យុវជនគាំទ្រគណបក្សសង្គ្រោះជាតិ ស្រុកពញាឮ ខេត្តកណ្ដាល ម្នាក់បានបាត់ខ្លួននៅពេលទៅចូលរួមមហាបាតុកម្មអហិង្សាដែលដឹកនាំដោយគណបក្សសង្គ្រោះជាតិ កាលពីថ្ងៃទី១៥ កញ្ញា។
យុវជនឈ្មោះ ញ៉ែម បញ្ញា អាយុ ១៩ឆ្នាំ ជាជនរងគ្រោះរស់នៅក្នុងភូមិព្រែកតាព្រហ្ម ឃុំកំពង់អ៊ុំ ស្រុកពញាឮ ខេត្តកណ្តាល ដែលបានបាត់ខ្លួនកាលពីថ្ងៃទី១៥ កញ្ញា។ រយៈពេលពីរថ្ងៃក្រោយមក គេបានប្រទះឃើញសាកសពយុវជននោះនៅរសៀលថ្ងៃទី១៧ កញ្ញា។
លោក ញ៉ែម សារឿន អាយុ ៤៨ឆ្នាំ ដែលត្រូវជាឪពុកបង្កើតរបស់ជនរងគ្រោះបានឱ្យដឹងថា កូនរបស់គាត់ គឺជាអ្នកគាំទ្រគណបក្សសង្គ្រោះជាតិ យ៉ាងសកម្ម។ លោកបញ្ជាក់ថា សូម្បីតែសក់ក្បាលរបស់កូនគាត់ក៏កាត់ជាលេខ ៧ដែរ។ លោកបន្តទៀតថា នៅថ្ងៃ១៥ កញ្ញា កូនរបស់លោកបានបបួលមិត្តភក្តិដើម្បីទៅចូលរួមធ្វើមហាបាតុកម្មអហិង្សារបស់គណបក្សសង្គ្រោះជាតិ នៅរាជធានីភ្នំពេញ ប៉ុន្តែមិនឃើញវិលត្រឡប់ទៅផ្ទះវិញទេ។ រហូតនៅរសៀលថ្ងៃ១៧ កញ្ញា ទើបលោកទទួលដំណឹងថា កូនរបស់លោកស្លាប់ដោយឃាតកយកមកទុកចោលនៅវាលស្រែជិតភូមិរបស់លោករស់នៅ។
លោកក៏បានឱ្យដឹងដែរថា លោកមិនអាចសន្និដ្ឋានថា វាជារឿងនយោបាយទេ ប៉ុន្តែកន្លងមកកូនប្រុសនិងក្រុមគ្រួសារលោកមិនដែលមានទំនាស់ជាមួយអ្នកណាទេ៖ «ខ្ញុំអត់ទាន់ឆ្លើយប្រាប់ប្អូនពីបញ្ហាទាក់ទងនឹងឃាតកម្មនេះថាទាក់ទងនឹងរឿងនយោបាយទេ តែទីមួយ ខ្ញុំប្រាប់ត្រង់ថា កូនរបស់ខ្ញុំជាអ្នកបម្រើសកម្មជន អ្នកគាំទ្រគណបក្សសង្គ្រោះជាតិតាំងពីដើមរហូត ហើយបញ្ហាផ្សេងទៀត ខ្ញុំអត់ទាន់ដឹង ចាំមើលប៉ូលិសគេធ្វើកោសលវិច័យ»។
មន្ត្រីប៉ូលិសថ្នាក់មូលដ្ឋាននៅឃុំកំពង់អ៊ុំ លោក សិដ្ឋ ក៏មិនអាចសន្និដ្ឋានបានថា ករណីឃាតកម្មនេះវាជារឿងនយោបាយ ឬក៏ជារឿងផ្ទាល់ខ្លួននោះទេ។ ករណីនេះ ក៏លោកមិនបានដឹងបា្រកដថា កើតនៅឯណាដែរ ប៉ុន្តែគ្រាន់តែប្រទះឃើញសាកសពក្នុងទឹកនៅវាលស្រែក្បែរភូមិជនរងគ្រោះរស់នៅ។
ជនរងគ្រោះត្រូវបានជនមិនស្គាល់មុខវាយនឹងដំបង និងកាប់ជាច្រើនពូថៅ។ មកដល់ពេលនេះ គ្រួសារសពរៀបចំធ្វើបុណ្យតាមប្រពៃណីរួចហើយដែរ ប៉ុន្តែគ្រួសារសពនៅតែសូមឱ្យសមត្ថកិច្ចជួយស្វែងរកយុត្តិធម៌ឱ្យកូនរបស់គាត់៕
No comments:
Post a Comment
yes