លោក យឹម សុវណ្ណ អ្ន្កកនាំពាក្យគណបក្សសង្គ្រោះជាតិ
ស្របពេលដែលរដ្ឋសភា នៅថ្ងៃសុក្រសប្តាហ៍នេះ គ្រោងអនុម័តសេចក្តីស្នើច្បាប់ ប្រឆាំងអ្នកដែលមិនទទួលស្គាល់របបប្រល័យពូជសាសន៍នៅកម្ពុជា មន្ត្រីគណបក្សប្រឆាំង ទាមទារឲ្យបញ្ចូលមាត្រាមួយ ដែលហាមមិនឲ្យអតីតខ្មែរក្រហមធ្វើជាមន្ត្រីជាន់ខ្ពស់ក្នុងរាជ រដ្ឋាភិបាលកម្ពុជា។
គណបក្សប្រឆាំង ទាមទារបែបនេះ ពីព្រោះខ្លួនយល់ថា មន្ត្រីជាន់ខ្ពស់មួយចំនួន ក្នុងរដ្ឋាភិបាលបច្ចុប្បន្ន ជាអតីតមេដឹកនាំខ្មែរក្រហម។ អ្នកនាំពាក្យគណបក្ស សម រង្ស៊ី លោក យឹម សុវណ្ណ ប្រាប់នៅថ្ងៃចន្ទទី៣ ខែមិថុនាថា សមាជិកសភារបស់គណបក្សសិទ្ធិមនុស្ស និងគណបក្ស សម រង្ស៊ី កំពុងតែប្រជុំសម្រេចថា នឹងចូលរួមក្នុងការប្រជុំអនុម័ត សេចក្តីស្នើច្បាប់ឲ្យមានការកាត់ទោសអ្នក ដែលនិយាយថាមិនមានរបបប្រល័យពូជសាសន៍ នៅកម្ពុជា ឬយ៉ាងណា។ លោកបន្ថែមថា អ្វីដែលសមាជិកសភាគណបក្សប្រឆាំង ចង់ឲ្យបន្ថែម គឺមាត្រាដែលហាមមិនឲ្យអតីតខ្មែរក្រហមធ្វើជាមន្ត្រីជាន់ខ្ពស់ ក្នុងរាជរដ្ឋាភិបាល ៖ “វាប្រថុចញ៉ុចមែនទែន ដោយសារធ្វើហ្នឹងទាំងតក់ក្រហល់ ហើយយើងមិនមែនឃើញសេចក្តីព្រៀងច្បាប់ នៅឡើយ ហើយអ្វីដែលយើងចង់បាន បន្ថែមទៀតទៅលើ អ្វីដែលគណបក្សប្រជាជនលើក គឺថាស្មើសុំឲ្យ សេចក្តីព្រាងច្បាប់នោះ មានបញ្ចូលមាត្រា ដែលហាមពួកខ្មែរក្រហម មិនឲ្យធ្វើជាមេដឹងនាំ នៅក្នុងរដ្ឋាភិបាល”។
អ្នកនាំពាក្យរដ្ឋសភា និងជាតំណាងរាស្ត្រគណបកស្សប្រជាជនកម្ពុជា លោក ឈាង វុន មានប្រសាសន៍ថា សេចក្តីស្នើច្បាប់ឲ្យមានការកាត់ទោសអ្នក ដែលនិយាយថា មិនមានរបបប្រល័យពូជសាសន៍នៅកម្ពុជា មាន៥មាត្រា ៖“គណៈអចន្ត្រៃយ៍បានប្រជុំគ្នារួចហើយ ហើយយល់ព្រមប្រគល់ការងារនេះ ជូនគណៈកម្មការ និតិកម្មរបស់រដ្ឋសភា គឺគណៈកម្មការទី៍ ដោយមានការស្នើ របស់អ្នកតំណាងរាស្ត្រគណបក្សប្រជាជន ក្នុងនោះមានរូបខ្ញុំមួយដែរ ហើយយើងបានសំរេចថា នឹងប្រជុំពេញអង្គ នៅថ្ងៃសុក្រ ទី០៧ នេះ”។
អ្នកវិភាគព្រឹត្តិការណ៍សង្គម លោកបណ្ឌិត ឡៅ ម៉ុងហៃ មានប្រសាសន៍ថាមុននឹងបង្កើត និងអនុម័តសេចក្តីស្នើច្បាប់ប្រភេទនេះ គួរតែពិនិត្យពីវិសាលភាពសេចក្តីស្នើច្បាប់នេះថា មានត្រឹមកម្រឹតណា ៖ “ដាក់ទោសទណ្ឌ អត់ដាក់កើតទេ អ្នកដែលនិយាយហើយនោះ ព្រោះច្បាប់ព្រហ្មទណ្ឌ គឺវាអត់មានអនុភាពធាក់ថយក្រោយទេ គឺមានតែទៅមុខ ដូចជាអត់បានការត្រង់នេះ ក៏ប៉ុន្តែយើងគួរគិតពិចារណា តើច្បាប់នោះវាចាំបាច់ទេ”។
កាលពីថ្ងៃទី២៧ ខែឧសភាកន្លងទៅ លោកនាយករដ្ឋមន្ត្រី ហ៊ុន សែន ប្រកាសធ្វើសេចក្តីស្នើច្បាប់ដាក់ទោសអ្នកដែលនិយាយថា មិនមានរបបខ្មែរក្រហមនៅកម្ពុជា។ ការប្រកាសនេះធ្វើឡើងបន្ទាប់ពី ជនរងគ្រោះក្នុងគុកទួលស្លែង ចោទប្រកាន់ លោក កឹម សុខា ថា បាននិយាយថា គុកទួលស្លែងជាកន្លែងសិប្បនិមិ្មត ហើយរបបកម្ពុជាប្រជាធិបតេយ្យ គឺជាឆាកល្ខោន ដែលរបបយួនកុម្មុយនីស្តបានរៀបចំទុក៕
No comments:
Post a Comment
yes