបានប្រមូលផ្តុំ លើកបដា ទាមទារឲ្យតុលាការ ផ្តន្ទាទោសលើអ្នកស្រី យ៉ោម បុប្ផា ដោយពួកគេសំអាងថា អ្នកស្រី យ៉ោម បុប្ផា ជាអ្នកចូលរួមវាយទៅលើអ្នករត់ម៉ូតូពីរនាក់ ឲ្យរងរបួស កាលពីដើមខែកញ្ញា ឆ្នាំ២០១២។ សំណុំរឿងក្តីនោះ ជារឿងព្រហ្មទណ្ឌ ល្មើសច្បាប់ មិនមែនជាករណីជម្លោះដីធ្លីទេ។
នៅចុងក្រោយនេះ សម្តេចនាយករដ្ឋមន្ត្រី ហ៊ុន សែន ក៏បានថ្លែងជាសាធារណៈថា ករណីស្ត្រីបឹងកក់ អ្នកស្រី យ៉ោម បុប្ផា ជារឿងក្តីព្រហ្មទណ្ឌ នៅតុលាការ តែបែរជាត្រូវបានគេបង្វែជារឿងដីធ្លី ហើយទម្លាក់កំហុសលើរដ្ឋាភិបាលទៅវិញ៕
No comments:
Post a Comment
yes