ប្រជាពលរដ្ឋ ជាច្រើន ចូលរួមនៅឯសួនសេរីភាពកាលពីម្សិលមិញ នៅពេលលោក សម រង្ស៊ី
ប្រធានបក្សសង្គ្រោះជាតិ ថ្លែងអំណរគុណប្រជាពលរដ្ឋបោះឆ្នោតឲ្យបក្សលោក
នៅក្នុងសុន្ទរកថា ដ៏ខ្លាំងក្លាមួយដែលមានការចូលរួមពីអ្នកគាំទ្ររាប់ពាន់នាក់ មេដឹកនាំគណបក្សប្រឆាំង លោក សម រង្ស៊ី កាលពីម្សិលមិញបានប្តេជ្ញាថា គណបក្សលោកនឹងធ្វើពហិការមិនចូលប្រជុំសភាដំបូងទេ ប្រសិនបើគ្មានការស៊ើបអង្កេតហ្មត់ចត់ទៅលើលទ្ធផលនៃការបោះឆ្នោតហើយបានប្តេជ្ញាថា នឹងធ្វើមហាបាតុកម្មតវ៉ា ប្រសិនបើលទ្ធផលបឋមមិនត្រូវកែតម្រូវដើម្បីបង្ហាញអំពីជ័យជម្នះរបស់គណបក្សសង្គ្រោះជាតិ។
លោក សម រង្ស៊ី បានថ្លែងទាំងសំឡេងស្អកៗ នៅប៉ុន្មានម៉ោងមុនពេលលោកឡើងយន្តហោះទៅសហរដ្ឋអាមេរិកដើម្បីចូលរួមពិធីមង្គលការកូនស្រីលោកថា៖ «យើងប្តេជ្ញាមិនអនុញ្ញាតឲ្យនរណាម្នាក់លួចជ័យជម្នះរបស់ប្រជាជនខ្មែរទេ»។ «កុំគំរាមកំហែងយើង។ យើងមិនខ្លាចទេ យើងនឹងធ្វើបាតុកម្មដ៏ធំមួយ»។
កាលពីថ្ងៃសៅរ៍គណៈកម្មាធិការជាតិរៀបចំការបោះឆ្នោតបានច្រានចោលជាផ្លូវការ អំពីការចូលរួមរបស់អង្គការសហប្រជាជាតិនៅក្នុងការស៊ើបអង្កេតចម្រុះ ដោយថ្លែងថា វានឹងជាការខុសច្បាប់ដែលអនុញ្ញាតឲ្យនរណាម្នាក់ក្រៅពី គ.ជ.ប និងគណបក្សនយោបាយចូលរួម។ បើទោះជារដ្ឋាភិបាលអះអាងថា ការចូលរួមរបស់អ្នកតាមដានបរទេសនិងក្នុងស្រុកក្នុងឋានៈជាអ្នកសង្កេតការណ៍ជាការគ្រប់គ្រាន់ក៏ដោយ ក៏គណបក្សសង្គ្រោះជាតិបានទទូចឲ្យពួកគេចូលរួមនៅក្នុងកម្រិតបច្ចេកទេស។
កាលពីម្សិលមិញ លោក សម រង្ស៊ី បានថ្លែងដដែលអំពីចំណុចនោះថា ការស៊ើបអង្កេតដែលមានអ្នកខាងក្រៅចូលរួម គឺជាអ្វីដែលគណបក្សលោកចង់បាន។
លោកបន្តថា៖ «យើងមិនចង់ធ្វើការតវ៉ាទេ។ ប្រសិន [គណបក្សប្រជាជនកម្ពុជា] ចង់បញ្ចៀសការធ្វើបាតុកម្ម ខ្លួនត្រូវតែដោះស្រាយ [បញ្ហានេះ] ឲ្យបានត្រឹមត្រូវ»។
ខណៈតួលេខលទ្ធផលបឋម ប្រកាសដោយ គ.ជ.ប ត្រូវគ្នាទៅនឹងការអះអាងរបស់គណបក្សប្រជាជនកម្ពុជា ដែលអះអាងថា បានឈ្នះ ៦៨ អាសនៈ ទល់នឹង ៥៥ អាសនៈ សម្រាប់គណបក្សសង្គ្រោះជាតិក៏ដោយ ក៏គណបក្សប្រឆាំងបានអះអាងតាំងពីដំបូងថា ចំនួនអាសនៈ ដែលពួកគេឈ្នះ គឺមានចំនួនច្រើនជាងនេះ។ កាលពីសប្តាហ៍មុន គណបក្សនេះប្រកាសថា ខ្លួនបានឈ្នះយ៉ាងហោចណាស់ ៦៣ អាសនៈ នៃអាសនៈ ១២៣ របស់សភា ដោយផ្អែកទៅលើតួលេខដែលប្រមូលបានពីអ្នកសង្កេតការណ៍នៅតាមការិយាល័យបោះឆ្នោត។
កាលពីម្សិលមិញ អនុប្រធានគណបក្សសង្គ្រោះជាតិ លោក កឹម សុខា បានប្រកាសថា តួលេខនោះគឺរឹតតែខ្ពស់ជាងមុនទៀត ហើយអះអាងថា រដ្ឋាភិបាលកាន់អំណាចបានដឹងយ៉ាងច្បាស់។
លោកថ្លែងថា៖ «នៅម៉ោង ៥ ល្ងាច [ថ្ងៃបោះឆ្នោត] លទ្ធផលត្រូវបានផ្តល់មកឲ្យខ្ញុំ។ យើងបានឈ្នះ ៧០ ភាគរយ។ នៅពេលពួកគេឮថា គណបក្សសង្គ្រោះជាតិឈ្នះ ៧០ ភាគរយ ពួកគេបានប្រាប់ឲ្យនរណាម្នាក់ចេញលទ្ធផល ថា ៦៨ ទល់នឹង ៥៥ អាសនៈ ហើយពួកគេបញ្ជាឲ្យនរណាម្នាក់ប្រាប់ទៅ គ.ជ.ប ឲ្យប្រកាសតាមលទ្ធផលនេះ»។ លោកបន្ថែមថា ជាង ៧០ ភាគរយនៃកងកម្លាំងប្រដាប់អាវុធនិងមន្រ្តីរាជការ គឺបោះឆ្នោតឲ្យគណបក្សប្រឆាំង។
លោក សម រង្ស៊ី ក៏បានយកការឈឺចាប់នេះលើកឡើងអំពីការអះអាងដដែលៗរបស់ លោកនាយករដ្ឋមន្រ្តី ហ៊ុន សែន និងមន្រ្តីរដ្ឋាភិបាលកំពូលដទៃៗទៀត ដោយបានថ្លែងថា ប្រសិនបើគណបក្សធ្វើពហិការ រដ្ឋាភិបាលនឹងចាត់ទុកតាមច្បាប់ថា អាសនៈគណបក្សប្រឆាំងត្រូវបានបោះបង់ចោល ហើយនឹងបែងចែកឡើងវិញ។ នៅក្នុងសុន្ទរកថាកាលពីថ្ងៃសុក្រ លោក ហ៊ុន សែន បានថ្លែងលើកឡើងអំពីទិដ្ឋភាពច្បាប់ និងក៏ព្រមានថា ការធ្វើពហិការជា «ការធ្វើផ្ទុយពីព្រះមហាក្សត្រ»។
លោក សម រង្ស៊ី បានតបវិញថា តាមពិតព្រះមហាក្សត្រមិនយល់ព្រមនឹងសភាមួយដែលសមាជិកជាច្រើនបានធ្វើពិហការនោះទេ។
លោកថ្លែងថា៖ «កុំនិយាយកុហក។ គ្មាននរណាម្នាក់ជឿទេ»។ «ព្រះមហាក្សត្រ គឺជាព្រះមហាក្សត្រខ្មែរ ហើយបើព្រះអង្គប្រថាប់ត្រា [លើសភា] ព្រះអង្គនឹងជាព្រះមហាក្សត្ររបស់គណបក្ស»។
លោក សុន ឆ័យ ប្រាប់ភ្នំពេញ ប៉ុស្តិ៍ ថា បើទោះមានការគំរាមពីលោកនាយករដ្ឋមន្រ្តី ហ៊ុន សែន វាមិនទំនងជាគណបក្សនោះនឹងយកអាសនៈរបស់បក្សសង្គ្រោះជាតិ ហើយឲ្យព្រះមហាក្សត្រផ្តល់សច្ចាប័ននោះទេ។ លោកបន្តថា៖ «វាគ្រាន់តែជាការគំរាម។ អ្នកឯងមិនអាចមានសភាមានសមាសភាពតែគណបក្សប្រជាជនទេ។ មិនអាចទៅរួចទេ កុំស្រមៃថា សភាកម្ពុជាមានអាសនៈ ១២៣ សុទ្ធតែសមាជិកគណបក្សប្រជាជន វាមិនអាចទៅរួចទេ»។
បើទោះជាការជួបជុំនេះមិនដល់មួយម៉ោងក៏ដោយ ក៏ក្រុមអ្នកគាំទ្ររាប់ពាន់នាក់បានស្រែកពេញសួនសេរីភាព និងតាមដងផ្លូវក្រោមការដឹកនាំរបស់លោក សម រង្ស៊ី និងលោក កឹម សុខា ដោយស្រែកថា «ប្តូរ» និង «ឈ្នះ»។
ក្រុមអ្នកគាំទ្រ នៅក្នុងលក្ខណសន្តិវិធីនិងរីករាយ តែភាគច្រើនហាក់ត្រៀមខ្លួនជាស្រេចក្នុងការចេញតវ៉ានៅតាមផ្លូវបើសិនលោក សម រង្ស៊ី ឲ្យសញ្ញា។
អ្នកស្រី មាស ចាន់ថាវី អាយុ ៦០ ឆ្នាំ ដែលមកពី តាខ្មៅ ដើម្បីចូលរួមការជួបជុំនេះថ្លែងថា៖ «គណបក្សប្រជាជនកម្ពុជា គឺជាចោរលួចនិងប្លន់។ ពួកគេមិនត្រឹមតែលួចពីខ្ញុំទេ ប៉ុន្តែបានលួចពីប្រជាជនជាច្រើន។ ខ្ញុំមិនបារម្ភ [អំពីការគំរាមរបស់លោក ហ៊ុន សែន ដែលថា នឹងមានភាពអស្ថិរភាព] ទេ ពីព្រោះ ខ្ញុំមានបទពិសោធពីឆ្នាំ ១៩៩៨។ ខ្ញុំនឹងមកហើយធ្វើបាតុកម្ម បើសិនចាំបាច់ខ្ញុំត្រូវមក ខ្ញុំមិនខ្លាចនោះទេ»។
រដ្ឋាភិបាលបានរិះគន់ការអះអាងរបស់លោក សម រង្ស៊ី ដោយកត់សម្គាល់ថា គណបក្សនេះបានប្រកាសអំពីចេតនាមិនគោរពលទ្ធផលតាំងពីមុនការបោះឆ្នោត។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានថ្លែងថា៖ «មិនថាលទ្ធផលយ៉ាងម៉េចទេ ពួកគេនឹងមិនគោរពឡើយ»។ លោកសង្កត់ធ្ងន់ថា ការចូលរួមរបស់អង្គការសហប្រជាជាតិគឺជាការបំពានលើគោលនយោបាយផ្ទាល់របស់ គ.ជ.ប។
លោកបន្តថា៖ «វាធ្វើឡើងដោយចំហនិងតម្លាភាពណាស់កាលពេលពិនិត្យសន្លឹកឆ្នោត លោក សម រង្ស៊ី ក៏នៅទីនោះ អង្គការខុម ហ្វ្រែល ក៏នៅទីនោះ ពួកគេមិនបានរកឃើញកំហុសណាមួយទេ»៕
No comments:
Post a Comment
yes