ស្ត្រីអ្នកភូមិរៀបរាប់ប្រាប់អ្នកយកព័ត៌មានពីបញ្ហាជម្លោះដីធ្លីដែលកើតឡើង
អាជ្ញាធរ ចម្រុះប្រមាណ ៥០ នាក់ បានចុះទៅកាប់បំផ្លាញផ្ទះ២ខ្នងនិងដំណាំកៅស៊ូរាប់ពាន់ដើម របស់ពលរដ្ឋដែលជាគ្រួសារទាហានរស់នៅក្នុងភូមិសង្គមថ្មី ឃុំថ្មដា ស្រុកវាលវែង ដែលមានជម្លោះដីធ្លី ជាមួយក្រុមហ៊ុន MDS Import Export Co; Ltd របស់លោកឧកញ៉ា ទ្រី ភាព។
អ្នកស្រីសុខ ដា អាយុ ៤១ ឆ្នាំ ដែលផ្ទះរបស់អ្នកស្រី និងដំណាំកៅស៊ូជាច្រើនត្រូវកាប់បំផ្លាញ បានឲ្យដឹងថា នៅម៉ោង ប្រមាណជា ៩ និង ៣០ នាទីព្រឹកម្សិលមិញ កម្លាំងចម្រុះប្រមាណ ៥០ នាក់ ដែលមានកម្លាំងប៉ូលិស ទាហាន ដែលការពារឲ្យក្រុមហ៊ុន និងមន្ត្រីបរិស្ថាន បានចុះមកកាប់បំផ្លាញដើមកៅស៊ូរបស់អ្នកស្រីអស់ ១០០០ដើម ស្វាយ៦០ដើម នឹងស្វាយចន្ទី ដូងមួយចំនួនទៀត។ អ្នកស្រីបានថ្លែងថា៖«ម្តាយខ្ញុំអាយុ៨០ ឆ្នាំ គាត់ព្យាយាមឃាត់គេកុំឲ្យរុះផ្ទះ និងកាប់ដើមកៅស៊ូត្រូវបានគេច្រានឡើងកប់ទៅនឹងស្មៅ ហើយគេបានវាយខ្ញុំនៅពេលដែលខ្ញុំរារាំងពួកគេ»។ អ្នកស្រីបន្តថា ពលរដ្ឋរស់នៅក្នុងតំបន់នេះគឺជាគ្រួសាររបស់ទាហានប្រចាំការនៅព្រំដែនកម្ពុជា-ថៃដែលបានមករស់នៅក្នុងតំបន់នោះតាំងពីឆ្នាំ ២០០០ បន្ទាប់ពីមេឃុំចែកដីឲ្យតែឥឡូវភូមិឃុំគេលែងទទួលស្គាល់ដោយថា ជាដីរបស់ក្រុមហ៊ុនទ្រីភាព។ អ្នកស្រីសុខ ដា បាននិយាយទៀតថា៖«ពួកគេមានកាំភ្លើងគ្រប់ដៃតែពួកខ្ញុំក៏បានត្រៀមលក្ខណៈរួចរាល់ហើយដែរ ប្រសិនបើពួកគេមករុះផ្ទះពួកយើងទៀត យើងមានកាំបិត ដើម្បីប្រយុទ្ធការពារផ្ទះរបស់ពួកយើង»។
ស្ត្រីអ្នកភូមិម្នាក់ទៀត អ្នកស្រី ខួច ទិត្យធីតា បានថ្លែងថា ពួកគេមកកាប់ដើមឈើ ដំណាំហូបផ្លែរបស់ប្រជាពលរដ្ឋចោលដើម្បីបំបិទភ័ស្តុតាងថាពលរដ្ឋទើបតែមករស់នៅគ្មានសិទ្ធិដាំដុះលើដីនេះទេដោយថា ដីនេះគឺជាដីរបស់ក្រុមហ៊ុន MDS។ អ្នកស្រីនិយាយថា៖«យើងបានទៅប្តឹងមេភូមិ មេឃុំ គេថា គេឈប់ទទួលស្គាល់ពួកយើងហើយ ដូច្នេះពួកយើងមានតែពឹងលើខ្លួនឯងទេ ប្រសិនពួកមន្ត្រីដែលធ្វើការបម្រើឲ្យក្រុមហ៊ុនបន្តមករុះរើផ្ទះពួកយើងទៀតគឺយើងកាប់ពួកគេឲ្យងាប់តែម្តង ពួកយើងលែងគិតអីទៀតហើយពីព្រោះពួកវាធ្វើបាបយើងពេក»។
បើតាមអ្នកភូមិ ក្រុមហ៊ុនរបស់លោកទ្រី ភាព បានហាមមិនឲ្យពួកគាត់ធ្វើចម្ការចាប់តាំងពីឆ្នាំ ២០១០ រហូតមកដល់សព្វថ្ងៃរីឯខាងមន្ត្រីបរិស្ថានថាដីដែលពួកគាត់កំពុងរស់នៅគឺជាដី របស់បរិស្ថានតែក្រុមហ៊ុនគេបែរជាអាចឈូសឆាយធ្វើអ្វីបានតាម ចិត្តពុំដែលអាជ្ញាធរហាមឃាត់ឡើយ។ អ្នកស្រីបានប្តេជ្ញាថា៖«យើងដល់ពេលត្រូវប្តូរស្លាប់ជាមួយពួកវាហើយនៅពេលនេះ»។
លោកព្រំ ងន មេឃុំថ្មដា បដិសេធពុំធ្វើការអត្ថាធិប្បាយទេកាលពីថ្ងៃម្សិលមិញ។
តំណាងក្រុមហ៊ុន(MDS Import Export Co; Ltd) ដែលបដិសេធពុំប្រាប់ឈ្មោះបានថ្លែងថា អាជ្ញាធរបានចុះទៅធ្វើការហាមឃាត់ប្រជាពលរដ្ឋទាំងនោះដោយសារតែពួកគាត់បានធ្វើកិច្ចសន្យាជាមួយអាជ្ញាធរពុំឲ្យមានការដាំដុះអ្វីនៅលើដីនោះទៀតទេបន្ទាប់ពីបទបញ្ជា ០១ ប៉ុន្តែ ពួកគាត់នៅតែធ្វើ។ លោកបានថ្លែងថា៖«ក្រុមហ៊ុនយើងពុំមានសិទ្ធិអីទៅរុះរើផ្ទះប្រជាពលរដ្ឋនោះទេ»។
លោក ឆេ ឆីវ អភិបាលស្រុកវាលវែងបានថ្លែងថា លោកពុំទាន់ទទួលបានដំណឹងនៅឡើយទេដូច្នេះលោកពុំអាចធ្វើការអត្ថាធិប្បាយបានឡើយតែពលរដ្ឋនៅក្នុងចំណុចនោះអាជ្ញាធរខេត្តបានចុះទៅស្វែងរកដំណោះស្រាយជូនគាត់ពីរបីលើករួចមកហើយ។ លោកបន្តថា ៖ «ពួកគាត់នោះបើធ្វើនៅលើដីចាស់របស់គាត់នោះគ្មានអ្នកណាហាមទេតែយើងខ្លាចគាត់ទៅដាំដុះបន្ថែមនៅលើដីផ្លូវថ្មី ទើបបានជាគេហាមឃាត់មិនឲ្យធ្វើ»។
បើយោងតាម ស.ជ.ណ.លេខ១៣០៥ ចុះថ្ងៃទី១២ ខែវិច្ឆិកា ឆ្នាំ ២០១០ រដ្ឋាភិបាល បានផ្តល់ដីសម្បទានសេដ្ឋកិច្ចទំហំ ៤៤០២ ហិកតា ទៅឲ្យក្រុមហ៊ុន លោកឧកញ៉ា ទ្រី ភាព ដើម្បីអភិវឌ្ឍដាំដំណាំកៅស៊ូ។
លោកភួង សុធា មន្ត្រីសម្របសម្រួលសមាគមអាដហុកប្រចាំខេត្តបានឲ្យដឹងថា ពលរដ្ឋទាំងនោះខ្លះបានមករស់នៅដោយទិញដីពីគេ ខ្លះបានមករស់នៅតាមប្តីដែលជាទាហានបន្ទាប់ពីអាជ្ញាធរភូមិ ឃុំ បានបែងចែករបបដីឲ្យពួកគាត់។ លោកថ្លែងថា៖«អាជ្ញាធរពុំបានស្វែងរកដំណោះស្រាយជូនពលរដ្ឋទេបែរជាប្រើហិង្សា ទៅលើពួកគាត់ទៅវិញនេះគឺជាការរំលោភសិទ្ធិមនុស្សដ៏ធ្ងន់ធ្ងរ»៕
No comments:
Post a Comment
yes