អតីតអ្នកបឹងកក់តវ៉ានៅមុខសាលារាជធានីភ្នំពេញ
អតីតអ្នកបឹងកក់ជិត៥០នាក់ នៅថ្ងៃព្រហស្បតិ៍នេះ បានបន្តកូដកម្មបិទផ្លូវចូលក្នុងសាលារាជធានីភ្នំពេញ បន្ទាប់ពីពួកគេរងការបង្ក្រាបពីសមត្ថកិច្ចកាលពីម្សិលម៉ិញ ដែលពួកគេអះអាងពេលនេះកំពុងធ្លាក់ខ្លួនឈឺ។
អ្នកស្រី ស៊ាង ណារ៉េត អះអាងជាតំណាងអតីតអ្នកបឹងកក់ ដែលទទួលសំណងហើយនោះ ថ្លែងនៅកន្លែងតវ៉ាព្រឹកនេះថា មូលហេតុដែលពួកគាត់ តវ៉ាម្តងហើយម្តងទៀតនេះ ដោយសារអភិបាលរាជធានីថ្មី លោក ប៉ា សុជាតិវង្ស មិនព្រមចេញមកដោះស្រាយបញ្ហាឲ្យពួកគាត់។ អ្នកស្រីថា សំណងដែលពួកគាត់ទទួលបាន ពីក្រុមហ៊ុនមិនបានធ្វើឲ្យជីវភាពគាត់ ដូចដើមនោះទេ។
កាលពីថ្ងៃពុធម្សិលមិញនេះ ស្នងការនគរបាលរាជធានីភ្នំពេញ បានប្រើឡានទឹកចំនួន៣គ្រឿង បាញ់បង្ក្រាបប្រជាសហគមន៍ ជិត២០០នាក់ មកពីបឹងកក់ អតីតអ្នកបឹងកក់ អ្នកបុរីកីឡា និងអ្នកថ្មគោល ដែលព្យាយាមបិទមហាវិថីព្រះមុន្នីវង្ស ខាងមុខសាលារាជធានីភ្នំពេញ ដើម្បីជំរុញអភិបាលថ្មី ចេញមុខដោះស្រាយជម្លោះដីធ្លី តាមការសន្យា។ ក្នុងការបង្ក្រាបនោះ ធ្វើឲ្យប្រជាពលរដ្ឋ៣នាក់សន្លប់ អ្នកខ្លះរបូតសម្លៀកបំពាក់ និងអ្នកខ្លះទៀតរងការឈឺចាប់ ដោយសាររងកម្លាំងទឹក។
អ្នកស្រី អោ ស៊ីហ៊ាង អាយុ៦០ឆ្នាំ ដែលអះអាងថា មានជំងឺផងនោះ បានឲ្យដឹងថា ការបង្ខំឲ្យពួកគាត់ចាកចេញ ដោយសំណងបន្តិចបន្តួច កន្លងមកនេះ ធ្វើឲ្យពួកគាត់រស់ដូចស្លាប់។
មិនអាចសុំការអធិប្បាយពីអភិបាលរាជធានីភ្នំពេញ លោក ប៉ា សុជាតិវង្ស បានទេ ដោយលោកប្រាប់ថាជាប់ប្រជុំ។
សម្រាប់ក្រុមប្រឹក្សាឃ្លាំមើលកម្ពុជា បានចេញសេចក្តីថ្លែងការណ៏នៅថ្ងៃនេះ ដោយថ្កោលទោសយ៉ាងដាច់អហង្ការ និងហៅទង្វើរបស់កងកម្លាំងអាជ្ញាធរក្រុងភ្នំពេញកាលពីម្សិលមិញថា ជាអំពើព្រៃផ្សៃបំផុត ក្នុងរបបលទ្ធិប្រជាធិបតេយ្យ ហើយមានតែរបបកម្មុយនីស្ត ទើបមានទង្វើបែបនេះ។
អតីតអ្នកបឹងកក់ជិត ៥០នាក់ ដែលទទួលសំណង ចំនួន៨០០០ដុល្លារ និង២លានរៀល កាលពីឆ្នាំ២០០០។
តំណាងឲ្យជាង៣០០គ្រួសារ ចាប់ផ្តើមតវ៉ាតាំងពីម្សិលមិញ និងបានចងតង់ដេក នៅមុខសាលារាជធានី រហូតដល់ម៉ោងប្រមាណជា៨យប់ទើបទៅផ្ទះវិញ តែដោយសារមិនទាន់ទទួលបានដំណោះស្រាយ ទើបពួកគេបន្តរហូតមកដល់ថ្ងៃនេះ៕
No comments:
Post a Comment
yes