ការប្រជុំសភាលើកដំបូងដោយគ្មានវត្តមានបេក្ខជនជាប់ឆ្នោតរបស់គណបក្សសង្គ្រោះជាតិគឺជាការរំលោភរដ្ឋធម្មនុញ្ញ

នៅព្រឹកថ្ងៃទី២៣ កញ្ញា ព្រះបាទ បរមនាថ នរោត្តម សីហមុនី ព្រះមហាក្សត្រ នៃព្រះរាជាណា​ចក្រ​កម្ពុជា បានយាងជាព្រះរាជាធិបតី ក្នុងការបើកសម័យប្រជុំសភាលើកដំបូង បើ​ទោះបីជា​ មានការ ស្នើដោយទទួចពីសំណាក់គណបក្សសង្គ្រោះជាតិ ប្រជាពលរដ្ឋ ព្រះសង្ឃ និងសង្គម​ស៊ីវិល សូមឲ្យ ព្រះអង្គពន្យាពេលយាងបើកសម័យប្រជុំសភា លើកដំបូងថ្ងៃទី២៣ កញ្ញាក្តី ដោយពួក គាត់យល់ ឃើញថា ដំណោះស្រាយនយោបាយ វិបត្តិជាតិ មិនទាន់ត្រូវបាន គណ​បក្សជាប់ឆ្នោតទាំង ពីរធ្វើការ ដោះស្រាយឲ្យមានភាពប្រសើរនៅឡើយទេ ។

ជាមួយគ្នានេះការបើកសម័យប្រជុំសភាលើកដំបូង សម្រាប់នីតិកាលទី៥នេះ គឺមានតែវត្តមាន​បេក្ខ​ជនជាប់ឆ្នោតរបស់គណបក្សប្រជាជន ចំនួន៦៨រូបតែប៉ុណ្ណោះ ដោយពុំមានវត្តមាន​បេក្ខ​ជន​ជាប់ ឆ្នោតរបស់គណបក្សសង្គ្រោះជាតិចូលរួមឡើយ ។

សូមជំរាបជួនផងដែរថា នៅបន្ទាប់ពីសម័យប្រជុំសភា លើកដំបូង នីតិកាលទី៥ ចាប់ដំណើរ​ការ ក្រោមព្រះរាជធិបតី របស់ព្រះករុណា ព្រះបាទបរមនាថ នរោត្តម សីហមុនី ព្រះមហា​ក្សត្រ នៃព្រះ រាជាណាចក្រកម្ពុជា គណបក្សសង្គ្រោះជាតិ ក៏បានចេញសេចក្តី​ថ្លែង​ការណ៏ ភ្លាមៗ ដោយចាត់ ទុក ថា ការបើកសម័យប្រជុំសភាលើកដំបូងនេះ គឺជាការរំលោភរដ្ឋធម្មនុញ្ញ នៃព្រះរាជាណាចក្រកម្ពុជា ព្រោះសភានោះគឺជាសភាឯកបក្សដែលមានតែបេក្ខជនជាប់ឆ្នោត របស់គណបក្សប្រជាជន ចំនួន៦៨រូបប៉ុណ្ណោះចូលរួម ។

ជាមួយគ្នានោះផងដែរ នៅក្នុងសេចក្តីថ្លែងការណ៏របស់គណបក្សសង្គ្រោះជាតិ ក៏បានលើក​យក មាត្រាមួយចំនួនរបស់រដ្ឋធម្មនុញ្ញ មកធ្វើជាដឹកតាងបញ្ជាក់បង្ហាញថា ៖

  

មាត្រា១ នៃរដ្ឋធម្មនុញ្ញ ចែងថា « ប្រទេសកម្ពុជា ជាព្រះរាជាណាចក្រដែល​ព្រះមហាក្សត្រ​ទ្រង់​ប្រតិបត្តិ តាមរដ្ឋធម្មនុញ្ញ និងតាមលទ្ធិប្រជាធិបតេយ្យ សេរី ពហុបក្ស »….

មាត្រា៥១ថ្មី ចែងថា « ព្រះរាជាណាចក្រកម្ពុជា អនុវត្តនយោបាយ ប្រជាធិបតេយ្យ សេរី ពហុបក្ស»….

មាត្រា៧៦ ចែងថា « រដ្ឋសភា មានសមាជិកតំណាងរាស្រ្តយ៉ាងតិច១២០រូប»…..

មាត្រា៨ ដែលចែងថា « ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរភាព ជាតិ »… និង

មាត្រា៩ ដែលចែងថា « ព្រះមហាក្សត្រ ទ្រង់មានតួនាទីខ្ពង់ខ្ពស់ ជាអាជ្ញាកណ្តាលដើម្បីធានា ការប្រព្រឹត្តិទៅនៃអំណាចសាធារណៈឲ្យមានភាពទៀតទាត់ ។

ដូច្នេះសភាដែលកើតឡើងនៅថ្ងៃទី២៣ កញ្ញា គឺជាសភាឯកបក្ស មិនមែនតំណាងឲ្យប្រជា​ជាតិខ្មែរទាំងមូលទេ ព្រោះបានផ្ទុយទាំងស្រុងទៅនិងគោលការណ៏ប្រជាធិបតេយ្យ សេរី ពហុបក្ស ហើយគណបក្សសង្គ្រោះជាតិ និងនៅតែបន្តការទាមទារយុត្តិធម៌ជូនប្រជាពលរដ្ឋខ្មែរ ដែលជាម្ចាស់ឆ្នោតឲ្យបានជាដាច់ខាត គឺមិនឲ្យគណបក្សប្រជាជន ធ្វើអ្វីៗស្រេចតែចិត្តឡើយ ៕