ក្រុមកម្មកររោងចក្រកាត់ដេរធ្វើកូដកម្មនៅតាមផ្លូវវ៉េងស្រេង
កម្មកររោងចក្រកាត់ដេរជាង៦៥០០នាក់នៅរោងចក្រ៣ផ្សេងគ្នាបានធ្វើកូដកម្ម និងតវ៉ាក្នុងរយៈពេលពីរថ្ងៃនេះដោយសារមូលហេតុផ្សេងៗគ្នា។
នៅក្នុងខណ្ឌមានជ័យរាជធានីភ្នំពេញកម្មករចំនួន ៧០០ នាក់នៅរោងចក្រ Pine Great បានធ្វើការបិទផ្លូវអស់រយៈពេលប្រហែលកន្លះម៉ោងដើម្បីទាមទារប្រាក់ខែពួកគេដែលយឺតយ៉ាវ។
កម្មការិនី ផៃ តារា មន្រ្តីសហជីពសេរីកម្មករប្រចាំរោងចក្រនេះបានថ្លែងថា រោងចក្របានសន្យាជាមួយកម្មករថានឹងបើកប្រាក់ឈ្នួលឲ្យពួកគេនៅថ្ងៃម្សិលមិញប៉ុន្តែ ពេលកម្មករមកដល់ពួកគេឃើញសម្ភារនៅក្នុងរោងចក្រត្រូវដឹកយកចេញអស់ហើយពុំមានបុគ្គលិកក្នុងរោងចក្រទេ។
ផៃ តារា ប្រាប់ដែរថា មន្រ្តីពីក្រសួងការងារបានជួបនឹងកម្មករហើយតំណាងក្រុមហ៊ុន សន្យាថានឹងបើកប្រាក់ឈ្នួលឲ្យកម្មករនៅថ្ងៃសុក្រ។
នៅក្នុងស្រុកអង្គស្នួលខេត្តកណ្តាលកម្មករប្រមាណ៨០០នាក់នៅរោងចក្រ Master & Frank ក៏បានធ្វើកូដកម្មបិទផ្លូវដើម្បីទាមទារឲ្យរោងចក្រទទួលយកកម្មករ៨នាក់ចូលធ្វើការវិញព្រោះថា ពួកគេត្រូវបានបណ្តេញចេញដោយមិនស្របច្បាប់។
តំណាងក្រុមហ៊ុនអះអាងថា កម្មករបានញុះញង់កម្មករដទៃៗទៀតឲ្យចូលរួមធ្វើកូដកម្មធ្វើឲ្យបាត់បង់អត្ថប្រយោជន៍ខ្លួន។
ចំណែកនៅឯខេត្តកំពង់ឆ្នាំង ឯណោះកម្មករចំនួន ៥០០០ នាក់នៅរោងចក្រ M&V ក៏ប្រមូលផ្តុំគ្នាធ្វើកូដកម្មដើម្បីទាមទារឲ្យប្រធានរដ្ឋបាលរបស់ពួកគេដែលត្រូវបានបណ្តេញចេញឲ្យចូលធ្វើការធម្មតាវិញ។
លោក នួន សំអុល តំណាងសហជីពសេរីកម្មករកម្ពុជាប្រចាំនៅរោងចក្រនេះបាននិយាយថា ប្រធានរដ្ឋបាលរោងចក្រ លោក ចាន់ ណារិទ្ធិ ត្រូវថៅកែបណ្តេញគាត់ចេញពីការងារដោយមិនមានមូលហេតុច្បាស់លាស់។
លោកបានបញ្ជាក់ថា៖ «គាត់តែងតែជួយដល់កម្មករនៅពេលពួកយើងមានបញ្ហា...យើងត្រូវការគាត់ត្រឡប់មកធ្វើការវិញ»។
លោក ពៅ ស៊ីថា ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ដកំពង់ឆ្នាំង មិនអាចទាក់ទងដើម្បីសុំអត្ថាធិប្បាយពាក់ព័ន្ធនឹងកូដកម្មរបស់កម្មករ M&V បានទេ កាលពីម្សិលមិញ៕
No comments:
Post a Comment
yes