ការដោះស្រាយបណ្តឹងរបស់គណបក្សសង្គ្រោះជាតិនៅក្រុមប្រឹក្សាធម្មនុញ្ញគឺគ្រាន់តែជាការធ្វើឡើងបង្គ្រប់កិច្ចតែប៉ុណ្ណោះ

លោក អេង ឆៃអ៊ាង នៅពេលឡើងការពារបណ្តឹង

ការដោះស្រាយបណ្តឹងរបស់គណបក្សសង្គ្រោះជាតិ ដែលបានដាក់ប្តឹងនៅ គជប ហើយត្រូវ​បានក្រុមប្រឹក្សាធម្មនុញ្ញ យកទៅដោះស្រាយនោះគណបក្សសង្គ្រោះជាតិ មើលឃើញថា​ជា​ការ​ធ្វើឡើងដើម្បីបង្គ្រប់កិច្ចតែប៉ុណ្ណោះ ព្រោះពុំមានដំណោះស្រាយណាមួយជាផលវិជ្ជា​មាន​ដល់គណបក្សសង្គ្រោះជាតិឡើយ ហើយដែលក្រុមប្រឹក្សាធម្មនុញ្ញកំពុងតែធ្វើការវិនិច្ឆ័យនេះ គឺផ្ទុយស្រឡះពីឆន្ទៈរបស់ពលរដ្ឋយ៉ាងធ្ងន់ធ្ងរបំផុត ។

ជាមួយគ្នានោះ លោក អេង ឆៃអ៊ាង ប្រធានក្រុមការងារគណបក្សសង្គ្រោះជាតិ ខេត្តកណ្តាល ដែលបានឡើងការពារបណ្តឹងរបស់ខ្លួននៅក្រុមប្រឹក្សាធម្មនុញ្ញ បានលើកឡើងថា បណ្តឹង​របស់​គណបក្សសង្គ្រោះជាតិមួយចំនួន គជប គឺមិនចាំបាច់បញ្ជូលមកក្រុមប្រឹក្សាធម្មនុញ្ញ ដើម្បី​ដោះស្រាយទេ គឺអាចធ្វើការដោះស្រាយនៅ គជប បាន តែ គជប ពុំមានឆន្ទៈក្នុងការ ដោះ​ស្រាយបណ្តឹងរបស់គណបក្សសង្គ្រោះជាតិឡើយ ហើយជានិច្ចជាកាល គជប តែងតែព្យា យាមធ្វើការច្រានចោលបណ្តឹងរបស់គណបក្សសង្គ្រោះជាតិ ។

លោក អេង ឆៃអ៊ាង បន្តថាក្នុងនោះផងដែរ ដូចជានៅខេត្តកណ្តាល សន្លឹតឆ្នោតដែលមាន ភាព​លំអៀង គជប រកឃើញមានចំនួនតិចរតួចបំផុត ដែលមិនស៊ីសង្វាក់គ្នាទាល់តែសោះ ទៅនិងអ្វីដែលបានកើតឡើង ហើយក្នុងនោះទៀត ក្រុមប្រឹក្សាធម្មនុញ្ញដែល​បានយក​បណ្តឹង​របស់គណបក្សសង្គ្រោះជាតិ មកធ្វើការដោះស្រាយ មិនថាខេត្តកណ្តាល​ ឬខេត្តផ្សេងៗ​ទៀត​នោះទេ គឺការដោះស្រាយក៏មិ​ន​​បានផ្តល់យុត្តិធម៌ដល់គណបក្សសង្គ្រោះជាតិផងដែរ ហើយអ្វី​ដែលក្រុមប្រឹក្សាធម្មនុញ្ញ ធ្វើនេះ គឺគ្រាន់តែជាការបង្គ្រប់កិច្ច និងជាការល្អមើលតែប៉ុណ្ណោះ ។ 

គួរជំរាបជូនថា គណបក្សសង្គ្រោះជាតិ និងបន្តស្វែងរកយុត្តិធម៌ជូនប្រជាពលរដ្ឋដែលជាម្ចាស់ ឆ្នោតជាបន្តបន្ទាប់ទៀត រហូតទទួលបានជោគជ័យ ហើយក្នុងនោះការដោះស្រាយបណ្តឹង​របស់គណបក្សសង្គ្រោះជាតិ នៅក្រុមប្រឹក្សាធម្មនុញ្ញ គណបក្សសង្គ្រោះជាតិ ក៏បានដឹងរួចជា ស្រេចហើយថា វាមិនផលវិជ្ជមានណាមួយដល់គណបក្សសង្គ្រោះជាតិ និងស្របទៅតាមឆន្ទៈ របស់ពលរដ្ឋឡើយ ។

ហេតុដូចនេះ​ហើយ ទើបបានជាគណបក្សសង្គ្រោះជាតិ ធ្វើការទាមទារឲ្យមានការបង្កើត​គណកម្មការឯករាជ្យ ដើម្បីធ្វើការស្រាវជ្រាវចំពោះភាពមិនប្រក្រតី​នៃការបោះឆ្នោត​កាលពី​ថ្ងៃទី២៨ សីហា កន្លងមកនេះ ដើម្បីផ្តល់យុត្តិធម៌ពិតប្រាកដជូនពលរដ្ឋដែលជាម្ចាស់ឆ្នោត ម្ចាស់អំណាចពិតនោះ ៕