អ្នកគាំទ្រគណបក្សសង្គ្រោះជាតិ នៅក្នុងពិធីជួបជុំមួយ
នៅទីលានប្រជាធិបតេយ្យកាលពីថ្ងៃចន្ទ
មន្រ្តីជាន់ខ្ពស់រដ្ឋាភិបាលបានធ្វើការព្រមាន កាលពីម្សិលមិញថា រដ្ឋាភិបាលនឹងមិនអត់ឱនឲ្យមេដឹកនាំគណបក្សប្រឆាំងឡើយ ក្នុងករណីដែលពួកគេដឹកនាំធ្វើមហាបាតុកម្មក្នុងបំណងផ្តួលរលំរដ្ឋាភិបាល។
ការព្រមាននេះ បានធ្វើឡើងបន្ទាប់ពីគណបក្សសង្គ្រោះជាតិ បានប្រកាសកាលពីថ្ងៃចន្ទថា ខ្លួននឹងធ្វើមហាបាតុកម្មនៅទូទាំងប្រទេសប្រសិនបើគណបក្សប្រជាជន មិនព្រមសហការ ដើម្បីបង្កើតគណៈកម្មការឯករាជ្យមួយដើម្បីធ្វើការស៊ើបអង្កេតទៅលើភាពមិនប្រក្រតីនៃលទ្ធផលបោះឆ្នោតបឋមដែលគណបក្សនេះនិយាយថា មានការលួចបន្លំជាទូទៅទេនោះ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ ភ្នំពេញ ប៉ុស្តិ៍ កាលពីម្សិលមិញថា រដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន បាននាំមកនូវសមិទ្ធផលជាច្រើន រួមទាំងស្ថិរភាព និងសន្តិភាពជូនប្រជាជន។ លោកបានលើកឡើងថា លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិ តែងតែប្រកាសថា និងជំរុញប្រជាជនធ្វើមហាបាតុកម្មដើម្បីផ្លាស់ប្តូរនៅក្នុងឆ្នាំ ២០១៣ នេះឲ្យបានជាដាច់ខាត។ លោកខៀវ សុភ័គ បានបញ្ជាក់ថា រដ្ឋាភិបាល នឹងមិនអនុញ្ញាតឲ្យអ្នកណាម្នាក់ បំផ្លាញសមិទ្ធផលទាំងអស់នេះទេ។
លោកបានថ្លែងទៀតថា៖ «ក្នុងករណីគាត់របូតមាត់ដូចលើកមុនគាត់ត្រូវតែកាត់បន្ថយ។ គ្រាន់តែធ្វើបាតុកម្មធម្មតាមិនអីទេ តែកុំធ្វើបាតុកម្មផ្តួលរលំរដ្ឋាភិបាល។ គ្មានអ្នកណាចង់មានបាតុកម្មផ្តួលរលំរដ្ឋាភិបាលទេ ព្រោះវាប៉ះពាល់ដល់ការរស់នៅរបស់មនុស្សទាំងអស់ និងប៉ះពាល់ដល់សន្តិសុខជាតិ។ យើងមិនអនុញ្ញាតឲ្យជនណាម្នាក់បំផ្លាញសមិទ្ធផលរបស់ជាតិទេ»។
លោក ខៀវ សុភ័គ បានលើកឡើងថា លោក សម រង្ស៊ី ប្រធាន និងលោក កឹម សុខា អនុប្រធានគណបក្សសង្គ្រោះជាតិ បានប្រកាសធ្វើមហាបាតុកម្មទូទាំងប្រទេសដើម្បីផ្លាស់ប្តូរក្នុងឆ្នាំ ២០១៣ នេះ។
លោក សុភ័គ បានសួរថា តើលោក សម រង្ស៊ី និងលោក កឹម សុខា ចង់ធ្វើរបៀបណា? វាមានចែងក្នុងច្បាប់ ឬអត់? លោកបញ្ជាក់ថា ក្រសួងមហាផ្ទៃ មានឯកសាររួចហើយ ទាក់ទងនឹងការប្រកាសធ្វើមហាបាតុកម្ម និងថា ឯកសារទាំងនេះ បានផ្សព្វផ្សាយទៅសាធារណជនរួចហើយ។ លោក សុភ័គ បានសួរទៀតថា៖ «តើវាមានន័យយ៉ាងម៉េច? ខ្ញុំឆ្ងល់? គាត់ចង់ធ្វើឲ្យជាតិជួបបញ្ហា ឬចង់កាន់អំណាច តាមរយៈការធ្វើបាតុកម្ម ដូចក្នុងបណ្តាប្រទេសនៅមជ្ឈិមបូព៌ា? វាមិនអាចធ្វើទៅរួចទេ។ កម្ពុជាមិនអនុញ្ញាតឡើយ»។
ប៉ុន្តែយ៉ាងណាក៏ដោយ អ្នកនាំពាក្យរូបនេះ បានបញ្ជាក់ថា ប្រសិនបើមេដឹកនាំគណបក្សសង្គ្រោះជាតិ ធ្វើមហាបាតុកម្ម ក្នុងក្របខ័ណ្ឌច្បាប់ ច្បាប់ត្រូវតែការពារពួកគេ ហើយប្រសិនបើពួកគេ ធ្វើមិនស្របច្បាប់ រដ្ឋាភិបាលត្រូវចាត់វិធានការច្បាប់លើពួកគេ។
ទោះជាយ៉ាងណា លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានហៅការថ្លែងរបស់លោក ខៀវ សុភ័គ ថាជាលេស ដើម្បីបង្ក្រាបបាតុករ ហើយចំណាត់ការនេះ គឺខុសច្បាប់។
លោកថ្លែងថា៖ «ការធ្វើបាតុកម្ម គឺដើម្បីដោះស្រាយភាពមិនប្រក្រតីកើតឡើងនៅថ្ងៃបោះឆ្នោត ហើយធានានូវសិទិ្ធ និងយុតិ្តធម៌ សម្រាប់ប្រជាជន។ពុំមានអ្នកណាម្នាក់ ប្រើពាក្យផ្តួលរលំឡើយ។ គាត់ប្រើពាក្យនេះ ជាលេសដើម្បីបង្ក្រាបលើបាតុករអហិង្សា ប៉ុន្តែនេះមិនមែនជាកំហុសគាត់ទេ»។
លោក សុខ ទូច អ្នកវិភាគនយោបាយឯករាជ្យ បានចាត់ទុកមហាបាតុកម្មរបស់គណបក្សសង្គ្រោះជាតិដើម្បីប្រឆាំងនឹងភាពមិនប្រក្រតី ក្នុងការបោះឆ្នោត ថា មិនខុសច្បាប់ទេ ដោយលោកសង្កត់ធ្ងន់ថា វាមិនត្រូវបានហៅថា ជាបាតុកម្មទម្លាក់រដ្ឋាភិបាលនោះឡើយ។
លោកសុខ ទូច បានថ្លែងថា៖«ប្រសិនបើធ្វើបាតុកម្មមុនការបោះឆ្នោត វាជាការផ្តួលរលំរដ្ឋាភិបាល។ ប៉ុន្តែបាតុកម្មក្រោយការបោះឆ្នោតដែលគ្មានយុតិ្តធម៌ វាមិនមែនជាការផ្តួលរលំទេ ដោយសារតែរដ្ឋាភិបាល ជារដ្ឋាភិបាលចាស់»។
លោកបានបន្ថែមថា អ្នកនយោបាយ ត្រូវតែអង្គុយនិងពិភាក្សាគ្នារកដំណោះស្រាយ និងថា ប្រសិនបើមេដឹកនាំគណបក្សប្រជាជន និងគណបក្សសង្គ្រោះជាតិ ពុំបានព្យាយាមពិភាក្សាគ្នាដើម្បីរកដំណោះស្រាយឲ្យបានពេញលេញទេ ប៉ុន្តែបែរជាធ្វើបាតុកម្មវាគឺជាការខុសច្បាប់។ ទាំងគណបក្សសង្គ្រោះជាតិ និងគណបក្សប្រជាជនត្រូវព្យាយាមដោះស្រាយបញ្ហា៕
No comments:
Post a Comment
yes