ការអង្គុយតាំងសមាធិអត់អាហាររបស់តំណាងសហគមន៍បឹងកក់(
អង្គការលើកលែងទោសអន្តរជាតិ(Amnesty International) អំពាវនាវឲ្យសហគមន៍អន្តរជាតិ ដែលកំពុងផ្តល់ជំនួយមកកម្ពុជា ជួយអន្តរាគមន៍ទៅរដ្ឋាភិបាលកម្ពុជា ឲ្យដោះលែងសកម្មជនដីធ្លី អ្នកស្រី យ៉ោម បុប្ផា ដែលបានជាប់ពន្ធនាគារ ចំនួន២៧៤ថ្ងៃហើយ។
ការស្នើសុំអន្តរាគមន៍អន្តរជាតិនេះ ធ្វើឡើងស្របពេលសាលាឧទ្ទរណ៍ គ្រោងបើកសវនាការលើបណ្តឹងទាស់ របស់អ្នកស្រី យ៉ោម បុប្ផា នៅថ្ងៃពុធ ទី៥ ខែមិថុនានេះ។
សេចក្តីថ្លែងការណ៍របស់អង្គការអន្តរជាតិមួយនេះ ចេញផ្សាយនៅថ្ងៃទី០៣ ខែមិថុនា សរសេរថា យើងសង្ឃឹមថា ដៃគូអភិវឌ្ឍន៍កម្ពុជា ដូចជាសហរដ្ឋអាមេរិក សហភាពអ៊ឺរ៉ុប ជប៉ុន និងសមាជិកអាស៊ាន នឹងចូលរួមជាមួយអង្គការលើកលែងទោសអន្តរជាតិ និងអង្គការផ្សេងទៀត ដើម្បីគាំទ្រការអំពាវនាវរបស់សហគមន៍បឹងកក់សម្រាប់ស្រីសេរីភាព អ្នកស្រី យ៉ោម បុប្ផា ។
អង្គការលើកលែងទោសអន្តរជាតិ អំពាវនាវ ឲ្យដោះលែងសកម្មជនដីធ្លី អ្នកស្រី យ៉ោម បុប្ផា ដោយគ្មានលក្ខខណ្ឌ និងជាបន្ទាន់ ព្រោះការចោទប្រកាន់លើសកម្មជនរូបនេះ គឺគ្មានមូលដ្ឋាន និងការកាត់ក្តី គឺអយុត្តិធម៌។
អង្គការមួយនេះបន្តថា អ្នកស្រី យ៉ោម បុប្ផា ត្រូវបានចាប់ដាក់ពន្ធនាគារ ចាប់តាំងពីថ្ងៃទី៤ ខែកញ្ញា ឆ្នាំ២០១២ ដោយបន្សល់ទុកកូន និងស្វាមី ដែលកំពុងមានបញ្ហាសុខភាព។
កាលពីថ្ងៃចន្ទ ទី០៣ ខែមិថុនា តំណាងសហគមន៍បឹងកក់ ៤នាក់ បានអង្គុយតាំងសមាធិអត់អាហារ ពេញមួយថ្ងៃ នៅមុខសាលាឧទ្ទរណ៍ ដើម្បីសុំឲ្យដោះលែង អ្នកស្រីយ៉ោម បុប្ផា។ ក្នុងការសមាធិដល់ពេលយប់នោះ សកម្មជនពីរនាក់ បានសន្លប់ និងត្រូវបានបញ្ជូនទៅមន្ទីរពេទ្យ។
សាលាដំបូងរាជធានីភ្នំពេញ កាលពីថ្ងៃទី២៧ ខែធ្នូ ឆ្នាំ២០១២ បានចោទប្រកាន់សកម្មជនដីធ្លីរូបនោះថា ជាអ្នកប្រើហិង្សាវាយបុរសអ្នករត់ម៉ូតូឌុបពីរនាក់ ឲ្យរងរបួស និងត្រូវផ្តន្ទាទោសឲ្យជាប់ពន្ធនាគារ៣ឆ្នាំ ដោយពិន័យជាប្រាក់៦០លានរៀល។
កាលពីថ្ងៃទី១៩ ខែមីនា លោកនាយករដ្ឋមន្ត្រី ហ៊ុន សែន មានប្រសាសន៍ថា ការលើកឡើងណាមួយថាការចាប់ខ្លួនស្ត្រីម្នាក់នៅតំបន់បឹងកក់ ជាកើតចេញពីរឿងតវ៉ារឿងដីធ្លីនោះ លោកថាជារឿងមិនយុត្តិធម៌សម្រាប់រាជរដ្ឋាភិបាល ៖ "ប៉ិនសំណុំរឿង ខ្លះ វាទៅជាសំណុំរឿងអយុត្តិធម៌ មកចំពោះរដ្ឋាភិបាល ស្រីបឹងកក់ម្នាក់នេះ វ៉ៃគេសោះហ្នឹង ត្រូវបានគេដាក់ថា សកម្មជនដីធ្លីនៅបឹងកក់ ឥឡូវវាប៉ះទង្គិចរវាង លឺថាឃើញសារព័ត៌មានចុះផ្សាយ ប៉ះទង្គិចរវាងក្រុមម្ខាង ទាមទារដោះស្រីហ្នឹង និងក្រុមម្ខាងទៀតទាមទារឲ្យកាត់ទោសស្រីហ្នឹង ក្រុមម្ខាងហ្នឹង គឺក្រុមម៉ូតូឌុប វ៉ៃគេជាប់ទោសព្រហ្មទណ្ឌ វាក្លាយទៅជាសកម្មជនដីធ្លី វាទៅជាអញ្ចេះទៅរួច"៕
No comments:
Post a Comment
yes