ជនជាតិភាគតិចចារ៉ាយទប់ស្កាត់គ្រឿងចក្រក្រុមហ៊ុនវៀតណាមឈូសដីព្រៃ
ជនជាតិដើមភាគតិចចារ៉ាយជាង ៣០០ គ្រួសារនៅជាប់នឹងព្រំដែនកម្ពុជា-វៀតណាមក្នុងស្រុកអូរយ៉ាដាវ បានដាក់ញតិ្ត ទៅមន្ត្រីសិទ្ធិមនុស្សអង្គការសហប្រជាជាតិ កាលពីម្សិលមិញ ដើម្បីសុំអន្តរាគមន៍ទប់ស្កាត់ការរំលោភបំពានដីធ្លី និងការបំផ្លាញធនធានធម្មជាតិ ដែលកំពុងតែរីករាលដាលនៅក្នុងភូមិរបស់ពួកគាត់ ដែលបង្កឡើងដោយក្រុមហ៊ុនវៀតណាម។
លោក រម៉ាស់ ឆ្វាត់ តំណាងសហគមន៍ភូមិឡំ ឃុំប៉ក់ញ៉ៃ រួមនឹងអង្គការសិទ្ធិមនុស្សអាដហុកបានទៅខេត្តស្ទឹងត្រែង ដើម្បីចូលរួមសិក្ខាសាលាមួយស្តីពី«ច្បាប់បាតុកម្ម»។ លោក ឆ្វាត់បានឲ្យដឹងថា លោកបានដាក់ញត្តិទៅមន្រ្តីសិទ្ធិមនុស្សអង្គការសហប្រជាជាតិប្រចាំនៅកម្ពុជា ដែលញត្តិនោះបានរៀបរាប់ពីបញ្ហា និងកង្វល់របស់ពួកគាត់។
ញត្តិដែលភ្នំពេញ ប៉ុស្តិ៍ទទួលបានកាលពីម្សិលមិញបានសរសេរថា៖«យើងខ្ញុំមានការព្រួយ បារម្ភដោយសារអស់ដី អស់ឈើ អស់អូរ អស់ភ្នំ ព្រោះក្រុមហ៊ុនវៀតណាមទាំងពីរ ឈូសឆាយ»។ ញត្តិដដែលនោះក៏បានបង្ហាញពីការមើលងាយរបស់មេការក្រុមហ៊ុនមក លើជនជាតិដើមភាគតិច និងការគំរាមកំហែងចាប់ខ្លួនពីសំណាក់អាជ្ញាធរនៅពេលដែលពលរដ្ឋធ្វើការតវ៉ាប្រឆាំងទៅនឹងការឈូសឆាយ។
លោករម៉ាស់ ឆ្វាត់ក៏បានឲ្យដឹងផងដែរថា លោកទទួលបានផែនទីមួយពីគម្រោងឈូសឆាយរបស់ក្រុមហ៊ុន ៧២។ លោកបន្តថា៖« គម្រោងផែនទីក្រុមហ៊ុនកំពុងយកដីភូមិឡំទាំងមូលសូម្បីតែដី ក្បាលភូមិ ដីកប់ខ្មោច ក៏មិននៅសល់ដែរ។ លើសពីនេះ បានជំរុញឲ្យជនជាតិដើមភាគតិចវាស់ដីចែកគ្នាតាមគ្រួសារទៀតផង»។
ទោះយ៉ាងណា លោក សេវ ហ្លីន មេភូមិឡំបានអះអាងថា ក្រុមហ៊ុន ៧២ មានតែផ្ទៃដីចំនួន ៩០០ ហិកតាប៉ុណ្ណោះ នៅក្នុងភូមិឡំ គឺមិនមែនមានច្រើនដូចដែលប្រជាពលរដ្ឋបានលើកឡើងនោះទេ។ លោកហ្លីនបានបញ្ជាក់ថា៖«ជនជាតិដើមក៏មិនចង់វាស់ដីនោះដែរគាត់ចង់បានដីជាសមូហភាពតាមទម្លាប់។ តែបើមិនវាស់ទេ ក្រុមហ៊ុនវាឈូស យកព្រោះគេថា ដីគ្មានម្ចាស់»។
លោក ឆាយ ធី អ្នកសម្របសម្រួលសមាគមសិទ្ធិមនុស្សអាដហុកខេត្តរនគិរីបានឲ្យ ដឹងថា ជនជាតិដើមភាគតិចកំពុងមានការព្រួយបារម្ភ ហើយកំពុងស្វះស្វែងរកកិច្ចអន្តរាគមន៍ពីអង្គការក្រៅរដ្ឋាភិបាលនានា នៅពេលដែលក្រុមហ៊ុនវៀតណាមទាំងនោះបន្តធ្វើសកម្មភាពឈូសឆាយដីព្រៃដែលពួកគាត់បានកំពុងអាស្រ័យបន្ត តាំងពីដូនតាមក។ លោកបញ្ជាក់ថា៖«កន្លងមកយើងបានធ្វើការស៊ើបអង្កេតពីក្តីបារម្ភដែលគាត់បានលើកឡើងហើយលទ្ធផលគឺមានពិតមែន ដូចជាការកាប់ឈើដឹកទៅវៀតណាមខុសច្បាប់ជាដើម»។
លោក ឆាយ ធីបានបង្ហាញពីក្តីបារម្ភថា ការផ្តល់ដីសម្បទានសេដ្ឋកិច្ច គឺជារឿងគ្រោះថ្នាក់ណាស់ ពិសេសដីនៅជាប់ព្រំដែន នឹងប្រទេសវៀតណាម ដូចជានៅភូមិឡំជាដើម ព្រោះថា កម្ពុជា អាចបាត់បង់ទឹកដីនោះដោយស្វ័យប្រវត្តិ បន្ទាប់ពីរយៈពេល៩៩ឆ្នាំនៃកិច្ចសន្យាដីសម្បទានទៅឲ្យក្រុមហ៊ុនវៀតណាម៕
No comments:
Post a Comment
yes