លោកជាម យៀប នៅក្នុងពិធីមួយកាលពីពេលកន្លងមក
មន្ត្រីជាន់ខ្ពស់រដ្ឋាភិបាល និងតំណាងរាស្ត្រដែលសុទ្ធតែមកពីគណបក្សប្រជាជនកម្ពុជាបានចំអកឡកឡឺយ ដាក់ក្រុមអ្នកតំណាងរាស្ត្រគណបក្សប្រឆាំង នៅក្នុងកិច្ចប្រជុំពេញអង្គរដ្ឋសភា កាលពីម្សិលមិញមុននឹងធ្វើការគំរាមកាត់ប្រាក់ខែដោយសារតែតំណាងរាស្ត្រគណបក្សប្រឆាំងទាំងនោះ បានទៅចូលរួមជាមួយគណបក្សសង្គ្រោះជាតិ ដែលទើបបង្កើតថ្មី។
តំណាងរាស្ត្រគណបក្សសម រង្ស៊ី ចំនួន ២៦ រូប និងគណបក្សសិទ្ធិមនុស្សចំនួន ៣ រូប បានទៅចូលរួមជាមួយគណបក្សសង្គ្រោះជាតិអស់ហើយជាគណបក្សដែលទើបតែត្រូវបានបង្កើតថ្មីដោយការច្របាច់បញ្ចូលគ្នា រវាងគណបក្សសម រង្ស៊ី និងគណបក្សសិទ្ធិមនុស្ស ដើម្បីចូលរួមប្រកួតជាមួយគណបក្សប្រជាជន នៅក្នុងការបោះឆ្នោតជាតិនាថ្ងៃទី២៨ ខែកក្កដាខាងមុខ។
លោក ងួន ញិល អនុប្រធានទីមួយរដ្ឋសភា លោក ស ខេង រដ្ឋមន្រ្តីក្រសួងមហាផ្ទៃ និងលោក ជាម យៀប តំណាងរាស្រ្ត បានថ្លែងម្តងម្នាក់ៗនៅក្នុងសម័យប្រជុំពេញអង្គរដ្ឋសភាដោយបានចំអកដាក់គណបក្សប្រឆាំងមុនពេលពួកគេបានលើកឡើងថា ភាពស្របច្បាប់នៃវត្តមានរបស់តំណាងរាស្ត្រគណបក្សប្រឆាំង នៅក្នុងរដ្ឋសភាគឺជាចំណុចវិវាទ។
លោក ស ខេង បានបន្ថែមថា៖ «ក្នុងករណីសមាជិកគណបក្សនយោបាយមួយស្នើសុំលាលែងពីគណបក្សនោះ បុគ្គលនោះ អាចបាត់បង់សមាជិកភាពតំណាងរាស្រ្ត ដោយស្វ័យប្រវតិ្ត។ ដូច្នេះ នោះ មានន័យថា គាត់មិនមែនជាសមាជិកតំណាងរាស្រ្តទៀតទេ»។
ដោយមិនបានថ្លែងលម្អិតលោកស ខេង បានសង្កត់ធ្ងន់ថា ក្រុមប្រឹក្សាធម្មនុញ្ញអាចពន្យល់ពីបញ្ហានេះ។ លោក ងួន ញ៉ិល បានបន្ទរតាមក្រោយលោកស ខេង ថា លោកចាត់ទុកតំណាងរាស្រ្តគណបក្សប្រឆាំងដែលមានវត្តមានក្នុងកិច្ចប្រជុំរដ្ឋសភា កាលពីម្សិលមិញថាបានធ្វើសកម្មភាពនៅក្រៅភារកិច្ច។ លោក ជាម យៀប បានថ្លែងថា លោកកំពុងពិចារណាផ្ញើលិខិតស្នើសុំលោក ហេង សំរិន ប្រធានរដ្ឋសភា កាត់ប្រាក់ខែតំណាងរាស្ត្រគណបក្សប្រឆាំង។
លោក ជាម យៀប បានពន្យល់ប្រាប់ ភ្នំពេញ ប៉ុស្តិ៍ បន្ទាប់ពីបិទអង្គប្រជុំរដ្ឋសភាថា៖ «រាល់បុគ្គលជាប់ឆ្នោតដែលផ្តាច់ខ្លួនពីគណបក្សនយោបាយមួយ ត្រូវតែលាលែងពីសមាជិកភាពដោយស្វ័យប្រវតិ្ត។ ដូច្នេះ ក្នុងឋានៈជាប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្ម នៃរដ្ឋសភា ខ្ញុំកំពុងត្រៀមចេញលិខិតមួយ ស្នើសុំសម្តេចប្រធានរដ្ឋសភាកាត់ប្រាក់ខែតំណាងរាស្រ្ត ដែលចូលរួមជាមួយបក្សសង្គ្រោះជាតិ»។
ការវាយប្រហារខ្លាំងៗ នៅក្នុងកិច្ចប្រជុំរដ្ឋសភាកាលពីម្សិលមិញហាក់ដូចជាជំរុញឡើងដោយសារការជជែកវែកញែកលើសេចក្តីព្រាងច្បាប់បង្ការអគ្គិភ័យ ដែលក្នុងពេលជជែកពិភាក្សា លោក យឹម សុវណ្ណ អ្នកតំណាងរាស្ត្រគណបក្សសម រង្ស៊ី បានលើកឡើងថា៖«ក្នុងឋានៈជាតំណាងរាស្រ្តគណបក្សសង្គ្រោះជាតិ» លោកចង់ឃើញការការពារល្អប្រសើរជាងនេះ។ បើទោះបីជាតំណាងរាស្រ្តគណបក្សប្រឆាំងពុំបានខិតខំវាយបកវិញ បន្ទាប់ពីគណបក្សប្រជាជនកម្ពុជា បានវាយប្រហារលើខ្លួនក៏ដោយ ក៏ប៉ុន្តែ លោក សុវណ្ណ បានប្រាប់អ្នកយកព័ត៌មាន បន្ទាប់ពីកិច្ចប្រជុំរដ្ឋសភាថា លោករីករាយដោយសារប្រតិកម្មនេះ។
លោកបានបន្ថែមថា៖ «ខ្ញុំរីករាយនៅពេលគណបក្សប្រជាជនកម្ពុជាវាយប្រហារបែបនេះ»។ លោកបានបន្ថែមថា បើគិតពីបញ្ញតិ្ត ៦ ខែ ការគំរាមកាត់ប្រាក់ខែតំណាងរាស្ត្រគណបក្សប្រឆាំងនេះគឺគួរឲ្យចង់សើច។ ថ្លែងតាមទូរស័ព្ទ ក្រោយមក លោក សុវណ្ណ បានពន្យល់ថា ឥរិយាបថរបស់គណបក្សកាន់អំណាចបង្ហាញថា ពួកគេពិតជាខ្លាចចាញ់គណបក្សសង្គ្រោះជាតិ៕
No comments:
Post a Comment
yes