(លោក សុខ សំអឿន ភរិយា និងកូនស្រី)
(លោក ប៊ន សំណាង)
លោក ប៊ន សំណាង និង លោក សុខ សំអឿន ដែលធ្លាប់ជាប់ចោទក្នុងករណីឃាតកម្មលើមេដឹកនាំសហជីព លោកជា វិជ្ជា កាលពីឆ្នាំ២០០៤ នៅម៉ោងជាង១១ព្រឹកថ្ងៃព្រហស្បតិ៍នេះ ត្រូវបានដោះលែងឲ្យមានសេរីភាពវិញហើយ បន្ទាប់ពីជាប់ពន្ធនាគារជាង៥ឆ្នាំ។
ក្រុមគ្រួសារ ភរិយា និងកូន បានទៅទទួលអ្នកទាំងពីរនៅពន្ធនាគារព្រៃស ដោយមានការឃ្លាំមើលពីអង្គការសិទ្ធិមនុស្ស។លោក ប៊ន សំណាង និង លោក សុខ សំអឿន បានសម្តែងភាពរីករាយសប្បាយចិត្តពេលបានរួចពីពន្ធនាគារ និងជួបជុំគ្រួសារ។ តែនៅពេលអ្នកសារព័ត៌មានសាកសួរទាក់ទងនឹងការចាប់អ្នកទាំងពីរ ដាក់ពន្ធនាគារដោយពុំមានទោសកំហុស អ្នកទាំងពីរ ចាប់ផ្តើមអួលដើមកនិយាយមិនចង់ចេញ។
លោក ប៊ន សំណាង មានប្រសាសន៍ថា លោក មិនមានគម្រោងប្តឹងទាមទារសងជំងឺចិត្តលើករណីនេះទេ តែលោក សុខ សំអឿន បដិសេធអត្ថាធិប្បាយលើបញ្ហានេះ។
តុលាការកំពូល កាលពីថ្ងៃពុធ បានទម្លាក់បទចោទទាំងស្រុង លើជនជាប់ចោទ ប៊ន សំណាង និងសុខ សំអឿន។ប្រធានចៅក្រមក្នុងអង្គជំនុំជម្រះ តុលាការកំពូល លោក ឃឹម ប៉ុណ្ណ ប្រកាលសាលដីកា នៅថ្ងៃទី២៥ខែកញ្ញានេះថា តាមការពិនិត្យលើភស្តុតាងដាក់បន្ទុក លើជនជាប់ចោទ និងសាក្សីឃើញហេតុការណ៍ បង្ហាញថា ជនជាប់ចោទ ប៊ន សំណាង និងសុខ សំអឿន ពិតជាមិនប្រព្រឹត្តិដូចការចោទប្រកាន់ទេ ដូចនេះ តុលាការសម្រេចឲ្យបុរសទាំងពីរមានសេរីភាពវិញ។ តែបុរសទាំងពីរ មិនត្រូវទទួលបានអត្ថប្រយោជន៍ផ្សេងៗនាពេលឃុំខ្លួនទេ ។
លោក ជា វិជ្ជា ត្រូវឃាតករបាញ់សម្លាប់នៅមុខតូបលក់កាសែត ជិតវត្តល័ង្កការ រាជធានីភ្នំពេញ កាលពីឆ្នាំ២០០៤។ មួយសប្តាហ៍ក្រោយ ប៊ន សំណាង និងសុខ សំអឿន ត្រូវបានចាប់ខ្លួននិងសាលាដំបូងរាជធានីភ្នំពេញ កាត់ទោសដាក់ពន្ធនាគារម្នាក់ៗ២០ឆ្នាំ ចោទពីបទ ឃាតកម្មគិតទុកមុន និងប្រើអាវុធខុសច្បាប់។ ប៉ុន្តែនៅឆ្នាំ២០០៨ តុលាការកំពូល បានបង្គាប់ឲ្យសាលាឧទ្ធរណ៏ បើកការស៊ើបអង្កេតឡើងវិញ និងឲ្យជនជាប់នៅក្រៅឃុំបណ្តោះអាសន្ន ខណៈអតីតស្នងការនគរបាលរាជធានីភ្នំពេញ លោក ហេង ពៅ ដែលកំពុងជាប់ពន្ធនាគារដែរនោះ អះអាងថា អ្វីដែលខ្លួនបានប្រឌិតភស្តុតាងដើម្បីចាប់ខ្លួនបុរសទាំងពីរនាក់ នោះ គឺធ្វើតាមបញ្ជារបស់អតីតអគ្គស្នងការនគរបាលជាតិ លោក ហុក ឡង់ឌី។
ប៉ុន្តែជនជាប់ចោទត្រូវបាន សាលាឧទ្ធរណ៍ចាប់ដាក់ពន្ធនាគារឡើងវិញនៅចុងឆ្នាំ២០១២ ដោយរក្សាការផ្តន្ទាដូចមុនដដែល បើទោះជាមិនមានភស្តុតាងបន្ថែម។
មេធាវីការពារ ជនជាប់ចោទ លោក ហុង គឹមសួន បានចាត់ទុកថា ការសម្រេចរបស់តុលាការកំពូលនៅថ្ងៃនេះ បង្ហាញថា ការឃុំខ្លួនកូនក្តីលោកកន្លងមក របស់តុលាការជាន់ទាបជាទង្វើខុសច្បាប់ ហើយលោកកំពុងពិចារណាជាមួយកូនក្តី ដើម្បីប្តឹងទារសំណង ៖ "តុលាការកំពូលកាត់ទោសនៅថ្ងៃនេះ គឺយកអង្គហេតុ និងអង្គច្បាប់មកពិចារណា ឃើញថា ការឃុំការចោទការប្រកាន់ទាំងអស់ នៃពួកមន្ត្រីថ្នាក់ក្រោម គឺធ្វើខុសនឹងច្បាប់"៕
No comments:
Post a Comment
yes